Tongo nda ti aye 17

Iri ti Abram aga Abraham

1Abram ayeke na ngu balegumbaya na gumbaya si KOTA GBIA asi na lo; lo tene na lo: “Mbi yeke Nzapa so ngangu ti mbi ahon angangu kue. Tambula na lege so mbi ye; mo sara aye ti mo kue gi na legeni. 2Mbi ye ti leke *mbuki na popo ti mbi na mo; mbi yeke sara titene *ahale ti mo awu ahon ndoni.” 3Abram ati, lo kpo li ti lo na sese. Nzapa atene tënë na lo, atene: 4“Ti mbi, mbuki so mbi leke ndali ti mbi na mo ayeke so: fade mo yeke ga babâ ti azo ti amara mingi mingi. 5 Fade azo ayeke kiri ti iri mo Abram pepe, me ala yeke iri mo Abraham, ngbanga ti so mbi yeke sara titene mo ga babâ ti azo ti amara mingi mingi. 6Mbi yeke sara titene mo du amolenge gbani gbani. Mbi yeke sara titene mo du azo ti amara nde nde si ambeni hale ti mo ayeke ga ande agbia. 7 Mbi yeke sara titene mbuki so ayeke na popo ti mbi na mo so angba ngbii asi na amolenge ti mo nga na ahale ti mo, na lege ti molongo ti dungo ti ala oko oko. Mbuki ni ayeke ngba kpu na kpu si na lege ni, mbi yeke duti Nzapa ti mo nga na Nzapa ti ahale ti mo so ayeke ga na peko ti mo. 8 Fade mbi yeke mu ndo so kue mo hon daa, so ti tene kodro ti Kanaan, ti mu ni biani biani na mo, na ahale ti mo. Mbi yeke duti Nzapa ti ala.”

9Nzapa akiri atene na Abraham: “Bata tënë ti mbuki ti mbi so; mo na ahale ti mo so ayeke ga ande na peko ti mo, na lege ti molongo ti dungo ala oko oko. 10 Baa, lege so ala yeke bata tënë ti mbuki so ayeke na popo ti mbi na mo nga na ahale ti mo so ayeke ga na peko ti mo ayeke tongaso: alingbi a fâ akoli so kue ayeke na popo ti ala na *ganza. 11Ganza ni ayeke mbeni ye so ayeke fa tënë ti mbuki so ayeke na popo ti mbi na ala. 12Fade a yeke fâ amolenge ti ala ti koli kue na ganza lango miombe na peko ti dungo ala. Ala sara tongaso na lege ti molongo ti dungo azo ni oko oko kue. Angbaa ti ala so a du ala na da ti ala, na ala so a vo ala vongo na nginza si ala yeke azo ti mara ti ala pepe so, alingbi a fâ nga ala na ganza. 13Ngbaa so a du lo na da ti ala, na lo so a vo lo vongo na nginza, alingbi a fâ ala na ganza. Tongaso si nzoroko ti mbuki ti mbi ayeke ngba na tere ti ala; mbuki so ayeke ngba kpu na kpu. 14Koli so afâ ganza pepe, fade a yeke tumba lo na popo ti amba ti lo, ngbanga ti so lo buba tënë ti mbuki ti mbi awe.”

15Na pekoni, Nzapa atene na Abraham: “Fade mo kiri mo iri wali ti mo Sarai na iri ti Sarai pepe. Ti fadeso, iri ti lo ayeke Sara. 16Mbi yeke sara tufa na ndö ti lo. Mbi yeke sara titene lo du molenge-koli na mo. Mbi yeke sara tufa na ndö ti lo. Lo yeke ga tara ti azo ti amara nde nde. Ambeni hale ti lo ayeke ga ande agbia ti amara nde nde.” 17Abraham ati, akpo li ti lo na sese si lo he ngia. Lo tene na be ti lo, lo tene: “Koli so ayeke na ngu ngbangbo oko alingbi ti du molenge? Sara so ayeke na ngu balegumbaya so alingbi ti du molenge?” 18Na pekoni, lo tene na Nzapa, lo tene: “Ye so mbi hunda ti mbi ayeke titene Ismael angba na fini na dawa ti mo!” 19Nzapa atene na lo: “Tënë ni laa pepe! Fade wali ti mo Sara ayeke du na mo mbeni molenge-koli. Mo yeke di iri ti molenge ni Isaac. Mbi yeke leke mbuki ti mbi na lo; mbuki ni ayeke ngba kpu na kpu ndali ti ahale ti lo na peko ti lo. 20Ti Ismael, mbi ma tënë ti mo awe. Baa, mbi yeke sara tufa na ndö ti lo; mbi yeke sara titene lo du amolenge, ala wu ahon ndoni. Lo yeke ga babâ ti amakonzi baleoko na use si mbeni kota mara ayeke baa gigi na lege ti lo. 21Me mbuki ti mbi, mbi yeke leke ni na Isaac, molenge so Sara ayeke du lo na mo na ngu ti peko, gi na mara ti ngoi so e yeke daa so.”

22So Nzapa atene tënë na Abraham awe, lo londo na tere ti Abraham si lo hon. 23Abraham amu molenge ti lo Ismael, na angbaa so kue a du ala na da ti lo, na ala so kue lo vo ala vongo na nginza, so ti tene akoli so kue ayeke na da ti lo, lo fâ ala na ganza gi na lango ni so Nzapa atene tënë na lo so. 24Abraham ayeke na ngu balegumbaya na gumbaya si a fâ lo na ganza. 25Ismael ayeke na ngu baleoko na ota si a fâ lo na ganza. 26Abraham na molenge ti lo Ismael afâ ganza gi na ya ti lango oko. 27Azo ti da ti lo, na angbaa so a du ala na da ti lo, na ala so lo vo ala vongo na nginza, ala na lo kue afâ ganza legeoko.

Currently Selected:

Tongo nda ti aye 17: MNF2010

Highlight

Copy