Tongo nda ti aye 26

Isaac ague na ndo ti Abimelek

1 Mbeni kota nzara ati na ya ti kodro ni. Kota nzara ni so ayeke nde na ti so ati na ngoi ti Abraham. Isaac ague na kodro ti Gerar, na ndo ti Abimelek, gbia ti azo ti Filistii. 2 KOTA GBIA asi na Isaac si atene na lo: “Mo gue na Ezipte pepe; me mo ngba na kodro so fade mbi yeke fa na mo. 3Mo duti na kodro ni; mbi yeke ande na mo si mbi yeke sara tufa na ndö ti mo, ngbanga ti so mbi yeke mu asese so kue na mo na *ahale ti mo. Mbi yeke sara ye alingbi na tënë ti yanga ti mbi so mbi deba na babâ ti mo Abraham so. 4 Mbi yeke sara titene ahale ti mo awu mingi tongana atongoro ti le ti nduzu; mbi yeke mu asese so kue na ala. Fade a yeke sara tufa na ndö ti amara ti ndö ti sese kue na lege ti ahale ti mo. 5Mbi yeke sara ye so kue, ngbanga ti so Abraham ama yanga ti mbi, lo sara ye so mbi hunda na lo, lo sara ye alingbi na atënë ti yanga ti mbi, ambela ti mbi na andia ti mbi.”

6Tongaso Isaac aduti na Gerar. 7 Azo ti ndo ni ahunda lo na ndö ti tënë ti wali ti lo. Lo kiri tënë, lo tene: “So ita ti mbi ti wali laa.” Lo sara mbeto ti tene na azo ni atene, Rébecca ayeke wali ti lo, ngbanga ti so lo yeke na mbeto titene azo ni afâ lo ndali ti Rébecca ayeke pendere wali mingi.

8Isaac aduti kâ aninga awe. Mbeni lâ, Abimelek, gbia ti kodro ti Filistii abaa ndo na fenetere si lo baa Isaac so ayeke sara ngia na wali ti lo Rébecca. 9Abimelek airi Isaac si atene na lo: “Andaa wali ti mo fade laa! Ngbanga ti nyen si mo tene, lo yeke ita ti mo ti wali so?” Isaac akiri tënë na lo, atene: “Mbi tene tongaso ngbanga ti so mbeto titene mbi kui ndali ti lo agbu mbi.” 10Abimelek akiri amu tënë si lo tene: “Nyen laa mo sara na e tongaso? Angba gi kete titene mbeni koli ti kodro so aduti na wali ti mo; mo ye ti sara si tënë ati na li ti e!”

11Abimelek amu yanga na azo ti kodro kue, atene: “Zo so kue ayeke ndu koli so wala wali ti lo, fade a yeke fâ lo.”

12Isaac alu kobe na kodro ni si na ngu ni so, lo wara kobe fani ngbangbo oko ahon ti so lo lu, ngbanga ti so KOTA GBIA asara tufa na ndö ti lo. 13Lo yeke na aye mingi. Aye ti lo ni angba ti wu wungo si lo ga kota zo mingi. 14Lo yeke na ataba, angasa na abagara si lo yeke na gba ti azo ti kua.

Isaac na Abimelek aga ambuki

Azo ti Filistii asara kota be na tere ti Isaac. 15Ala tuku sese, akanga na adu ti ngu so kue azo ti kua ti Abraham, babâ ti Isaac azi ni so. Azo ti kua ni azi adu ti ngu ni ando na ndembe so Abraham angba na fini. 16Abimelek atene na Isaac: “Londo na kodro ti e mo hon, ngbanga ti so mo ga ngangu mingi, mo hon e.”

17Isaac alondo na ndo so si lo hon. Lo gue, lo sara bâbâ ti lo na popo-hoto ti Gerar si lo duti kâ. 18Na ngoi ti babâ ti lo Abraham, a zi adu ti ngu. Na peko ti kuâ ti Abraham, azo ti Filistii atuku sese na ya ti adu ti ngu ni si akanga ni. Isaac akiri azi adu ni si amu na adu ti ngu ni gi a-iri so babâ ti lo azia ando na ndö ni so.

19Mbeni lâ azo ti kua ti Isaac ayeke zi mbeni du ti ngu na popo-hoto ni; kâ, ala wara ngu so ayeke sua suango. 20Awabatango-nyama ti kodro ti Gerar apapa na awabatango-nyama ti Isaac, ala tene: “Ngu so ayeke ti e.” Isaac adi iri ti du ti ngu ni Esek, ngbanga ti so awabatango-nyama apapa na lo ndali ni. 21Azo ti kua ti Isaac akiri azi mbeni du ti ngu nde; azo akiri apapa na lo ndali ni. Isaac adi iri ti du ti ngu ni Sitna. 22Lo londo na ndo so, lo gue, lo zi mbeni du ti ngu ni nde. Ti so papa alondo ndali ni pepe. Lo di iri ti du ti ngu ni Rehobot. Lo tene na be ti lo, lo tene: “Fadeso KOTA GBIA amu na e kota ndo. Aye ti e kue ayeke gue na legeni na ya ti kodro ni.”

23Isaac alondo na ndo so, lo gue na Bersheba. 24Na bi ni, KOTA GBIA asi na lo si atene na lo: “Mbi yeke Nzapa ti babâ ti mo Abraham. Mo sara mbeto pepe, ngbanga ti so mbi yeke na mo. Ndali ti Abraham, zo ti kua ti mbi, mbi yeke sara tufa na ndö ti mo si mbi yeke sara titene *ahale ti mo awu mingi. 25Na ndo so, Isaac aleke mbeni gbalaka na Nzapa si lo iri KOTA GBIA na iri ti lo ti voro lo. Kâ, lo leke da ti lo ti bongo si azo ti kua ti lo akiri azi mbeni du ti ngu.

26 Abimelek alondo na Gerar si ague ti baa Isaac. Lo na Ahuzat, wamungo-wango ti lo, na Pikol, makonzi ti aturugu ti lo laa ague. 27Isaac atene na ala: “Ala ga ti baa mbi ngbanga ti nyen? Ala ke mbi si ala tumba mbi na kodro ti ala awe!” 28Ala kiri tënë, atene: “E baa biani so KOTA GBIA ayeke na mo. Nilaa e tene na be ti e, e tene, ayeke nzoni e na mo, e deba yanga ti e na popo ti e ti ga ambuki. 29Ayeke nzoni mo deba yanga ti mo ti sara sioni na e pepe. Biani, e sara ando sioni na mo pepe, me e sara gi nzoni na mo si e zia mo, mo gue na siriri. Mo yeke fadeso zo so KOTA GBIA asara tufa na ndö ti lo.” 30Isaac aleke kobe ti matanga ndali ti ala si ala te, ala nyon. 31Na kota ndaperere so ndo angba kâ, ala londo si ala oko oko kue adeba yanga ti ala na popo ti ala. Isaac azia ala na lege si ala gue na siriri.

32Gi na lango ni so azo ti kua ti Isaac aga afa na lo peko ti tënë ti du ti ngu so ala zi so. Ala tene na lo: “E wara ngu awe.” 33Lo di iri ti du ti ngu so Shiba. Ndani laa laso azo angba ti iri gbata ni Bersheba.

Ezau amu wali

34 Ezau ayeke na ngu baleosio si lo mu Yehudit, molenge ti Beeri, zo ti mara ti Het, na Basmat, molenge ti Elon, zo ti mara ti Het, titene ala ga awali ti lo. 35Awali use so aga mbeni ye ti ziango vundu na be ti Isaac na Rébecca.

Currently Selected:

Tongo nda ti aye 26: MNF2010

Highlight

Copy