Tongo nda ti aye 31

1Jacob ama a tene, amolenge ti Laban ayeke tene: “Jacob amu aye ti babâ ti e kue si lo ga zo ti mosoro mingi gi ndali ti aye ti babâ ti e so lo mu ni so.” 2Jacob abaa le ti Laban si lo baa so sarango ye ti Laban na mbage ti lo aga nde na ti kozoni. 3 Tongaso KOTA GBIA atene na Jacob: “Mo kiri na kodro ti akotara ti mo na ti asewa ti mo; fade mbi yeke na mo.”

4Jacob atokua titene a iri Rachel na Lea ti ga na peko ti lo na ya ti ngonda, ndo so lo na anyama ti lo ayeke daa. 5Ala ga si lo tene na ala: “Mbi baa so sarango ye ti babâ ti ala na mbage ti mbi aga nde na ti kozoni. Me Nzapa ti babâ ti mbi ayeke na mbi. 6Ala wani ahinga so mbi sara kua na babâ ti ala na ngangu ti mbi kue. 7Me babâ ti ala ahanda mbi; fani baleoko, lo sanze futa so lo lingbi fade ti mu na mbi. Me Nzapa azia na lo lege pepe titene lo sara sioni na mbi. 8Na ndembe so lo tene: ‘Anyama so kue akete nzoroko ayeke na tere ti ala ayeke futa ti mo’, anyama ni kue ayeke du gi amolenge so akete nzoroko ayeke na tere ti ala. Na ndembe so lo tene: ‘Anyama so kue ayongoro nzoroko ayeke na tere ti ala ayeke futa ti mo’, anyama ni kue ayeke du gi amolenge so ayongoro nzoroko ayeke na tere ti ala. 9Nzapa azi anyama ti babâ ti ala na maboko ti lo si lo mu ala na mbi. 10Na ndembe so anyama ni ayeke bongbi koli na wali, mbi baa li ti mbi si na ya ti bango-li ni, mbi baa akoli-nyama ni ayeke bongbi na amama ni so ayongoro nzoroko, akota nzoroko na akete nzoroko ayeke na tere ti ala. 11*Ange ti Nzapa airi mbi na ya ti bango-li ni, atene: ‘Jacob.’ Mbi yeda, mbi tene: ‘Mbi laa.’ 12Lo kiri lo tene: ‘Yo le ti mo na nduzu, mo baa ye! Akoli-nyama so ayeke bongbi na amama ni so, ala kue ayeke na ayongoro nzoroko, akota nzoroko na akete nzoroko na tere ti ala, ngbanga ti so mbi baa ye so Laban asara na mo. 13 Mbi yeke Nzapa so lani na Betel mo leke mbeni têne aluti na nduzu, mo tuku mafuta na ndö ni si mo mu zendo na mbi kâ so. Fadeso, londo, mo zia kodro so, mo kiri na kodro ti asewa ti mo.’ ” 14Rachel na Lea akiri tënë na Jacob, atene: “Mbeni ye ti e angba na maboko ti babâ ti e titene e wara ni na peko ti kuâ ti lo? 15Lo baa e tongana awande si lo ka e, lo te nginza ti e kue awe pepe? 16Tongaso, amosoro so kue Nzapa azi ni na maboko ti babâ ti e so, aga ti e na ti amolenge ti e awe. Fadeso, mo sara ye so kue Nzapa atene na mo.”

17Tongaso Jacob alondo, lo mu amolenge ti lo na awali ti lo, lo zia ala na ndö ti azambala. 18Lo mu anyama ti lo kue, na amosoro so kue lo wara na sese ti Mezopotamii ti nduzu titene lo kiri na ndo ti babâ ti lo Isaac, na sese ti Kanaan. 19Laban ague ti fâ kua ti tere ti anyama ti lo. Na ndembe ni so, Rachel ague, anzi anzapa ti da ti babâ ti lo. 20Jacob ahanda Laban, zo ti kodro ti Aram. So lo ye ti kpe ti hon so, lo tene tënë ni na Laban kozoni pepe. 21Lo kpe, lo hon na aye ti lo kue; lo fâ *bale ti Efrate si lo gue na mbage ti ahoto ti Galaad.

22Na ota lango ni, azo atene na Laban atene, baa Jacob akpe awe. 23Laban alondo, lo mu azo ti da ti lo na tere ti lo si ala tumba peko ti Jacob. Ala tambula na ya ti lango mbarambara si ala wara lo na ya ti ahoto ti Galaad. 24Me Nzapa asi na Laban na ya ti bango-li na bi si atene na lo: “Mo sara hange! Tene tënë oko na Jacob pepe, ataa nzoni tënë wala sioni tënë.”

25Laban awara Jacob; andaa Jacob aleke da ti lo ti bongo na ndö ti hoto. Laban na a-ita ti lo aleke nga da ti ala ti bongo na ndö ti ahoto ti Galaad. 26Laban ahunda Jacob, atene: “Nyen laa mo sara tongaso, nyen? Mo handa mbi si mo mu amolenge ti mbi ti wali, mo hon na ala tongana azo so a gbu ala na kanga na ngoi ti bira! 27Mo kpe na hondengo ni ngbanga ti nyen? Mo handa mbi si mo tene tënë ni na mbi pepe ngbanga ti nyen? Tongana mo tene fade tënë ni na mbi, ka mbi zia mo na lege na ya ti ngia, na bia, na pikango akete ngo na akundi. 28Mo zia mbi su ngbangba ti amolenge ti mbi ti wali na a-ata ti mbi pepe. Biani mo sara ye tongana zo so li ti lo ayeke daa pepe. 29Mbi yeke na ngangu ti sara sioni na ala. Me biri na bi, Nzapa ti babâ ti mo atene na mbi: ‘Sara hange! Tene tënë oko na Jacob pepe, ataa nzoni tënë wala sioni tënë.’ 30Fadeso, mo londo, mo hon awe, ngbanga ti so be ti mo ayeke do dongo lani ti kiri na da ti babâ ti mo. Me mo nzi anzapa ti da ti mbi ngbanga ti nyen?” 31Jacob akiri tënë na Laban, atene: “Mbi sara mbeto si mbi tene na be ti mbi, mbi tene: ‘E hinga pepe, mo yeke mu amolenge ti mo ti wali na ngangu na maboko ti mbi.’ 32Me ti anzapa ti mo, zo so mo yeke wara ni na maboko ti lo, lo lingbi na kuâ! Na dawa ti a-ita ti e, mo gi ye ti mo so ayeke na mbi si mo mu ni.” Jacob ahinga ti lo fade pepe atene, Rachel anzi anzapa ti Laban.

33Laban ali na ya ti da ti bongo ti Jacob, ti Lea nga na ti azo ti kua ti wali use so, me Laban awara ye oko pepe. Lo sigigi na ya ti da ti bongo ti Lea si lo gue, lo li na ya ti da ti bongo ti Rachel. 34Andaa Rachel amu fade anzapa ni, lo honde ala na ya ti du ti mbata ti dutingo na ndö ti zambala si lo duti na ndö ni. Laban agi ya ti da ti bongo ni kue, me lo wara ye oko pepe. 35Rachel atene na babâ ti lo: “Babâ, tongana mo baa mbi londo pepe, ayeke nzoni mo sara ngonzo pepe, ngbanga ti so ye so ayeke si ka na awali kue so, ni laa asi na mbi so.”

Laban agi ndo gbaa, lo wara anzapa ni pepe. 36Ngonzo agbu Jacob si lo suku na Laban, lo tene: “Sioni ti nyen laa mbi sara? Mbi sara ye so ake ndia si mo yeke gi peko ti mbi tongaso so? 37So mo gi ya ti akungba ti mbi kue so, mo wara mbeni kungba ti da ti mo oko daa? Fa ni na le ti a-ita ti mbi nga na le ti a-ita ti mo titene ala fâ ya ti ngbanga ni na popo ti mbi na mo! 38Mbi sara ngu baleuse na ndo ti mo; ataba ti mo na angasa ti mo adu amolenge na kuâ ni laoko pepe. Mbi te akoli-taba na popo ti anyama ti mo laoko pepe. 39 Mbeni nyama ti mo so sioni nyama afâ lo, mbi ga na kuâ ti lo na mo laoko pepe. Mbi wani, mbi yeke zia mbeni nyama nde na plase ni. Anyama so azo anzi ala na kota lâ wala na bi, mo yeke hunda na mbi ti futa ala. 40Na kota lâ, mbi baa pasi ti ndo-wâ; na bi, mbi baa pasi ti de si lango akpe na le ti mbi. 41Mbi sara ngu baleuse na da ti mo; ngu baleoko na osio, mbi sara kua na mo ndali ti amolenge ti mo ti wali use so. Mbi sara kua ngu omene ti wara ataba na angasa. Me mo sanze futa ti mbi fani baleoko. 42Tongana Nzapa ti kotara ti mbi Abraham na Nzapa ti babâ ti mbi Isaac, Nzapa so asara ye ti ziango mbeto na be ti azo amu fade maboko na mbi pepe, ka mo zia mbi, mbi gue maboko senge. Me Nzapa abaa ye ti buba so mo sara na mbi nga na ngangu kua so mbi sara. Nilaa biri na bi, lo fâ ya ti tënë na popo ti mbi na mo.” 43Laban akiri tënë na Jacob, atene: “Amolenge-wali so ayeke amolenge ti mbi; amolenge so ala du so ayeke ti mbi; anyama so ayeke anyama ti mbi; aye so kue mo yeke baa so ayeke ti mbi. Me ti londo na lango ti laso, nyen laa mbi lingbi ti sara ndali ti amolenge ti mbi ti wali na amolenge so ala du so? 44Tongaso, ayeke nzoni mo ga, mbi na mo, e leke tënë ti mbuki. E sara ye so afa atene e ga ambuki awe.”

45Jacob amu mbeni têne, lo leke aluti na nduzu. 46Na pekoni, lo tene na a-ita ti lo, lo tene: “Ala ro atêne.” A-ita ti lo ni amu atêne si ala bongbi ti sara gba ni. Ala duti na ndö ti gba ti atêne so si ala te kobe. 47Laban adi iri ti ndo ni Yegar-Sahaduta. Jacob adi ti lo iri ti ndo ni Galed. 48Laban atene: “Gba ti atêne so e bongbi so afa laso atene, mbi na mo, e ga ambuki awe.” Ndani laa azo airi ndo ni so Galed. 49Ambeni zo adi nga iri ni Mispa, ngbanga ti so Laban atene na Jacob: “Ayeke nzoni KOTA GBIA abaa ndo na ndö ti mbi na mo tongana e kangbi ande si e yeke baa tere pepe. 50Tongana mo sara pasi na amolenge ti mbi ti wali si mo kiri mo mu ambeni wali nde na ndö ti amolenge ti mbi, mo sara hange, ngbanga ti so zo laa ayeke baa e pepe, me Nzapa laa ayeke baa mbi na mo.”

51Laban atene na Jacob: “Baa gba ti atêne so! Baa têne so mbi leke aluti na nduzu na popo ti mbi na mo so! 52Gba ti atêne ni na têne so ayeke luti na nduzu so ayeke baa mbi na mo. Mbi deba yanga ti mbi ti hon gba ti atêne ni ti gue na mbage ti mo ti sara sioni na mo pepe. Mo nga, mo deba yanga ti mo ti hon ni ti ga na mbage ti mbi ti sara sioni na mbi pepe. 53Ayeke nzoni Nzapa ti Abraham na Nzapa ti Nahor afâ ngbanga na popo ti mbi na mo.”

Tongaso Jacob adeba yanga ti lo na iri ti Nzapa ti Isaac, babâ ti lo, Nzapa so asara ye ti ziango mbeto na be ti azo. 54Jacob amu *sandaga na Nzapa na ndö ti hoto ni. Lo tisa a-ita ti lo ti te kobe. Na peko ti so ala te kobe awe, ala lango na ndö ti hoto ni na bi ni so.

Currently Selected:

Tongo nda ti aye 31: MNF2010

Highlight

Copy