Tongo nda ti aye 33

Jacob na Ezau awara tere

1Jacob ayo le ti lo na nduzu si lo baa Ezau so ayeke ga na akoli ngbangbo osio na tere ti lo. Jacob akangbi amolenge ni na popo ti Lea, Rachel na azo ti kua ti wali use so. 2Lo zia azo ti kua ti wali ni na amolenge ti ala ti hon ti ala kozo. Na peko ti ala ayeke Lea na amolenge ti lo si Rachel na Joseph aga ti ala na peko. 3 Jacob wani ahon kozo ti ala kue, lo kuku, lo kpo li ti lo na sese fani mbarambara kozo titene lo si nduru na tere ti ita ti lo. 4Ezau amu loro ague, awara lo; lo gbu Jacob ngangu na kate ti lo si lo su ngbangba ti lo. Ala use kue atoto. 5Na pekoni Ezau ayo le ti lo na nduzu, lo baa awali ni na amolenge ni si lo hunda ndo, lo tene: “So azo wa laa na peko ti mo so?” Jacob akiri tënë, atene: “Amolenge so Nzapa asara nzoni be na mbi si lo mu ala na mbi, zo ti gbe ti mo laa.”

6Azo ti kua ti wali aga nduru, ala na amolenge ti ala si ala kuku na sese. 7Lea na amolenge ti lo nga aga nduru si ala kuku na sese. Na pekoni, Joseph na Rachel aga nduru si ala kuku na sese. 8Ezau ahunda ndo, atene: “Mo ye fade ti sara nyen na gba ti anyama so kue mbi wara na lege so?” Jacob akiri tënë, atene: “Mbi ga na ala na mo, kota zo ti mbi titene mo baa mbi na nzoni le.” 9Ezau akiri amu tënë si lo tene: “Ita ti mbi, mbi yeke na aye alingbi na mbi awe. Bata aye ti mo ndali ti mo.” 10Jacob akiri tënë, atene: “Ên-en, mbi gbu gere ti mo! Tongana mo baa mbi na nzoni le, ayeke nzoni mo yeda ti mu kadoo so mbi mu na mo so. So mbi baa le ti mo so, ayeke tongana ti so zo abaa le ti Nzapa. Biani, mo yamba mbi nzoni mingi. 11Tongaso, ayeke nzoni mo yeda ti mu kadoo so mbi tokua na mo, ngbanga ti so Nzapa laa asara nzoni be na mbi si lo mu na mbi aye so kue alingbi na mbi.”

Lo voro Ezau ngbii si Ezau ayeda ti mu aye ni. 12Ezau atene: “E londo, e gue! Mbi na mo, e yeke gue legeoko.” 13Jacob akiri tënë na lo, atene: “Kota zo ti mbi, mo hinga so amolenge awoko mingi. Mbi yeke nga na amama ti taba na amama ti bagara so angba ti mu me na amolenge ti ala. Tongana a sara si ala tambula na ngangu gi na ya ti lango oko, fade anyama ni kue ayeke kui. 14Ayeke nzoni mo, kota zo ti mbi, mo hon ti mo kozo ti mbi, zo ti gbe ti mo. Fade anyama ti mbi na amolenge ti mbi ayeke na dawa si mbi yeke tambula yeke-yeke alingbi na tambula ti ala ngbii mbi si na ndo ti mo, kota zo ti mbi, na sese ti Seir.” 15Ezau atene: “Mbi ye ti zia ambeni zo so ayeke mu peko ti mbi so titene ala ngba na tere ti mo.” Jacob akiri tënë, atene: “Ngbanga ti nyen? Mbi ye gi titene mo, kota zo ti mbi, mo baa mbi na nzoni le, awe!”

16Gi na lango ni so, Ezau amu lege si lo kiri na Seir. 17Jacob amu lege ague na Sukot. Kâ, lo sara da ti lango ti lo si lo leke nga akpangba ndali ti anyama ti lo. Ndani laa azo adi iri ti ndo ni Sukot, so ti tene “Akpangba.”

Jacob asara kodro nduru na gbata ti Sishem

18Jacob alondo na sese ti Mezopotamii ti nduzu, lo si na nzoni tere na gbata ti Sishem so ayeke na sese ti Kanaan. Lo sara bâbâ ti lo na ndo so abaa le na gbata ni. 19 Lo vo mbeni sese na maboko ti amolenge ti Hamor, babâ ti Sishem na ale ti nginza ngbangbo oko. Lo sara da ti lo ti bongo na ndo ni so. 20Lo leke mbeni gbalaka kâ si lo di iri ni “El, Nzapa ti Israel”.

Currently Selected:

Tongo nda ti aye 33: MNF2010

Highlight

Copy