Tongo nda ti aye 44

Joseph atara be ti a-ita ti lo

1Joseph amu yanga na koli so ayeke baa lege ti aye ti da ti lo, atene: “Mu ale ti *ble, mo zia ni na ya ti asake ti azo so asi, alingbi na ngangu ti yongo kungba ti zo oko oko. Mo zia nginza ti zo oko oko na yanga ti sake ti lo. 2Mo mu kopo ti mbi so a sara na wen ti nginza so, mo bongbi ni na nginza ti vongo na kobe ti tanga ti molenge ni, mo zia ni na yanga ti sake ti lo.” Koli ni asara ye ni alingbi na tënë so Joseph atene na lo. 3Lango oko na pekoni, so ndo ahan awe, ala zia azo so ague, ala na alele ti ala. 4 So ala sigigi na ya ti gbata ni ti gue si ala de ti hon yongoro pepe, Joseph atene na koli so ayeke baa lege ti aye ti da ti lo so, atene: “Londo mo kpe na peko ti azo so. Tongana mo wara ala, mo hunda ala, mo tene: ‘Ngbanga ti nyen si ala sara sioni na zo so asara nzoni na ala so? 5Kopo so kota zo ti mbi ayeke nyon na ye si lo yeke mu ti gi na nda ti aye so ayeke na hondengo ni so, ala nzi ni ngbanga ti nyen? Ye so ala sara so ayeke sioni.’ ”

6Koli ni ague, awara ala si lo tene na ala atënë ni so. 7Ala kiri tënë na lo, atene: “Kota zo, mo tene mara ti tënë tongaso ngbanga ti nyen? E azo ti gbe ti mo, e lingbi ti sara mara ti ye tongaso laoko pepe. 8 Nginza so lani e wara ni na yanga ti asake ti e so, mo baa, e londo na ni kâ na sese ti Kanaan, e kiri na ni na mo pepe? Asara tongana nyen si e kiri ti nzi nginza wala lôro ti da ti kota zo ti mo so? 9Tongana a wara ye ni so na ya ti kungba ti mbeni zo na popo ti e, ayeke nzoni a fâ lo; ti e, fade a mu e kue, e ga angbaa ti mo!” 10Koli ni akiri tënë na ala, atene: “E yeke sara tongana ti so ala tene so. Me zo so a yeke wara ye ni na ya ti kungba ti lo, lo yeke ga ande ngbaa ti mbi. Ti atanga ni, tënë ayeke na li ti ala pepe.” 11Ala zia asake ti ala ni hio na sese si zo oko oko azi yanga ti ti lo. 12Koli ni ato nda ti gingo ya ti asake ni alondo na kozo molenge ni ngbii asi na tanga ti molenge ni. Lo wara kopo ni na ya ti sake ti Benjamin. 13Ala suru bongo na tere ti ala; zo oko oko akiri aleke akungba ti lo na ndö ti lele ti lo si ala kiri na ya ti gbata ni.

Juda amu tere ti lo ti zi Benjamin na ya ti kpale

14Juda na a-ita ti lo asi na da ti Joseph; andaa Joseph ni angba na ya ti da. Ala ti na sese na gbe ti lo. 15Joseph atene na ala, atene: “So sarango ye ti nyen laa ala sara so? Ala hinga atene zo tongana mbi so, mbi yeke gi nda ti aye so ayeke na hondengo ni pepe?” 16Juda amu tënë si lo tene: “Kota zo, tënë ti nyen laa e yeke tene na mo, nyen? Tënë ti nyen laa e lingbi ti tene, nyen? Tënë ti nyen laa e tene si e ga mbirimbiri na le ti mo? Nzapa afa sioni ti e na gigi awe. Baa, e na lo so a wara kopo ni na ya ti akungba ti lo so, e ga angbaa ti mo awe.” 17Joseph akiri tënë na ala, atene: “Sarango ye tongaso alingbi na mbi pepe. Gi zo so a wara kopo ni na maboko ti lo so laa ayeke ga ande ngbaa ti mbi. Ti ala atanga ni, ala kiri na siriri na tere ti babâ ti ala.”

18Juda ague nduru na tere ti Joseph si lo tene na lo: “Kota zo, mbi gbu gere ti mo, zia mbi, zo ti gbe ti mo, mbi tene mbeni tënë, mo ma. Zia ngonzo ti mo alondo ngangu na tere ti mbi pepe, ngbanga ti so mo yeke tongana Faraon. 19Kota zo, mo hunda ando e, azo ti gbe ti mo, mo tene: ‘Babâ ti ala wala mbeni ita ti ala ti koli ayeke daa?’ 20E kiri tënë na mo, e tene: ‘Babâ ti e ayeke daa, lo ga mbakoro awe. Lo yeke na mbeni kete molenge so lo du lo na ndembe so lo ga mbakoro awe. Mbeni ita ti molenge ni ti koli akui awe; gi lo oko na ya ti mama ti lo laa, lo ngba na fini si babâ ti lo aye lo mingi.’ 21Mo tene na e, azo ti gbe ti mo, mo tene: ‘Ala ga na lo na mbi titene mbi baa lo na le ti mbi si.’ 22E kiri tënë na mo, kota zo, e tene: ‘Molenge ni alingbi ti kangbi na babâ ti lo pepe; tongana lo kangbi na babâ ti lo, babâ ni ayeke kui.’ 23Mo tene na e, azo ti gbe ti mo, mo tene: ‘Tongana tanga ti ita ti ala ni aga na ala pepe, ala yeke kiri ti baa le ti mbi pepe.’ 24Tongana e kiri na tere ti babâ ti e, zo ti gbe ti mo, e fa na lo peko ti atënë so mo, kota zo, mo tene na e so. 25Na pekoni, babâ ti e atene na e: ‘Ala kiri ague, avo na e mbeni kobe.’ 26E kiri tënë na babâ ti e, e tene: ‘E lingbi ti gue pepe. Tongana tanga ti ita ti e ayeke na tere ti e si e yeke gue. Tongana lo yeke na tere ti e pepe, lege titene e baa le ti koli so ayeke daa pepe.’ 27Babâ ti e, zo ti gbe ti mo atene na e: ‘Ala hinga so wali ti mbi adu na mbi gi amolenge-koli use. 28Mbeni oko azia mbi ahon awe. Ti mbi, mbi hinga, mbi tene, mbeni sioni nyama asuru ya ti lo kete kete awe. Biani, mbi kiri mbi baa le ti lo pepe ngbii asi laso. 29Tongana ala kiri amu lo so na tere ti mbi ahon na lo si mbeni ye ti sioni asi na lo, fade ala yeke sara titene mbi so kua ti li ti mbi avuru kue awe so, mbi gue na mawa na be ti mbi na ndo ti akuâ.’ 30Juda akiri atene: ‘Tongana mbi kiri fadeso na tere ti babâ ti mbi, zo ti gbe ti mo si molenge ni ayeke na tere ti e pepe, so tënë ti molenge ni agbu be ti lo mingi so, 31gi na ndembe so lo yeke baa ande molenge ni na tere ti e pepe, lo yeke kui. Andaa e azo ti gbe ti mo, e yeke sara titene babâ ti e, zo ti gbe ti mo so kua ti li ti lo avuru kue awe so, lo gue na vundu na be ti lo na ndo ti akuâ. 32Mbi zo ti gbe ti mo, mbi mu yanga na le ti babâ ti mbi, mbi tene, molenge ni ayeke na maboko ti mbi. Mbi tene na lo, mbi tene: Tongana mbi kiri na molenge ni na mo pepe, ayeke nzoni tënë ti ye ti sioni so mbi sara na mo, babâ ti mbi so angba na li ti mbi kpu na kpu.’ 33Tongaso, kota zo, mbi zo ti gbe ti mo, mbi gbu gere ti mo! Zia mbi ngba ge; mbi ga ngbaa ti mo si molenge ni na a-ita ti lo ague. 34Tongana molenge ni ayeke na tere ti mbi pepe, fade mbi yeke gue na tere ti babâ ti mbi tongana nyen? Ye ti sioni so ayeke si ande na babâ ti mbi so, mbi ye ti baa ni pepe.”

Currently Selected:

Tongo nda ti aye 44: MNF2010

Highlight

Copy