Luc 6

Jésus na tënë ti lango ti wungo tere

(Matt 12.1-8; Marc 2.23-28)

1 Na mbeni *lango ti wungo tere, Jésus ayeke hon na ya ti ayaka ti *ble; adisiple ti lo afâ ambeni li ti ble ni, ala foro ni na ya ti maboko ti ala si ala yeke te. 2 Ambeni *farizien atene na ala: “Ngbanga ti nyen si ala yeke sara ye so *Ndia ake titene zo asara ni na lango ti wungo tere?” 3 Jésus akiri tënë na ala: “Ye so David asara ando na ndembe so nzara agbu lo, lo na azo so amu peko ti lo, ala diko tënë ni pepe? 4 Lo li na ya ti da ti Nzapa, lo mu mapa so a mu na *sandaga na Nzapa, lo te ni si lo mu mbeni na azo so amu peko ti lo; andaa a mu lege gi na awayango-sandaga oko ti te mapa ni!” 5Na pekoni, Jésus akiri atene na ala: “*Molenge ti Zo laa ayeke makonzi ti lango ti wungo tere.”

Koli so maboko ti lo abuba

(Matt 12.9-14; Marc 3.1-6)

6Na mbeni lango nde ti wungo tere, Jésus ali na ya ti da ti sambelango Nzapa si lo yeke fa ye na azo. Kâ, mbeni koli ayeke daa so maboko ti lo ti koli abuba. 7Le ti awafango-ndia na *afarizien kue ayeke gi na tere ti Jésus; ala yeke ku ti baa wala lo yeke kai kobela na *lango ti wungo tere titene ala wara mbeni tënë ti bi na li ti lo. 8Me Jésus ahinga atënë ti be ti ala. Nilaa lo tene na koli so maboko ti lo abuba so, lo tene: “Londo, mo luti na ndo so na le ti azo kue!” Koli ni alondo si lo luti. 9Na pekoni, Jésus ahunda ala, atene: “Mbi hunda ala: *Ndia ti e afa nyen? A fa na e ti sara nzoni wala sioni, ti soo zo na kuâ wala ti fâ zo na lango ti wungo tere?” 10Jésus abaa le ti ala oko oko kue si lo tene na koli ni: “Yoro ya ti maboko ti mo!” Lo yoro ni si maboko ti lo aga nzoni. 11Ngonzo agbu awafango-ndia na afarizien si ala yeke tene tënë na popo ti ala na ndö ti ye so ala lingbi ti sara na Jésus.

Jésus asoro awatokua baleoko na use

(Matt 10.1-4; Marc 3.13-19)

12Mbeni lâ, Jésus ague na li ti mbeni hoto ti sambela; lo sambela Nzapa na bi ni so kue. 13So ndo ahan awe, lo iri adisiple ti lo si lo soro ambeni baleoko na use, lo di iri ti ala *awatokua. 14Azo ni ayeke Simon, so Jésus adi iri ti lo Pierre na André ita ti lo, Jacques, Jean, Philippe, Barthélemy, 15Matthieu, Thomas, Jacques, molenge ti Alfe, Simon so azo atene lo yeke tiri ndali ti lipandaa ti kodro, 16Judas, molenge ti Jacques, na Judas Iskariote so ayeke ga ande zo ti kango Jésus.

Jésus afa tënë si lo kai kobela ti azo

(Matt 4.23-25)

17Jésus na *awatokua ti lo alondo na li ti hoto ni azu si lo luti na mbeni ndo so ayeke kpangbara. Adisiple ti lo mingi mingi ayeke kâ, ala na gba ti azo so asi singo. Azo ni alondo na ya ti agbata ti Judée kue, na Jérusalem, na agbata ti Tir na Sidon so ayeke na yanga ti kota ngu-ingo. 18Ala ga ti ma tënë ti Jésus, ala ga nga titene lo kai kobela ti ala. Ala so asioni yingo ayeke sara pasi na ala, tere ti ala nga aga nzoni. 19Azo kue ayeke gi lege ti ndu tere ti lo, ngbanga ti so mbeni ngangu ayeke sigigi na ya ti tere ti lo si ayeke sara titene tere ti ala kue aga nzoni.

Tënë na ndö ti nzoni dutingo ti zo

(Matt 5.1-12)

20Jésus abaa ndo na mbage ti adisiple ti lo si lo tene:

“Ti ala nzoni, ala so ayeke awayere,

ngbanga ti so *Kodro-gbia ti Nzapa ayeke ti ala!

21Ti ala nzoni, ala so nzara ayeke sara ala fadeso,

ngbanga ti so fade ya ti ala ayeke si!

Ti ala nzoni, ala so ayeke toto fadeso,

ngbanga ti so fade ala yeke he ngia!

22 “Ti ala nzoni, ala so azo ake ala, atumba ala, azonga ala si ayeke diko asioni tënë na iri ti ala ndali ti *Molenge ti Zo! 23 Na ndembe ni so, ala duti na ngia, ala dodo na ngia, ngbanga ti so futa ti ala ayeke ande kota na yayu! Biani, akotara ti ala asara ando gi tongaso na awayanga-Nzapa.

24Me mawa na ala, azo ti mosoro,

ngbanga ti so ala wara ye ti dengo be ti ala awe!

25Mawa na ala, ala so ya ti ala asi fadeso,

ngbanga ti so fade nzara ayeke sara ala!

Mawa na ala, ala so ayeke he ngia fadeso,

ngbanga ti so fade ye ti vundu ayeke si na ala si ala yeke toto!

26Mawa na ala, ala so azo kue ayeke tene nzoni tënë ti ala! Biani, akotara ti ala asara ando gi tongaso na awayanga-Nzapa ti mvene!”

Tënë ti yengo awato

(Matt 5.38-48; 7.12a)

27“Me mbi tene na ala, ala so ayeke ma mbi so: Ala ye awato ti ala, ala sara nzoni na azo so ake ala! 28Ala sara tufa na ndö ti azo so adeba ala, ala sambela ndali ti azo so asara ngangu na ala! 29Tongana mbeni zo apika ngbangba ti mo, yoro nga na lo mbage ni lo pika. Tongana mbeni zo amu kota bongo ti mo, zia lo mu nga nduzu bongo ti mo. 30Tongana mbeni zo ahunda ye na mo, mu ni na lo; tongana mbeni zo amu mbeni ye ti mo, hunda lo ti kiri na ni na mo pepe. 31 Ye so ala ye titene azo asara na ala, ala sara nga ye ni na azo. 32Tongana ala ye gi azo so aye ala, ye titene azo agonda ala ndali ni ayeke so wa? Azo ti siokpari nga aye gi azo so aye ala. 33Tongana ala sara nzoni gi na azo so asara nzoni na ala, ye titene azo agonda ala ndali ni ayeke so wa? Azo ti siokpari nga ayeke sara gi tongaso. 34Tongana ala sara boon gi na azo so ala hinga atene, fade azo ni ayeke kiri na ni na ala, ye titene azo agonda ala ndali ni ayeke so wa? Azo ti siokpari nga ayeke sara boon na amba ti ala titene na pekoni, ala kiri na ni na ala. 35Me ala ye awato ti ala, ala sara nzoni na azo! Ala sara boon na azo, me ala ku ti wara mbeni ye na peko ni pepe. Tongaso si ala yeke wara ande kota ye ti nzoni na pekoni si ala yeke duti amolenge ti Nzapa so ayeke na yayu kâ na ndö ti aye kue. Nzapa ayeke sara nzoni na azo so ahinga ti mu singila pepe nga na azo ti sioni. 36 Ala sara nzoni be mingi na azo tongana ti so Babâ ti ala ayeke sara nzoni be mingi na azo.”

Tënë ti fango ngbanga na li ti azo

(Matt 7.1-5)

37“Ala fâ ngbanga na li ti azo pepe si Nzapa afâ nga ngbanga na li ti ala pepe; ala zia tënë na li ti azo pepe si Nzapa azia nga tënë na li ti ala pepe; ala zi tënë na li ti azo si Nzapa azi nga tënë na li ti ala. 38Ala mu ye na azo si Nzapa amu nga ye na ala. Fade a yeke mu ye ti hakango na ye, a haka ye na ya ni, a pete ndö ni, a yingi ni ngbii asi meke meke si a tuku ni na yanga ti bongo ti ala. Ye so ala yeke mu ti haka na ye na amba ti ala, gi ni laa a yeke mu nga ti haka na ye na ala.”

39 Jésus akiri atene na ala mbeni toli, atene: “Waziba alingbi ti fa lege na mba ti lo waziba? Fade ala use kue ayeke ti na ya ti du pepe? 40 Zo ti mandango ye ahon wafango-ye na lo pepe; me tongana lo manda ye nzoni, fade lo ga tongana wafango-ye na lo. 41Ngbanga ti nyen laa mo yeke baa gi kete pere so ayeke na le ti mba ti mo si mo yeke baa kota keke so ayeke na le ti mo so pepe? 42Tongana nyen laa mo yeke tene na mba ti mo, mo tene: ‘Ita, ku mbi zi pere so ayeke na le ti mo’ si ti mo, mo yeke baa kota keke so ayeke na le ti mo so pepe? Mo so tënë ti yanga ti mo ayeke nde na sarango ye ti mo so, ayeke nzoni mo zi kota keke so ayeke na le ti mo so kozoni si na pekoni, mo baa ndo nzoni ti zi pere so ayeke na le ti mba ti mo.”

Keke na lengo ti keke

(Matt 7.16-20; 12.33-35)

43“Nzoni keke ayeke le fungo lengo ni pepe si keke so abuba ayeke le nga nzoni lengo ni pepe. 44 A yeke hinga keke oko oko gi na lege ti lengo ti lo. A yeke ko afige na tere ti akeke ti ki pepe si a yeke ko nga ale ti *vinye na ya ti akamba ti ki pepe. 45 Nzoni zo ayeke sigigi na anzoni ye so ayeke na be ti lo; me sioni zo ayeke sigigi na asioni ye so ayeke na be ti lo. Biani, ye so asi be ti zo laa ayeke sigigi na lege ti tënë ti yanga ti lo.”

Toli ti ada use

(Matt 7.24-27)

46“Ngbanga ti nyen laa ala yeke iri mbi: ‘*Kota Gbia, Kota Gbia’, me ala sara ye alingbi na tënë so mbi tene so pepe? 47Zo so aga na mbi, lo ma tënë ti mbi si lo sara ye alingbi na ni, lo kpa zo wa? Mbi ye ti fa ni na ala: 48lo yeke tongana zo so ayeke sara da; lo zi du so ali si lo leke gere ti da ni na ndö ti têne. Ngu asuku amu ndo kue, ngu asua ngangu, apika tere ti da ni, me da ni ayingi oko pepe, ngbanga ti so lo sara da ni nzoni. 49Me zo so ama atënë ti mbi si lo sara ye alingbi na ni pepe, lo yeke tongana zo so asara da na ndö ti senge sese, gere ti da ni ayeke daa pepe. Ngu asua ngangu, apika tere ti da ni si gi hio tongaso, da ni akungbi, ati si abuba kue.”

Currently Selected:

Luc 6: MNF2010

Highlight

Copy