တမၢၼ်ႇ 2

ဝိၺိၺ်ႇမူတ်းၸၢင်ႇၸဝ်ႈလူင်းမႃး

1မိူဝ်ႈဢၼ်ပဵၼ်ဝၼ်းပွႆးပဵၼ်ႇတေႇၵုၵ်ႉတေႇ၊ၸိုင်၊ၶဝ်ၸိူဝ်းဢၼ်ယုမ်ႇမၢတ်ႈတင်းသဵင်ႈတင်းလူင်၊ဢွၼ်ၵၼ်ၸုတုမ်ယူႇတီႈၼိုင်ႈဢေႃႈ။- 2မိူဝ်ႈၼၼ်ႉၵမ်းလဵဝ်၊သဵင်ဢၼ်မိူၼ်သဵင်လူမ်းၽိဝ်ႁုင်လုၵ်ႉၵႃႈတီႈၵၢင်ႁၢဝ်ပေႃႇမႃး၊တဵမ်ႁိူၼ်းဢၼ်ၶဝ်ၼင်ႈယူႇၼၼ်ႉဝႆႉဢေႃႈ။- 3ၶဝ်လႆႈႁၼ်ဢၼ်မိူၼ်ၸိူဝ်ႉၼင်ႇပဵဝ်ၽႆးၼမ်ၼႃႇၽုတ်းမႃးၽႄႈဢွၵ်ႇၵႂႃႇၸပ်းၵႃႈၼိူဝ်ၶဝ်၊ႁင်းၽႂ်ႁင်းမၼ်းဢေႃႈ။- 4ၶဝ်ၼၼ်ႉ၊တင်းသဵင်ႈတင်းလူင်ပျေႉၸုမ်ႇတဵမ်ဝႆႉတင်းဝိၺိၺ်ႇမူတ်းၸၢင်ႇၸဝ်ႈလႄႈဝိၺိၺ်ႇၸဝ်ႈႁဵတ်းႁႂ်ႈၶဝ်ၸၢင်ႈမေႃလၢတ်ႈၼႂ်းၵႂၢမ်းၽႃႇသႃႇတၢင်ႇၸိူဝ်ႉတၢင်ႇၶိူဝ်းတင်းလၢႆဢေႃႈ။

5မိူဝ်ႈယၢမ်းၼၼ်ႉၵူၼ်းမဵဝ်းၵျူး၊ဢၼ်ယုမ်ႇမၢတ်ႈၵူဝ်ယမ်ၽြႃးပဵၼ်ၸဝ်ႈလႄႈလုၵ်ႉသေၵႃႈတီႈတၢင်ႇဝၢၼ်ႈတၢင်ႇဝဵင်း၊ၼႂ်းလေႃးၵႃႉၵူႈတီႈၵူႈလႅၼ်ၼၼ်ႉ မႃးမီးယူႇၼႂ်းဝဵင်းယေႇရုသလႅမ်ႇ၊ဢေႃႈ။- 6မိူဝ်ႈဢၼ်ၶဝ်ၸိူဝ်းၼၼ်ႉ၊လႆႈငိၼ်းသဵင်ၼၼ်ႉၸိုင်၊ၵူၼ်းၼမ်ၼႃႇၸုတုမ်ၵၼ်မႃးဢေႃႈ။ ၶဝ်ဢွၼ်ၵၼ်ၵႂင်ၸႂ်ယုင်ႈၸႂ်ၵွပ်ႈပိူဝ်ႈၶဝ်လႆႈငိၼ်းတပႄးၸဝ်ႈတင်းလၢႆ၊ႁေႃးလၢတ်ႈတြႃးၼႂ်းၵႂၢမ်းၽႃႇသႃႇၶဝ်ၸိူဝ်းဢၼ်လႆႈငိၼ်းႁင်းၽႂ်ႁင်းမၼ်းယူႇၼၼ်ႉဢေႃႈ။- 7ၼႂ်းတၢင်းဢၼ်ၶဝ်ယင်းယုင်ႈၸႂ်ၵႂင်ၸႂ်လႄႈဢၢမ်းၼႃႇလူင်လၢင်ၼၼ်ႉ ၶဝ်လၢတ်ႈလႄႈဝႃႈ၊ “ၵူၼ်းၸိူဝ်းဢၼ်ႁေႃးလၢတ်ႈၸိူဝ်ႉၼင်ႇၼႆယူႇၼႆႉ၊ပဵၼ်ၵူၼ်းမဵဝ်းၵႃႇလိလႄး၊ဢမ်ႇၸႂ်ႈႁိုဝ်း။- 8သမ်ႉပဵၼ်ၸိူဝ်ႉၼင်ႇႁိုဝ်လႄႈႁဝ်းလႆႈငိၼ်းပဵၼ်ၵႂၢမ်းၽႃႇသႃႇမဵဝ်းႁဝ်းဝႆႉ၊ႁင်းၽႂ်ႁင်းမၼ်းၼင်ႇႁိုဝ်။- 9ႁဝ်းၸိူဝ်းၼႆႉ၊ပဵၼ်ၵူၼ်းမဵဝ်းပႃႇထိ၊တင်းမိူင်းမေႇတိ၊တင်းမိူင်းဢေႇလမ်ႇ၊တင်းမိူင်းမေႇသူဝ်ႇပူဝ်ႇတေးမီးယႃး၊တင်းမိူင်းယုတႃႉ၊တင်းမိူင်းၵပ်ႉပတေႃးၵိ၊တင်းမိူင်းပွၼ်ႇတု၊တင်းမိူင်းဢႃႇသိ၊- 10တင်းမိူင်းၽႃႇရုၵိ၊တင်းမိူင်းပမ်ႇပုလိ၊တင်းမိူင်းဢေးၵျိပ်ႉ၊တင်းလၢႆ တင်းၵူၼ်းဝၢၼ်ႈၼွၵ်ႈၼႃးပၢင်ႇမိူင်းလိပ်ႉပီးယႃး၊ဢၼ်ၸမ်ၵၼ်တင်းဝဵင်းၵုရေႇၼေႇ၊ၸိူဝ်းၼၼ်ႉဢေႃႈ။- 11ႁဝ်းၵမ်ႈၽွင်ႈယင်းပဵၼ်ၵူၼ်းဝဵင်းရူဝ်းမႃႉ၊ၸႃႉၸဵမ်ၵူၼ်းမဵဝ်းၵျူး၊တင်းၵူၼ်းတၢင်ႇၸိူဝ်ႉတၢင်ႇၶိူဝ်း၊ဢၼ်လႆႈၶဝ်ႈသႃႇသၼႃႇၵျူး၊မႃးဢိၵ်ႇတင်းႁဝ်းၸိူဝ်းဢၼ်လုၵ်ႉသေၵႃႈတီႈ၊ၵုၼ်ၵရေႇတေႇ၊ဢိၵ်ႇတင်းမိူင်းဢရေးပီးယႃး၊မႃးၸိူဝ်းၼႆႉ လႆႈငိၼ်းၶဝ်ႁေႃးလၢတ်ႈလူၺ်ႈၵႂၢမ်းၽႃႇသႃႇႁဝ်းၵူႈၶိူဝ်းၶိူဝ်း၊ဢၼ်ႁေႃးလၢတ်ႈလွင်ႈတၢင်းဢၼ်ယႂ်ႇဢၼ်မျၢတ်ႈ၊ဢၼ်ၽြႃးပဵၼ်ၸဝ်ႈပွင်ႁဵတ်းၼၼ်ႉယူႇယဝ်ႉ၊” ဝႃႈၼင်ႇၼႆဢေႃႈ။- 12ၶဝ်ဢၢမ်းၼႃႇလူင်လၢင်လႄႈဢမ်ႇၸၢင်ႈပွင်ႇၸၢင်ႈလႅင်းသေယဝ်ႉ၊ၶဝ်ၼင်ႇၵၼ်ၵၼ်ၵေႃႉၼိုင်ႈလႄႈၵေႃႉၼိုင်ႈ၊တွင်ႈထၢမ်တီႈၵၼ်လႄႈဝႃႈ၊ “လွင်ႈတၢင်းၼႆႉပဵၼ်ၸိူဝ်ႉၼင်ႇႁိုဝ်၊” ဝႃႈၼင်ႇၼႆယူႇဢေႃႈ။

13ၵူၺ်းၵႃႈ၊မီးၵူၼ်းၵမ်ႈၽွင်ႈသႄႉသွမ်းတပႄးၸဝ်ႈၸိူဝ်းၼၼ်ႉလႄႈဝႃႈ၊ “ၶဝ်မဝ်းလဝ်ႈဢိူဝ်း၊” ဝႃႈၼင်ႇၼႆဢေႃႈ။

ၵႂၢမ်းတြႃးဢၼ်ပေႇတရုႁေႃးလၢတ်ႈ

14မိူဝ်ႈၼၼ်ႉ၊ပေႇတရု၊လုၵ်ႉၸုၵ်းလူၺ်ႈၵၼ်တင်းတမၢၼ်ႇၸဝ်ႈသိပ်းဢဵတ်းပႃးလႄႈ ဢဝ်တင်းသဵင်ဢၼ်ယႂ်ႇၼႃႇႁေႃးလၢတ်ႈၵႃႈတီႈမူႇၵူၼ်းလႄႈဝႃႈ၊ “ပီႈၼွင်ႉၵျူး၊ၶဝ်ဢိၵ်ႇတင်းသူၸိူဝ်းဢၼ်ယူႇၼႂ်းဝဵင်းယေႇရုသလႅမ်ႇ၊တင်းသဵင်ႈတင်းလူင်ၶဝ်႟။ ထွမ်ႇဢဝ်ၵဝ်ၶႃႈသေၵမ်း။ လွင်ႈတၢင်းၼႆႉ၊ပဵၼ်ၸိူဝ်ႉၼင်ႇႁိုဝ်ဝႃႈၼႆႁႂ်ႈၵဝ်ၶႃႈလႆႈလၢတ်ႈၼႄပၼ်သေၵမ်းၶႃႈ။- 15ၶိင်ႇယၢမ်းၼႆႉပဵၼ်ၵၢင်ၼႂ်ၵဝ်ႈမွင်းလႄႈၶဝ်ၸိူဝ်းၼႆႉဢမ်ႇမဝ်းလဝ်ႈၸိူဝ်ႉၼင်ႇဢၼ်သူထၢင်ႇပဵၼ်ၼၼ်ႉၶႃႈ။- 16လွင်ႈၼႆႉၸမ်ႉ၊ပဵၼ်ၸွမ်းၵႃႈၼင်ႇဢၼ်ၵႂၢမ်းပရေႃးၽႅတ်ႈ#2:16 “ၵႂၢမ်းပရေႃးၽႅတ်ႈ” - ၵႂၢမ်းဢၼ်ၽြႃးပဵၼ်ၸဝ်ႈၸႂ်ႉၵူၼ်းမၼ်းၸဝ်ႈႁေႃးလၢတ်ႈလွင်ႈတၢင်းဢၼ်တၵ်းပဵၼ်မႃးတေႃႈလဵဝ်လႄႈဝၼ်းမိူဝ်းၼႃႈယူဝ်းဢေႇလႃႉ၊ႁေႃးလၢတ်ႈဝႆႉလႄႈဝႃႈ။

17“‘ၽြႃးပဵၼ်ၸဝ်ႈလၢတ်ႈဝႆႉလႄႈဝႃႈ၊

ၼႂ်းၶိင်ႇၵႃႇလႃႉလိုၼ်းသုတ်းၼၼ်ႉ

တၵ်းလႆႈပဵၼ်မႃးၸမ်ႉ၊

ၵဝ်တၵ်းပၼ်ဝိၺိၺ်ႇၵဝ်ၵႃႈၼိူဝ်

မဵဝ်းၵူၼ်းၵူႈမဵဝ်းဢေႃႈ။

လုၵ်ႈလၢင်းသူတၵ်းဢဝ်တင်းၺၢၼ်ႇပရေႃးၽႅတ်ႈ#2:17 “ၺၢၼ်ႇပရေႃးၽႅတ်ႈ” - ၺၢၼ်ႇတၢင်းႁုဢၼ်ႁေႃးလၢတ်ႈၵႂၢမ်းၽြႃးပဵၼ်ၸဝ်ႈလွင်ႈတၢင်းတၵ်းပဵၼ်မႃးတေႃႈလဵဝ်လႄႈဝၼ်းမိူဝ်းၼႃႈႁေႃးလၢတ်ႈဢေႃႈ။

ၵူၼ်းၼုမ်ႇၵူၼ်းၵမ်သူတၵ်းလႆႈႁၼ်ၼိမိၵ်ႈ

လၢၵ်ႈၶၼႃႇဢေႃႈ။

ၵူၼ်းထဝ်ႈၵူၼ်းၵႄႇသူၵေႃႈ တၵ်းလႆႈၼွၼ်းၽၼ်ႁၼ်ၼိမိၵ်ႈတင်းလၢႆဢေႃႈ။

18ၸႂ်ႈတႄႉ။ ၼႂ်းဝၼ်းၼၼ်ႉၵဝ်တၵ်းပၼ်ဝိၺိၺ်ႇၵဝ်၊

ၵႃႈၼိူဝ်ၶႃႈၵူၼ်းၸၢႆးၶႃႈၵူၼ်းယိင်းၵဝ်တင်းလၢႆလႄႈ

ၶဝ်ၵေႃႈ တၵ်းဢဝ်တင်းၺၢၼ်ႇပရေႃးၽႅတ်ႈလႄႈႁေႃးလၢတ်ႈဢေႃႈ။

19ၵဝ်တၵ်းႁဵတ်းၼႄမဵဝ်းဢၼ်လီဢၢမ်းၵႃႈၼိူဝ်ၽႃႉၵၢင်ႁၢဝ်၊

ဢိၵ်ႇတင်းၼိမိၵ်ႈဢၼ်လီဢၢမ်းၵႃႈၼိူဝ်လိၼ်မိူင်းၼႆႉဢေႃႈ။

တၢင်းဢၼ်ပဵၼ်လိူတ်ႈပဵၼ်ယၢင်၊ပဵၼ်မုၵ်ႉၽႆးပဵဝ်ၽႆးတင်းတၢင်းဢၼ်ပဵၼ်ၵႂၼ်းၽႆးလႂ်။

20တႃဝၼ်းတၵ်းလပ်းသိင်ႇၵႂႃႇၽိတ်းၽိတ်းလႄႈ၊

လိူၼ်ၵေႃႈတၵ်းလႅင်ၸၢင်းႁၢင်းထၢၼ်ႈပေႃးမိူၼ်လိူတ်ႈၵႂႃႇ၊

ၼႂ်းၸူဝ်ႈဢၼ်ဝၼ်းထွတ်ႈဝၼ်းမျၢတ်ႈလူင်ထႃႇဝရႃႉၽြႃး၊ဢမ်ႇပႆႁွတ်ႈမႃးၼၼ်ႉဢေႃႈ။

21မိူဝ်ႈၼၼ်ႉ၊ၽူႈလႂ်သေဢမ်ႇဝႃႈ၊ၵေႃႉဢၼ်ၵၢဝ်ႇႁႃဢေႁႃထႃႇဝရႃႉၽြႃး၊

ပုၼ်ႈတၢင်းဢၼ်တၵ်းမႃႉၸႃႉၸွႆႈထႅမ်ၼၼ်ႉ၊

ၵေႃႉၼၼ်ႉတၵ်းလွတ်ႈဢေႃႈ၊’ ဝႃႈၼင်ႇၼႆၼၼ်ႉယဝ်ႉဢေႃႈ။ #တူၺ်း၊ ယူဝ်းဢေႇ 2:28-32

22“ပိူဝ်ႈၼႆလႄႈပီႈၼွင်ႉၸိူဝ်ႉၶိူဝ်းဢိသရေး၊ၶဝ်႟။ ထွမ်ႇငိၼ်းဢဝ်ၵႂၢမ်းၼႆႉၸေးၸေးတႃႉ။ ၸဝ်ႈယေႇသု၊ၵူၼ်းဝဵင်းၼႃႇၸရႅတ်ႈ၊ၼႆႉ၊လႆႈၶၢမ်ႇတၢင်းဢၼ်ဢႃႇၼႃႇတၼ်းၶူဝ်းၽြႃးပဵၼ်ၸဝ်ႈ၊ၶၢမ်ႇသၢၵ်ႈသေႇဝႆႉ၊ၽၢႆႇၼႃႈသူထၢင်ႇထၢင်ႇသႃးသႃး၊ၵႃႈၼႂ်းတၢင်းဢၼ်ၽြႃးပဵၼ်ၸဝ်ႈဢဝ်မၼ်းၸဝ်ႈၼၼ်ႉသေလႄႈပွင်ႁဵတ်းၼိမိၵ်ႈဢၼ်လီဢၢမ်း၊ဢိၵ်ႇတင်းတၼ်းၶူဝ်းဢၼ်လၢၵ်ႇလၢႆးယဝ်ႉ။ ၵွပ်ႈပိူဝ်ႈလွင်ႈတၢင်းၼႆႉတင်းသဵင်ႈတင်းလူင်၊ႁဵတ်းပဵၼ်သိုဝ်ႈၼႃႈတႂ်ႈတႃသူမူတ်းမူတ်းလႄႈသူႁုႁၼ်ယူႇယဝ်ႉ။- 23ၸွမ်းၼင်ႇဢလူဝ်ႇၽြႃးပဵၼ်ၸဝ်ႈမၵ်းၶၢၼ်းဝႆႉၼၼ်ႉ၊မၼ်းၸဝ်ႈဢဝ်ၸဝ်ႈယေႇသု၊ဢၢပ်ႈပၼ်တီႈသူသေလႄႈသူၵေႃႈ၊ၸႂ်ႉၶဝ်ၸိူဝ်းဢၼ်ဢမ်ႇတြႃးၼၼ်ႉ၊တွၵ်ႇမၼ်းၸဝ်ႈဝႆႉၵႃႈၼိူဝ်သဝ်မႆႉဝႃးမိုဝ်းလႄႈဢဝ်မၼ်းၸဝ်ႈတၢႆယဝ်ႉ။- 24ၵူၺ်းၵႃႈ၊ၽြႃးပဵၼ်ၸဝ်ႈသမ်ႉႁႂ်ႈမၼ်းၸဝ်ႈလုၵ်ႉသေၵႃႈတၢင်းတၢႆၶိုၼ်းလိပ်းမႃးသေလႄႈ ပွႆႇႁႂ်ႈမၼ်းၸဝ်ႈလွတ်ႈသေၵႃႈတီႈတၼ်းၶူဝ်းတၢင်းတၢႆ၊ပိူဝ်ႈဢၼ်ၶုၼ်မရၼႃႉဢမ်ႇၸၢင်ႈမတ်ႉၽုၵ်ႇမၼ်းၸဝ်ႈဝႆႉလႆႈၼၼ်ႉဢေႃႈ။- 25ပိူဝ်ႈၼႆလႄႈ တႃႇဝိတ်ႈ၊တႅမ်ႈဝႆႉလွင်ႈမၼ်းၸဝ်ႈလႄႈဝႃႈ၊

“‘ၵဝ်ၸမ်ႉ၊ႁၼ်ထႃႇဝရႃႉၽြႃးသိုဝ်ႈၼႃႈတႂ်ႈတႃတႃႇသေႇဢမ်ႇထၢတ်ႇဢေႃႈ။

မၼ်းၸဝ်ႈမီးယူႇၽၢႆႇၶႂႃၵဝ်လႄႈ

ၵဝ်ဢမ်ႇလႆႈႁွတ်ႈထိုင်တၢင်းဢၼ်ၵူဝ်ႁႄၸႂ်သၼ်ႇ။

26ပိူဝ်ႈၼႆလႄႈ ႁူဝ်ၸႂ်ၵဝ်ပၢင်ႇၸိုၼ်ႈဢေႃႈ။

ၵႂၢမ်းၵဝ်ၵေႃႈသႂၢင်ႇသိူဝ်းဢေႃႈ။

လိူဝ်သေၼၼ်ႉ၊ၵဝ်ဢၼ်ပဵၼ်ၵူၼ်းဢၼ်ၸၢင်ႈလုၸၢင်ႈလႅဝ်ၼႆႉၵေႃႈ၊

ၵွပ်ႈပိူဝ်ႈတၢင်းဢၼ်မုင်ႈထႃႈမွင်းထႃႈလႄႈတၵ်းလႆႈလိုဝ်ႈၸႂ်ဢေႃႈ။

27ၸဝ်ႈႁဝ်းတၵ်းဢမ်ႇပိၼ်ႉဢမ်ႇပႅတ်ႈဝိၺိၺ်ႇၵဝ်ၶႃႈဝႆႉၵႃႈၼႂ်းမိူင်းမရၼႃႉတီႈၶႃႈ။

တီႈၵူၼ်းမူတ်းၸၢင်ႇၸဝ်ႈႁဝ်းၼၼ်ႉၵေႃႈ၊

ၸဝ်ႈႁဝ်းတၵ်းဢမ်ႇႁႂ်ႈလႆႈတူႇၼဝ်ႈၵႃႈၼႂ်းပႃႇႁဵဝ်ႈတီႈၶႃႈ။

28ၸဝ်ႈႁဝ်းၼႄပၼ်သဵၼ်ႈတၢင်းသူင်ႇထိုင်တီႈဢၼ်ဢသၢၵ်ႈလိပ်းလႄႈ

တၢင်းဢၼ်ၵဝ်ၶႃႈလႆႈယူႇသိုဝ်ႈၼႃႈတႂ်ႈတႃၸဝ်ႈႁဝ်းၼၼ်ႉ၊

ႁဵတ်းႁႂ်ႈၵဝ်ၶႃႈသိူဝ်းၸူမ်းတီႈၶႃႈဢေႃႈ၊’

ဝႃႈၼင်ႇၼႆဝႆႉဢေႃႈ။ #တူၺ်း၊ သႃႇ 16:8-11

29“ပီႈၼွင်ႉၶဝ်႟။ ၵဝ်တၵ်းမွၵ်ႇလၢတ်ႈလွင်ႈပူႇမွၼ်ႇႁဝ်းတႃႇဝိတ်ႈ၊ၼၼ်ႉ၊သၢင်းသၢင်းလၢင်းလၢင်းတီႈသူလူးၵွၼ်ႇဢေႃႈ။ မၼ်းတၢႆၵႂႃႇယဝ်ႉလႄႈဢဝ်ၽင်ဝႆႉယဝ်ႉဢေႃႈ။ ၶုမ်ပႃႇႁဵဝ်ႈမၼ်းမီးယူႇတီႈႁဝ်းတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။- 30ၸွမ်းလူၺ်ႈမၼ်းပဵၼ်ပရေႃးၽႅတ်ႈၵေႃႉၼိုင်ႈလႄႈ ႁုႁၼ်လွင်ႈတၢင်းဢၼ်ၽြႃးပဵၼ်ၸဝ်ႈ၊မီးၵႂၢမ်းၵတိဢၼ်ၸိုဝ်ႈဢၼ်ၸႂ်ႈဝႃႈဝႆႉတီႈမၼ်း၊လူၺ်ႈလွင်ႈဢၼ်မၼ်းၸဝ်ႈတၵ်းလႆႈယုၵ်ႉတၢင်ႇဝႆႉ၊ၶုၼ်ႁေႃၶမ်းပႃးၼိုင်ႈၵႃႈၼႂ်းၸိူဝ်ႉၶိူဝ်းမၼ်းၼင်ႈၵႃႈၼိူဝ်ပလၢင်ႇမၼ်းၼၼ်ႉဢေႃႈ။- 31တႃႇဝိတ်ႈ၊ၼၼ်ႉ၊ယင်းႁုထႃႈလႄႈႁေႃးလၢတ်ႈဝႆႉ၊လွင်ႈၸဝ်ႈၶရိၸ်ႈတၵ်းလုၵ်ႉၶိုၼ်းလိပ်းၼၼ်ႉလႄႈဝႃႈ၊

“‘ဝိၺိၺ်ႇမၼ်းၸဝ်ႈၼၼ်ႉ၊ဢမ်ႇလႆႈပႅတ်ႈဝႆႉၵႃႈၼႂ်းမိူင်းမရၼႃႉ၊

ၼိူဝ်ႉမၼ်းၸဝ်ႈၵေႃႈဢမ်ႇလႆႈတူႇလႆႈၼဝ်ႈၵႃႈတီႈၼႂ်းၶုမ်ပႃႇႁဵဝ်ႈ၊’ #တူၺ်း၊ သႃႇ 16:10

ဝႃႈၼင်ႇၼႆဢေႃႈ။- 32ၸဝ်ႈယေႇသု၊ၼၼ်ႉ၊ၽြႃးပဵၼ်ၸဝ်ႈႁႂ်ႈမၼ်းၸဝ်ႈလုၵ်ႉၶိုၼ်းလိပ်းယဝ်ႉလႄႈႁဝ်းၵႃႈမီးၼႆႉ၊လႆႈပဵၼ်ၵေႃႉဢၼ်ၶၢမ်ႇသၢၵ်ႈသေႇဢေႃႈ။- 33မၼ်းၸဝ်ႈၸိုင်၊လႆႈၶၢမ်ႇယွင်ႈဢဝ်ဝႆႉၵႃႈတီႈၽၢႆႇၶႂႃမိုဝ်းၽြႃးပဵၼ်ၸဝ်ႈဢၼ်ပဵၼ်ပေႃႈၸဝ်ႈၼၼ်ႉသေယဝ်ႉ၊လႆႈၶၢမ်ႇဢဝ်ဝိၺိၺ်ႇဢၼ်မူတ်းၸၢင်ႇၸဝ်ႈ၊မႅၼ်ႈၼင်ႇဢၼ်ၵတိၸဝ်ႈမီးဝႆႉၼၼ်ႉယဝ်ႉ။ ၵႃႈဢၼ်သူလႆႈႁုငိၼ်းမိူဝ်ႈလဵဝ်ၼႆႉပဵၼ်သူးၵျေးၸူးတၢင်းလီဢၼ်မၼ်းၸဝ်ႈပၼ်ၵႃႈၼိူဝ်ႁဝ်းၼၼ်ႉယဝ်ႉ။- 34လွင်ႈမၼ်းၸမ်ႉ၊တႃႇဝိတ်ႈ၊ပဵၼ်ၵေႃႉဢၼ်လႆႈၶိုၼ်ႈၵႂႃႇၵႃႈၼိူဝ်ၵၢင်ႁၢဝ်ပုၼ်ႉဢမ်ႇၸႂ်ႈလႄႈမၼ်းၸင်ႇလၢတ်ႈလႄႈဝႃႈ၊

‘ထႃႇဝရႃႉၽြႃးလၢတ်ႈတီႈၸဝ်ႈၵဝ်ၶႃႈလႄႈဝႃႈ၊

ၼင်ႈၵႃႈတီႈၽၢႆႇၶႂႃၵဝ်ၼႆႉ။

35တေႃႇထိုင်ႁွတ်ႈၵဝ်ဢဝ်ရၢၼ်ႇသူႇမႂ်းတင်းလၢႆ၊

တမ်းပႃႈတႂ်ႈတိၼ်မႂ်းႁႂ်ႈလႆႈပဵၼ်တီႈတၢင်ႇတိၼ်မႂ်းၼၼ်ႉတႃႉ၊’ ဝႃႈၼင်ႇၼႆဢေႃႈ။ #တူၺ်း၊ သႃႇ 110:1

36“ၵွပ်ႈပိူဝ်ႈလွင်ႈတၢင်းၼႆႉလႄႈႁႂ်ႈမဵဝ်းၸိူဝ်ႉၶိူဝ်းဢိသရေး၊တင်းသဵင်ႈတင်းလူင်၊ႁုမၢတ်ႈထၢင်ႇထၢင်ႇသႃးသႃးလွင်ႈၸဝ်ႈယေႇသု၊ဢၼ်သူတွၵ်ႇဝႆႉၵႃႈၼိူဝ်သဝ်မႆႉဝႃးမိုဝ်းၼႆႉ၊ပဵၼ်ၸဝ်ႈဢၼ်ၽြႃးပဵၼ်ၸဝ်ႈယုၵ်ႉတၢင်ႇဝႆႉ၊ႁႂ်ႈပဵၼ်ၸဝ်ႈပဵၼ်ၸွမ်ဢိၵ်ႇတင်းၼႂ်းဢရႃႇၸဝ်ႈၶရိၸ်ႈ၊ၼၼ်ႉတႃႉ၊” ဝႃႈၼင်ႇၼႆဢေႃႈ။- 37မိူဝ်ႈဢၼ်ၵူၼ်းတင်းလၢႆလႆႈငိၼ်းၼၼ်ႉၸိုင်၊မီးႁူဝ်ၸႂ်ဢၼ်မႆႈႁွၼ်ႉၼႃႇလႄႈဢွၼ်ၵၼ်တွင်ႈထၢမ်ပေႇတရု၊တင်းတမၢၼ်ႇၸဝ်ႈတၢင်ႇၵေႃႉၸိူဝ်းၼၼ်ႉလႄႈဝႃႈ၊ “ပီႈၼွင်ႉၶဝ်႟။ ႁဝ်းၶႃႈတေလႆႈႁဵတ်းၸိူဝ်ႉၼင်ႇႁိုဝ်ၶႃႈ၊” ဝႃႈၼင်ႇၼႆဢေႃႈ။

38 ပေႇတရု၊ၶိုၼ်းလၢတ်ႈလႄႈဝႃႈ၊ “ပုၼ်ႈလွင်ႈၼင်ႇႁိုဝ်သူတၵ်းလွတ်ႈဢပျတ်ႈၸိုင်၊သူဢွၼ်ၵၼ်ၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်သေယဝ်ႉ၊ၶၢမ်ႇဢဝ်မၢင်ႇၵလႃႇပပ်ႉတိၸမ်ႇၼႂ်းၸိုဝ်ႈသဵင်ၸဝ်ႈယေႇသုၶရိၸ်ႈ၊တႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ဢပျတ်ႈသူတၵ်းလႆႈလွတ်ႈလႄႈ သူတၵ်းလႆႈႁပ်ႉၶၢမ်ႇဢဝ်သူး၊ဢၼ်ပဵၼ်ဝိၺိၺ်ႇမူတ်းၸၢင်ႇၸဝ်ႈဢေႃႈ။- 39လွင်ႈမၼ်းၸမ်ႉ၊ၵတိၸဝ်ႈၼၼ်ႉ၊ဝႆႉပုၼ်ႈသူတင်းလုၵ်ႈလၢင်းသူ၊ဢိၵ်ႇတင်းၵူၼ်းၸိူဝ်းဢၼ်မီးတီႈၵႆတင်းသဵင်ႈတင်းလူင်ဢၼ်ဝႃႈ၊ၵႃႈဢၼ်ၽြႃးပဵၼ်ၸဝ်ႈႁဝ်းထႃႇဝရႃႉၽြႃးႁွင်ႉဢဝ်ဝႆႉ၊ပုၼ်ႈမၼ်းၸဝ်ႈၼၼ်ႉဢေႃႈ၊” ဝႃႈၼင်ႇၼႆဢေႃႈ။

40 ပေႇတရု၊ၶၢမ်ႇသၢၵ်ႈသေႇလွင်ႈၸိူဝ်းၼႆႉၵူၺ်းဢမ်ႇၵႃး၊ယင်းဢဝ်တင်းၵႂၢမ်းတၢင်ႇၸိူဝ်ႉတၢင်ႇဢၼ်ၼမ်ၼႃႇတိုၵ်းယူင်းၶဝ်လႄႈဝႃႈ၊ “ၵႄႇသႄႇဢဝ်တူဝ်ၸဝ်ႈၵဝ်ႇသေၵႃႈတီႈဢပျတ်ႈတၢမ်ႇ၊ဢၼ်ႁွတ်ႈထိုင်ၵႃႈတီႈၶဝ်ၸိူဝ်းဢၼ်ၸႂ်ၵူတ်ႉၸႂ်ငေႃးၼၼ်ႉတႃႉ၊” ဝႃႈၼင်ႇၼႆဢေႃႈ။- 41ၵူၼ်းၼမ်ၼႃႇယုမ်ႇမၢတ်ႈတြႃးၸဝ်ႈဢၼ်ပေႇတရု၊ႁေႃးလၢတ်ႈၼၼ်ႉလႄႈ ၶၢမ်ႇဢဝ်မၢင်ႇၵလႃႇပပ်ႉတိၸမ်ႇ#2:41 “ပပ်ႉတိၸမ်ႇ” - မၢင်ႇၵလႃႇတၢင်းၸူမ်ၼမ်ႉဢေႃႈ။ ၼႂ်းဝၼ်းၼၼ်ႉ၊ၵူၼ်းသၢမ်ႁဵင်ၸမ်ၸမ်ၶဝ်ႈပႃးမႃးၼႂ်းၽုင်မူႇၸုမ်းဢေႃႈ။- 42ၶဝ်ၼၼ်ႉ၊ဢွၼ်ၵၼ်သွၼ်ဢဝ်တီႈတမၢၼ်ႇၸဝ်ႈတင်းလၢႆယူႇ၊ၶဝ်ႈပႃးၼႂ်းတၢင်းဢၼ်ႁဵတ်းမုၵ်ႉႁဵတ်းၸိူဝ်းယူႇ၊ၼင်ႇၵၼ်ၵၼ်ၽႄမႅင်ႇတၢင်းၵိၼ်တီႈၵၼ်ယူႇ၊ဢိၵ်ႇတင်းႁဵတ်းပထၼႃႇသူးတွင်းယူႇတႃႇသေႇဢေႃႈ။

ၸူဝ်ႈတႃႇဢသၢၵ်ႈတၢၼ်းတပႄးၸဝ်ႈ

43တမၢၼ်ႇၸဝ်ႈတင်းလၢႆ၊ႁဵတ်းၼႄၼိမိၵ်ႈလၢၵ်ႈၶၼႃႇတၢင်းဢၼ်လီဢၢမ်းၼမ်ၼႃႇလႄႈၵူႈၵေႃႉၵူႈၵူၼ်းၵူဝ်ယမ်ၽြႃးပဵၼ်ၸဝ်ႈၼႃႇဢေႃႈ။- 44ၶဝ်ၸိူဝ်းဢၼ်ယုမ်ႇမၢတ်ႈတင်းသဵင်ႈတင်းလူင်ၼၼ်ႉၵေႃႈ၊ႁဵတ်းမုၵ်ႉႁဵတ်းၸိူဝ်းယူႇလူၺ်ႈၵၼ်ၶိူဝ်းၶိူဝ်းလႄႈ ဢဝ်ၶူဝ်းလဵင်းၵႃႈမီးႁူမ်ႈၵၼ်ၸၢႆႇမႅင်ႇပၼ်ၵၼ်ယူႇဢေႃႈ။- 45ၶဝ်ၶၢႆဢုၵ်ႉၸႃႇၶူဝ်းလဵင်းဢၼ်ၶဝ်ပိူင်ႇႁင်းၽႂ်ႁင်းမၼ်းၸိူဝ်းၼၼ်ႉလႄႈဢဝ်ငိုၼ်းၼၼ်ႉၽႄမႅင်ႇပၼ်တီႈၵၼ်ၸွမ်းၵႃႈၼင်ႇဢၼ်ၽႂ်လူဝ်ႇႁင်းၽႂ်ႁင်းမၼ်းၼၼ်ႉဢေႃႈ။- 46ၶဝ်ဢွၼ်ၵၼ်ၶိုၼ်ႈၵျွင်းပိၵ်ႈမၢၼ်ႇၸဝ်ႈ၊ၸုတုမ်ၵၼ်ၵူႈမိုဝ်ႉၵူႈဝၼ်းယူႇ၊ၵိၼ်ၶဝ်ႈႁူမ်ႈလူၺ်ႈၵၼ်ၵႃႈတီႈႁိူၼ်းၶဝ်တင်းႁူဝ်ၸႂ်ဢၼ်ၶၢဝ်သႂ်တင်းၸႂ်ဢၼ်သႂၢင်ႇသိူဝ်းယူႇ၊- 47ဢွၼ်ၵၼ်ယွင်ႈယေႃးၽြႃးပဵၼ်ၸဝ်ႈယူႇလႄႈ လႆႈၼႃႈလႆႈတႃၵႃႈတီႈၽၢႆႇၼႃႈၵူၼ်းတင်းလၢႆယူႇဢေႃႈ။ ထႃႇဝရႃႉၽြႃးယင်းထၢပ်ႈထႅင်ႈပၼ်ၵူၼ်းၸိူဝ်းဢၼ်လႆႈတၢင်းဢၼ်ၵႄႇၶျွတ်ႈဢဝ်ၼၼ်ႉ၊တီႈၼႂ်းၸိူဝ်းၸဝ်ႈၵူႈမိူဝ်ႈၵူႈဝၼ်းယူႇဢေႃႈ။

Currently Selected:

တမၢၼ်ႇ 2: SHNCL

Highlight

Copy