Luka 4

O kondoi Yesu

(Mat. 4:1-11; Mar. 1:12-13)

1Ɗa Yesu u shanai n Ayinviki a̱ Ka̱shile. Ana wu uta̱i o Kuɗolu ku Urdu, ɗa Ayinviki a̱ Ka̱shile a ɗikai ni a kubana a kakamba. 2Ta ɗe Kalijani ka piyasai ni ali ayin amangere. Ayin a nan lo ra̱ka̱ u lyaꞋa ili ba, ɗa kambulu ka̱ ka̱na̱i ni n a̱bunda̱i a kubana uteku.

3Ɗa Kalijani ka danai ni, “Maku ma̱ Ka̱shile ma baci vi mayun, bonoko katali ka burodi.”

4Amma ɗa Yesu u danai ni, “Wi ta̱ punu uɗani a Katagarda ka Ciɗa,† ‘N ilikulyaꞋa i ɗa koci vuza u kuyaꞋan wuma ba.’ ”#K.Wil. 8:3.

5Ɗa u ɗikai ni u bankai gaɗi, ɗa gogo lo u yotsongi ni tsugono tsa aduniyan dem. 6Ɗa Kalijani ka danai ni, “Mi ta̱ e kuneke wu tsugbayin n tsugono tsa n utsura ra̱ka̱, vo okpo vuza vi kinda le. Adama a na ili ya i va̱ i ɗa e neke mu ta̱ i ɗa ra̱ka̱, mi ta̱ a kufuɗa kpamu me neke vuza na u luwai mu dem. 7Vu kuɗa̱ngu baci ɗa vi lyaꞋakai mu kayala, mi ta̱ e kuneke wu i ɗa.”

8Ɗa Yesu wu ushuki ni, “Wi ta̱ uɗani, ‘Kuɗa̱ngu vi lyaꞋaka Vuzavaguɗu Ka̱shile ka̱ nu kayala endeꞋen, a̱yi ɗa kpamu vuza na va kuyaꞋanka tsugbashi.’ ”#K.Wil. 6:13. 9Ɗa Kalijani ka ɗikai ni a kubana a Urishelima a̱ ubuta̱ u na u laꞋi ugaɗi dunduꞋun a̱ A̱Ꞌisa̱ a Gbayin, ɗa u danai, “Avu Maku ma̱ Ka̱shile maꞋa baci vi mayun, ikpangu a iɗika. 10Adama a na wi ta̱ uɗani, ‘Wi ta̱ a kudana alingata a̱ ni a inda wu. 11I ta̱ kpamu e kukeɓe wu, adama a na ka̱ta̱ vu ta̱ɗa̱tsa̱ a katali ba.’ ”#4:11 Punu na, Kalijani ka dakakai adama a na u yaꞋanka Yesu ugboji. Uzuwakpani u Kuku (Ishp. 91:11-12), u danai Ka̱shile ki ta̱ a̱ kusuku alingata a̱ ni a̱ ɓa̱nka̱ wu adama a na vu ta̱ɗa̱tsa̱ ba.

12Ɗa Yesu wu ushuki ni, “A ɗana ta̱, ‘Ka̱ta̱ vu kondo Vuzavaguɗu Ka̱shile ka̱ nu ba.’ ”#K.Wil. 6:16.

13Ana Kalijani ko kotsoi ikondishi i ni dem, ɗa u lazai u ka̱sa̱kpa̱i ni biꞋi.

Yesu u gita̱i ulinga a̱ Ga̱lili

(Mat. 4:12-17; Mar. 1:14-15)

14Ɗa Yesu u lazai o kubono a uɓon u Ga̱lili. Utsura wa Ayinviki a̱ Ka̱shile kpamu wi ta̱ koɓolo n a̱yi. Arabali a̱ ni kpamu ɗa a̱ ka̱na̱i kuka̱ra̱Ꞌa̱sa̱. 15Ɗa u ka̱na̱i kuyotsongusu uma a̱ unu a avasa, ɗa uma kpamu a̱ ka̱na̱i kucikpa yi.

A iwain Yesu a Nazara

(Mat. 13:53-58; Mar. 6:1-6)

16Ana Yesu u yawai Nazara (ubuta̱ u na u kumgbai), ɗa a kanna ka Ashibi u uwai a̱ kunu ka avasa,† uteku u na u ci yaꞋansa. Ɗa u ɗenga̱i adama a na u yaꞋan mekecu. 17Ɗa e nekei ni katagarda ke keneki Ishaya, ɗa u ba̱ra̱kpa̱i kaꞋa, ɗa u cinai ubuta̱ u na a ɗanai,

18“Ayinviki a Vuzavaguɗu i ta̱ koɓolo nu mpa, ɗa a zuwai mu adama a na n dana aza a unambi Arabali a Singai. U suku mu ta̱ kpamu adama a na n dana a̱ ka̱sa̱kpa̱ aza a na i ugbashi. M ɓa̱yuwa̱ kpamu a̱shi a̱ a̱yimba̱, mi isa kpamu aza a na uma i o kudomoku. 19N dana kpamu na va ayin a yawa ta̱ adama a na Vuzavaguɗu wi ta̱ a kuyaꞋanka uma kasingai.”#4:19 Yesu a kuyaꞋan kadanshi a Katagarda ki Ishaya 61:1-2.

20Ɗa u ka̱ta̱la̱i katagarda ka, ɗa u nekei vuza vu ulinga, ɗa u da̱sa̱ngi adama a na u yaꞋan kuyotsongusu. Aza a na i punu a̱ kunu ka avasa ka dem, ɗa a̱ ka̱na̱i kinda yi. 21Ɗa u ka̱na̱i kudana le, “Anana kadanshi ka katagarda ka ka shana ta̱ a atsuvu a̱ ɗa̱.”

22Dem vi le ɗa a̱ ka̱na̱i kucikpa yi, ɗa a̱ ka̱na̱i kuyaꞋan mereve ma kadanshi ku uyoꞋo ka na u yaꞋin va, ali ɗa a danai, “Ashe a̱yi maku ma̱ Isuhu† maꞋa ba?”

23Yesu u danai le, “Mayun sai i dana mu kansa ka nam pa ka, ‘Koboci, ta̱na̱ta̱ngu ka̱ci ka̱ nu.’ I dana baci nannai yi ta̱ a kudana mu, ‘YaꞋan ili i mereve punu na a̱ ubuta̱ u uma a̱ nu uteku u na vi yaꞋin a Kafarnahum.’ 24Amma n dana ɗa̱ mayun, a ci cikpa keneki a̱ ubuta̱ u uma a̱ ni ba.

25“Mayun ɗa, a ayin e keneki Iliya, agapa o yoku i ta̱ lo (aza na ali e le a̱ kuwa̱i) i a kuciga uɓa̱nki. Adama a na a̱ sa̱nga̱i mini ma gaɗi ali a̱ya̱ a tatsu n kagimi, ɗa kambulu ka gbayin ka̱ yikpa̱i iɗika i nan lo. 26Amma a̱ suku Iliya a kubana wa agapa o yoku ba, sai u kagapa ko yoku komoci na ɗe a Zarifatu a uɓon u Sida.#1 Ng. 17:1-16. 27A ayin a keneki Ilisha,† nkutu mi ta̱ lo n a̱bunda̱i punu a Israila. Amma ko vuza te a̱ ka̱tsuma̱ ke le o potsokpo ba, sai NaꞋama† ɗa endeꞋen, vuza va aza a Siriya.”#2 Ng. 5:1-14.

28Ana a panai nannai, ele vu na i punu a̱ kunu ka avasa ka, ɗa a yaꞋin wupa n a̱bunda̱i. 29Ɗa a̱ ɗenga̱i, ɗa a̱ uta̱ka̱i ni a̱ uka̱ra̱Ꞌi u likuci a̱ ubuta̱ u na wi gaɗi n ka̱ga̱guru, adama a na e tecengu yi ɗe. 30Amma ɗa u kpatalai sayin, ɗa u lazai punu e mere me le.

Vuza vu wunla̱i u gbani-gbani

(Mar. 1:21-28)

31Ɗa Yesu u lazai a kubana a Kafarnahum, likuci i yoku punu a̱ Ga̱lili, ɗa kanna ka Ashibi u ka̱na̱i kuyotsongusu le. 32Ɗa a̱ ka̱na̱i kuyaꞋan mereve n kuyotsongusu ku ni, adama a uteku u na wi o kuyotsongusu n utsura.

33Punu a̱ kunu ka avasa ka, vuza yoku wi ta̱ punu n wunla̱i u gbani-gbani† wi nshinda̱, ɗa u ɗengusa̱i ka̱la̱ka̱tsu n utsura, 34“Yi ɗa̱i ɗa vi o koꞋuso tsu, Yesu vuza vu Nazara? Vu ta̱wa̱ ta̱ adama a na vu una tsu? N yeve ta̱ ko avu ɗa ya, Vuzaciɗa nan lo ɗa vuza vu Ka̱shile!”

35Ɗa Yesu u dansukai ni, u danai, “Paɗa bini! Ka̱ta̱ vu ka̱sa̱kpa̱ yi.” Ana wunla̱i wa u ɓasangi ni a iɗika lo a̱ ubuta̱ u uma, ɗa u ka̱sa̱kpa̱i ni, amma ta na u ciya̱ usa̱n ba.

36Ɗa mereve ma̱ ka̱na̱i le dem, ɗa a̱ ka̱na̱i mecenshenei, “IcuꞋu i kadanshi i yi ɗa̱i nannai? Ɗa wi a kuyaꞋanka wunla̱i u gbani-gbani kadanshi babu wovon, ali ɗa kpamu wunla̱i u sumai n u ka̱sa̱kpa̱i uma!” 37Ɗa arabali a a̱ ka̱ra̱Ꞌi dem punu a uɓon wa.

Yesu u potsokpoi akaya a̱ Biturusu

(Mat. 8:14-17; Mar. 1:29-34)

38Ɗa Yesu u ɗenga̱i punu a̱ kunu ka avasa ka, ɗa u uwai a kpaꞋa ku Biturusu, ɗa ta na u cinai a̱na̱ku a vuka vu Biturusu a saɓanai n kuta̱nu. Ɗa o folonoi ni adama a na u ta̱na̱ta̱ngu yi. 39U shamgbai ɗevu n a̱yi, ɗa u dansukai kuta̱nu ka. Ɗa ta na u ta̱na̱i, ali ɗa u ɗenga̱i ɗa u ka̱na̱i kuɓa̱nka̱ le.

40Kanna ka nan lo a kubana kulivi, uma a banka ta̱ n aza a mbanaki kakau u Yesu adama a na u zuwaka le ekiye ka̱ta̱ u potsokpo le. 41Wunla̱i u gbani-gbani kakau kpamu u tsu uta̱ ta̱ punu u uma n a̱bunda̱i. A̱ ka̱na̱ kpamu yoroli, n a danai, “Avu Maku ma̱ Ka̱shile maꞋa.”

Amma u dansuka le ta̱, ɗa u sa̱nka̱i le kadanshi, adama a na e yeve ta̱ a̱yi ɗa Kirisiti Kishi.

Yesu a kudana uma kadanshi ka̱ Ka̱shile

(Mar. 1:35-39)

42Ana kayin ka asai, ɗa Yesu u ɗenga̱i u banai a̱ ubuta̱ u na wi babu vuza. Ɗa ta na uma a̱ ka̱na̱i kula̱nsa̱ yi. Ana e enei ni, ɗa o folonoi ni adama a na ka̱ta̱ u ka̱sa̱kpa̱ likuci i le ba. 43Amma ɗa u danai le, “Mayun ɗa, n dana likuci i yoku Arabali a Singai o tsugono tsu Ka̱shile,† adama a na a ɗa a̱ suꞋuki mu.” 44Ɗa u ka̱na̱i ka̱ka̱ra̱sa̱ a kudana uma kadanshi ka̱ Ka̱shile ɗe a̱ unu a avasa a uɓon u Yahuda.#4:44 Iɗani i kuku i yoku i danai “Ga̱lili”.

Currently Selected:

Luka 4: asgNT

Highlight

Copy