Luka 5

Yesu u gita̱i kuɗeke mukumitoni n ni

(Mat. 4:18-22; Mar. 1:16-20)

1Kanna ke te, Yesu lo a kashani a̱ ka̱kina̱ ka Mala ma̱ Ga̱lili. Uma ta na a banai wa̱ ni n a̱bunda̱i, adama a na a pana kadanshi ka̱ Ka̱shile. 2Ɗa we enei antsu e re lo a na osoruku a zuwai adama a na i ta̱ a̱ kuza̱Ꞌa̱ maza ma̱ bilili me le. 3Ɗa u uwai a kpantsu ku yoku ku Sima ku ɗa ta na. Ɗa u danai e tecengu kpantsu ka kenu. Ɗa u da̱sa̱ngi, adama a na u ciya̱ u yaꞋan kuyotsongusu.

4Ana u kotsoi kuyaꞋanka le kadanshi, ɗa u danai Sima, “Ɗika maza ma̱ nu, taɗuku maꞋa a̱ ubuta̱ wu uga̱vi adama a na vi ciya̱ adan.”

5Ɗa Sima u danai ni, “Vuzagbayin, ci yaꞋan ta̱ ɗe ulinga n kayin dem ci ciya̱ ili ba. Adama a na avu ɗa vu danai, ci ta̱ a kuyaꞋan.”

6Ana a yaꞋin nannai, ɗa e remei adan n a̱bunda̱i, ali bilili vi le vi cigai kukara. 7Ɗa e ɗekei aza e le a bana a̱ ɓa̱nka̱ le. Ɗa a banai ɗa a shatangi antsu e le dem, ali a ɗa a cigai kuliɓa.

8Ana Sima Biturusu we enei nannai, ɗa u kuɗa̱ngi ɗa u lyaꞋi kayala, ɗa u danai, “Vuzagbayin, ɗenga̱ lo ɗevu nu mpa, mpa vuza vu unushi ɗa.” 9U dana ta̱ nannai adama a na a̱yi n aza a̱ ni dem a yaꞋan ta̱ mereve, adama a̱ ka̱bunda̱i ka adan ka na e remei. 10Ɗa Yakubu n Yahaya, muku n Zabidi, n Sima toku vi le a yaꞋin kpamu mereve.

Ɗa Yesu u danai Sima, “Ka̱ta̱ vu pana wovon ba. Uteku n anana vo kudoku ve reme adan ba, vi ta̱ o kokpo vuza na u kuta̱wa̱ n uma.” 11Ɗa a̱ uta̱ka̱i antsu e le pulai a̱ ka̱sa̱kpa̱i lo a ɗa, ɗa o tonoi ni.

Yesu u potsokpoi ma̱kutu

(Mat. 8:1-4; Mar. 1:40-45)

12Kanna ke te, Yesu punu a̱ likuci i yoku lo, ɗa ma̱kutu mo yoku ma̱ ta̱wa̱i wa̱ ni. Ana we enei Yesu, ɗa u kuɗa̱ngi u lyaꞋi kayala, ɗa u folonoi ni, “Vuzagbayin, vi ciga baci, potsokpo mu.”

13Yesu u ba̱ra̱kpa̱i kukiye ku ni, ɗa ta na u saꞋwai vuma va. Ɗa u danai, “N ciga ta̱. Potso!” Gogo va lo, ɗa ukutu u ka̱sa̱kpa̱i ni.

14Ɗa Yesu u danai ni, “Ka̱ta̱ vu dana vuza ba, amma bana vi yotsongu ka̱ci ka̱ nu a̱ ubuta̱ u ganu. Ka̱ta̱ vi lyuka uteku u na Musa u danai adama a na o potsokpo wu ta̱. Na ɗa urotu u na u kokpo we le.”#A.Gan. 14:1-32.

15Ko n nannai, arabali a̱ ni a, a̱ ka̱ra̱Ꞌi ka̱u, ali ɗa ka̱bunda̱i ka uma ka̱ ta̱wa̱i kupanaka yi, ka̱ta̱ kpamu o potsokpo le mɓa̱la̱. 16Yesu ta na u tsu bana ta̱ a̱ ubuta̱ endeꞋen ni, adama a na u yaꞋan kavasa.

Yesu u potsokpoi ma̱kutsuma̱

(Mat. 9:1-8; Mar. 2:1-12)

17Kanna ke te, Yesu a kuyaꞋan kuyotsongusu, ɗa Afarishi† nu nlum n Wila̱ lo ida̱shi, ele ɗa a̱ uta̱i ka̱tsura̱ ka̱tsura̱ ka̱ Ga̱lili dem n Yahuda n Urishelima kpamu. Utsura u Vuzavaguɗu wi ta̱ lo n a̱yi, adama a na u potsokpo aza a mbanaki. 18Uma o yoku a yawai m ma̱kutsuma̱ a kajiba, ɗa a piyai adama a na a uka yi punu a̱ kunu ka, ka̱ta̱ o poloko Yesu va asuvu. 19A fuɗa a yaꞋan nannai ba, adama a̱ ka̱bunda̱i ka uma. Ɗa a kumbai kukpa̱Ꞌa̱ ɗa a karakpai, ɗa o zorukpoi ni punu n kajiba ka̱ ni e mere ma uma, sai a asuvu e Yesu derere.

20Ana Yesu we enei uneki wa̱ a̱ɗu u le, ɗa u danai, “Ka̱ja̱Ꞌa̱ ka̱ va̱, a cinukpaka wu ta̱ n unushi u nu.”

21Afarishi nu nlum n Wila̱ ma, a̱ ka̱na̱i kusheshe uteku u le, “Yayi vuza tsu nam pa o kubonoko ka̱ci ka̱ ni tsu Ka̱shile? Yayi u kufuɗa kucinukpaka n unushi? Sai Ka̱shile endeꞋen.”

22Yesu u yeve ta̱ ili i na i e kusheshe, ɗa ta na we ecei le, “Yi ɗa̱i ɗa yi e kusheshe ili i nan lo a̱ a̱ɗu a̱ ɗa̱? 23Ye ne i ɗai i laꞋi n ɗevu, an vuza wa dana, ‘A cinukpaka wu ta̱ n unushi u nu,’ ko a dana, ‘Ɗenga̱, vu wala’? 24Amma, mi ta̱ a kuyaꞋan nannai, adama a na i yeve a na mpa, Maku ma Vuma,† mi n utsura u na u kucinukpaka n unushi.” U danai ma̱kutsuma̱ ma, “N dana wu, ɗenga̱, ɗika kajiba ka̱ nu, vu wala a kubana a kpaꞋa.” 25Gogo lo, ɗa u ɗenga̱i a asuvu e le, u ɗikai kajiba ka̱ ni. Ɗa u lazai a kubana a kpaꞋa, n u cikpai Ka̱shile. 26Yaba dem u yaꞋin mereve, ɗa a cikpai Ka̱shile kpamu. A panai wovon ka̱u, ɗa a danai, “Ce ene ta̱ ili i gbangam anana.”

Yesu u ɗekei Levi

(Mat. 9:9-13; Mar. 2:13-17)

27Ana i nan lo i lazai, Yesu wu uta̱i a̱ ubuta̱ u yoku. Ɗa we enei vuza na e ci ɗeke Levi,† kishi ku utafu,† a̱ ida̱shi a kafalaka. Ɗa u danai ni, “Tono mu.” 28Ɗa u ɗenga̱i u ka̱sa̱kpa̱i ili i ni ra̱ka̱, ɗa ta na u tonoi ni.

29Ɗaɗa Levi u foɓusoi ka̱ɗiva̱ ka gbayin a kpaꞋa ku ni adama e Yesu. Ɗa ishi a utafu n a̱bunda̱i n uma o yoku lo a lyaꞋi koɓolo dem. 30Amma Afarishi nu nlum n Wila̱ n le, a yaꞋankai mukumitoni kadanshi ko mololo, a danai, “Yi ɗa̱i ɗa ya kulyaꞋa n i soꞋi n ishi a utafu n aza a̱ unushi dem?”

31Yesu wu ushuki le, “Vuza vi ikyamba m ma̱ta̱na̱ ɗa u tsu la̱nsa̱ vuza va̱ a̱guma̱ ba, amma sai vuza vu mɓa̱la̱. 32N ta̱wa̱ adama a na n ɗeke aza a̱ usuɓi ba, amma sai aza a̱ unushi a kubana a̱ ubuta̱ u kushika̱ unushi.”

Keci adama a̱ kuka̱na̱ ku una̱

(Mat. 9:14-17; Mar. 2:18-22)

33A danai ni, “Mukumitoni n Yahaya a̱ tsu ka̱na̱ ta̱ una̱ n a vasai, ali m mukumitoni ma Afarishi dem, amma n nu sai kulyaꞋa n o soꞋi ayin tutu.”

34Ɗa Yesu wu ushuki, “Va kuzuwa ta̱ omoci a vuza vi yolo i savu a̱ ka̱na̱ una̱, a̱yi ta na lo koɓolo n ele? 35Ayin i ta̱ lo a̱ kuta̱wa̱ a na a kuɗika vuza vi yolo i savu va we le, a̱ ka̱tsuma̱ ka ayin a nan lo i ta̱ a̱ kuka̱na̱ una̱.”

36Ɗa u danai le agisana a nam pa: “Babu vuza na u kukara motogu ma savu, ka̱ta̱ u pa̱ɗa̱ngu motogu ma̱ kuku. Vuza na baci u yaꞋin nannai, motogu ma savu ma mi ta̱ a̱ kuna̱mgba̱ ra̱ka̱. Kakashi ka savu ka ka̱ kuciya̱sa̱na̱i n ka̱ kuku ka ba. 37Babu vuza na u kutsungu ribinya a kedele ka̱ kuku. Vuza na baci u yaꞋin nannai, ribinya ya yi ta̱ a kushita ka̱ta̱ i ɓoso kedele ka, ka̱ta̱ u namba ribinya ya n kedele ka dem. 38Amma ribinya a̱ tsungu i ɗa e kedele ka savu. 39Babu vuza na u kiwanai n washi, ka̱ta̱ u doku u ciga kusoꞋo ribinya. Adama a na wi ta̱ a kudana, ‘Kakuci ka laꞋa ta̱ n uyoꞋo.’ ”

Currently Selected:

Luka 5: asgNT

Highlight

Copy