Fíĉilum 25
25
Gabugor Aburaham gapago
1Aburaham nabbañ ayab ace aare gajaol Kétura. 2Nabugol úᵽur gaamme Simiran, Yokuĉan, Medan, Majan, Yiĉebak ni Ĉua. 3Yokuĉan nabuh Ĉeba ni Dedan ; Dedan aamme ᵽay afan ala bugaa Aĉur, Létuĉ ni Léum. 4Majan úᵽurol guomme Efa, Efer, Henok, Abida ni Elida. Dáuru ᵽe gabugor Kétura.
5Aburaham nahat áᵽurol Isak fubajol ᵽe. 6Náᵽuren wafol uce asen úᵽurol bugaa Kétura ni Hagar. Bare balama aĉet, náᵽurenil gujow gúrali áᵽurol Isak, mbaa bo tinah talu túᵽureul me.
Eĉet Aburaham
7-8Fúfanum Aburaham fúariari ban ni fiᵽio. No naĉet me, o babajer símit ekeme ni úvi gúfaji ni gaat (175). Min ñer aalo atoh bo sipayol n’ufuga. 9Ñer úᵽurol Isak ni Isimael n’gújaenum efuluŋol iki gufoh Makupela baubu Mámure, ni gaun gagu gaamme ni galah gagu gal Eforon áᵽur Soar ala Hit ; 10galah gaugu go Aburaham anom me ni bugaa Hit, dó gufogol me galam aarol Saara. 11No Aburaham aĉet me ᵽúrto, Aláemit násonien áᵽurol Isak atajen. O baĉiner lof éhaᵽa yay yo guvoge me Lahai-Roi.
Gabugor Isimael
12Gáu Isimael maa gujae, áᵽur Aburaham o nabaj me ni Hagar ala Esíp aamme amigel Saara :
13Uᵽúr Isimael ubuge, ti gúulo me : Nebayot aamme afammaol, mbiban Kedar, Adibeel, Mibusam, 14Miĉema, Duma, Masa, 15Hadad, Tema, Yétur, Nafiĉ, ni Kedema. 16Dáuru úᵽur Isimael gaamme guñen ni gúuba ; bugo ᵽe bífesum bom, ánoan ni bugo afan ala fiil nam, ban nasen ésugol ni furobool gajaol. 17Isimael no naĉet me, o babajer símit ekeme ni ávi ni gaat ni súuba (137). Min aalo atoh bo sipayol n’ufuga. 18Buganol guke me guĉin ni mof mamu malof me Esíp, újogum Havila bi Ĉur, galam mof mamu maa Aĉur. Gaunorutil ni gutiil go guĉil me éhatulor yauyu.
Esau ni Sakob
19Gáu Isak, áᵽur Aburaham, maa gujae :
Isak, Aburaham abugol. 20No nabaj me símit úvi gúuba, nayab Rebeka aamme bájur Betuel, náni ᵽoᵽ álin Laban. Bugo éubail Padan-Aram gúᵽullo. 21Bare Rebeka ájuut affas fufane. Ñer Isak nah’alaw Atúla tima nasen aarol gásumay. Atúla náttunol min akanol ateb. 22Ni bíteb baubu, náni n’enah múuba, ban múuba maumu nihi mutaj ró ni farol. Rebeka najahali naah : « Wa uom n’ebajom ? » Mufaŋ najow ake eŋes gasab n’Atúla. 23Atúla naagol :
« Uú gúuba guom n’aw,
súsuh súuba ᵽan súᵽurul ni bugo sañumut ejamor :
ece ᵽan efaŋ epayo sembe,
apuma ᵽan ábahen afamma amigel. »
24No funagol fiĉih me, nabaj may múuba. 25Amundum me ajuh tíyaŋ, ni kan añil ájuge, ban nafalet ti énuhureŋ. N’gukanol gajow gagu gaa Esau (dóemme "nafalefalet"). 26Mbiban, atiol nájoul gañenol go baroŋer n’ejoh futoñ afamma. N’guvogol Sakob (dóemme "najogol ni futoñ")#25.26 Sakob : gajow gagu gaa Sakob, ni gúhiboriay gújue may gúni abuta. . No Esau ni Sakob gubugi me, Isak o babajer símit úvi gúfaji (60).
27No uñiaw gújalo me, Esau nakan asaa ámah, ban namaŋ baha. Sakob o nakan an abebene, nd’ake ban. 28Ᵽail, Esau nafaŋe namaŋe mata ellu baha naruhene ; jail tin o biinumol ni Sakob nabaŋ bo.
29Funah fice, Esau nábbañul ni jasaw mayoge. Natoh atiol Sakob o básiler búholoŋ baa gusah. 30Naagol : « Ujíom básileri bájuh me itiñ, bieb bumugom ! Básiler baubu bájuh me, bo nimaŋe. » (Yo eĉil me ni’gusalol Edom, dóemme "ájuh me".) 31Sakob naagol : « Umundum ᵽan unomenom fufanei pe ! » 32Naagol : « Ᵽan iĉet m’bieb. Fufaneom wa fúju to ekan ? » 33Naagol : « Ñer ubbat ! » Min abbat gaa búoh nanomene Sakob fufaneol. 34Ñer Sakob nasenol unaĉ ni básiler gusah gagu atiñ ak’apoñ, aban narem nakay. Mamu Esau aĉotihen mee fufaneol.
Currently Selected:
Fíĉilum 25: bqjDBL2
Highlight
Share
Copy
Want to have your highlights saved across all your devices? Sign up or sign in
Wycliffe Bible Translators, Inc. All rights reserved.
