KO ‘EKISOTO 11
11
Ko e Tala ‘e Mōsese ‘e Mate ‘a e ‘Uluaki Tama Kotoa pē
1PEA folofola ‘a Sihova kia Mōsese, ‘Oku kei toe ha tā ‘e taha ke u ‘omi kia Felo, pea ki ‘Isipite; hili ia te ne tukuange kimoutolu; ka ne ka tukuange homou kotoa te ne mātu‘aki kapusi kimoutolu mei heni. 2Ke ke lea mu‘a ‘i he telinga ‘o e kakai ke nau kole teunga siliva mo teunga koula, ‘a e tangata mei hono kau tangata, mo e fefine mei hono kau fefine. 3Pea na‘e tuku ‘e Sihova ke ‘ofeina ‘a e kakai ‘i he ‘ao ‘o e kau ‘Isipite. Koe‘uhi ko e tangata ko Mōsese na‘a ne mā‘olunga ‘aupito ‘i he fonua ko ‘Isipite, ‘i he ‘ao ‘o e kau tamaio‘eiki ‘a Felo, pea mo e ‘ao ‘o e kakai.
4Pea fakahā ‘e Mōsese, Ko eni ‘a e folofola ‘a Sihova, ‘I he tu‘uapō te u ‘alu atu ‘i he lotolotonga ‘o ‘Isipite: 5pea ‘e mate ‘a e ‘uluaki tama kotoa pē ‘i he fonua ko ‘Isipite, ‘o fai mei he ‘uluaki tama ‘a Felo ‘oku ‘afio ‘i hono taloni, ‘o a‘u ki he ‘uluaki tama ‘a e kaunanga ‘oku nofo mei he tu‘a me‘a momosi; pea mo e ‘uluaki tama kotoa pē ‘a e fanga manu. 6Pea ‘e ai ha fu‘u tangi ‘i he feitu‘u kotoa pē ‘o ‘Isipite, ‘a ia kuo te‘eki hano tatau, pea ‘e ‘ikai toe ai hano tatau. 7Ka ‘e ‘ikai ue‘i ‘e ha kulī hono ‘elelo ki ha taha ‘o ha‘a ‘Isileli, ki he kakai pe ki he manu; koe‘uhi ke mou ‘ilo ‘oku vahe‘i ‘e Sihova ‘a e kakai ‘Isipite mei he kakai ‘Isileli. 8Pea ko kinautolu ni kotoa pē ko ho‘o kau tamaio‘eiki te nau ‘alu hifo kiate au, pea te nau hū kiate au, ‘o pehē, ‘Alu atu koe, mo e kakai kotoa ‘oku fakaongo kiate koe; pea hili ia te u toki ‘alu atu. Pea ne hū kitu‘a meia Felo kuo lili.
9Pea na‘e folofola ‘a Sihova kia Mōsese, ‘o pehē, ‘E ‘ikai tokanga ‘a Felo kiate kimoua; koe‘uhi koe fakalahi ‘eku ngaahi mana ‘i he fonua ko ‘Isipite. 10Pea na‘e fai ‘e Mōsese mo ‘Ēlone ‘a e ngaahi mana ko ia kotoa pē ‘i he ‘ao ‘o Felo, ka ka fakafefeka ‘e Sihova ‘a e loto ‘o Felo, pea na‘e ‘ikai te ne tukuange ‘a ha‘a ‘Isileli mei hono fonua.
Currently Selected:
KO ‘EKISOTO 11: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
