KO ‘EKISOTO 14
14
Ko e Laka Atu ‘a e Kakaí he Tahi Kulokulá
1Pea folofola ‘a Sihova kia Mōsese, ‘o pehē, 2Lea ki ha‘a ‘Isileli ke nau foki ‘o fokotu‘u tēniti ki he potu hahake ‘o Piheloti, ‘i he vaha‘a ‘o Mikitoli mo e tahi, ‘i he potu hahake ‘o Peali-Sēfoni; ‘i hono hāngai ko ia te mou fokotu‘u homou tēniti, ‘i tahi. 3Pea ‘e lau ‘e Felo ki ha‘a ‘Isileli, Kuo nau ‘efihia ‘i he fonua, kuo tāpuni ‘a e Toafa kiate kinautolu. 4Pea te u fakafefeka ‘a e loto ‘o Felo, pea te ne tuli kiate kinautolu; pea te u lāngilangi‘ia ‘ia Felo, mo ‘ene fu‘u hōsitē kotoa; pea ‘e ‘ilo ‘e he kau ‘Isipite ko Sihova au. Pea na‘a nau fai pehē.
5Pea na‘e fakahā ki he Tu‘i ‘Isipite ‘oku hola ‘a e kakai: pea na‘e liliu ‘a e loto ‘o Felo mo e loto ‘o ‘ene kau tamaio‘eiki ki he kakai, pea nau pehē, Ko e hā kuo tau fai pehē ai, ‘o tukuange ‘a ha‘a ‘Isileli mei he tauhi kiate kitautolu? 6Pea ne teuteu ‘ene sāliote, ‘o ne ‘alu mo ia hono kakai: 7‘io na‘a ne ‘ave ‘a e sāliote fili ‘e onongeau, mo e sāliote kotoa pē ‘a e kau ‘Isipite, pea mo e ngaahi kapiteni ki hono kotoa. 8‘Io, na‘e fakafefeka ‘e Sihova ‘a e loto ‘o Felo ko e Tu‘i ‘Isipite, pea na‘a ne tuli ki ha‘a ‘Isileli; pea ko ha‘a ‘Isileli ē ‘oku nau ‘alu atu mo e nima kuo hiki tā.#14.8 mo e… tā; pe ‘i honau malu‘i ‘e Sihova. 9Ka ka tuli kiate kinautolu ‘e he kau ‘Isipite, ‘o nau ma‘u kinautolu ‘oku nau ‘apitanga ‘i tahi–‘io ko e hoosi kotoa mo e sāliote ‘a Felo, mo ‘ene tau heka hoosi mo ‘ene hōsitē, ka ‘oku nau ‘i Piheloti, ‘i he potu hahake ‘o Peali-Sēfoni.
10Pea fakaofiofi mai ‘a Felo, pea tāngaki hake ‘a ha‘a ‘Isileli, pea tā ko ‘Isipite ē ‘oku tulimui mai; pea na‘a nau manavahē fu‘u; pea kaila ‘a ha‘a ‘Isileli kia Sihova. 11Pea na‘a nau pehē kia Mōsese, Ko e masiva tanu‘anga ‘apē ‘a ‘Isipite kuo ke ‘ave ai kimautolu ke mate ‘i he toafa ni? Ko e hā kuo ke ngaohi pehe‘i ai kimautolu, ‘o ‘omi mei ‘Isipite? 12‘Ikai ko eni ‘a e lea na‘a mau fai kiate koe ‘i ‘Isipite, ‘o mau pehē, Tukuange kimautolu ke mau tauhi ‘a e kakai ‘Isipite? He na‘e ngutuhua ange ‘emau tauhi ‘a e kakai ‘Isipite ‘i he‘emau mate ‘i he toafa ni.
13Pea na‘e lea ‘a Mōsese ki he kakai, ‘Oua ‘e manavahē; mou tu‘u pē ‘o mamata ki he fakamo‘ui ‘a Sihova, ‘a ia te ne fai ma‘amoutolu he ‘aho ni: he ko e kau ‘Isipite kuo mou sio ki ai he ‘aho ni ‘e ‘ikai te mou toe mamata ki ai ‘o ta‘engata. 14Ko Sihova te ne tau ma‘amoutolu, ka ko kimoutolu te mou tu‘u noa pē.
15Pea folofola ‘a Sihova kia Mōsese, Ko e hā ‘oku ke tangi ai kiate au? lea ki ha‘a ‘Isileli ke nau laka atu. 16Ka ko koe te ke ofa‘aki ho tokotoko, ‘o mafao ho nima ki tahi, ‘o vaeua ia: pea ‘e ‘alu ‘a ha‘a ‘Isileli ‘i he loto tahi ‘i he mōmoa. 17Pea ko au ē ‘oku ou fakafefeka ‘a e loto ‘o e kakai ‘Isipite, pea te nau muimui kiate kimoutolu, pea te u lāngilangi‘ia ‘ia Felo mo ‘ene hōsitē kotoa, ‘a ‘ene tau heka hoosi mo ‘ene tau sāliote. 18Pea ‘e ‘ilo ‘e he kau ‘Isipite ko Sihova au, ‘oka u ka fakalāngilangi‘i au ‘ia Felo, ‘i he‘ene tau sāliote mo ‘ene tau heka hoosi.
19Pea na‘e hiki ‘a e ‘āngelo ‘a ‘Elohimi, ‘a ia kuo ne hā‘ele mu‘omu‘a ki he tau ‘a ‘Isileli, ‘o ne hā‘ele mei mui; pea na‘e hiki ‘a e pou ‘ao mei honau ‘ao, ‘o tu‘u mei honau tu‘a; 20‘o ne hū ‘i he vaha‘a ‘o e tau ‘a ‘Isipite mo e tau ‘a ‘Isileli, ‘o ne ‘i ai pē ko e ‘ao mo e fakapo‘uli; pea ne fakamaama ‘i he pō:#14.20 ‘o ne ‘i ai… ‘i he pō; ‘Oku ngali tonu hono hiki ‘o: Ko e ‘aó na‘e hoko ai ‘a e fakapo‘uli ki he kakai ‘Isipité ka ko e maama ki he kakai ‘Isilelí, ka ‘oku ‘ikai ke mahino ‘a hono faka-Hepeluú. ko ia na‘e ‘ikai ke vāfeinofi ai ‘a ē mo ē ‘i he pō kotoa.
21Pea mafao atu ‘e Mōsese hono nima ki tahi, pea na‘e fakatafe atu ‘e Sihova ‘a e tahi ‘aki ‘a e matangi mālohi mei hahake ‘i he pō ko ia kotoa, ‘o ne fakamātu‘u ‘a e tahi, pea na‘e tu‘usi ‘a e tahi. 22Pea na‘e hū ‘a ha‘a ‘Isileli ki he loto tahi ‘i he mōmoa; pea na‘e tu‘u mai ‘a e tahi mo‘onau ‘ā mei to‘omata‘u mo to‘ohema.#1 Kol 10.1-2; Hep 11.29 23Pea na‘e tuli atu kiate kinautolu ‘a e kau ‘Isipite, ‘o hū ki he loto tahi ‘a e ngaahi hoosi kotoa pē ‘a Felo, ‘a ‘ene tau sāliote mo ‘ene tau heka hoosi. 24Pea ‘i he uasi pongipongi, ‘iloange na‘e fofonga atu ‘a Sihova ki he tau ‘a ‘Isipite ‘i he pou afi mo ‘ao, ‘o ne veuki ‘a e tau ‘a ‘Isipite; 25‘o ne fakapine ‘a e me‘a teka ‘o ‘enau ngaahi sāliote, ‘o fakamatekangata‘a. Pea pehē ‘e he kau ‘Isipite, Tau hola mei he ‘ao ‘o ‘Isileli; he ko Sihova ‘oku tau ma‘anautolu ki he kau ‘Isipite.
26Pea folofola ‘a Sihova kia Mōsese, Mafao atu ho nima ki tahi, koe‘uhi ke foki ‘a e tahi ‘o lōmaki‘i ‘a e kakai ‘Isipite, ‘a e tau sāliote mo e tau heka hoosi. 27Pea mafao ‘e Mōsese hono nima ki tahi, pea na‘e foki mai ‘a e tahi ki hono loloto ‘i he ma‘a ‘a e ‘aho; pea hola ‘a e kau ‘Isipite, ‘o fakafetaulaki ki ai, pea tupe‘i ‘e Sihova ‘a e kau ‘Isipite ki loto tahi. 28‘Io, na‘e foki ‘a e tahi, ‘o lōmaki‘i ‘a e tau sāliote mo e tau heka hoosi mo e hōsitē kotoa ‘a Felo na‘e muimui atu kiate kinautolu ki loto tahi: na‘e ‘ikai toe hanau momo‘i toko taha. 29Ka ka hā‘ele ‘a ha‘a ‘Isileli ‘i he mōmoa ‘i he loto tahi, pea na‘e tu‘u mai ‘a e tahi mo‘onau ‘ā ‘i honau to‘omata‘u mo to‘ohema.
30Ko ia, na‘e fakamo‘ui ‘e Sihova ‘a ‘Isileli ‘i he ‘aho ko ia mei he nima ‘o e kau ‘Isipite; pea na‘e mamata ‘a ‘Isileli ki he kau ‘Isipite ‘oku nau mate holo ‘i matātahi. 31Pea vakai ‘e ‘Isileli ‘a e ngāue lahi kuo fai ‘e Sihova ki he kau ‘Isipite; pea na‘e ‘apasia ‘a e kakai kia Sihova, pea na‘a nau tui kia Sihova mo ‘ene tamaio‘eiki ko Mōsese.
Currently Selected:
KO ‘EKISOTO 14: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
