KO ‘EKISOTO 22
22
Ko e ngaahi Lao ki he Fakamo‘ua
1KAPAU ‘e kaiha‘asi ‘e ha taha ha pulu pe ha sipi, ‘o ne tāmate‘i ia, pe fakatau; te ne ‘ange ha pulu ‘e nima ko e fetongi ‘o e pulu ko ia, pea ko e sipi ‘e fā ke fetongi ‘a e sipi. 2Kapau ‘e ma‘u ha kaiha‘a ‘i he‘ene hae fale, pea taa‘i ia, ‘o ne pekia; ‘e ‘ikai lau fakapō ki he tangata ko ia. 3Ka ‘o kapau kuo hopo ‘a e la‘ā ‘i he‘ene fai, ‘e lau ko ‘ene fakapō: na‘e pau ke ne totongi; ka ‘ikai ha‘ane me‘a, ‘e fakatau ia koe‘uhi ko ‘ene kaiha‘a. 4Kapau ‘e mātu‘aki ‘iloa ‘a e me‘a kaiha‘a ‘i hono nima ‘oku kei mo‘ui, pe ko ha pulu pe ‘asi pe sipi, te ne totongi ‘o liunga ua.
5Kapau kuo ‘i ha taha ‘a e kai ‘o ha ngoue pe ha ngoue vaine, ko ‘ene tukuange ‘ene manu ‘o ne kaikai ‘i he ngoue ‘a ha taha kehe;#22.5 Kapau… ngoue ‘a ha taha kehe; pe Kapau ‘e fai ‘e ha taha ha tutututu ‘i ha ngoue pe ko ha ngoue vaine, pea ‘ikai ke ne tokanga ki ai ‘o vela ai e ngoué. te ne totongi ki ai mei he lelei ‘o ‘ene ngoue, mo e lelei ‘o ‘ene ngoue vaine.
6Kapau ‘e puho hake ha afi, ‘o mo‘ua ai ‘a e ‘a talatala, pea vela ai ‘a e ngaahi fokotu‘unga koane, pe ko e ta‘u kuo motu‘u, pe ko e ngoue, kuo pau ke totongi ‘e ia na‘a ne tafu ‘a e afi.
7Kapau ‘e ‘ange ‘e ha tangata ki ha toko taha ha pa‘anga pe ha koloa ke tauhi, pea kaiha‘asia ia mei he fale ‘o e siana; kapau ‘e ‘iloa ‘a e kaiha‘a te ne totongi lōua. 8Kapau ‘e ‘ikai ‘iloa ‘a e kaiha‘a, pea ko e tangata ‘oku ‘o‘ona ‘a e fale te ne ‘unu‘unu mai kia ‘Elohimi, ke sivi pe kuo ‘ikai te ne ala ki he koloa ‘a e tokotaha ko ia.
9Ko e me‘a kotoa pē ‘oku matamata ko e angahala, pe ‘oku kau ki ha pulu, pe ha ‘asi, pe ha sipi, pe ha kofu, pe ko ha me‘a kuo mole, ‘a ia ‘oku pehē ‘e ha taha, “‘Oku pehē ‘a e me‘a,” ‘e ‘ave kia ‘Elohimi ‘ena me‘a; pea ko ia ‘e fakahalaia ‘e ‘Elohimi te ne totongi lōua ki he tokotaha.
10Kapau ‘e ‘ange ‘e ha tangata ki ha taha ha ‘asi, pe pulu, pe sipi, mo e hā fua ha manu, ke tauhi, pea mate ia, pe lavea, pe ‘ave, kae ‘ikai ha taha ‘e mamata ki ai, 11‘e fai ‘i he‘ena me‘a ha fuakava ‘i he huafa ‘o Sihova, ‘Ilo ‘e ia ‘o kapau kuo ne ala ki he koloa ‘a e tokotaha ko ē; pea ko ia ‘oku ‘a‘ana ‘a e me‘a te ne tali ia, pea ‘e ‘ikai ha totongi ‘e fai. 12Ka ‘o kapau na‘e mātu‘aki kaiha‘asia lolotonga ‘ene ‘iate ia, pea te ne toki totongi kiate ia ‘oku ‘a‘ana. 13Kapau na‘e mātu‘aki haehae, ke ne ‘omi ia ko e fakamo‘oni; ‘e ‘ikai te ne totongi ‘a e me‘a kuo haehae.
14Pea kapau ‘e nō ha me‘a ‘e ha tangata mei ha taha kehe, pea lavea ia, pe mate, ka na‘e ‘ikai ‘i ai ‘a e tangata ‘oku ‘a‘ana; kuo pau te ne totongi. 15Kapau na‘e ‘i ai ‘a e tangata ‘oku ‘a‘ana, ‘e ‘ikai ha totongi ‘e fai: kapau ko e manu nō, na‘e fua ia ‘e he pa‘anga ‘o hono nō.
16Kapau ‘e kākaa‘i ‘e ha tangata ha ta‘ahine kuo te‘eki polo‘i, ‘o ne mohe mo ia, kuo pau te ne ‘ange ki he mātu‘a ‘a e koloa totonu, ka ne ma‘u ia mōno uaifi.#Teu 22.28-29 17Kapau ‘oku ‘ikai ‘aupito loto ‘ene tamai ke foaki ia kiate ia, ka te ne ‘ange pē ha pa‘anga ‘o taau mo e fakakoloa ‘o ha ta‘ahine.
18‘E ‘ikai te mou tuku ke mo‘ui ha fefine fai tuki.#Teu 18.10,11
19Ko ia te ne mohe mo ha manu ‘e mate tāmate‘i.#Lev 18.23; 20.15-16; Teu 27.21
20Ko ia ‘oku ne feilaulau ki ha ‘otua, ‘o ‘ikai kia Sihova toko taha, ‘e tuku ia ki he faka‘auha.#Teu 17.2-7
21Ko e muli ‘e ‘ikai te ke fai fakamālohi ki ai, pe fakamamahi‘i; he na‘a mou nofo muli kimoutolu ‘i ‘Isipite.#‘Eki 23.9; Lev 19.33-34; Teu 24.17-18; 27.19 22‘Ilonga ha uitou, pe fānau tamai mate, ‘e ‘ikai te mou fakamamahi‘i kinautolu. 23Kapau te mou momo‘i fai fakamamahi ki ai, ‘io, ka momo‘i tangi ‘e ia kiate au, te u mātu‘aki ongo‘i ‘enau tangi; 24pea ‘e kakaha ‘eku ‘ita, pea te u tāmate‘i kimoutolu ‘aki ‘a e heletā, pea ‘e uitou ‘a homou ngaahi uaifi, pea tamai mate ho‘omou fānau.
25Kapau te ke tali ha nō pa‘anga ‘a ha taha masiva ‘o hoku kakai ‘oku ‘iate koe, ‘e ‘ikai te ke fai kiate ia ‘a e tō‘onga ‘o e tangata ‘oku mo‘ua ki ai ha taha; ‘e ‘ikai te ke ‘eke kiate ia ha toloi.#Lev 25.35-38; Teu 15.7-11; 23.19-20 26Neongo kuo ke ki‘i to‘o pē ‘a e kofu ‘o e tokotaha ko ē mo‘o talifaki, ka te ke fakafoki kiate ia te‘eki ke tō ‘a e la‘ā:#Teu 24.10-13 27he ko si‘ono kafu pē taha ia, ka e kofu ia ‘o hono kili; te ne mohe ‘i he hā? Pea ka faifai pea tangi ia kiate au, pea te u ongo‘i: he ko e taha ‘ofa au.
28‘E ‘ikai te mou tālalakulaku ki he ‘Otua,#22.28 ‘Otuá; pe kau fakamāú. pe kape ki he pule ‘o ho kakai.#Ngā 23.5
29‘Oua te mou tuai ke ‘omi ‘a e mahu mo e huhu‘a ‘o homou ta‘u; ko e ‘uluaki ‘o ho‘omou fānau tangata te mou foaki kiate au.
30‘E pehē foki mo ho‘o fai ki ho‘o fanga pulu, mo ho‘o fanga sipi: ko e ‘aho ‘e fitu te ne ‘i he‘ene fa‘ē, ‘i hono ‘aho valu te mou ‘omi kiate au.
31Pea te mou nofo kiate au ko e kakai tapu: ko ia ko e kakano kuo haehae ‘e he manu ‘i he vao ‘e ‘ikai te mou kai ia: ka te mou lī ia ki he fanga kulī.#Lev 17.15
Currently Selected:
KO ‘EKISOTO 22: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
