KO ‘EKISOTO 4
4
Ko Hono ‘Oange ‘e he ‘Otuá ‘a e Mafai Fai Mana ‘o Mōsese
1PEA tali ‘e Mōsese ‘o pehē, Ka ko eni, ‘e ‘ikai te nau tui kiate au, pea ‘e ‘ikai te nau tali ‘eku lea; he te nau pehē, Kuo ‘ikai hā ‘a Sihova kiate koe.
2Pea folofola ‘a Sihova kiate ia, Ko e hā ena ‘i ho nima? Pea ne pehē, Ko e tokotoko.
3Pea ne folofola mai, Sī ia ki lalo. Pea ne sī ia ki lalo, pea na‘e hoko ia ko e ngata; pea na‘e hola ‘a Mōsese mei ai. 4Pea folofola ‘a Sihova kia Mōsese, Mafao atu ho nima, ‘o puke ‘i hono iku: (pea ne mafao atu hono nima, ‘o ne kuku ia, pea na‘e liliu ia ‘i hono nima ko e tokotoko) 5koe‘uhi ā ke nau tui kuo hā kiate koe ‘a Sihova, ko e ‘Otua ‘o honau tupu‘anga, ko e ‘Otua ‘o ‘Epalahame, ko e ‘Otua ‘o ‘Aisake, pea ko e ‘Otua ‘o Sēkope.
6Pea fai atu ‘e Sihova ‘ene folofola kiate ia, Ke ke ‘ai mu‘a ho nima ki ho kona. Pea ne ‘ai hono nima ki hono kona: pea ‘i he‘ene to‘o mai, tā kuo kilia hono nima hangē ko e sinou. 7Pea ne folofola mai, Toe ‘ai ho nima ki ho kona. (Pea ne toe ‘ai hono nima ki hono kona, pea ‘i he‘ene to‘o mai, tā kuo liliu ‘o hangē ko hono kili.) 8Tala atu, kapau ‘e ‘ikai te nau tui kiate koe, ‘o ‘ikai te nau tali ‘a e lea ‘a e ‘uluaki faka‘ilonga, ka te nau tui pē ki he lea ‘a hono ua. 9Pea pehē, kapau ‘e ‘ikai te nau tui ki he ongo faka‘ilonga ko ena, ‘o ‘ikai te nau tali ho‘o lea, pea te ke ohu ha vai mei he vaitafe, ‘o lilingi ki he funga fonua; pea ko e vai ‘oku ke ohu mei he vaitafe, ‘e hoko ia ko e toto ‘i he funga kelekele.
10Pea lea ‘a Mōsese kia Sihova, ‘Ēī, fakamolemole, ‘oku ‘ikai ko e tangata lea au, talu mei mu‘a mo ‘eku pehē, pea neongo ho‘o folofola ki ho‘o tamaio‘eiki ka ‘oku ou kei pehē pē: he ko e loungutu mamafa au, pea mamafa mo hoku ‘elelo.
11Pea folofola ‘a Sihova kiate ia, Ko hai na‘a ne ngaohi ‘a e ngutu ‘o e tangata? Pea ko hai na‘a ne ngaohi ‘a e noa, pe ko e tuli, pe ko e ‘ā, pe ko e kui? ‘Ikai ko au, Sihova? 12Pea ko ia ke ke ‘alu pē, pea te u ‘i ho ngutu ‘e au, pea te u fakahinohino kiate koe ‘a e lea te ke fai.
13Pea ne pehē, Fakamolemole, ‘Eiki, ka ke fai mu‘a ho‘o fekau ‘i ha taha te ke fekau ai.
14Pea tuputāmaki ‘a Sihova kia Mōsese, ‘o ne folofola, ‘Ikai ‘oku ‘i ai ‘a ‘Ēlone ko e Līvai, ko ho tokoua? ‘Oku ou ‘ilo ‘oku mātu‘aki lea ia. Kae‘uma‘ā foki ‘oku ne ha‘u ke fakafetaulaki kiate koe: pea ‘i he‘ene sio kiate koe ‘e fiefia hono loto. 15Pea te ke lea kiate ia, ‘o ‘ai ‘a e ngaahi lea ko ia ki hono ngutu; pea ko au te u ‘i ho ngutu ‘o‘ou, pea ‘i hono ngutu ‘o‘ona, pea te u hīnoi‘i kimoua ki he me‘a te mo fai. 16Ko ho tangata lea ia ki he kakai: ‘io, te ne fetongi ‘e ia ho ngutu, pea ko koe te ke fetongi ‘a e ‘Otua kiate ia. 17Pea te ke to‘o ‘a e tokotoko ko ena, pea ko e me‘a ko ia te ke fai‘aki ‘a e ngaahi faka‘ilonga.
18Pea ‘alu ‘a Mōsese ‘o fakahā kia Setelō, ko e kāinga ‘o hono uaifi, ‘o ne pehē ki ai, Ka u ‘alu mu‘a ‘o foki ki hoku kāinga ‘oku ‘i ‘Isipite, ‘o vakai pe ‘oku nau kei mo‘ui. Pea tali ‘e Setelō kia Mōsese, ‘Oku lelei; ke ke ‘alu.
19Pea folofola ‘a Sihova kia Mōsese ‘i Mitiani, ‘Alu ‘o foki ki ‘Isipite; he kuo mate ‘a e kakai kotoa na‘e kumi kiate koe ke fakapoongi. 20Pea na‘e ‘ave ‘e Mōsese hono uaifi, pea mo hono ongo foha, pea ne fakaheka ki ha ‘asi, ‘o ne foki ki he fonua ko ‘Isipite; pea na‘e to‘o ‘e Mōsese ‘a e tokotoko ‘o ‘Elohimi, ‘o ‘alu mo ia.
21Pea folofola ‘a Sihova kia Mōsese, ‘I ho‘o ‘alu ko eni ke foki ki ‘Isipite, ke ke tokanga ke fai ‘i he ‘ao ‘o Felo ‘a e ngaahi mana kotoa pē ‘a ia kuo u tuku ki ho nima: pea te u fakafefeka ‘e au hono loto, pea ‘e ‘ikai te ne tukuange ‘a e kakai. 22Pea te ke lea kia Felo, ‘o pehē, Ko eni ‘a e folofola ‘a Sihova, Ko ‘Isileli ko hoku foha ia, ko hoku ‘uluaki; 23pea kuo u tala kiate koe ke ke tukuange hoku foha ke ne tauhi kiate au: pea kuo ke fakafisi ki hono tukuange; vakai, te u tāmate‘i ho foha, ‘a ho ‘uluaki.#‘Eki 12.29
24Pea lolotonga ‘ene fononga na‘e fakafetaulaki kiate ia ‘e Sihova ‘i he mālōlō‘anga, ‘o ne fai ke tāmate‘i ia. 25Pea to‘o ‘e Sīpola ha hele maka, ‘o ne kamu ‘ene tama, ‘o ne sī atu ia ki hono va‘e,#4.25-26 va‘e; ‘Oku faka‘uhinga‘i ‘e he kau mataotao ‘e ni‘ihi ‘a e lau ko eni ki he va‘é ko e heliaki ‘o e fakatangata. ‘o ne pehē, He ko e husepāniti fakatoto koe kiate au. 26Pea ne tukuange ia, pea toki pehē ‘e he fefine, Ko e husepāniti fakatoto!–ko ‘ene lau ki he kamu.
27Pea folofola ‘a Sihova kia ‘Ēlone, ‘Alu ki he Toafa ke fakafetaulaki kia Mōsese. Pea na‘a ne ‘alu ‘o fakafetaulaki kiate ia ‘i he Mo‘unga ‘o ‘Elohimi, ‘o ne ‘uma kiate ia. 28Pea fakahā ‘e Mōsese kia ‘Ēlone ‘a e ngaahi folofola ‘a Sihova, ‘a ia kuo ne fekau ia, mo e ngaahi faka‘ilonga kuo ne tu‘utu‘uni ke fai. 29Pea ‘alu ‘a Mōsese mo ‘Ēlone, ‘o na fakataha ‘a e kau mātu‘a kotoa pē ‘o ha‘a ‘Isileli: 30pea ‘a‘au ‘e ‘Ēlone ‘a e ngaahi me‘a kuo folofola‘aki ‘e Sihova kia Mōsese, mo ne fai ‘a e ngaahi faka‘ilonga ‘i he ‘ao ‘o e kakai. 31Pea na‘e tui ‘a e kakai: pea ‘i he‘enau fanongo kuo ‘a‘ahi ‘a Sihova ki ha‘a ‘Isileli, pea kuo ne mamata ki honau ngaohikovi‘i, na‘a nau punou ‘o lotu.
Currently Selected:
KO ‘EKISOTO 4: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
