KO SĒNESI 32
32
Ko e Teu Fe‘iloaki ‘a Sēkope mo ‘Īsoa
1KA ka fai atu ‘e Sēkope hono fononga, pea fakafetaulaki mai kiate ia ha kau ‘āngelo ‘a e ‘Otua. 2Pea pehē ‘e Sēkope ‘i he‘ene mamata kiate kinautolu, Tā ko e ‘apitanga tau eni ‘o e ‘Otua: ko ia na‘a ne fakahingoa ‘a e potu ko ia ko Mehanemi (ko Ongo ‘apitanga tau).
3Pea fekau atu ‘e Sēkope ha kau talafekau ke fakamelomelo kiate ia ki hono tokoua ko ‘Īsoa, ki he fonua ko Seia, ki he tuku‘uta ‘o ‘Ītomi. 4Pea ne na‘ina‘i kiate kinautolu, ‘o pehē, Ko e anga eni ‘o ho‘omou lea ki hoku ‘eiki ko ‘Īsoa, Ko e fakatau folofola eni ‘a ho‘o tamaio‘eiki ko Sēkope; Na‘a ku nofo ‘āunofo kia Lēpani, pea kuo u ‘i ai ‘o a‘u ki he taimi ni: 5pea ‘oku ou ma‘u pulu mo e ‘asi, ‘a e fanga manu mo e kau tamaio‘eiki mo e kau kaunanga; pea kuo u fekau atu ke tala ki hoku ‘eiki na, ke langa‘i ‘ene ofa kiate au.
6Pea na‘e foki mai ‘a e kau talafekau kia Sēkope, ‘o nau pehē, Na‘a mau a‘u atu ki ho tokoua ko ‘Īsoa, pea ‘oku ne ha‘u foki ke fakafetaulaki kiate koe, pea ‘oku ne ha‘u mo ia ha kau tangata ‘e toko fāngeau. 7Pea manavahē ‘aupito ai ‘a Sēkope, ‘o ne faingata‘a‘ia: pea ne hanga ‘o vahevahe ‘a e kakai na‘e ‘iate ia, mo e fanga manu iiki, mo e fanga manu lalahi, mo e fanga kāmeli, ke ‘apitanga ua; 8pea ne pehē, Kapau ‘e ha‘u ‘a ‘Īsoa ki he ‘apitanga ‘e taha, ‘o ne taa‘i ia, hei‘ilo ‘e hola ‘a e ‘apitanga ‘oku toe.
9Pea pehē ‘e Sēkope, ‘E ‘Otua ‘o ‘eku kui ko ‘Epalahame, mo e ‘Otua ‘o ‘eku tamai ko ‘Aisake; ‘a Sihova na‘a ke folofola mai, ‘o pehē, Foki ki ho fonua, pea ki ho tupu‘anga, pea te u fai ‘ofa kiate koe: 10‘oku ‘ikai te u taau ke ma‘u ha taha ‘o ho‘o ngaahi fu‘u meesi ni, mo ho‘o ngaahi fu‘u fakaai, ‘a ia kuo ke fai ki ho‘o tamaio‘eiki ko au; he ko hoku tokotoko pē na‘a ku a‘a mo au ‘i Soatani ni, ka ko eni kuo u hoko ‘o ‘apitanga ua. 11‘Ē, ke ke fakahaofi au mei he nima ‘o hoku tokoua, ‘io, meia ‘Īsoa: he ‘oku ou tailiili kiate ia ‘e au, na‘a ‘iloange te ne ha‘u ‘o taa‘i au, ‘o talua ‘aki ‘a e fa‘ē mo e fānau. 12Ka na‘a ke folofola mai ‘e koe, Te u mātu‘aki fai ‘ofa kiate koe, pea te u ngaohi ho hako ke tatau mo e ‘one‘one ‘o e tahi, ‘a ia ‘oku ‘ikai malau ko ‘ene lahi.#Sēn 22.17
13Pea ne nofo ai ‘i he pō ko ia; pea ne fili mei he me‘a kuo ne ma‘u, ha me‘a‘ofa ki hono tokoua ko ‘Īsoa; 14ko e kosi fefine ‘e toko uangeau mo e kosi tangata ‘e toko uofulu, ko e sipi fefine ‘e toko uangeau mo e sipi tangata ‘e toko uofulu, ko e fanga kāmeli ‘e toko tolungofulu, 15ko e sināmanu mo honau ‘uhiki, ko e fanga pulu fefine ‘e toko fāngofulu mo e pulu tangata ‘e toko hongofulu, ko e ‘asi fefine ‘e toko uofulu mo e fanga ki‘i ‘asi ‘e hongofulu. 16Pea ne tuku kinautolu ki he‘ene kau tamaio‘eiki, ‘o fakafa‘ahinga; ‘o ne pehē ki he‘ene kau tamaio‘eiki, Mou mu‘omu‘a atu, ‘o ‘ai ke vahavaha ‘a e fa‘ahinga mo e fa‘ahinga. 17Pea ne na‘ina‘i ki he ‘uluaki, ‘o pehē, ‘Oka mou ka fetaulaki mo ‘Īsoa ko hoku tokoua, ‘o ne fehu‘i kiate koe, ‘o pehē, ‘Oku ‘o hai koe? pea ‘oku ke ‘alu ki fē? pea ko e ngaahi me‘a ‘a hai eni ‘oku ke fakateka? 18Pea te ke tali, Ko e ngaahi me‘a ‘a ho‘o tamaio‘eiki ko Sēkope; ko e me‘a‘ofa eni kuo ne tuku atu ki hono ‘eiki ko ‘Īsoa: pea ko eni ‘oku ne muimui mai foki. Pea ne tu‘utu‘uni pehē foki ki hono ua pea pehē mo hono tolu. 19‘Io, mo kinautolu kotoa pē na‘e muimui ki he fanga manu ‘o ne pehē, Ke hangē ko ia ho‘omou lea kia ‘Īsoa ‘oka mou ka ‘ilo ia. 20Pea te mou pehē foki, Ko eni ‘oku muimui mai ‘a ho‘o tamaio‘eiki ko Sēkope. He na‘a ne pehē, Ka u fakalelei mu‘a hono loto ‘aki ‘a e me‘a‘ofa ‘oku mu‘aki atu na, pea hili ia te u fakafe‘iloaki kiate ia; hei‘ilo te ne tali lelei au. 21Ko ia na‘e mu‘omu‘a atu ‘a e me‘a‘ofa ki he kauvai; ka ka nofo ia ‘i he ‘apitanga ‘i he pō ko ia.
Ko Fefa‘uhi ‘a Sēkope ‘i Penieli
22Pea ne tu‘u hake ‘i he pō ko ia, ‘o ne ‘ave hono ongo uaifi mo ‘ene ongo kaunanga, mo hono ngaahi foha ‘e toko hongofulu mā taha, ‘o nau a‘a atu ‘i he a‘a‘anga ‘o Siapoki. 23‘Io, na‘a ne ‘ave kinautolu ki he kauvai mo e me‘a kotoa pē na‘e ‘iate ia. 24Pea na‘e nofo toko taha pē ‘a Sēkope;#Hōs 12.3-4 pea na‘e fefa‘uhi mo ia ha tangata, ‘o a‘u ki he ‘alu hake ‘a e pongipongi.
25Pea ‘i he‘ene vakai ‘oku ‘ikai te ne lava‘i ia, na‘a ne alasi hono ‘aofi tenga; pea na‘e homo ‘a e ‘aofi tenga ‘o Sēkope ‘i he‘ene fefa‘uhi mo ia. 26Pea ne folofola, Tuku ange au ke u ‘alu, he ‘oku ‘alu hake ‘a e pongipongi. Pea ne tali, ‘E ‘ikai te u tukuange koe, kae‘oua ke ke tāpuaki au.
27Pea ne folofola kiate ia, Ko e hā ho hingoa? Pea ne tali, Ko Sēkope.
28Pea ne folofola, ‘E ‘ikai toe ui ho hingoa ko Sēkope, ka ko ‘Isileli pē (Ko Fai-mo e-‘Otua):#32.28 ‘Isileli; ‘Oku vāofi ‘a hono pu‘aki ‘o e hingoá ni mo e faka-Hepelū ‘o e ‘oku fefa‘uhi mo e ‘Otuá pe ko e ‘oku fefa‘uhi ‘a e ‘Otuá. #Sēn 35.10 he kuo ke fai mo e ‘Otua mo e kakai, pea kuo ke lava.
29Pea fehu‘i ange ‘e Sēkope, ‘o pehē, Tala mai mu‘a ho huafa ‘o‘ou.#Fkm 13.17-18 Pea ne folofola mai, Ko e hā ‘oku ke fai pehē ai, ‘o ‘eke ki hoku hingoa? Pea ne tāpuaki‘i ia ‘i ai.
30Pea na‘e fakahingoa ‘e Sēkope ‘a e potu na ko Penieli (ko Fofonga-‘o e-‘Otua).#32.30 Penieli; ‘Oku vāofi ‘a hono pu‘aki ‘o e hingoá ni mo e faka-Hepelū ‘o e fofonga ‘o e ‘Otuá. he‘ene pehē, He kuo u sio ki he ‘Otua, ‘o ma mātu‘aki femātaaki, ka kuo fakahaofi ‘eku mo‘ui. 31Pea na‘e hopo kiate ia ‘a e la‘ā ‘i he‘ene laka atu ‘i Penueli, pea na‘a ne ketu pē koe‘uhi ko hono tenga. 32Ko hono ‘uhinga ia ‘oku ‘ikai ke kai ‘e ha‘a ‘Isileli, ‘o a‘u ki he ‘aho ni, ‘a e uoua ‘o e tenga, ‘a ia ‘oku ‘i he ‘aofi tenga: koe‘uhi na‘a ne alasi ‘a e ‘aofi tenga ‘o Sēkope ‘i he uoua na‘e mingi.
Currently Selected:
KO SĒNESI 32: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
