KO SĒNESI 35
35
Ko Hono Tāpuaki‘i ‘e he ‘Otuá ‘a Sēkope ‘i Pēteli
1PEA folofola ‘a e ‘Otua kia Sēkope, Tu‘u ‘o ‘alu hake ki Pēteli, ‘o nofo ai; pea ngaohi ai ha ‘ōlita kia ‘Ela, ‘a ia na‘a ne hā kiate koe ‘i ho‘o hola meia ‘Īsoa ko ho tokoua.#Sēn 28.11-17
2Pea lea ‘a Sēkope ki hono fāmili, pea ki hono kau nofo‘anga kotoa pē, ‘o pehē, Mou li‘aki ‘a e ngaahi ‘otua muli ‘a ia ‘oku ‘iate kimoutolu, pea mou fakama‘a kimoutolu, ‘o fetongi homou ngaahi kofu: 3pea tau tutu‘u ‘o ‘alu ki Pēteli, ka u ngaohi ai ha ‘ōlita kia ‘Ela, ‘a e ‘Otua na‘a ne talia au ‘i he ‘aho ‘o ‘eku faingata‘a‘ia, pea ne ‘iate au ‘i he fononga na‘a ku fai. 4Pea na‘a nau ‘ange kia Sēkope ‘a e ngaahi ‘otua muli kotoa pē na‘a nau ma‘u mo e ngaahi mama na‘e tui ‘i honau telinga; pea na‘e tanu ia ‘e Sēkope ‘i he lalo ‘oke na‘e tu‘u ofi ki Sikemi.
5Pea na‘a nau fononga: pea na‘e tō ‘a e ngeia ‘o e ‘Otua ki he ngaahi kolo takatakai, pea na‘e ‘ikai te nau tuli ‘a e ha‘a Sēkope. 6Pea ko Sēkope mo e kakai kotoa na‘e ‘iate ia na‘a nau a‘u ki Lusa, ‘a ia ‘oku ‘i he fonua ko Kēnani, pea ko Pēteli ia. 7Pea ne langa ai ha ‘ōlita, ‘o ne fakahingoa ‘a e potu ko ‘Ela-Pēteli (ko e ‘Otua-Pēteli); koe‘uhi ko e potu ia na‘e fakahā ai kiate ia ‘a e ‘Otua, ‘i he‘ene hola mei hono tokoua. 8Pea na‘e pekia ‘a Tepola ko e fefine tauhi ‘o Lepeka, pea na‘e tanu ia ‘i he talalo ‘o Pēteli ‘i he lalo ‘oke; pea na‘e fakahingoa ia ko ‘Ālonipakuti (ko ‘Oke-Tangi).
9Pea na‘e toe hā ‘a e ‘Otua kia Sēkope ‘i he‘ene ha‘u mei Mesopotēmia, pea ne tāpuaki‘i ia. 10Pea na‘e folofola kiate ia ‘e he ‘Otua, Ko ho hingoa ko Sēkope: ‘e ‘ikai ui ho hingoa ko Sēkope, ka ko ‘Isileli ho hingoa ‘amui: pea ne fakahingoa ia ko ‘Isileli.#Sēn 32.28 11Pea folofola ki ai ‘a e ‘Otua, ko au ko e ‘Otua ko Sātai, ke ke tupu ‘o fakatokolahi; ko ha kakai, ‘io, ko ha koto kakai ‘e tupu meiate koe, pea ‘e fua mei ho mānava ha ngaahi tu‘i,#Sēn 17.4-8 12pea ko e fonua na‘a ku ‘atu kia ‘Epalahame mo ‘Aisake, te u ‘atu ia mo‘ou; pea hili koe, te u ‘atu ki ho hako. 13Pea hā‘ele hake ‘a e ‘Otua meiate ia ‘i he potu na‘a ne alea ai mo ia. 14Pea na‘e fokotu‘u ‘e Sēkope ha pou ‘i he potu ko ia na‘a ne alea ai mo ia, ‘io, ko e pou maka: pea ne lilingi ki hono funga ha feilaulau inu, pea ne pani lolo foki.#Sēn 28.18-19 15Pea na‘e fakahingoa ‘e Sēkope ‘a e potu ‘a ia na‘e alea ai ‘a e ‘Otua mo ia ko Pēteli.
Ko e Mate ‘a Lesieli
16Pea nau hiki mei Pēteli; pea na‘e toe pē ha vā‘ihala pea nau hoko ki ‘Efalata: pea langa ‘a Lesieli, pea na‘e faingata‘a. 17Pea lolotonga ‘ene faingata‘a‘ia ‘i he fā‘ele mo e lea mai kiate ia ‘a e mā‘uli, ‘o pehē, ‘Oua te ke manavasi‘i he te ke ma‘u mo e tama ni foki. 18Pea ‘i he tei hiki hono laumālie (he na‘a ne pekia), na‘a ne fakahingoa, ia ko Pēnoni (Tama-‘o-‘eku-mamahi): ka na‘e fakahingoa ia ‘e he‘ene tamai ko Penisimani (ko Tama-to‘omata‘u).#35.18 Penisimani; ‘Oku ala ‘uhinga pē ‘a e hingoá ni ‘i he faka-Hepeluú ko e “foha ‘e monū‘ia”.
19Pea na‘e pekia ‘a Lesieli, pea na‘e tanu ia ‘i he hala ki ‘Efalata, ‘a ia ko Pētelihema. 20Pea na‘e fokotu‘u ‘e Sēkope ha pou ‘i hono fa‘itoka: pea “Ko e pou fa‘itoka ia ‘o Lesieli” ‘o a‘u ki he ‘aho ni. 21Pea hiki ‘a ‘Isileli, ‘o folahi hono tēniti ki ko atu ‘i he taua ko ‘Eta.
Ko e Fanga Foha ‘o Sēkopé
(1 Kal 2.1-2)
22Pea lolotonga ‘a e nofo ‘a ‘Isileli ‘i he fonua ko ia, na‘e ‘alu ‘a Lūpeni, ‘o mohe mo Pīla‘a ko e sinifu ‘o ‘ene tamai: pea fanongo ‘a ‘Isileli ki ai.#35.22 ‘Oku pehē he hiki fuoloa ‘e taha: peá ne ‘ita ‘aupito. ‘Oku ‘ikai ke ‘asi ia ‘i he faka-Hepeluú. #Sēn 49.4
23Pea ko eni, na‘e hongofulu mā ua ‘a e foha ‘o Sēkope: ko e fānau ‘a Lia; ko Lūpeni, ko e ‘uluaki foha ‘o Sēkope, mo Simione, mo Līvai, mo Siuta, mo ‘Īsaka, mo Sepulone: 24ko e fānau ‘a Lesieli; ko Siosifa, mo Penisimani: 25pea ko e fānau ‘a Pīla‘a, ko e kaunanga ‘a Lesieli; ko Tani mo Nafitalai: 26pea ko e fānau ‘a Sīlipa ko e kaunanga ‘a Lia; ko Kata mo ‘Āseli: ko eni ia ‘a e ngaahi foha ‘o Sēkope, ‘a ia na‘e fā‘ele‘i kiate ia ‘i Mesopotēmia.
Ko e Mate ‘a ‘Aisake
(1 Kal 2.1-2)
27Pea a‘u ‘a Sēkope ki he‘ene ‘eiki ko ‘Aisake ki Mamilī ki he kolo ‘o ‘Ā‘apa, ‘a ia ko Hepeloni, ‘a ia na‘e nofo ‘āunofo ai ‘a ‘Epalahame mo ‘Aisake. 28Pea ko e fuoloa ‘o ‘Aisake ko e ta‘u ‘e teau mo e ta‘u ‘e valungofulu. 29Pea hokotaki ‘a ‘Aisake, ‘o ne pekia, pea ne ului ia ki hono kakai, ko e ‘eiki fuoloa mo a‘ua‘u: pea na‘e telio ia ‘e hono ongo foha ko ‘Īsoa mo Sēkope.
Currently Selected:
KO SĒNESI 35: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
