LEVITIKO 1
1
Ko e Feilaulau Mōifua
1PEA ui ange ‘a Mōsese ‘e he ‘Eiki, ‘o ne folofola ki ai mei he Tēniti Fe‘iloaki‘anga, ‘o pehē, 2Lea ki ha‘a ‘Isileli, mo ke pehē kiate kinautolu, Ka ‘i ai ha tangata ‘iate kimoutolu te ne ‘oatu ha kōpano#1.2 kōpano; Ko hono ‘uhinga ‘o e lea kōpanó ko e tuku ki he ngāue ‘a e ‘Eiki, ‘o hangē ko e fakamatala ‘ia Ma‘ake 7.11. ki he ‘Eiki, te ne fai ‘ene kōpano mei he‘ene fanga manu, mei he fanga pulu, pe mei he fanga sipi.
3Kapau ko e feilaulau-mōifua ‘a ‘ene kōpano, ko ha pulu, te ne ‘atu ha manu tangata ‘oku ‘ikai hano mele! te ne ‘atu ia ‘i he matapā ‘o e Tēniti Fe‘iloaki‘anga, ke hōifua ai ‘a e finangalo ‘o e ‘Eiki. 4Pea te ne hilifaki hono nima ki he ‘ulu ‘o e feilaulau; pea ‘e tali ia koe‘uhi ko e tangata, ko e fakalelei ma‘ana. 5Pea te ne tāmate‘i ‘a e pulu ‘i he ‘ao ‘o Sihova: pea ko e ngaahi foha ‘o ‘Ēlone ‘a ia ‘oku taula‘eiki, te nau ‘atu ‘a e toto, ‘o luluku ‘aki ia ‘a e ‘ōlita takatakai, ‘a ia ‘oku ‘i he mata Tēniti Fe‘iloaki‘anga. 6Pea te ne fohi ‘a e feilaulau, ‘o tafa ia. 7Pea ko e ngaahi foha ‘o ‘Ēlone ko e Taula‘eiki te nau ‘esiafi ki he ‘ōlita, mo fakamā‘opo‘opo ‘a e fefie ki he afi; 8pea ko e ngaahi foha ‘o ‘Ēlone, ‘a ia ‘oku taula‘eiki, te nau fakamā‘opo‘opo ‘a e ngaahi konga manu, ‘a e ‘ulu, mo e ngako, ki he fefie ‘oku ‘i he afi ‘i he ‘ōlita: 9ka ko hono to‘oto‘onga mo hono ngaahi alanga te ne fufulu vai: pea ‘e toki tutu ‘e he taula‘eiki hono kotoa ‘i he ‘ōlita, ko e feilaulau-mōifua fai‘aki ‘a e afi, ko e ngangatu fakahōifua kia Sihova.
10Pea kapau ko ‘ene kōpano ko e me‘a mei he‘ene fanga manu iiki, ko ha sipi pe kosi, ka ko ha feilaulau-mōifua; te ne ‘atu ha manu tangata ‘oku ‘ikai hano mele. 11Pea te ne tāmate‘i ia ‘i he tafa‘aki ‘ōlita ki he tokelau, ‘i he ‘ao ‘o Sihova: pea ko e ngaahi foha ‘o ‘Ēlone, ‘a ia ‘oku taula‘eiki, te nau luluku ‘aki ‘a e ‘ōlita hono toto takatakai. 12Pea te ne tafa ia, ‘o tuku hono ngaahi konga mo hono ‘ulu mo hono ngako: pea ko e taula‘eiki te ne fakamā‘opo‘opo ia ‘i he funga fefie, ‘a ia ‘oku ‘i he afi ‘i he ‘ōlita: 13ka ko hono to‘oto‘onga mo hono ngaahi alanga te ne fufulu vai: pea ‘e ‘atu ‘e he taula‘eiki hono kotoa, ‘o tutu ‘i he ‘ōlita: ko e feilaulau-mōifua ia, fai‘aki ‘a e afi, ko e ngangatu fakahōifua kia Sihova.
14Pea kapau ko ‘ene kōpano ‘oku fai mei he manupuna, ka ko e feilaulau-mōifua, te ne fai‘aki ‘a e kulukulu, pe ha lupe mui. 15Pea ‘e ‘omi ‘e he taula‘eiki ki he ‘ōlita, pea te ne motuhi fakalouhi‘imofisi hono ‘ulu, ‘o tutu ‘i he ‘ōlita, pea te ne tatau hono toto ‘i he holisi ‘o e ‘ōlita: 16pea te ne fakangākau ia, ‘o lī ki he tafa‘aki ‘ōlita ki hahake, ki he potu ‘o e efuefu. 17Pea te ne hele hono kapakau, kae ‘ikai fahi ua; pea ‘e tutu ia ‘e he taula‘eiki ‘i he ‘ōlita ‘i he funga fefie ‘oku ‘i he afi: ko e feilaulau-mōifua ia, fai‘aki ‘a e afi, ko e ngangatu fakahōifua kia Sihova.
Currently Selected:
LEVITIKO 1: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.