LEVITIKO 10
10
Ko e Fai Angahala ‘a Nātapi mo ‘Āpiu
1KA ko e ongo foha ‘o ‘Ēlone, ‘a Nātapi mo e ‘Āpiu, na‘a na to‘o takitaha ‘ene ‘ainga malala, ‘o ‘ai ki ai ha afi, ‘o tuku ki ai ha ‘inisēnisi, ‘o na ‘oatu ki he ‘ao ‘o Sihova ha afi kehe, ko e me‘a na‘e ‘ikai te ne tu‘utu‘uni kiate kinautolu. 2Pea na‘e pā atu ha afi mei he ‘ao ‘o Sihova, ‘o keina kinaua, ‘o na pekia ‘i he ‘ao ‘o Sihova. 3Pea lea ai ‘a Mōsese kia ‘Ēlone, ko eni ia na‘e folofola‘aki ‘e Sihova, ‘o pehē, Te u tāpuhā‘ia ‘iate kinautolu ‘oku taka ofi mai, pea te u lāngilangi‘ia ‘i he ‘ao ‘o e kakai kotoa.#10.3 te u lāngilangi‘ia ‘i he ‘ao ‘o e kakai kotoa; pe kuo pau ke fakalāngilangi‘i au ‘e hoku kakaí. Pea na‘e longo pē ‘a ‘Ēlone.
4Pea na‘e ui ange ‘e Mōsese ‘a Misaeli mo ‘Elisafani, ko e ongo foha ‘o ‘Osieli, ko e tu‘asina ‘o ‘Ēlone, ‘o ne pehē kiate kinaua, ‘Unu‘unu mai: ‘ave homou kāinga mei he mata Fale Tapu ki he tu‘a ‘apitanga. 5Ko ia na‘a na ‘unu‘unu atu, ‘o na ‘ave ai pē kinaua mo hona sote ki he tu‘a ‘apitanga, hangē ko e me‘a ‘a Mōsese.
6Pea lea ‘a Mōsese kia ‘Ēlone, pea kia ‘Eliesa mo ‘Ītama ko hono ongo foha, ‘Oua ‘e tuku mafue homou ‘ulu, pea ‘oua ‘e hae homou kofu; koe‘uhi ke ‘oua te mou mate, pea ke ‘oua ‘e tō ha houhau ki he fakataha kotoa: kae tuku ki homou kāinga, ‘a ha‘a ‘Isileli kātoa, ke tēngihia ‘a e faka‘auha kuo fai ‘e Sihova. 7Pea ‘e ‘ikai te mou hū mai mei he matapā ‘o e Tēniti Fe‘iloaki‘anga, na‘a mou mate, he ko e lolo pani ‘a Sihova ‘oku ‘iate kimoutolu. Pea na‘a nau fai hangē ko e lea ‘a Mōsese.
Ko e ngaahi Tu‘utu‘uni ‘o Kau ki he Kau Taula‘eikí
8Pea folofola ‘a Sihova kia ‘Ēlone, ‘o pehē, 9‘Oua ‘e inu ha uaine pe ha kava mālohi, ‘a koe pe ko ho ngaahi foha, ‘oka mou ka hū ki he Tēniti Fe‘iloaki‘anga, telia na‘a mou mate (ko e tapu ta‘engata ia ki homou ngaahi to‘utangata): 10pea koe‘uhi ke mou ‘ilo ‘a e faikehekehe ‘o e me‘a ‘oku tapu mo e me‘a ‘oku palahi, mo e me‘a ‘oku ta‘ema‘a mo e me‘a ‘oku ma‘a; 11pea ke mou ako ki ha‘a ‘Isileli ‘a e ngaahi tu‘utu‘uni ‘a ia kuo folofola‘aki ‘e Sihova kiate kinautolu ‘ia Mōsese.
12Pea lea ‘a Mōsese kia ‘Ēlone, pea kia ‘Eliesa mo ‘Ītama ko hono ongo foha na‘e toe, ‘o pehē, To‘o ‘a e feilaulau-me‘akai, ‘a e me‘a ‘oku toe ‘i he ngaahi feilaulau ‘a Sihova fai‘aki ‘a e afi, pea mou kai ia ta‘eha lēvani ‘i he tafa‘aki ‘o e ‘ōlita: he ko e me‘a toputapu ia.#Lev 6.14-18 13Pea te mau kai ia ‘i ha potu ‘oku tapu; he ko ho ‘inasi, mo e ‘inasi ‘o ho ngaahi foha ‘i he ngaahi feilaulau ‘a Sihova ‘oku feia ‘aki ‘a e afi: he na‘e pehē hoku fekau. 14Pea ko e fatafata tākalo mo e tefito alanga hapai te mou kai ‘i ha potu ‘oku ma‘a; ‘a koe, mo ho‘o fānau tangata, mo ho‘o fānau fefine, fakataha: he kuo foaki ia ko ho ‘inasi, mo e ‘inasi ‘o ho ngaahi foha, mei he ngaahi feilaulau-‘ofa ‘a ha‘a ‘Isileli, 15te nau ‘omi ‘a e tefito alanga ‘oku hapai ‘aki, mo e fatafata ‘oku tākalo ‘aki, fakataha mo e ngaahi ngako ‘oku tutu, ke feia ‘aki ha feilaulau-tākalo ‘i he ‘ao ‘o Sihova; pea ‘e ‘a‘au ia mo ho ngaahi foha foki, ko e ‘inasi ta‘engata; ‘o hangē ko e tu‘utu‘uni ‘a e ‘Eiki.
16Pea fiu‘a kumi ‘e Mōsese ‘a e kosi tangata feilaulau-angahala, pea tā kuo faka‘auha ia ‘aki ‘a e afi: pea na‘a ne ‘ita kia ‘Eliesa mo ‘Ītama, ko e ongo foha ‘o ‘Ēlone na‘e toe, ‘o ne pehē, 17Ko e hā na‘e ‘ikai te mou kai ‘a e feilaulau-angahala ‘i ha potu tapu; he ko ha me‘a toputapu ia, pea kuo ne ‘atu ia kiate kimoutolu ke ‘ave ‘a e kovi ‘o e fakataha, ke fai ha fakalelei ma‘anautolu ‘i he ‘ao ‘o Sihova?#Lev 6.24-26 18Tā na‘e ‘ikai ‘omi hono toto ki he loto Potu Tapu: na‘e totonu ke mou kai ia ‘i he Potu Tapu, ‘o hangē ko ‘eku fekau.
19Pea lea ‘a ‘Ēlone kia Mōsese; Vakai, ko e ‘aho eni ia na‘a nau ‘atu ‘enau feilaulau-angahala ‘i he ‘ao ‘o Sihova, mo ‘enau feilaulau-mōifua; pea kuo hoko kiate au ‘a e ngaahi me‘a pehē mo pehē: pea ka ne u kai ‘a e feilaulau-angahala he ‘aho ni, ‘e hōifua ai koā ‘a e finangalo ‘o Sihova? 20Pea ‘i he fanongo ‘a Mōsese ki ai, na‘e hā lelei kiate ia.
Currently Selected:
LEVITIKO 10: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.