Luké 10
10
Ko e Fakanofonofo ‘e Sīsū Hono Kaungā Ngāue ‘e Toko Fitu Ngofulu mā Ua
1PEA hili ‘a e ngaahi me‘a ko ia, na‘e fakanofo ‘e he ‘Eiki ha ni‘ihi kehe ‘e toko fitungofulu,#10.1 ‘E toko fitungofulu; ‘Oku pehē ‘i he ngaahi hiki fuoloa ‘e ni‘ihi: fitungofulumā ua. ‘o ne fekau atu kinautolu, ‘o tautau toko ua, ke fakamelomelo kiate ia ki he kolo takitaha mo e potu ‘oku ne teu ‘alu ki ai ‘e ia. 2Pea ne pehē kiate kinautolu, Kuo lahi ‘a e ta‘u kuo motu‘u, ka ‘oku kaungatāmaki ‘a e kau ngāue: ko ia ke mou kole ki he ‘Eiki ‘oku ‘a‘ana ‘a e ta‘u, ke ne kouna atu mo ha kau ngāue ke utu ‘ene ta‘u.#Māt 9.37-38 3Mou ‘alu; ko eni, ‘oku ou tuku atu kimoutolu ke mou hangē ha fanga lami ‘i he lotolotonga ‘o e fanga ulofi.#Māt 10.16 4‘Oua na‘a to‘o ha kato pa‘anga, pe ha kato ‘oho, pe ha ngaahi sū: pea na‘a mo e fetapa mo ha taha ‘i he hala, ‘oua.#Māt 10.7-14; Ma‘ake 6.8-11; Luk 9.3-5 5Pea ‘ilonga ha fale te mou hū ki ai, mou fuofua lea ‘o pehē, Si‘oto‘ofa ki he fale ni. 6Pea kapau ‘oku ‘i ai ha hoa ‘o ho‘omou ‘ofa, pea ‘e nofo kiate ia ‘a ho‘omou tāpuaki: ka ka ‘ikai, pea ‘e foki ia kiate kimoutolu. 7Pea mou nofo ‘i he fale pē ko ia, ‘o kai mo inu ‘a e ngaahi me‘a te nau ‘omi. Seuke, ‘ilonga ha taha ‘oku ngāue, ‘oku taau ke ne ma‘u ha‘ane totongi. ‘Oua na‘a hiki mei ha fale ki ha fale.#1 Kol 9.14; 1 Tīm 5.18 8Pea ‘ilonga ha kolo te mou hū ki ai, pea nau tali kimoutolu, mou kai ‘a e me‘akai te nau tuku ‘i homou ‘ao: 9pea mou fakamo‘ui ‘a e kakai ‘i he kolo ko ia ‘oku mahaki, pea mou pehē kiate kinautolu, Kuo ofi mai kiate kimoutolu ‘a e Pule‘anga ‘o e ‘Otua. 10Pea ‘ilonga ha kolo te mou hū ki ai, pea ‘oku ‘ikai te nau tali kimoutolu, mou ‘alu atu ki he ngaahi mala‘e ‘o e kolo, ‘o mou pehē,#Ngā 13.51 11Na‘a mo e efu ‘o ho‘omou kolo, ‘a ia kuo piki ki homau va‘e, ‘oku mau holoholo atu; ka neongo ia, ka mou ‘ilo ‘a e me‘a ni, Kuo ofi ‘a e Pule‘anga ‘o e ‘Otua. 12Pea ‘oku ou tala atu, ‘e kātaki ngofua ‘a Sōtoma ‘i he ‘aho ko ē ‘i he kolo ko ia.#Sēn 19.24-28; Māt 11.24; 10.15
Ko e Ngaahi Kolo Ta‘eTui
(Māt 11.20-24)
13‘Oiauē koe, Kōlesini! ‘oiauē koe, Petesaita! he ka ne fai ‘i Taia mo Saitoni ‘a e ngaahi ngāue mamafa na‘e fai ‘iate kimoua, ne loa pē ‘enau fakatomala, ‘o nau nofo mo e tauanga‘a mo e pani efuefu.#‘Ais 23.1-18; ‘Isi 26.1; 28.26; Sioelí 3.4-8; ‘Ēmosi 1.9-10; Sāk 9.2-4 14Ka ‘e kātaki ngofua ‘i he Fakamaau ‘a Taia mo Saitoni ‘iate kimoua. 15Pea ko koe foki Kāpaneume, ‘e hiki koe koā ki Langi? ‘e hifo koe ki Hētesi.#‘Ais 14.13-15
16Ko ia ‘oku ne fakaongo kiate kimoutolu, ‘oku ne fakaongo kiate au; pea ko ia ‘oku ne tekaki kimoutolu, ‘oku ne tekaki au; pea ko ia ‘oku ne tekaki au ‘oku ne tekaki ia na‘a ne fekau mai au.#Māt 10.40; Ma‘ake 9.37; Luk 9.48; Sioné 13.20
Ko e Foki Mai ‘a e Toko Fitu ngofulu Mā Uá
17Pea na‘e foki fiefia mai ‘a e kau Fitungofulu,#10.17 Fitungofulú: vakai ki he veesi 1. ‘o nau pehē, ‘Eiki, na‘a mo e kau tēvolo ‘oku nau vaivai kiate kimautolu koe‘uhi ko ho huafa.
18Pea ne pehē kiate kinautolu, Ne u toutou sio ki he tō ‘a Sētane mei he langi, ‘o hangē ha ‘uhila. 19Ko eni kuo u tuku kiate kimoutolu ‘a e mafai ke mala ‘i he fanga ngata mo e fanga sikapio, pea mo e ngāue kotoa ‘a e Fili: pea ‘e ‘ikai ‘aupito ha me‘a ‘e lavea ai kimoutolu.#Saame 91.13 20Ka neongo ia, kae ‘oua te mou fiefia ‘i he me‘a ko ia, ‘a e vaivai ‘a e ngaahi fa‘ahikehe kiate kimoutolu; ka ko e me‘a ke mou fiefia ai, ko e tu‘u ‘a homou ngaahi hingoa ‘i he tohi ‘i Hēvani.
Ko e Fakamālō ‘a Sīsū ki He‘ene Tamaí
(Māt 11.25-27; 13.16,17)
21‘I he houa ko ia na‘a ne hākailangitau ‘i he Laumālie Mā‘oni‘oni,#10.21 na‘á ne… Laumālie Mā‘oni‘oní: ‘Oku ngali tonu hono hiki ‘o: na‘e fakafonu ‘ai ia ‘a e fiefia ‘e he Laumālie Mā‘oni‘oní; ka ‘oku pehē ‘i he ngaahi hiki fuoloa ‘e ni‘ihi: ‘e he Laumālié, pea ‘i he ni‘ihi: ‘i hono laumālié. ‘o ne pehē, ‘oku ou fakatonuhia‘ia koe, ‘e Tamai, ko e ‘Eiki ‘o e langi mo māmani, ‘i ho‘o fufū ‘a e ngaahi me‘a pehē mei ha kakai ‘oku poto mo ‘ilo‘ilo, ka ke tatala ki ha kau tamaiki, ‘io, ‘e Tamai; tonuhia ho‘o finangalo ke pehē.
22Kuo tuku kiate au ‘e he‘eku Tamai ‘a e ngaahi me‘a fuli pē: pea ‘oku ‘ikai hā toko taha ‘oku ne ‘ilo pe ko hai ‘a e Foha, ngata pē ‘i he Tamai; pe ko hai ‘a e Tamai, ngata pē ‘i he Foha, pea mo ha taha ‘e loto ‘e he Foha ke faka‘ilo ia ki ai.#Sioné 3.35; 10.15
23Pea ne tafoki ‘o lea ki he kau ako fakaekinautolu, ‘o pehē, Monū‘ia ā ‘a e ngaahi mata ‘oku sio ki he ngaahi me‘a ‘oku mou sioa. 24Seuke, ‘oku ou tala atu, kuo tokolahi ‘a e kau palōfita, mo e ngaahi tu‘i, na‘a nau feinga ke mamata ki he ngaahi me‘a ‘oku mou sioa, ka na‘e ‘ikai te nau mātā; pea ke fanongo ki he ngaahi me‘a ‘oku mou fanongo ki ai, ka na‘e ‘ikai te nau fanongoa.
Ko e Samēlia Loto ‘Ofa
25Pea ‘iloange na‘e tu‘u hake ha tufungalao ke sivi hakili ia, ‘o ne pehē, Tangata‘eiki, ko e hā ha me‘a te u fai kae tō mo‘oku ‘a e mo‘ui ta‘engata?#Māt 22.35-40; Ma‘ake 12.28-34
26Pea pehē ‘e ia ki ai, Ko e hā ‘a e me‘a kuo tohi ‘i he Lao? ‘oku fēfē ho‘o lau?
27Pea tali ‘e ia ‘o pehē, Te ke ‘ofa ki he ‘Eiki ko ho ‘Otua, ‘o fai‘aki ‘a e kotoa ‘o ho loto, mo e kotoa ‘o ho laumālie, mo e kotoa ‘o ho ivi, mo e kotoa ‘o ho ‘atamai; pea te ke ‘ofa ki ho kaungā‘api ‘o hangē ko ho‘o ‘ofa kiate koe.#Lev 19.18; Teu 6.5
28Pea me‘a ia ki ai, Totonu ho‘o tali; fai ia, pea te ke mo‘ui.#Lev 18.5
29Ka ‘i he‘ene fie fakatonuhia ia, na‘a ne pehē kia Sīsū, Pea ko hai nai hoku kaungā‘api?
30Pea fokotu‘u atu ‘e Sīsū, ‘o ne pehē, Tokua na‘e ai ha tangata na‘e ‘alu hifo mei Selusalema ki Selikō, pea ne toloto ‘i ha kaiha‘akau; ‘a ia na‘a nau to‘o hono kofu, pea ‘ikai ngata ai, ka na‘a nau taa‘i ia, pea ‘i he tuku ia ‘o nau ‘alu, kuo ne kafo lahi, ‘o tei mate‘i he‘enau ngāue. 31Pea fe‘unga mo ia na‘e ‘alu hifo ha taula‘eiki ‘i he hala ko ia: pea ‘i he‘ene sio ki he tangata, na‘a ne halafaki ‘i he kauhala ‘e taha. 32Pehē foki mo ha motu‘a Līvaite, na‘e hoko ki he potu ko ia, ‘o ne ‘alu atu ia ‘o mamata, pea toki halafaki ‘i he kauhala ‘e taha. 33Ka ‘i he fononga mai ha tangata Samēlia, na‘a ne a‘u ki he tangata, pea ‘i he‘ene sio ki ai na‘e langa hono fatu ‘i he ‘ofa;#2 Kal 28.15 34‘o ne ‘unu‘unu atu, ‘o tulu‘i hono ngaahi lavea ‘aki ‘a e lolo mo e uaine, mo ne ha‘iha‘i; pea ne fakaheka ia ki he‘ene manu, ka ne ‘alu ia ‘i lalo ‘o taki ki he fale tali fononga, ‘o ne tauhi ia ‘i ai. 35Pea pongipongi hake, na‘a ne to‘o mai ha fo‘i tēnali ‘e ua, ‘o ne ‘ange ki he motu‘a na‘e tauhi ‘a e fale tali fononga, ‘o ne pehē, Ke ke tauhi pē ‘a e tangata ni; pea ka ‘oku si‘i ‘eni, pea ‘i he‘eku foki mai te u totongi ‘e au ha‘o me‘a kuo mole ai.
36Ko hai ‘i he toko tolu ni, ‘i ho‘o poa, na‘e hoko ko e kaungā‘api ‘o e siana na‘e mo‘ua ‘e he kaiha‘akau?
37Pea tali ‘e ia, Ko ia na‘a ne fai ‘ofa ki he tangata.
Pea pehē ‘e Sīsū kiate ia, ‘alu, ‘o fai pehē mo koe foki.
Ko Mā‘ata mo Mele
38Pea lolotonga ‘enau fononga, tokua na‘e ‘alu ‘e ia ki ha vilisi: pea ko ha fefine na‘e hingoa ko Mā‘ata na‘a ne fakaafe ia ki hono fale.#Sioné 11.1 39Pea na‘e ai hono tehina na‘e ui ko Mele, pea ko e fefine ko ia na‘a ne fāite atu ‘i he va‘e ‘o Sīsū, ‘o fanongo ki he‘ene fakamatala. 40Kae fehākaaki ‘a Mā‘ata, ‘i he fai ‘o ha fu‘u teuteu; pea tu‘u mai ia ‘o ne lea, ‘Eiki, ‘oku ‘ikai te ke tokanga koā ki he tuku au ‘e hoku tehina ke u fai toko taha pē ‘a e teuteu? ko ia ke ke tala kiate ia ke ne tokoni kiate au.
41Ka ka tali ‘e Sīsū, ‘o ne pehē ki ai, ‘e Mā‘ata, Mā‘ata, ‘oku ke loto mo‘ua mo fekāmaaki ki he ngaahi me‘a kehekehe: 42ka ‘oku lahi pē ha me‘a ‘e taha: seuke, kuo fili ‘e Mele ‘a e ngafa ‘oku lelei, ‘a ia foki ‘e ‘ikai to‘o meiate ia.
Currently Selected:
Luké 10: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
