NŌMIPA Ko e Talateu
Ko e Talateu
Ko e tohi Nōmipá ko e talanoa ia ki he anga ‘o e nofo ‘a e kakai ‘Isilelí ‘i he meimei ta‘u ‘e fāngofulu mei he‘enau mavahe mei he Mo‘unga ko Sainaí ‘o a‘u ki he kau‘āfonua fakahahake ‘o e fonua na‘e tala‘ofa ‘e he ‘Otuá te ne ‘oange mo‘onautolú. Ko e hingoa ‘o e tohí, ‘oku kau ia ki he konga mahu‘inga ‘o e talanoá, ‘a ia ko e tohi kakai ‘e Mōsese ‘a e kakai ‘Isilelí ‘i he Mo‘unga ko Sainaí kimu‘a pea nau mavahé, pea toe fai tu‘oua ‘i Moape ‘i he fakahahake ‘o e vaitafe ko Soataní ‘i he meimei to‘utangata ia ‘e taha kimui. ‘I he vaha‘a ‘o e ongo tohi kakaí na‘e fononga ‘a e kakai ‘Isilelí ki Kātesi Pānea ‘i he kau‘āfonua fakatonga ‘o Kēnaní, ka na‘e ‘ikai lava ke nau hiki atu ki he fonua ‘o e tala‘ofá mei ai. Hili ha‘anau ‘apitanga laulauta‘u ‘i he potu ko iá, na‘a nau fononga atu ki he feitu‘u fakahahake ‘o e Vaitafe Soataní, ‘a ia ne ‘osi ma‘u kelekele ai ‘a e konga ‘o e kakaí, kae teuteu ‘a e toengá ke nau hiki atu ki he kauvai ‘e taha ‘o e vaitafé ki Kēnani.
Ko e tohi Nōmipá ko e fakamatala ia ki ha kakai na‘a nau fa‘a lotosi‘i mo manavasi‘i he fehangahangai mo e faingata‘á, mo nau angatu‘u ki he ‘Otuá pea mo Mōsese, ‘a e tangata na‘e fakanofo ‘e he ‘Otuá ke taki kinautolú. Ko e talanoa ‘eni ki he tokanga ta‘etūkua ‘a e ‘Otuá ki hono kakaí, neongo ‘enau fa‘a vaivai mo talangata‘a, pea mo e mateaki‘i ta‘etoe afe ‘e Mōsese ‘a e ‘Otuá mo e kakaí fakatou‘osi, neongo ‘a e fa‘a si‘i ‘ene kātakí he ngaahi tu‘unga ‘e ni‘ihi.
Ko e Kakano ‘o e Tohí
Ko e teu mavahe ‘a e kakai ‘Isilelí mei he Mo‘unga ko Sainaí (1.1–9.23)
a. Ko e ‘uluaki tohi kakaí (1.1–4.49)
e. Ko e ngaahi lao mo e tu‘utu‘uni kehekehe (5.1–8.26)
f. Ko e Pāsova hono uá (9.1-23)
Ko e fononga mei he Mo‘unga ko Sainaí ki Moape (10.1–21.35)
Ko e ngaahi me‘a na‘e hoko ‘i Moape (22.1–32.42)
Ko hono fakamā‘opo‘opo ‘o e anga ‘o e fononga mei ‘Isileli ki Moapé (33.1-49)
Ko e ngaahi tu‘utu‘uni kimu‘a pea nau hiki atu ki he kauvai ‘e taha ‘o e Vaitafe ko Soataní (33.50–36.13)
Currently Selected:
NŌMIPA Ko e Talateu: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.