Marcos 16

Is Kegkevanhew ni Jesus

(Marcos 16:1-8; Mateo 28:1-8; Lucas 24:1-12; Juan 20:1-10)

1Ne hein neiwas dutun is Andew te Kedhimeley, si Maria Megdelina, wey si Maria he iney ni Santiago, wey si Selumi, mibpemasa zan te pehemut su edhendiyè dan te penlevengà wey zan ikehaplas haazà is pehemut te lawa ni Jesus. 2Ne te meselem dutun te iyan pa kedsilà te andew zutun te egkehuna he andew te simana, nemenhendutun dan te midlevengan ki Jesus. 3Ne ebpein-inseey zan te, “Hentei is ebpekelilid kenitew zuen te zekelà he vatu he inlekeb duen te idselang te penlevengà?” 4Iyan, hein midlingehè dan, neehè dan he nelilid en sikan is batu zutun he utew zekelà. 5Ne mid-ahuk dan dutun te idselang te penlevengà ne neehè dan is ebpimpinuu he menguhed he etew ziyà te egkekewanan dan he kukumbalà te meputì he manggad. Ne zutun nekehuyab is gehinawa zan. 6Ne migkag̵i haazà is etew te, “Kenè kew mahandek. Ebpen-ahaan niw si Jesus he tigNeserit, sikan is inransang te krus, iyan, wazè en dini su nevanhew en. Ahaa niw man kayi te midsevukan kandin.” 7Ne te kegkeipus te ked-ahaa zan dutun, ke sikandin te, “Hendiyan kew en te menge sumusundan din ne keg̵iyi niw sikandan wey si Pedro he si Jesus, edhuna sikandin diyà te Geliliya ne ziyè niw sikandin egkeahà, sumalà is migkag̵i zin keniyu.” 8Ne zutun nemengguwè dan dutun te penlevengà is ebpemelelag̵uy su utew zan nengeinuinu wey nengehandek. Ne tenged kayi wazè dan tudtula heini ziyà te minsan hentei su nengehandek dan.

Is Kebpaahà ni Jesus ki Maria Megdelina

(Marcos 16:9-11; Mateo 28:9,10; Juan 20:11-18)

9Ne te meselem pa utew zutun te andew he Duminggu hein nevanhew en si Jesus, midhuna sikandin mebpaahà diyà te ki Maria Megdelina, sikan is bahi he mibpeg̵uwaan din dengan te pitu he mezaat he mulin-ulin. 10Ne heini si Maria, mibeyaan din is menge sumusundan ni Jesus. Ebpemenineg̵ew he egkengeseeng haazà is menge sumusundan ni Jesus tenged te kedhimetayi ki Jesus. 11Ne hein midtudtulan sikandan ni Maria he neehè din si Jesus su nevanhew en, wazè dan tuuwi.

Is Kebpaahà ni Jesus Duen te Zezuwa he Etew

(Marcos 16:12,13; Lucas 24:13-35)

12Ne neiwas haazà mibpaahà si Jesus is nahalin is dagwey zin diyà te zezuwa he menge sumusundan din dutun te edhendiyà haazà is dezuwa te unayan. 13Ne midlikù dan diyà te Hiruselim ne mibpenudtulan dan is menge zuma zan he neehè dan si Jesus, iyan, minsan pa zutun wazà medtuu is menge zuma zan.

Is Kebpaahà ni Jesus Duen te Menge Sumusundan Din

(Marcos 16:14-18; Mateo 28:16-20; Lucas 24:36-49; Juan 20:19-23)

14Ne zutun, mibpaahà daan si Jesus dutun te sepulù wey sevaha he menge sumusundan din te timpu he egkekaan sikandan. Midsawey zin sikandan tenged te kezesen te isip dan su wazè dan medtuu te menge etew he nemenudtul he nekeahà kandin he nevanhew. 15Ne zutun migkeg̵iyan ni Jesus sikandan te, “Penhipanew kew ziyà te tivuuk he kelibutan, ne ipesavut niw is Meupiya he Tudtulanen diyà te minsan hentei he etew he linimbag te Megbevayà. 16Ne sikan is edtuu kayi wey ebpebewtismu, ebeg̵ayan te untung he wazà pidtemanan. Ne sikan is kenà edtuu ne edhukuman te silut. 17Ne sikan is etew he edtuu kediey, duen menge singyal he egkehimu zan. Pinaag̵i te keg̵ehem te ngazan ku igkepeg̵uwè dan is menge mezaat he mulin-ulin he ebpenlalung te menge etew. Ne ebpekekag̵i sikandan te kineg̵iyan he kenè dan egketuenan. 18Ne minsan ke ebpekeg̵awed sikandan te menge uled wey ebpekeinum sikandan te minsan hengkey he edhilu, kenà sikandan egkekeizan. Ne emun edempaan dan is egkengezeruwan, ne egkengeulian.”

Is Kegkevatun ni Jesus Diyà te Langit

(Marcos 16:19,20; Lucas 24:50-53; Nengeulaula 1:9-11)

19Ne te kegkeipusa te Nengazen he si Jesus dutun te menge lalag din, mibatun sikandin pehendiyà te langit, ne mibpinuu ziyà te egkekewanan te Megbevayà. 20Ne zutun nemenhipanew is menge sumusundan te Nengazen he si Jesus ne impesavut dan is Meupiya he Tudtulanen diyà te minsan hendei. Ne is gehem te Megbevayà, mid-ug̵up kandan su nemekehimu zan te menge egkengein-inuwan su wey memeketuu is menge etew zutun te ibpesavut dan.

Currently Selected:

Marcos 16: mbbNT

Highlight

Copy