Lucas 21

No tinoroh a rakoh so sinmo do Dios

(Marcos 12:41-44)

1Do kayan ni Jesus do templo am navoya na sira o maynakem a tawo a tomoroh so regalo da. 2As navoya na pa o asa ka makasiasi a bioda a tomoroh so dadwa ka sentimos. 3Vatan na sia, “Vatahen ko dinio so kakawyoran ta rakorakoh o tinoroh no makasiasi aya a bioda as kano katavoan no tinoroh da no kadwan aya, 4takwan tomnoroh sa ya do sobra da asna no bioda aya am tinoroh na o voyvoh na a kartos do tori na panghovokan a kapakasiasi na.”

No mapaparin sa a manam so kavosan no mondo aya

(Mateo 24:1-2; 10:17-18; 24:3-14; Marcos 13:1-13)

5Do katori da machimavid dia no tawotawo saya o sinerbi a ipatnek so templo aya kano labor sa a tinoroh no tawotawo am vinata ni Jesus, 6“No tayto nio saya mavoya am maytavo anti a mararayaw as arava o mavidin a magen do gadagada naya.” 7Ahsan da nia, “Maistro, an mango o kaparin na nia as kan ango anti o kapanmoan namen sia.”

8Vinata ni Jesus, “Makapatak kamo tapian abo mapaychawaw dinio, ta aro sa anti o mawara a omserbi so ngaran ko as kavata da sia, ‘Yaken o panayahen nioaya,’ as ‘Nawara dana o tawsan no mondo.’ Vatahen ko dinio o kadi nio manganohdan dira. 9An madngey nio anti o mahara sa arap am mamo kamoava, ta kaylangan o kaparin da nia amna nyeng pava anti o kavosan no mondo aya.

10“Mian sa anti o matatarek a kavahayan kano nasiones a mangay do arap, 11as kayan anti no mahara a nini do matatarek a logar. Mian anti o pesti as kano kapaychapteng so mahara. Mian sa anti o mapaparin do tohos aya a oyod a mangamomo. 12As do manam so kaparin da nia am manoma pa anti o kapakasiasi da dinio. Akosahen da anti nio do salapan da no manyokoyokod as kan do sinagoga as kakalaboso da dinio a makayamot do ngaran ko, 13amna nia anti o yanan no oportonidad nio a mapawnonong so Evanghelio aya. 14Ichavakel nioava an ango vatahen nio dira, 15ta torohan koynio so kasolivan a di da anti matbay kano masobna no komontra sa dinio. 16No mismo sa anti a mapararayaw ninio am kaynyapoanan nio, sira o kakakteh nio, kaliposan nio kano kaychayvan nio sa. As mian sa anti dinio o dimanen da. 17As makayamot do kawnot nio diaken am kontrahen kamo anti no atavo, 18amna no Dios anti o machonong dinio. 19Dawa mabdibdis kamoava, ta makarawat kamo anti so kakawyoran aya a viay.

No manam a kararayaw no Jerusalem

(Mateo 24:15-21; Marcos 13:14-19)

20“Kapanmohen nio ta an mawara o kadivovong da sia o Jerusalem no sinjalo a enimigo nio am katanggalen nio ta no kararayawan am mahay pava. 21As an maparin sa anti ya am nyeng sa mayayo a tomayo do katokotokonan o tawotawo no Judea as sira o mian do takey am omodi pa sava, 22ta niaya anti o kawara no mahara a kastigo no Dios a akma so vatahen no nakatolas a Chirin na. 23Oyod sa anti makasi o mangovot so metdeh as kanira no mian so pasosohen da, ta mian anti o mahara a pakasisian da no Judeo. 24Dimanen da anti sira as kahap da sira ipriso do matatarek a nasiones. As no Jerusalem am labanan da anti no Hentil a manda do kapabhes na sira no Dios a maynolay dira.

No manam anti a kawara no Naytawo aya

(Mateo 24:29-31; Marcos 13:24-27)

25“Mian sa anti o machitatarek a mapaparin do tohos, do araw, vohan kano vitohen as do tana aya am mahara a pakasisian as aran no taaw am mian anti o mapaparin daw. 26As no tawotawo sa anti am mabo o ayet kano angdet da a somalap so mapaparin saya ta aran no tohos aya am mabdibdis anti, 27as kavoya darana anti sia o Naytawo aya do kademdeman a gomtin a oyod a rakoh kano makakniknin so ipakapamarin. 28An maparin sa anti ya am makasoyot kamo na as kapanapanaya nio na sia o kalibrian nio ta masngen dana.”

No sinyal no kasitnan no kapaypatol no Dios

(Mateo 24:32-35; Marcos 13:28-31)

29Pinawnonong na o akmaya sia parabola. Kwana am, “Tiban nio pa kono o kayo aya as kano kadwan a kayo, 30ta an kavoya nio so katool da am mapanmo nio o kasngen dana no rayon. 31Akma pa saw ta an mavoya nio sa anti o vinata ko saya a mapaparin am kapanmohen nio o kasngen dana somitnan no kapaypatol no Dios. 32Vatahen ko dinio ta no tawotawo sichangoriaw am maviay pa anti a makavoya so vinata ko saya a mapaparin. 33Mabo anti o tohos kano tana amna no chirin ko am maynyoha ava.

No nanawo do kafermi ta a mananggal

34“Amna makarakoh kamo so tanggal tapian dia nawri o parinyen nio o kapaylalakam nio do komwan do mondo aya anmana no kapagosto nio do karakohan nio tapian di kamo anti akmay kawtapan, 35ta no kawara naya anti am akmay tolo a abo so makatanggal sia do atavo a parte no mondo aya. 36Dawa fermi kamo a mananggal as kadi nio omhemhesan a machahoahok tapian mian anti o ayet nio a somalap so atavo saya mapaparin tapian magsal kamo anti a machivayat do Naytawo aya.”

37Do kararaw am nananawo si Jesus do templo ori as an kamahep narana am mangay do tokon no Olivo. 38As do mavekhas pa am machivayat dana sa o aro a tawotawo do templo aya a mangay a domngey sia.

Currently Selected:

Lucas 21: VTSP

Highlight

Copy