Matiyu 8
8
Pauliun hi Īsa in Sakit sin Tau Īipul
(Mk. 1:40-45; Lk. 5:12-16)
1Manjari limūd na hi Īsa dayn ha taas būd-būd. Paglūd niya, mataud tuud tau imuurul kaniya. 2Manjari awn hambuuk tau īipul in miyawn kan Īsa ampa simujud ha alupan niya, amu agi, “Tuwan, mapauliꞌ mu aku bang mu kabayaan kaulian aku.”
3Na biyutang hi Īsa in lima niya pa tau īipul sartaꞌ imiyan siya, laung niya, “Kabayaan ku kaulian na in sakit mu. Lumanuꞌ na in pais mu!” Na, saruun-duun naīg in ipul niya iban limanuꞌ na in pais niya. 4Sakali biyandaan siya hi Īsa, laung niya “Ibut-ibut kaymu, ayaw kaw magbaytaꞌ minsan kansiyu pasal sin pagpauliꞌ ku kaymu, sagawaꞌ kadtu kaw magtūy pa imam ampa mu palilingan in baran mu kaniya. Pagꞌubus, ampa kaw kadtu ungsud sin pagkulbanan amu in daakan hi Musa, ha supaya awn tandaꞌ kakitaan sin manga tau katān sin kiyaulian na kaw.”
Pauliun hi Īsa in Daraakun sin Kapitan Sundalu
(Lk. 7:1-10)
5Manjari pagdatung hi Īsa pa dāira Kapirnaum, awn hambuuk kapitan tau Rūm in miyāk mawn kaniya, ampa nagmuhut-muhut nangayuꞌ tabang kaniya. 6Laung sin kapitan, “Tuwan, in daraakun ku nasasakit ha bāy, diꞌ makahibal iban kiyasasakitan tuud.”
7Laung hi Īsa, “Madtu aku magpauliꞌ sin sakit niya.”
8“Ayaw na kaw madtu, Tuwan,” in sambung sin kapitan kaniya. “Diꞌ aku tūpun magpakadtu kaymu pa taas sin bāy ku sabab labi in kawasa mu dayn kākuꞌ! Malayngkan minsan kaw umiyan sadja dayn dī, tantu kaulian na in daraakun ku didtu ha bāy. 9Kaingatan ku maagad in uldin mu, sabab in aku ini hambuuk da isab tau ha babaan sin kawasa sin manga nakuraꞌ ku, iban awn da isab manga sundalu ha babaan ku. Bang laung ku ha sundalu ku, ‘Kadtu kaw’, madtu siya. Bang laung ku ha hangka-tau, ‘Kari kaw’, mari siya. Bang laung ku ha īpun ku, ‘Hinanga ini’, na magtūy niya hinangun.”
10Na, nainu-inu tuud hi Īsa pagdungug niya. Laung niya ha manga tau mataud imuurul kaniya, “Baytaan ta kamu tuud, way aku nakalanggal hambuuk tau bangsa natuꞌ Israil amu in biyaꞌ ha yan in kusug sin parachaya iban pangandul. 11Matantu ku kaniyu bang tumindug na tuud in pamarinta sin Tuhan mataud tau ginis-ginisan bangsa dayn ha manga hulaꞌ ha subangan iban sadlupan in makapagsāw kaynda Ibrahim, Isahak, iban hi Yaꞌkub sin pagjamu ha lawm pamarintahan sin Tuhan. 12Sumagawaꞌ mataud tau bangsa Israil in diꞌ makatabuk sin karayawan sin pamarinta sin Tuhan amu in bakas kiyasukuꞌ kanila. Hilaruk na sila pa lawm narkaꞌ jahannam. Duun sila magtangis iban sumandal sin kasiksaan makalap.” 13Sakali laung hi Īsa ha kapitan “Uwiꞌ na kaw madtu. Dayn ha sabab sin parachaya iban pangandul mu, hikarihil na kaymu in piyangayuꞌ mu.”
Sartaꞌ in daraakun sin kapitan didtu ha bāy kiyaulian na saruun-duun.
Pauliun hi Īsa in Sakit sin Tau Mataud
(Mk. 1:29-34; Lk. 4:38-41)
14Sakali limanjal na hinda Īsa mawn pa bāy hi Pitrus. Na, pagsūd nila pa bāy, kītaꞌ hi Īsa in ugangan babai hi Pitrus nagkukulang hīhinglaw. 15Kiyaputan hi Īsa in lima sin babai, sartaꞌ magtūy kiyaulian in hinglaw sin ugangan hi Pitrus. Na, nagbangun na siya ampa nagbutang pagkaun kan Īsa.
16Pagsadlup sin suga, mataud tau in diyā madtu kan Īsa. Sasukuꞌ sin tau siyusūd saytan, piyaguwaꞌ hi Īsa katān in manga saytan dayn ha lawm baran nila sin hambuuk lapal sadja, iban sasukuꞌ sin nasasakit kiyaulian niya. 17Hīnang niya in katān ini ampa mabunnal in kiyabaytaꞌ hi Nabi Isayas ha lawm Kitab, amu agi,
“Siya in nakapauliꞌ sin sakit natuꞌ,
iban nakapalayuꞌ sin manga sakit dayn kātuꞌ.”
In Manga Tau Apit Magad kan Īsa
(Lk. 9:57-62)
18Manjari pagkitaꞌ hi Īsa sin mataud tau ha katilibut niya, diyaak niya in manga mulid niya, magsakap supaya sila makauntas pa hansipak hunasan. 19Sakali awn hambuuk guru saraꞌ agama miyawn kan Īsa. Laung niya “Tuwan, magad aku kaymu minsan kaw pakain.”
20In sambung hi Īsa kaniya “In manga iruꞌ talun awn lugal pagꞌuwian nila iban in kamanuk-manukan awn pugad paghali-halihan nila, sumagawaꞌ in aku, amu in Anak Mānusiyaꞌ, wayruun tantu lugal pagtūgan iban paghali-halihan ku.”
21Awn isab hambuuk mulid hi Īsa namung kaniya, amu agi, “Tuwan, pauwia naa aku magbalik pa bāy. Bang ku hikakubul naa in amaꞌ ku ampa aku mari magbalik magad kaymu.”
22Sagawaꞌ laung hi Īsa kaniya, “Agad na kaw kākuꞌ bihaun iban ayaw na kaw mabimbang sin pasal yan, sabab in manga tau patay in pagtaat nila pa Tuhan, amu in matūp magkubul ha manga patay.”
Palinawun hi Īsa in Dagat
(Mk. 4:35-41; Lk. 8:22-25)
23Sakali simakat na hi Īsa pa taas kumpit asibiꞌ, ampa miyagad in manga mulid niya. Imuntas na sila sin dagat. 24Bukun malugay magtūy himuyup in hangin makusug, agun-agun na sila malunud, saꞌbu hi Īsa natutūg. 25Sakali kiyadtu sin manga mulid niya hi Īsa, ampa biyatiꞌ. Laung nila, “Tuwan, panabang na kaw. Magmula na kitaniyu!”
26Na, laung hi Īsa kanila, “Maytaꞌ kamu miyugaꞌ tuud? Kulang pakarayaw in pangandul niyu.” Sakali nagbangun na siya ampa niya diyaak in hangin iban alun pahundungun. Na, saruun-duun magtūy liminaw tuud in hulaꞌ.
27Magtūy in manga mulid niya kiyublaan. Agi nila, “Ay kaw naa, hisiyu bahaꞌ tuud in tau ini? Minsan in hangin iban alun magkahagad kaniya!”
Paguwaun hi Īsa in manga Saytan dayn ha Baran sin Duwa Tau
(Mk. 5:1-20; Lk. 8:26-39)
28Pagꞌubus yadtu dimungguꞌ na sila pa hansipak sin hunasan ha hulaꞌ sakup sin Gadara. Manjari awn duwangka-tau siyusūd saytan duun. Naghulaꞌ sila ha lawm kakubulan. Landuꞌ sila makabugaꞌ-bugaꞌ hangkan wayruun maglabay dayn ha dān masuuk pa kanila. Sakali gimuwaꞌ in duwangka-tau ini miyāk kan Īsa. 29Saruun-duun magtūy sila nagsilawak, amu agi “Unu in kabayaan mu kāmuꞌ, ikaw amu in Anak Tuhan? Miyari ka kaw supaya kami binsanaun sin bukun pa waktu?”
30Manjari ini awn manga babuy mataud nagbabaan didtu nagkakaun malayuꞌ-layuꞌ mawn kanila. 31Sakali nangayuꞌ junjung in manga saytan kan Īsa, laung nila “Anduꞌ kailu, bang mu kami paguwaun, pakadtua kami pa lawm baran sin manga babuy yaun.”
32“Kadtu na kamu,” laung hi Īsa. Sakali magtūy na gimuwaꞌ in manga saytan dayn ha baran sin duwangka-tau limīn madtu pa manga baanan babuy, ampa na in baanan sin babuy limungtud dimagan dayn ha pangpang pa babaꞌ. Nakatūy sila pa lawm dagat, iban naubus tuud sila naluꞌmus.
33Manjari in manga tau nagꞌiipat sin manga babuy magtūy dimagan madtu pa dāira, nanuysuy ha manga tau sin katān kiyakitaan nila, iban sin pasal sin nahinang hi Īsa ha duwangka-tau siyusūd sin saytan. 34Hangkan mataud tau dayn ha dāira in miyadtu miyāk kan Īsa, ampa sila nangayuꞌ junjung kan Īsa, bang mayan siya mīg na dayn ha hulaꞌ nila.
Currently Selected:
Matiyu 8: tsg
Highlight
Share
Copy
Want to have your highlights saved across all your devices? Sign up or sign in
© 1998, 2018, Wycliffe Bible Translators, Inc. All rights reserved.
