Aluki 14

Azezi botɩ bʋraaga yẽ ĩmã'asʋm vo'osgo daarɛ

1Vo'osgo daarɛ ayɩla tɩ Azezi daan sẽŋɛ Farisi dõma naba ayɩla yire tɩ ba di. Tɩ nẽrba la n boe mĩ na bɩsra ẽn wʋn ẽŋɛ se'em. 2La bʋraaga ayɩla n boe mĩ tɩ ĩ-fʋʋsŋɔ bã'aga tara ẽ, tɩ a zɛ Azezi nẽŋam. 3Tɩ Azezi soke lɔɔ karẽnsãandõma, la Farisi dõma la yetɩ: «Sore boe tɩ nẽra botɩ nẽrba yẽ ĩmã'asʋm vo'osgo daarɛ bɩɩ, sore ka boe?» 4Tɩ ba sĩna. Tɩ Azezi botɩ bʋraaga la yẽ ĩmã'asʋm, basɛ ẽ tɩ a kule. 5Dee soke ba yetɩ: «Ãne n boe yãma pʋam tɩ a dayʋa, bɩɩ a lɔlga wʋn lui lʋa pʋam vo'osgo daarɛ tɩ a kãn zoe tɔtɔ sẽŋɛ ka yaagɛ ẽ?» 6Tɩ ba makɛ tɩ ba lerge ẽ koŋe.

Dɛna-ya sik-m-mẽŋa dõma

7Tɩ Azezi yẽ nẽr-sɛba tɩ ba wi tɩ ba wa'am wa di la n loosrɩ zẽ'e-sõma zĩ'ita, tɩ a makɛ makrɛ yele ba yetɩ: 8«Nẽra sãn ẽŋɛ pɔgdire kibsa wi fo, da kãn sẽŋɛ ka zĩ'ire zẽ'e-sõŋɔ, tã tɩ a mẽ wi la nẽra n gãnnɩ fõn. 9Tɩ sɛka n wi ya wuu la, da wa'am wa yele fʋ yetɩ: ‹Isge, dee tɩ ẽna zĩ'ire.› Tɩ fʋ yãŋa isge sẽŋɛ ka zĩ'ire poorʋm poorʋm la yãnnɛ. 10Nẽra sãn wi fo, sẽŋɛ ka zĩ'ire poorʋm, tɩ sɛka n wi fʋ la sãn wa'am yẽ fɔ, a wʋn yetɩ: ‹M sɩrɛ, wa'am wa zĩ'ire nẽŋam.› Bɛla tɩ fʋ wʋn yẽ nã'asgɔ nẽr-sɛba tɩ fʋ zĩ la ba la zẽ'am. 11Nẽr-sɛka woo n zẽkrɩ a mẽŋa, Nawẽnnɛ wʋn sike ẽ, la nẽr-sɛka n sikri a mẽŋa, Nawẽnnɛ wʋn zẽkɛ ẽ.»

12La Azezi yele sɛka n wi ẽ na yetɩ: «Fʋ sãn yetɩ fʋ ẽŋɛ dia wʋntɛɛŋa, bɩɩ yʋ'ʋŋɔ wi nẽrba tɩ ba wa'am wa di, da wi'ira fʋ sɩrdõma, bɩɩ fʋ sɔbiisi, bɩɩ fʋ nẽrba, bɩɩ fʋ sawiiba n de bõntatba, se'ere n soe la, ba mẽ wʋn wa ẽŋɛ bɛla daar-sɛka mɛ wi fo lebse bɛla sãnnɛ. 13Fʋ sãn yetɩ fʋ ẽŋɛ dia wi nẽrba tɩ ba wa'am di, wi nasdõma, la kɔɔrnɔ, la wɔbsɩ, la fɔɔsɩ. 14Fʋ sãn ẽŋɛ bɛla, fʋ wʋn tara zu-yẽlga, se'ere n soe la, ba kãn yãŋɛ ẽŋɛ lebse fo. Bɛla, wakat-sɛka tɩ Nawẽnnɛ wʋn botɩ nẽr-sɛba n ẽŋɛ sɛla n masɛ a yɛm na vo'oge la, fʋ wʋn yẽ yɔɔrɔ.»

Kibs-kãtɛ makrɛ

(Amatie 22:1-10)

15La nẽrba la n lagsɛ zẽa dia zẽ'a la Azezi la, ba wõm ẽn yele se'em na mɛ, tɩ nẽra ayɩla yele ẽ yetɩ: «Nẽr-sɛka woo n wʋn po di dia Nawẽnnɛ so'olʋm pʋam na tarɩ zu-yẽlga.» 16Tɩ Azezi makɛ makrɛ bɔ ẽ yetɩ: «Bʋraa ayɩla n daan boe, ẽŋɛ dia zozo'e, wi nẽrba zozo'e tɩ ba wa'am wa di. 17Tɩ dia la wakatɛ paagɛ, tɩ a tõm a tõntõnna yetɩ, a sẽŋɛ ka yele nẽrba la tɩ ẽŋa yetɩ: ‹Wa'am-ya tɩ mam mãasʋm ba'asɛ mɛ gu'ura ya.› 18Tɩ ba nẽra woo yɛta lan pakɛ ẽŋa se'em, tɩ ẽŋa sɔsra sugri. Pɔspɔsɩ dãana la yele ẽ yetɩ: ‹Mam da la va'am, tɩ m sẽŋɛ ka bɩsɛ lan ãn se'em, bɛla tɩ mam sɔsra ẽ sugri.› 19Tɩ ayɩla yetɩ: ‹Mam da la nii-kɔɔrsɩ pia bɔɔra tɩ m makɛ ba bayi bayi kɔ bɩsɛ, bɛla tɩ mam sɔsra ẽ sugri.› 20Tɩ ayẽma mẽ yetɩ: ‹Mam di la pɔg-sãana, bɛla tɩ mam kãn yãŋɛ wa'am.›

21Tɩ tõntõnna la lebe ka tɔgɛ bɛla bɔ a zuudãana la. Tɩ a zuudãana la sũure yĩige, tɩ a yele a tõntõnna la yetɩ: ‹Yese tɔtɔ sẽŋɛ tẽŋa la sorɔɔrɔ zuto ka tarɩ nasdõma, la kɔɔrnɔ, la fɔɔsɩ, la wɔbsɩ wa'am tɩ ba di.› 22Tɩ tõntõnna la sẽŋɛ ka ẽŋɛ a zuudãana la n yele se'em na, dee yele ẽ yetɩ: ‹M zuudãana, fõn yetɩ mam ẽŋɛ se'em na, mam ẽŋɛ mɛ, la zẽ'a ken dee mɛ.› 23Tɩ zuudãana la le yele a tõntõnna la yetɩ: ‹Yese tẽŋa la pʋam sẽŋɛ sorɔ-pɩgsɩ la wuu zuo, ka mõrgɛ tarɩ nẽrba la wa'am tɩ ba kẽ tɩ mam yire pɩrɛ.›

24La mam yetɩ yãma mɛ tɩ nẽr-sɛba tɩ mam dẽŋɛ yele ba tɩ ba wa'am, tɩ ba zagsɛ la, ba nẽra nẽra kãn le malɩn di mam dia la.»

Azezi karẽnbia n masɛ tɩ a ẽŋɛ se'em

(Amatie 10:37-38;5:13, Amarkɩ 9:50)

25Azezi daan sẽnnɩ mɛ, tɩ nẽr-kʋʋŋɔ dɔla ẽ, tɩ a gelge yele ba yetɩ: 26«Nẽra sãn yetɩ a doose mam dee ka nõŋɛ mam gãnna a sɔ, la a ma, la a pɔga, la a kɔma, la a sɔbiisi, la a tãpa, bɩɩ a sãn ka nõŋɛ mam gãnna a mẽŋa vɔm, a kãn tã'agɛ dɛna mam karẽnbia. 27La sɛka woo n ka sakɛ nãmsgɔ wʋ nẽra n zɛɛrɩ a kũm dɔ-puurŋa dɔla mam, a kãn tã'agɛ dɛna mam karẽnbia.

28Ya mi tɩ nẽra sãn bɔna ya pʋam bɔɔra tɩ a mẽ de-tʋgma, a wʋn dẽŋɛ zĩ'ire mɛ geele bɩsɛ, ẽn tarɩ se'em na wʋn seke tɩ a yãŋɛ mẽ ba'asɛ, bɩɩ la kãn seke? 29La sãn dagna bɛla, a sãn ẽebɛ ẽbrɛ dee ka yãŋɛ mẽ ba'asɛ, sɛba wuu n yẽ bɛla la wʋn la ẽ mɛ 30yetɩ: ‹Nẽr-ẽna ẽebɛ la deego, dee ka yãŋɛ mẽ ba'asɛ.› 31Bɩɩ naba sãn wɛ'ɛsa tɩ a zɛbɛ la a na-tadãana, dẽnɩ tɩ a dẽŋɛ tẽ'esɛ bɩsɛ, ẽŋa n tarɩ nẽrba tʋspia la, a wʋn tã'agɛ zɛbɛ la na-sɛka n tarɩ nẽrba tʋspisyi, bɩɩ a kãn tã'agɛ? 32La a sãn bãŋɛ tɩ a kãn tã'agɛ, naba ayẽma la n ken zãagɛ la, a wʋn dẽŋɛ tõm na a tõntõnɩba tɩ ba sẽŋɛ naba la zẽ'am ka soke ẽ bɩsɛ, bãma wʋn ẽŋɛ la wãne tɩ zɛbrɛ la ba'asɛ. 33Bɛla mẽ, yãma nẽr-sɛka woo n ka basrɩ bõn-sɛba wuu tɩ a tarɩ la, ka tã wʋn dɛna mam karẽnbia.

34Yaarʋm ãn sõŋa mɛ, la a sãn sabgɛ, ba wʋn ẽŋɛ la wãne botɩ a le ãna yẽlʋm? 35A ka le tara yõorɔ la tẽŋa, la a ka tã wʋn dɛna bugulgo mẽ, ba lobrɩ ẽ basra mɛ. Sɛka n wõm yetɔga wã, a selse sõŋa sõŋa.»

Currently Selected:

Aluki 14: gurDBL

Highlight

Copy