Aluki 15

Pesgo, la lagfɔ n bɔɩ makrɛ

(Amatie 18:12-14)

1Lampo-tɔ'ɔsrɩba, la tõon-be'ero dõma zozo'e n daan sẽŋɛ Azezi zẽ'am tɩ ba selse a yetɔga. 2Tɩ Farisi dõma, la lɔɔ karẽnsãandõma la yõnna yetɩ: «Bʋra-ẽna wã to'orɩ la tõon-be'ero dõma, dee dita la ba.» 3Tɩ Azezi makɛ makrɛ wã soke ba yetɩ: 4«Bʋra-kãna n boe ya pʋam tara piisi kɔbga, tɩ ayɩla sãn bɔɩ, tɩ a kãn lagsɛ piisi piswɛɩ la awɛɩ la basɛ dũnsẽkam, dee sẽŋɛ ka ɛ ayẽma n bɔɩ la halɩ yãŋa yẽ ẽ? 5La a sãn yẽ ẽ, a wʋn yõkɛ ẽ mɛ buke la sũ-yẽlga. 6La a sãn kule yire, a wʋn wi a sɩrdõma, la a sawiiba mɛ yele ba yetɩ: ‹Naagɛ-ya la mam tɩ tɩ ẽŋɛ sũ-yẽlga, se'ere n soe la, mam yẽ m pesgo la n bɔɩ la mɛ.› 7Bɛla mam yetɩ ya tɩ tõon-be'ero dãana ayɩla sãn teege yɛm basɛ tõon-be'ero, sũ-yẽlga boe Nawẽnnɛ yire pʋam la bɛla gãnna nẽr-sõma piswɛɩ la awɛɩ n ka eerɩ tɩ ba teege yɛm.

8Bɩɩ, pɔg-kãna n boe wʋn tara lig-kõba pia, tɩ ayɩla sãn bɔɩ, tɩ a kãn yõ fɩtla pɩɩsɛ deego la ɛ lagfɔ la sõŋa halɩ wa yẽ ẽ? 9La a sãn yẽ ẽ, a wʋn wi a sɩrdõma, la a sawiiba mɛ yele ba yetɩ: ‹Naagɛ-ya la mam tɩ tɩ ẽŋɛ sũ-yẽlga, se'ere n soe la, mam yẽ m lagfɔ la n bɔɩ la mɛ.› 10Bɛla mam yetɩ ya tɩ tõon-be'ero dãana ayɩla sãn teege yɛm basɛ tõon-be'ero, sũ-yẽlga boe Nawẽnnɛ malɛkadõma zẽ'am na bɛla.»

Budibla n basɛ a sɔ yire, la a kẽema makrɛ

11Tɩ Azezi le yele ba yetɩ: «Bʋraa n daan boe tara a dayɔɔsɩ bayi. 12Tɩ yɩbga la yele a sɔ yetɩ: ‹M sɔ, pʋɩ fʋ bõntarsõm na bɔ mam m bõnɔ.› Tɩ a sɔ pʋɩ a bõntarsõm na bɔ ba. 13Tɩ la ẽŋɛ dabsa fẽe, tɩ yɩbga la lagsɛ a bõntarsõm na wuu yese sẽŋɛ tẽŋa n zãagɛ, ka tõm tõon-yooro sã'am ẽn tarɩ sɛla la wuu. 14La ẽn sã'am a bõntarsõm na wuu ba'asɛ la, kɔm kãtɛ n wa'am tẽŋa la pʋam, tɩ a ka le tara sɛla wʋn di. 15Tɩ a sẽŋɛ tẽŋa la nẽra ayɩla zẽ'am tɩ a dɩkɛ ẽ tɩ a tõnna. Tɩ nẽra la dɩkɛ ẽ botɩ a sẽŋɛ mõom ka gu'ura a kurkurdõma. 16Tɩ a kɔm dõnna tɩ a bɔɔra tɩ a di kurkuri dia. Tɩ nẽra nẽra ka bɔ ẽ. 17Tɩ a tẽ'esɛ a sũurum yetɩ: ‹Mam sɔ tarɩ tõntõnɩba zo'oge mɛ tɩ ba dita tɩgra dee basra, dee tɩ mam bɔna kalam kiira la kɔm.› 18Yãŋa yetɩ: ‹Mam wʋn lebe kule la m sɔ yire ka yele ẽ yetɩ, mam tõm na Nawẽnnɛ la fõn be'em, 19mam ka le masɛ tɩ ba wi mam tɩ fʋ bia. Ɩta mam wʋ fʋ tõntõnɩba la ayɩla.› 20Dee isge kulla a sɔ yire. La ẽn nãn boe zãazãarɛ la, tɩ a sɔ la yẽ ẽ, tɩ a ninbãalga yõkɛ ẽ, tɩ a zoe tʋ'ʋsɛ kɔkɛ ẽ, mõbgɛ ẽ. 21Tɩ bia la yele ẽ yetɩ: ‹M sɔ, mam tõm na Nawẽnnɛ la fõn be'em. Mam ka masɛ tɩ ba le wi'ira mam tɩ fʋ bia.› 22Tɩ a sɔ la yele a tõntõnɩba yetɩ: ‹Sẽŋɛ-ya tɔtɔ ka tarɩ fu-sɛka n ãn sõŋa gãnna la wa'am wa yɛ ẽ, dee dɩkɛ nutʋa pire a nu'ubiire, dee dɩkɛ tagra pire ẽ. 23La ya yõkɛ lɔl-polle n nõbɛ wa'am wa kʋ tɩ tɩ ẽŋɛ dia di, dee ẽŋɛ sũ-yẽlga. 24Se'ere n soe la, mam bia wã daan wõn na a ki mɛ, dee le vo'oge. A daan bɔɩ mɛ, tɩ tɩ le yẽ ẽ.› Tɩ ba yãŋa ɩta sũ-yẽlga.

25Wakat-ẽŋa tɩ a dayɔ-kẽema la boe la va'am. La ẽn lebe kulna wa lɛm yire la, a wõm na duursi tɩ ba wẽ'erɩ wa'ara. 26Tɩ a wi a sɔ tõntõnna ayɩla soke ẽ yetɩ: ‹Bẽm n ẽŋɛ?› 27Tɩ tõntõnna la lerge ẽ yetɩ: ‹Fʋ yɩbga la n wa'am, tɩ fʋ sɔ kʋ lɔl-polle n nõbɛ, ẽŋa n yẽ fʋ yɩbga la tɩ a tarɩ ĩmã'asʋm na ĩyã.› 28Tɩ kẽema la sũure yĩige halɩ. Tɩ a zagsɛ tɩ ẽŋa kãn kẽ yire. Tɩ a sɔ yese belem ẽ yetɩ, a wa'am wa kẽ. 29Tɩ a lerge a sɔ la yetɩ: ‹Bɩsɛ, yʋʋma zozo'e tɩ mam tõnnɩ fʋ tõoma, dee ka zagsɛ fʋ nõorɛ baa daarɛ ayɩla, la fõn ka bɔ mam bulla baa daarɛ ayɩla tɩ m kʋ tɩ mam la m sɩrdõma ẽŋɛ sũ-yẽlga. 30La fʋ bi-ẽna wã n dɩkɛ fʋ bõntarsõm sẽŋɛ ka tõm yalsɩ tõoma sã'am ba wuu dee kulum wã, fʋ kʋ la lɔl-polle bɔ ẽ.› 31Tɩ a sɔ lerge ẽ yetɩ: ‹M bia, fõn boe la mam zẽ'am daarɛ woo. La mam n tarɩ sɛla wuu la de la fõn bõnɔ. 32La, la masɛ mɛ tɩ tɩ ẽŋɛ sũ-yẽlga sɩrʋm, se'ere n soe la, fʋ yɩbga wã daan wõn na a ki mɛ, dee le vo'oge. A daan bɔɩ mɛ. Tɩ tɩ le yẽ ẽ.› »

Currently Selected:

Aluki 15: gurDBL

Highlight

Copy