Aluki 16

Tõntõnna n de yɛm dãana makrɛ

1Tɩ Azezi le yele a karẽnbiisi la yetɩ: «Bʋraaga n daan boe dɛna bõntarsa, tara tõntõnna tɩ a bɩsra a yire yelle. Tɩ ba wa'am wa yele bõntarsa la yetɩ, tõntõnna la sã'anɩ a bõntarsõm na mɛ. 2Tɩ zuudãana la wi a tõntõnna la yetɩ: ‹Bẽm tɩ ba tɔgra fõn yelle tɩ mam wõnna wãna? Geele pa'alɛ ma fõn ẽŋɛ mam bõntarsõm na se'em. Fʋ kãn le bɩsra mam yire yelle.› 3Tɩ tõntõnna la yele a mẽŋa yetɩ: ‹Mam zuudãana la yetɩ a dige mam a tõoma la pʋam mɛ, mam wʋn ẽŋɛ la wãne? Kʋa? Mam ka tarɩ pãŋa wʋn kɔ. La yãnnɛ n wʋn tara mam la sosgo. 4Mam mi mam wʋn ẽŋɛ se'em, tɩ a sãn wa dige ma, m tara sɩrdõma n wʋn to'oge mam ba yiɛ sõŋa.› 5Tɩ a wi a zuudãana sãnditba ayɩla ayɩla, soke pɔspɔsɩ dãana la yetɩ: ‹Fõn tarɩ mam zuudãana sãnnɛ la wãne?› 6Tɩ a lerge yetɩ: ‹Mam tarɩ a sãnnɛ na kaam dugl-kãra kɔbga.› Tɩ a yele ẽ yetɩ: ‹To'oge fʋ sãnnɛ gõŋɔ tɔtɔ zĩ'ire gʋlsɛ yetɩ, kaam dugl-kãra pinuu.› 7Dee soke ayẽma yetɩ: ‹Fõn tarɩ mam zuudãana sãnnɛ na wãne?› Tɩ a lerge yetɩ: ‹Mam tarɩ a sãnnɛ na mui bɔra kɔbga.› Tɩ a yele ẽ yetɩ: ‹To'oge fʋ sãnnɛ gõŋɔ gʋlsɛ yetɩ pinii.› 8Baa la tõntõnna wã ɩrgɔ n ka doose sore la, a zuudãana pẽgɛ ẽ mɛ, ẽn tõm na yɛm na ĩyã. Dũni-ẽna wã dõma tarɩ la yɛm tõnna la taaba gãnna nẽr-sɛba n bãŋɛ Nawẽnnɛ peelem.

9Bɛla ĩyã, mam yetɩ ya tɩ ya dɩkɛ dũnia bõntarsõm yõgɛ sɩrdõma, tɩ dũnia bõntarsõm na sãn wa ba'asɛ, ba wʋn to'oge ya tɩ ya bɔna Nawẽnnɛ yire wakatɛ n ka ba'asrɩ.»

Bõntarsõm sɩra sɩra

10«Nẽr-sɛka woo n de sɩra dãana bõn-pɩgsɩ pʋam, mẽ de la sɩra dãana bõn-kãra pʋam. La sɛka n ka de sɩra dãana bõn-pɩgsɩ pʋam, mẽ ka de sɩra dãana bõn-kãra pʋam. 11Bɛla, ya sãn ka dɛna sɩra dõma dũnia wã bõntarsõm pʋam, ãne n wʋn dɩkɛ bõntarsõm sɩra sɩra gu'ule ya? 12La ya sãn ka dɛna sɩra dõma la bõn-sɛba n dagɩ ya mẽŋa bõnɔ, ãne n wʋn dɩkɛ bõnɔ bɔ ya tɩ la dɛna ya mẽŋa bõnɔ? 13Tõntõnna ka tã wʋn sakɛ zuudãandõma bayi. A wʋn sise ayɩla mɛ, dee nõŋɛ ayɩla, bɩɩ a wʋn nanna ayɩla la mɛ, dee pɔ'ɔra ayɩla la. Bɛla, yãma ka tã wʋn sakɛ Nawẽnnɛ n de ya Zuudãana, dee botɩ bõntarsõm mẽ dɛna ya zuudãana.»

Nawẽnnɛ lɔɔ, la a so'olʋm yelle

(Amatie 11:12-13;5:31-32, Amarkɩ 10:11-12)

14Farisi dõma n nõŋɛ ligri la n wõm bɛla la, ba la'arɩ Azezi mɛ. 15Tɩ Azezi yele ba yetɩ: «Yãma pa'alɩ ya mẽŋa nẽrba nẽŋam wʋ ya de la nẽr-sõma. La Nawẽnnɛ mi ya pʋtẽ'era n ãn se'em mɛ. Bõn-sɛka tɩ nẽrsaalba pẽgrɩ la, de la bõn-dẽgrɔ Nawẽnnɛ zẽ'am.

16Amoyisi lɔɔ, la Nawẽnnɛ nõtɔ'ɔsrɩba n yʋʋn pa'alɩ nẽrba ban wʋn ãna se'em, ka paagɛ wakat-sɛka tɩ Azã wa'am na. Lan pɔsɛ Azã n misri nẽrba ko'om pʋam na, ba mõolɛ Nawẽnnɛ so'olʋm kõ-yẽlga mɛ, tɩ nẽra woo nargra pãŋa tɩ a kẽ. 17La, la de la nãana tɩ saazuum la dũnia tole gãnna tɩ Nawẽnnɛ lɔɔ la bõn-pɩka ayɩla bɔɩ.

18Nẽr-sɛka woo n basɛ a pɔga, dee le di pɔka ayẽma, a ẽŋɛ la be'em wʋ nẽra n gã'arɩ la a tadãana pɔga, la sɛka woo n di pɔka tɩ a sɩra basɛ mẽ ẽŋɛ la be'em.»

Bõntarsa, la nasa Alazaarɩ makrɛ

19Tɩ Azezi yetɩ: «Bõntarsa n daan boe, yɛɛra futo n ba ãna sõŋa, dee tara sɛla woo daarɛ woo tɩ la seke. 20Tɩ nasa ayɩla mẽ daan bɔna, tɩ a yʋ'ʋrɛ dɛna Alazaarɩ, tɩ a ĩyã wuu tara nõtɔ. A daan ẽn gã la bõntarsa la zanõrʋm, 21bɔɔra tɩ a di bõntarsa la n diti tɩ di-zõra luta la. Tɩ baasɩ sẽnna lɛɛla a nõtɔ la. 22Tɩ Alazaarɩ wa ki. Tɩ Nawẽnnɛ malɛkadõma tarɩ ẽ sẽŋɛ Nawẽnnɛ yire Abraham zẽ'am. Tɩ bõntarsa la mẽ wa ki, tɩ ba laagɛ ẽ.

23Tɩ bõntarsa la daan bɔna bug-tẽŋa nãmsra, yãŋa gorge yẽ Abraham halɩ zẽ'a n zãagɛ, tɩ Alazaarɩ zẽa a sakʋkɔ. 24Tɩ bõntarsa la wi Abraham yetɩ: ‹M sɔ Abraham, zoe m ninbãalga, dee tõm Alazaarɩ tɩ a dɩkɛ a nu'ubiire tẽ'egɛ ko'om mã'alɛ m zɩlɩŋa, se'ere n soe la, mam boe la bugum pʋam nãmsra.› 25Tɩ Abraham yele ẽ yetɩ: ‹M bia, tẽegɛ tɩ fõn daan boe dũnia zuo wakat-sɛka la, fõn daan tarɩ bõn-sõma mɛ, dee tɩ Alazaarɩ yẽta toogo. La lɛɛlɛ wã, a sũure mã'agɛ mɛ, dee tɩ fõn yãŋa nãmsra. 26La bõn-sɛka n pa'asɛ, bog-ko'ogo n beŋe tõma la yãma, tɩ nẽra sãn bɔɔra tɩ a ze'ele kalam sẽŋɛ yãma zẽ'am, a kãn tã'agɛ. La nẽra mẽ sãn bɔɔra tɩ a ze'ele yãma zẽ'am wa'am tõma zẽ'am, a kãn tã'agɛ.› 27Tɩ a lerge Abraham yetɩ: ‹M sɔ Abraham, la sãn dɛna bɛla, mam sosrɩ fʋ mɛ tɩ fʋ tõm Alazaarɩ tɩ a sẽŋɛ mam sɔ yire, 28tɩ mam tarɩ la sɔbiisi banuu, a sẽŋɛ ka kã'an ba, tɩ ba mẽ da wa'am nãmsgɔ zẽ'a wã.› 29Tɩ Abraham yele ẽ yetɩ: ‹Ba tarɩ Amoyisi la Nawẽnnɛ nõtɔ'ɔsrɩba n gʋlsɛ gõn-sɛba la mɛ. La masɛ tɩ ba sakɛ la gõn-bãma yetɔga.› 30Tɩ a lerge ẽ yetɩ: ‹M sɔ, ayɛɩ, nẽra sãn vo'oge lebe sẽŋɛ ba zẽ'am, ba wʋn teege yɛm basɛ tõon-be'ero.› 31Tɩ Abraham lerge ẽ yetɩ: ‹Ba sãn kãn sakɛ Amoyisi, la Nawẽnnɛ nõtɔ'ɔsrɩba la nõorɛ, baa nẽra n ki sãn vo'oge lebe, ba kãn sakɛ.› »

Currently Selected:

Aluki 16: gurDBL

Highlight

Copy