Mateo 4

Na Namachasan Satan An Jesus Makafasuron

Mar. 1:12-13; Luc. 4:1-13

1Sachi ad impuyut na Ispiritun Apudyus à Jesus ta ikaw wi maid pu takù ingkaw ta sachin mamachasan Satan an siya makafasuron. 2Ad ta unog na opatpuruy padcha ta sachi wi foon pù nangnangan, siyan nafitifitil. 3Siyan ummoy Satan padpachason à siya, wi anana, “Nu tuttuway anà sian Apudyus, mamfarfalinom tinapoy na anchanayay fatu.”

4Ngim sinongfatana anani, “Niyug-is ta ukud Apudyus wi, ‘Foon pu kà tinapoy afus na ifiyag na taku, ngim masapurcha kon losani ukud Apudyus à mafiyakanchà ing-ingkana.’”

5Sachi ad inyoy Satan à Jesus ta tabfungan na Templo ta sachi naapudyusani ili wi Jerusalem. 6Ad ananan siya, “Nu tuttuway anà sian Apudyus, man-odchag-a, tan niyug-is ta ukud Apudyus wi,

‘Filinon Apudyus na aanghelesnà mangayyuwan an sia,

siyan sìpawonchà sia,

ta uray na chapannu, achi pu masukat ta fatu.’”

7Ad anan ako Jesus an siya, “Ngim niyug-is ako ta ukud Apudyus wi, ‘Achim padpachason na Apum wi Apudyus.’”

8Ad inyoy ako Satan à Jesus ta tànangani filig, ad impailanan mansabsafali wi maiturayan ta luta ya kinafarucha. 9Ad anana, “Paituray-u losan chachi an sia nu mampalintumong-a wi manayaw an saon.”

10Ad summongfat à Jesus anani, “Lumayaw-a Satan! Tan na niyug-is wi ukud Apudyus, anana,

‘Maid uchum à chayawonyu

nu achi afus na Apuyu wi Apudyus,

ya afus akò siyà patkonyu!’”

11Sachi ad lummayaw à Satan, ad ummoy na aangheles finadngan à Jesus.

Na Nallukiyan Jesus Nantudtuchuwan Ad Galilea

Mar 1:14-15; Luc. 4:14-15

12Chingngor pun Jesus wi nifarud à Juan wi Mamfufunyag, nangulin ummoy ad Galilea. 13Ngim foon à iningkaw ad Nazaret ngim ummoy ad Capernaum wi achani ta sachi Fayfay wi Galilea wi sakupon Zabulon ya Neftali. 14Nàwan sachì tummuttuwaan na inukud Isaias wi profeta ta awi, wi anana,

15“Mafadngan na takud Zabulon ya Neftali

wi chomang na sachi Chawwang wi Jordan

wi nan-apot ta Fayfay,

wi chichan foon pù Judio

wi ingkaw ta provinsiya wi Galilea!

16Na amaschi wi taku,

isù iniingkawcha ta pangot kapu ta fasurcha,

ad sachin nisinaanchan Apudyus.

Ngim mamfaru ta sana

tan marawakan na somsomòcha

tan chummatong an chichan napigsay Silaw.”

17Ad nanipud ta sachi, illukin Jesus wi mangiwarawag ta tudtuchuna anani, “Masapur mamfafawiayu ta lawingi oy-oyyoonyu tan chanchanin milukiyan na Manturayan Apudyus!”

Na Nangayakan Jesus Ta Opati Manatakufur À Mandisipulusna

Mar. 1:16-20; Luc. 5:1-11

18Na nanadchadcharanan Jesus ta tarantag na sachi Fayfay wi Galilea, innilanan chuway mansunud wi cha Simon wi ananchay Pedro ya Andres wi manakufur. 19Ad anan Jesus an chicha, “Ichulinyunat ad mitun-ud-ayun saon ta sukatà na iwaaryu ta mamatiyonyun takun saon.” 20Ad nan-itaynanchan takufurcha ad nitun-udchan siya.

21Naaaycha pù ait innilan ako Jesus na chuway mansunud wi cha Jaime an Juan ya amachay Zebedeo wi iningkaw ta fangkacha, wi amatonchan takufurcha. Ad inayakan ako Jesus chichay mansunud. 22Ad nan-itaynanchà amacha ta fangka ad nitun-udchan Jesus.

Na Nantudtuchuwan Jesus Ya Nangaanana Ta Sakit

Luc. 6:17-19

23Ad ummoy à Jesus ta ailiilid Galilea nantudtudtuchu ta sinagogacha wi makimkimungan na Judio, ad inwarawarawagnan Mamfaruy Chamag mipangkop ta Manturayan Apudyus. Ad inaanna kon nan-ob-ofot wi sakit ya likat na taku. 24Ad nanchinamag na mipangkop an Jesus ta losani ilid Siria. Siyan inyoy na takun siyan losani nasakit à nan-ob-ofot wi sakit, wi isun na nakafarfaray, nakartoy ya chachi naayayong. Ad impaimfag Jesus chicha losan. 25Ad ad-adchuwan na takuy nitun-ud an siya wi narpu ta provinsiya wi Galilea ya Judea ya Decapolis ya Jerusalem ya chachi ili ta chomang na Chawwang wi Jordan.

Currently Selected:

Mateo 4: ksc

Highlight

Copy