लूका 15
15
तोरुप लुककी पे
(मत्ती १८:१२-१४)
1ङ्यिम्ज्यिक से दुतुपतिवा ताङ दिक्छेनतिवा तेरी येशूकी सुङ ङ्येन्दुपला खोकी चिप्ला जोम्नोक। 2यिने फरिसीतिवा ताङ यहूदी छ्योकी गेकेनतिवी मुक्तम देनिन सिरा दुक सिक्यासुङ, “दी मी तीकी याङ दिक्छेनतिवाला गा क्यानी तिवी मुला राङ देनी समा शेनोक।”
3तमा येशूकी तिवाला दी पे ति शेन नाङ्सुङ, 4“ख्यिरा पर्ला मी ललाइकी ति लुक सयी च्यिक वोज्यिवी, तमा तिवी पर्ला लुक च्यिक ति तोर्सुङ सिसिन खाल गु ताङ गु तीला चरिनला राङ क्युर ज्याक्नी ती तोरुप लुक तीला माङ्येता सेक मोछोल्वी रो? 5तीला ङ्येसिमा गा कियी सिरा तीला खोरो पङ्दुर ज्याक्नी 6खाङ्बा खुर्नी गिवी। तमा खोरो दाल्जातिवा ताङ युल्वातिवाला कताङ्नी दुक सिवी, ‘ङे मुला गा की। ङे तोरुप लुक ति ङ्येसुङ।’ 7ङ ख्यिराङला सिरिन, दी दोके दिक्पा ने सेम ग्युर मोगोवु मी टेङ्बु मिरा खाल गु ताङ गु सिनाङ दिक्पा ने सेम ग्युरुप मी मिरा च्यिककी थोक्ला देवाच्येनला मङ गा किवी।”
तोरुप डप्बुकी पे
8“पुम्पेजा यीकी ति ङुलकी डप्बु#१५:८ ङुलकी डप्बु च्यिक ति लावा मिरा च्यिककी ङ्यिमी ल यिन। च्यिथम्बा नोक, तिवी पर्ला च्यिक ति तोर्सुङ सिसिन तीकी दिप्ली च्येनी कोमी ग्यप्नी खाङ्बी अर्शा उर्शाला ती तोरुप डप्बुला माङ्येता सेक मोछोली रो? 9तमा तीला ङ्येसिमा खोरो दाल्जातिवा ताङ युल्वातिवाला मुला राङ कताङ्नी ‘ङ ताङ मुला गा की। ङे तोरुप डप्बु याङ ङ्येसुङ।’ सिनी सिवी। 10ङ ख्यिराङला सिरिन, दी दोके दिक्पा ने खोरो सेम ग्युरुप दिक्छेन मिरा च्यिककी थोक्ला कोन्छ्योककी लेन क्योलुप थुतिवा गा किवी।”
तोरुप पुज्युङकी पे
11येलुङ येशूकी सुङ्सुङ, “मी मिरा च्यिककी ति पुज्युङ पिन ङ्यी नोक। 12ङ्यिम्ज्यिक पुज्युङ छ्युङा तीकी खोरो पपाला ‘पालो, ङला थोप गोवु अंश ति गो नाङ्नी।’ सिनी सिक्यासुङ। तमा पपा तीकी खोरो टोङ्बा ति पुज्युङ ङ्यिवुला गोनी बिन्सुङ। 13तमा ङ्यिमा चेयी ज्युक्ला ती पुज्युङ छ्युङा ति खोरुङला थोपुप टोङ्बा ति तेरी रुनी थाक्रिङ्बु लुङ्बाला गाल। ते गल्नी तीकी सेम नोजु क्यानी खोरो टोङ्बा ति तेरी ना ताङ्सुङ। 14तीकी तेरी टोङ्बा ति सिन्दा क्यासिमा ती लुङ्बाकी तेरी दासाला छासे ङ्यिमा मर्वु शर्नी ती ति कतुकारला ख्येल्सुङ। 15तुक क्यानी ती ति ती लुङ्बाकी मी यीकी ते गल्नी लाका लाङ्सुङ। तमा तेकी मी तीकी तीला खोरो शिङ खला फाक्पा चोपला ताङ्सुङ। 16तीला छासे ल्होवा लानी फाक्पी सयी वोतुप फाक्पी समा यिन्सिनाङ सोनी खोरो खोक्पा ग्येङ्गुप नो क्यासुङ, यिने सी साङ तीला काङ साप समा माबिन।
17ती पेला के तीकी टेन्बा ङ्येनी दुक सिक्यासुङ, ‘ङे पाली खाङ्बा याङ लावातिवा बङीकी सुप दुन दुन सोनी साङ ल्हकिवी। यिने ङ ति दे ल्होतुङ्बा राङ शेप छाल्सुङ। 18त याङ ङ ङरा पाली चाला गल्नी दुक सिरिन, “ओ पालो, ङे कोन्छ्योक ताङ पाली तेन्दोकला दिक्पा क्यायी। 19त याङ ङ पाली पुज्युङ सि छ्योवु मे। ङला पाली लावा मिरा च्यिक दोके नोनी ज्योक।”’ 20तमा ती खोक लानी खोरो पपी ते गाल। ती ति तरोङ साङ थाक्रिङ्बु वोतुप पेला राङ पपा तीकी तीला थोङ्नी तीला ङ्यिङ्ज्ये लानी छ्योङ्बाल ग्यकिन गल्नी पाङ्बा तप्नी पुका क्यासुङ। 21तमा पुज्युङ तीकी पपाला सिक्यासुङ, ‘पालो, ङे याङ कोन्छ्योक ताङ पाली तेन्दोकला दिक्पा क्यायी, तफेन्ला ङ याङ पाली पुज्युङ सि छ्योवु मे।’ 22यिने पपा तीकी लावातिवाला सिक्यासुङ, ‘ङमु गल्नी तेरी सिनाङ मज्या ल्यामु ति खुन वानी दीला कोन बिन, थेप्तोकला सोर्तुक तान बिन, तमा काङ्बाला काचा कोन बिन। 23तमा लङ्डु ग्यामु यी सेनी दाक्पु डेन कितुप। 24च्यिलासिसिन दी ङे पुज्युङ ति शिसुङ, यिने येलुङ सेन्बु लासुङ। तोर्सुङ, तमा त याङ ङ्येसुङ।’
25ती पेला पुज्युङ छ्ये ति शिङ ख नेसुर लोक्नी खाङ्बी चाला वुङ्सालेन्सिन लु ताङ छ्याम्डल के कियी वोतुप वोरु थोसुङ। 26तमा तीकी लावा यीला कताङ्नी, ‘दे काङ च्युङ्नोक?’ सिनी टिसुङ। 27तमा लावा तीकी तीला सिक्यासुङ, ‘ख्योरो नुप लोक्नी वासुङ। खो थङ्बु राङ लोक्नी वावु ख्योरो पाली गा क्यानी लङ्डु ग्यामु यी से च्यिसुङ।’ 28ती थोसिमा पुज्युङ छ्ये ति ङ्यिर्मु लानी खाङ्बी नाङ्ला शुकुप साङ माङ्येन्सुङ। तमा पपा ति पाङ्ला राङ वानी तीला लुसुङ। 29यिने तीकी पपा तीला सिक्यासुङ, ‘लो दोजोयी सेक ङे पाली शब्ज्यी क्या देतिन, तमा पाली काङ सुङ्गुप ति ङे तेरी ङ्येनिन। यिने पाली ङला ङे दाल्जातिवी मुला गा कितुपला रेरुक च्यिक साङ मनङ वे। 30यिने छ्येमुतिवी मुला शोर्नी पली टोङ्बा तेरी ना तोङ्गुप दी पली पुज्युङ ति लोक्नी वासिमा तीकी थोक्ला ति लङ्डु ग्यामु से च्यिसुङ।’ 31तमा पपा तीकी तीला सिक्यासुङ, ‘पुज्यो, ख्युरुङ याङ नरी ङ ताङ मुला राङ वे। ङे टोङ्बातिवा तेरी ख्योरो तिराङ यिन। 32यिने दी ख्योरो नुप याङ शिसुङ, यिने येलुङ सेन्बु लासुङ। तोर्सुङ, यिने त याङ ङ्येसुङ। तुक क्यानी दाक्पी गा ताङ किर्मु कि राङ गोकिवी।’”
Currently Selected:
लूका 15: xsrNT
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.
