Kara Okovuri Nkanuka 5
5
Ananaiasi-daring Sapaira Daang Daangamparekotaa' Boo'paretu'na'
1Teka narung naning miring Ananaiasi teni ninka ba'aang Sapaira, teringe kansi'koo nii'noo' baavevuretu'. 2Ee'noko Ananaiasi, ba'aange noru'ui otoko, nii'ning pinka'ura ee'noko nii'ning kara okovuri nkanuka-anko tavo'uu' ookutunung moo' tampuma. 3Teka Piitai aa'puu', “Ananaiasi, aming-koo da' Sietani'ke domang maanto'koo taura'daring Tanuaang Meekung tosiee'naang mooni'koo nii'ning pinka'ei kansi' baaveveieeng-koong? 4Tenang mme' baavevea' tevora' tee da' narung okorui otoko'nung. Ee'noko baaveveieenoo'keta tee mooni' tee dakaang, daka piaropeu'na' nkovepeu'. Naninge eturuarupeu' a' tavo'koo. Ee'noko arekee'koo dakaang domange tee' matauei? Ai' dake tee naning tosiea', teka Kumponing tosieing.” 5Tenang Ananaiasie teing kara taaravura tee te' doonko boo' dua'aru'nung. Ee'noko teing nantoong taaravau'ning aa'na' avoreau'. 6Teketa nemaa' daa'arira mono nopa'aara nkavai berora dako'au'.
7Dama'ke beenaumo aua-pina' tankinuko ba'aang te' tavo'kuu' noru'ua' kapoo' nkoaru'nung. 8Ee'noko Piitai aa'puu' teni, “Naumeai, dee'ke ee masika' kansi' aing-koo mooni' anke otoining-koo makosi baaveveresieeng?” Ee'noko tenie aa'puu', “Ee', teing-koo makosi.” 9Teka Piitai aa'puu' teni, “Dee'ke arekee'koo nari' mataueresing Tanuaang Meekung Ovoring bakaang paara-koo? Taaraveai da'ung dako'koo beroining-koong kumpikumpiring, enang toroarima karanaang basiarimang. Teinge ee'ninge napo' da' nkaraava'naang.” 10Teketa namu'ke teni te' doonko kau'kanoo' boo' dua'aru'. Ee'noko teinge nemaa'ke poroma boo'pario' ooaara oko-aape nkavai berora dako'au' ba'ung-koo nameng-aape. 11Ee'noko avo'avoro' pankaing tavo'kuu' teing-koo ookara-koo dootuu'nupoong-koo ee'noko napo' teing-koo tang taaravau'ning-koo.
Kumponinge Teing Karistoo' Bakaning Taa'ni'antavuru'na'
12Enang tee teinge kara okovuri nkanukai mmau' taa'ni'antananka ee'noko ta'nimpaarii'nanka nkoaako' nantoong-koo meu'ke, ee'noko teing ookutunavitu dootuu'nava pankava-koo Solomoni' bakanavaro aivitu˜navaro-koo teke nari' kune'eema otoroko'. 13Nii'ning teing-anko po'koo avoreaako', teka bane avoreaama nantoonge deto aa'na' nari' noru'aariko'. 14Ee'noko nii'ninge masika'antavaama dau-eta dau Ovoring-koo tampo'ariko', miatara, aa'noko donkaang ee'noko maniku'. 15Tee' nkoarima teinge siipa-po'nupoong taung sionairu-koo nkavaari poroma batanang-koo ee'noko tani' dovang-koo bempaariko' Piitai teke tankinuma tamung uu'aa' narunge deeko', daka'antavuriko taarevoroo'naang. 16Ee'noko napo' nantoonge osi oki'nareka'keta Jerusalema' koroai otoroining-eta siipa-po'nupoong po'antavaariko' ee'noko ma'nari orenge koriaariko'ning, ee'noko ookara nari' taarevoroko'.
Koosinunge˜ Simpiri'antavuru'na' Teing Kara Okovuri Nkanuka
17Teka piristi' deto basi daa'aru'nung bakanavitu Noru' Pitunavitu ninka mamairoi maanto'uri. 18Ee'noko teing kara okovuri nkanuka dai'aarira kiimatanava-koo tamung sipaarimanoo' sipaaru'. 19Teka muunganang Ovoring bakaang koosinunge karanaang kiimatanava-koong daate'ura dama'du sing-antavuru' teing, ee'noko aa'puru', 20“Berira donkoniriaing te' pava dootuu'nava pankava-koo ee'noko nauereriaing nantoong ookara minkunaa aung amurii' nerakung otooto'koong.” 21Ee'noko tenang teinge tee' taaravaara tane'ke tero ora'ka pava dootuu'nava pankava-koo berora nau-antavaariko' teke.
Enang piristi' deto basi bakanoo' kara simpe'doma pou' teing ninka nari' otoroko'ning ninka, teketa koompaara'navitu bokuaaru', teing ookara bore'nuka Isireeli-nupoong tarenuka, ee'noko kiimatanava-koo botoaaru' kara okovuri nkanuka po'antavaarii'naang. 22Teka tenang piatooronanka˜ porora teka kiimatanava-koo ooaaria', ee'noko toroarira tee' minkuau' ooaariaruu'na'. 23Aa'pau', “Nii'ke kiimatanava tampa' pinka'ario' ooampiring, ee'noko tanatavaamaing karanaange donkonaio', teka tenang daate'ampirinang narung naning otoa' kuunge.” 24Enang tee teie teing piatooronuka dootuu'nava pankava tareaako'ning-koong bore'ke ee'noko piristi'koo pankenge taaravaara teing aing karananka teing papaaravariru' teing-koo. Paapaa'arima aa'paako', “Ai' pa arekee' nkoaraa'naang?” 25Ee'noko nii'nunge pora aa'puru', “Teing nantoong dii'ke kiimatanava-koo siperereru'ning pava dootuu'nava pankava-koo donkonai nau-antavaarimaang nantoong.” 26Teketa teing piatooronuka biikaang bore' siompai berora bokuaaru' teing, teka tokoona' nkoaaria' avoreai nantoonge kapange too'paari'neeng-koo.
Tuutunanoo'ka Kara okovuri nkanukai Ovontung Maku'aaru'na'
27Ee'noko teinge po'antavaarira koompaara'navitu-koo uro'kanoo' donkong-antavaaru'. Bera piristi' deto basie nia'urima aa'puu', 28“Nii'ke bakei koonto' poterarampirieeng dii' tee aung miring-koo nau-antarariaroo'naang. Teka dii'ke maanto'antavering aung Jerusalema'nameng teie diikaang naunaue, ee'noko dii'ke nii' tuumpi-koo kei'dorimang aung naning bakaang boo'koo.”
29Teka Piitai ee'noko teing nii'ning kara okovuri nkanukai maku'aama aa'pau', “Nii' aa' tee Kumponing-koo narung-koo aroo'marii'naang, naning-koo deea'. 30Teie Kumponinge niikakatauro biikaange daa'antavuu'nung tee Jiisuu' dii'ke dupisi'eru'nung aa'barata'koo bi'erira. 31Kumponinge pankaing-antavuu'nung deto tee-koo tampavine-koo sipura nantoong biikaang Ovoring ee'noko Domang-anta deemparaa'naang teketa dii' Isireeli-nupoong pakururio' bere'dariko oraka' nkonanka tonta'derurii'naang. 32Ee'noko nii' teing kara sira'nuka aing-koo kapoo'nanka-koo tee ninka Tanuaang Meekung ninka nari', tee ee'nung Kumponinge avuru'nung teing siompaamaing.”
Kamelielei Ovontung Ka'duu-antavuru'na'
33Tenang teinge ovoroo'nukai tee' taaravaara teing iirai puru'antavurio' teing dupisi'koo piavorou'nung. 34Teka teing-koo narung Boto Keperuu'navitu˜koong miring Kameliele otoko' ookarai nantoonge tampa' noru'aamaung. Bera tee teing-koo koompaara'navitu-koo meu'ke donkonura aa'puu', “Aing nantoong dama'du sing-antaverereriai io'.” 35Ee'noko teie aa'puru' teing ovooka'nuka, “Dii' Isireeli-nupoong, tampa' tarerariai aing-koo kapoo' orara nkoveri'neeng. 36Tero tee naning Tuudas donkonura baka daangamparako'nung pankaing tamparama, ee'noko karingai donkaange deerunoo' karenaumo daaku'ke siompaako'. Teka tee tavaako tee teing tee siompaako'ning avitoitoi purarenka'arira paa'ariru'. 37Tee-koo dama'ke Judasi Kaaleli'nung napo' donkonuu' tenang Siisa'ke nantoong deeruvuriko'nang, ee'noko teie nii'ning barampuru'. Ee'noko tee napo' tee' boo'paru' ee'noko teing ookara tee siompaako'ning purarenka'ariru'. 38Tee'koo ninge enang dii' aung kapoo' enang tavo'kuing-koo naurampimang, donta'dariri otoriaing aing-eta nantoong-eta, siperereriko bii'ka otoroai. Aing kapoo' ainge maroaama nkoaamatomaing naning-etaing deeko' teing dua'aravaining. 39Teka teing Kumponing-etaing deeko' dii'ke teing dua'anta-koo makosi deea'. Tee' nkorarima deeko' Kumponing ninka turani'nanka deentarii'naang.”
Teing Kara Okovuri Nkanuka Mura'aariko Doturotuariru'na'
40Bera tee bakaang kara tampa' taaravaara teing kara okovuri nkanuka kuung bokuaarira mura'aarima poteaaru' Jiisuu' bakaang miring-koo kapoo' minkuaavaroo'naang. 41Teketa tee koompaara'navitu-ankoita berou'nung dotuariritaa' Kumponinge taura'puru'nung-koo manki' nkavaava'naang bakaang miring-koo. 42Ee'noko doong kante pava dootuu'nava-koo ee'noko nantoong biikaning pavananka-koo nau-anta-koo sipariaruko' daankiaama Jiisuu' tee naning Kumponinge tero Pako'pari'uu'nung˜ nantoong domampuri tarevuriainoo'koo.
Currently Selected:
Kara Okovuri Nkanuka 5: nasNTpo
Highlight
Share
Copy
Want to have your highlights saved across all your devices? Sign up or sign in
© 1994, Wycliffe Bible Translators, Inc. All rights reserved.
