Luukeꞌ 23

Jiisuu' Pailati'ankoi Donkong-antavau'na' Koosinang-koo

(Mat 27:1-2,11-14; Mak 15:1-5; Jon 18:28-38)

1Teketa ookara naro'ariru'ning daa'arira Pailati'anko tavo'au' ee'nung daurarong Siisa'ke botovuu'nung Judia'navaro tare-koo. 2Ee'noko teka teinge tuumpi tutumpau' aa'paama, “Nii'ke enang daa'ampiring aung naning nantoong Siisa' bakaang tare-ita onou kentaang-antavurimaung, tee Siisa'anko taakisi dua'koo orokovurikoo', ee'noko aa'pukoo', ‘Ning tee tero Kumponinge dii' domang-anta-koo maraka-antaruru'nung, daurarong pako'pari'antamuma.’”

3Ee'noko Pailati'ke nia'uu' tee, aa'puu', “Da' ee tee Ju'nupoong biikaang daurarong?” Ee'noko teie maku'uma tee aa'puu', “Tee' nari' minkueina' o'nong.”

4Ee'noko Pailati'ke teing piristi'koo ovontunanka karika' ninka nari' aa'puru', “Ninge kapoo' oraka' nkovuing ooampa' aung-koo dii'ke tuumpi-koo makosi.”

5Teka teinge e'manai aa'paako', “Aunge nantoong Rooma'nung daurarong bakaang tanata-ita keta'parii'naang irikung-antavurimaung nau-antavurima Judia'nameensi' daka'pui, Kaaleli'nameensi'keta bera aa' amono-koo basivukoo'.”

Jiisuu' Eeroti'ankoi Donkong-antavau'na' Koosinang-koo

6Tenang Pailati'ke taaravura tee aung kara teie tana'uu' tee Kaaleli'nung deeko'. 7Ee'noko tenang teie Pailati'ke Kaaleli'nung noru'ura, teie Jiisuu' Eeroti'anko botovurio' be'antavau', tee Siisa'ke Kaaleli'navaro tarenara deeng-antavuu'nung-anko, ai' Eeroti' Kaaleli'keta Jerusalema' beero'ui otoko'nung tee paroro oo-koo.

8Tenang Eeroti'ke Jiisuu' oovura aa'na' dotuaru' pankaroong oo-koo piavoko'nung-koo nantoonge minkuaako taaravuko'noo'ka tee. Ee'noko teie nii'ning taa'ni'anta iri'po'ning nkovuko deeko' oovuu'naang piavou'. 9Tee'koo Eeroti'ke pankapankaroonge niania' nia'uu', teka Jiisuu'ke nii'nau' maku'evua'. 10Teketa piristi'koo ovontung ee'noko boto naunukai teke donkonai iri'oroitaa'nange tuumpiaako'. 11Ee'noko Eeroti' ninka bakaning piatooronukai uri'narimpaama oraka' nkoaako' akapeu'aama, teketa nepu'na' mononopa' boo'antananka tee-koo daurarong-pina' kurumpaara Eeroti'ke toro-antavuu' Pailati'anko. 12Ee'noko te'mung ee'na'mung Eeroti' naanka Pailati' napo' navueeretu' temu'keta tee turampeereko'naanka.

Jiisuu' Pailati'ke Boo'koo Tampuu'na'

(Mat 27:15-26; Mak 15:6-15; Jon 18:39–19:16)

13Teketa Pailati'ke piristi'koo ovontung, tare-nupoong ee'noko nantoong naro'urira aa'puru', 14“Dii'ke tee aung naning ning-anko tavo'ering daurarong Siisa' bakaang tare-ita nantoong onou kentaang-antavurimaung tamperima. Tee-koo ee aing, ninge dii'koo uro'kanoo'ka baakeeneama kapoo' dii'ke tuumpierimaing-koo narung ooampa'. 15Eeroti'ke tee'ke, nii'anko toro-antavuing-koo noru'ampiringe kapoo' oovua'. Ooveriko, kapoo' aung boo'anta-koo makosi aunge nkovua'. 16Ninge mura'ke kiimata-antavamira niikaang toomo siompansitaa' si'antarerompiaing.” 17Tee tee toomo ookara mare' kante Baari'koong˜ Paroro-koo Pailati'ke tee narung kiimatanuka-koo kiimata-ita simpiri'antaevuriko' nantoong piavoroko. 18Teka ookarai nari' bokiaama aa'pau', “Boo'antaveainung tee aung naning, ee'noko Barabas sing-antaveai nii'anko.” 19Barabas tee naning kiimata-koo sipau'nung Siisa' bakaang tanata toto'koo tavu' tutumpuio' Jerusalema'koo meu'ke ee'noko naning dupisi'uu'.

20-21Pailati'ke Jiisuu' simpiri'anta-koo piavora napo' nii'namu' daankivuru', teka teinge bokiaama aa'pau', “Aa'barata'koo, aa'barata'koo taakaveai!”

22Napo' beemu'pina' teie aa'puru' teing, “Aming-koo? Aming orara kapoo' nkovuinge? Ninge aung-koo oroo' aung boo'anta-koo makosinoo' ooampa'. Tee'koo ninge kiimata-antavamira simpiri'antavama'naang.” 23Teka teinge aa'na' deravariri bokiaama aa'barata'koo taakavaava'naang tampaako'. 24Ee'noko baru' aa'na' bokiaako tee'koo Pailati'ke taura'puma boto sipuu' kapoo' piavorou'na' nkoaraa'naang. 25Teketa teie bake-antavuu' tee naning kiimata-koo sipau'nung Siisa' bakaang tanata toto'koo tavu' tutumpuio' ee'noko naning dupisi'uio', tee ee'nara teing eentavaariko'nung, ee'noko Jiisuu' teing biikaang bireng-koo sipuu'.

Jiisuu' Aa'barata'koo Taakavau'na'

(Mat 27:32-44; Mak 15:21-32; Jon 19:17-27)

26Ee'noko teinge Jiisuu' tuutunantoma-ita tenkeng-antavaama aa'barata' poru'antavau'. Teketa manki'oi nkavuko naning pora'keta poko kompau' miring Saimoni', Sairini-nung, ee'noko teinge tee aa'barata' tee-koo poru'antavau' Jiisuu'koo dama'due nkavuu'naang.

27Ee'noko teketa nantoong karika'ke siompau', ee'noko nii'ning maniku'ke nari' orarunsiariri birompaama tee siompau'. 28Teka Jiisuu' teing-aape bere'arara aa'puru', “Dii' maniku' Jerusalema'nupoong, ning biromeriauka', teka dii'ka birontariai ee'noko diurukaa' toire' birompererima. 29Ai', ee aing, doonanka pomaang ookara manki'oroainang, baru' teing biurukaa'po'nupoong biurukaa' baikeaariko orarunsiariaining. 30Ee'noko tenang baiarima aa'paavai, ‘Iu'nanka nii'koo dau dua'dariai ee'noko miinankai daka'mereriai.’ 31Ning naning tampara ee' kiimatamaako oomerira tasi'periaing dii' aa'na' dau basinoo' tora'antaraariaing kiimata-koo makosinuka deentariko.”

32Nii'naanka kenaankara oraanka tee' nari' be'antavaaretu' tee ninka nari' dupisi'aaree'naang. 33Ee'noko tenang te' basiarira Makupi' tampaamanoo' teka tee aa'barata'koo taakavau', ee'noko tenaanka oraanka nari', narung tampavine-aape ee'noko narung mare'aanavine-aape. 34Ee'noko Jiisuu'ke aa'puu', “Mma' tonta'antaveriaing teing, ai' teinge tee noru'aava' nkoaamang tee aung kapoo'.” Ee'noko teinge piatooronukai deikoo'eema bakaang mononopa' tankaampeu'.

35Ee'noko nantoong tee-ankoi due'ke donkonai ooai otoko', ee'noko ovontunge akapeu'aako' tee aa'paama, “Aunge tee nantoong oovuning domaang moo'urikoo', enang baka moo'aravai, aung Kumponinge Pako'pari'nii', tero nii' domang-anta-koo maraka-antamuru'nung deeko'.”

36Ee'noko napo' teke tee narunge dariraari ee' oro' beemu'pie daariau' tee-koo bore'kanoo'ke:

AUNG TEE JU'NUPOONG BIIKAANG DAURARONG;

37Kiriki'na', Rooma'na' ee'noko Iiburuna' daariau'; 38Ee'noko teinge piatooronukai akapeu'aama porora uaini kaaveerii' avu'koo paaravau' aa'paama, “Da' tee Ju'nupoong Biikaang Daurarong deeko' enang daka domaang moo'daravai.”

39Narunge tenaanka-koo oraanka-koo nari' bi'aaretu'naanka-koo Jiisuu' oraka' minkuvuma aa'puu', “Da' ee tee Domang-anta Kumponinge tero Pako'pari'nii' deea'? Enang daka domaang moo'daravai, ee'noko nee' nari' moo'mereai.” 40Teka teie nii'nunge tee aka'puma aa'puu', “Da' ee Kumponing-koo arorea' otong ee' nari' boo'aape o'noritaa'? 41Nee'ke tee makosina' tora'pampemang mero'koo nkoampemaing-koo, teka aunge kapoo' orara nkovua'.” 42Ee'noko teie aa'puu' Jiisuu', “Norunoru'meai ning tenang dakaang muu' taa'ni'doi kompema.” 43Ee'noko Jiisuu'ke aa'puu' tee, “Masika' ninge nauramaang da', e'mung ee'na'mung ni'ninka nari' o'noree'naang da' osi tampoo'ke˜.”

Jiisuu' Boo'paru'na'

(Mat 27:45-56; Mak 15:33-41; Jon 19:28-30)

44Enang tee duaaki'uko duaa' namu'ke ka'murunta'uu' ookutunairu-koo bera kamunoo'nang deeko' duaa' koo'uu'. 45Tenang duaa' mutaanampuio' tee baarong pava dootuu'nava pankava-koong, meekavaro ku'nung, meu' ke'me'aru'. 46Ee'noko Jiisuu' aa'na' deto bokuma aa'puu', “Mma' ee, nkaang tanuaang dakaang bireng-koo sipansing.” Ee'noko tee' minkuvuma asi'namu' domaang oparu'.

47Teketa enang teie piatooro daaku' tarenunge tee aung kapoo' nkoaru'nung oovura teie Kumponing pankaing-antavuu' aa'puma, “Masika', tee aung naning tee oraka'nko oto'evuaung.” 48Ee'noko ookara karika' te' naro'ariru'ning dooroarii'naang tenang ookara kapoo' nkoaru'nung-koo osi-aape toroariru' orarunsiariri domang tavarima. 49Ee'noko ookarai Jiisuu' noru'aako'ninge, ee'noko maniku' Kaaleli'keta siompau'ning nari', teinge isipo' donkonai ooau' tee kapoo'nanka.

Jiisuu' Dako'au'na'

(Mat 27:57-61; Mak 15:42-47; Jon 19:38-42)

50Enang tee naning narung otoko' miring Josepa', Arimatea'namono-koong, Ju'nupoong biikaning-koo osi-koo namono. Aung Josepa' tee narung koompaara'navitu-koong pankaing, naning tampara, koonto', ee'noko nemparako'nung Kumponing bakaang muu' oo-koo; 51Bane teie koompaara'navitu-koong narung, nka Jiisuu' dupisi'aava'naang minkuaako tee kontevou'. 52Teie ee'nunge Pailati'anko bera Jiisuu' bakaang mono eentavuu'. 53Ee'noko aa'barata'keta sing-antavura baaronge boo'nuka dai'na' dai'uma nopa'ura sipuu' teie kuvi dako'doma-koo kuung, aa'noo' kapang-koo nenke'uu'nareng, naning tutung dako'aava'nareng. 54Tee tee te'mung Doong Uaana'mung-koo maamuna'mung ee'noko tee Doong Uaana'mung due'ui otoko namu'ke dako'au'.#23:54 Tenang duaa' tumparako doong maamuna'mung-koo tee Doong Uaana'mung tutumparako'nung. Josepa' Arimatea'nung ee'noko Nikodemasi iri'narumpuresi dako'uretu' tee Jiisuu', Doong Uaana'mung orarivure'neeng-koo. 55Ee'noko teinge maniku'ke Kaaleli'keta Jiisuu' ninka porou'ninge Josepa'koo bi'ariri berora tee kuvi dako'doma ooau' ee'noko Jiisuu' bakaang mono bempau'na' ooau'. 56Teketa tee osi duparira duuninanka numpompo'ning maamu-antavau' bakaang mono sisi'koo, ee'noko te'mung Doong Uaana'mung tee uaavoroi otorou' botoi minkuvui otoina'.

Currently Selected:

Luukeꞌ 23: nasNTpo

Highlight

Copy