Luukeꞌ 4

Sietani'ke Jiisuu' Paaravuu'na'

(Mat 4:1-11; Mak 1:12-13)

1Ee'noko Jiisuu' Tanuaang Meekunge maanto'ura toroaru'nung teketa Joo'dani-nari-eta, ee'noko Tanuaang Meekunge be'antavuu' mee'bora' sirakamaa'koo karenaumo kivora doonanka-koo Sietani'ke daua'koo; 2Ee'noko teie tee kapoo' naivua' teing doong-koo. Ee'noko teing doong oparu'noo'ke tee peeravou'nung. 3Ee'noko Sietani'ke Jiisuu' dua'anta-koo paaravuma aa'puu' tee, “Da' Kumponing bauring deeko' aung kapang naueko taamang deemparavaing.” 4Ee'noko Jiisuu'ke maku'uma aa'puu'nung tee, “A, tee Daari Meekung-koo ee' daariari otong,

‘Naning taamang narunge domampari otoaung, teka ookara kara Kumponing-etaning siompui domampari otomaung.’” (Boto 8:3)

5Ee'noko Sietani'ke deto koing-antavura oki'nung batei-koo oo-antavuu' ookara muu'nanka kansi'kooning. 6Ee'noko aa'puu' tee, “Ninge tee da' aing ookara tare-koo purinto' arompaing biikaning meenasi ninka, ai' aing ning okomui otoining ee'noko ninge tee avomaung baa ninge pia-antavamaung avu'koo. 7Teka dake ning dootuu'mei dei aing ookara oko-antarampeu'.” 8Ee'noko Jiisuu'ke maku'uma aa'puu'nung, “A, Daari Meekung-koo ee' daariari otong:

‘Dii'ke Ovoring diikaang Kumponing narung dootuu'eriaing, ee'noko nii'nung siomperia' otoriai.’” (Boto 6:13)

9Ee'noko Sietani'ke Jerusalema'aape be'antavuu' tee Jiisuu', ee'noko a'dei' pava dootuu'nava pankava-koo miiraka-koo pante'antavura aa'puu', 10“Da' Kumponing bauring deeko' anke doonko to'di'daravaing, tampa' dua'darako masika'antaraavaina', ai' Daari Meekung-koo ee' daariari otong,

11‘Teie bakaning koosinunanka botovuriaing da' nee'daava'naang. Teinge biikaning birenge deto doontaavaing, kapang-koo kau' naapurara'neeng-koo.’” (Kena 91:11-12)

12Ee'noko Jiisuu'ke maku'uma aa'puu', “A, teka napo' Daari Meekunge aa'murimaung,

‘Dii'ke tee Ovoring diikaang Kumponing parapaara-koo siperiauka'.’” (Boto 6:16)

13Ee'noko tenang Sietani'ke paaravuma bakevura sipuu' napo' nii'nang makosivuainang nempuitaa'.

Jiisuu' Kaaleli'navaro Bera Tampa' Mintoomparu'na' Tanuaang Meekunge Iri'antavuio'

(4:14–9:50)

Nasareti'nupoonge Tutung Bata'au'na' Jiisuu'

(Mat 4:12-17; 6:1-6; 13:53-58; Mak 1:14-15)

14Ee'noko Jiisuu' mee'bora' sirakamaa'keta toroaru'nung tee ninka purinto' Tanuaang Meekung-etaing ninka Kaaleli'nameng-aape; 15Teie Jiisuu'ke nau-antavuriko'nung biikaning pava dootuu'nanka-koo biivimpaako, ee'noko tee-koong doorenang avitoitoi nanu'antavau' tevaro-koo;

16Ee'noko tee Nasareti' pou'nung te' tee panka'antavuretu'noo'. Ee'noko biikaang pava dootuu'nava-koo tumparu' bakaang aarumo Doong Uaana'mung-koong siompuitaa'; 17Ee'noko deeruvuu'naang donkonuio' avau'nung buukunane' temu'nung Kumponing-etaing nakaronarai Aisaia'ke daarivuu'nane'. Teie tene' bere'ura koonto' piavou'noo' oovura deeruvuu' ee' daariari otoinoo',

18“Tee Tanuaang Meekung Ovoring bakaang ning-koo otong ai' ning tee pako'pari'muu'nung teie daankiama'naang doorenang tampara ata'oi'nuka-koo. Teie botomuu'nung ning nauaranko dai'nisinanka dipi'arii'naang ee'noko kaputu'nuka ookaava'naang;

19Napo' botomuu'nunge unaa-antavarama'naang teing booni'uri otoromaing ee'noko nauarama'naang enanung batei Ovoringe miru'uu'nung piaavurira domampuriaing-koo teing.” (Aisaia' 61:1-2)

20Ee'noko teie tene' avo'ura avuu' napo' tee naning dootuu' nko-koo pakupakunung ee'noko nau-anta nko-koo neriarama doonko ba'namparu' nantoonge ookarai teke pava dootuu'koo otoroko'ninge naapu narung ooai otoko; 21Ee'noko tee kara tutumpuma aa'puu', “E'mung tee dupearing taaraverio' tee Daari Meekunge minkuvuu'nung.” 22Ee'noko teing ookarai tampa' tampau'nung tee-koo, ee'noko ta'ninau' kara maneena' karou'nung-koo. Ee'noko teinge aa'pau', “Nko aung baie, Josepa' bauring ee deea'?”

23Ee'noko teie aa'puru', “Masika' noru'ansing, anaare karanaare mirumiru'naare napo' ning naumerii'naang dii'ke, ee' minkunaare, ‘Nankai', da' daka taare-antararavai. Teing kapoo' Kapaneume'navuntu'koo nkoveu'ning taaravampiru'ning anke dakanoo'ke napo' nkoveaing masikung deeko'.’ 24Masikung naurampimang, naning Kumponing-etaing nakaronara bakanoo'ka tee aroo'aavaung. 25Masika' aa'nou'nung naurampimang: Mmau' naaroonkunanka otoroko' Isireeli-nameensi'koo tenang tee temu'nung Kumponing-etaing nakaronara Eliasi otoko'nang peera pankaing nkoaru' aa'nang, paning pankaroong avo'ari otoko mare' beemareu-eta ˜nau-taa kaara-koo. 26Ee'noko teing-koo naning-anko Kumponinge botovua' Eliasi, teka naaro Ju'deeaing-koonani-anko naro' botovuu' paku-koo aroo'uainani noru'ui Sarepati'navuntu'koo, Saidoni'koonoo'. 27Ee'noko napo' tenang tee Kumponing-etaing nakaronara Elaisa' bakanang aa'nou', mmau' oramuu'po'nupoong otoroko' Isireeli-nameensi'koo, ee'noko teing-koo nii'narai Elaisa' aroo'ua' kui-koo, teka Ju'deeaing-koo narung deeko', Neeamani, Siiria-nameensi'koong, Elaisa' aroo'uio' kuiaru'.”

28Tenang teinge tee' taaravaara ookara pava dootuu'koo otoroko'ning aa'na' iiravorou'nung. 29Ee'noko daa'arira kompai osi-eta tuu'aama bata'au'nung bera mare-koo auremping osi siroong kaniau'noo'keta due', teke doonko kosi'aava'naang bore'ke uroio'. 30Teka teketa' teing-koo meu'ke beentevuri tankinura tenkenuu'.

Jiisuu'ke Kapaneume'navuntu'koo Ma'naang Bata'uu'na'

(Mak 1:21-28)

31Ee'noko Jiisuu' Kapaneume'navuntu'aape danto beu', osi pankaing Kaaleli'nameng-koonoo'; 32Ee'noko teke otoi Doong Uaana'mung kara nau-antavuriko aa'na' ta'ninau' tee-koo bakaang nau-anta-koo, kara bakaang purinto' deempario'; 33Ee'noko teke pava dootuu'koo naning narung otoko'nung ma'naang orara kurumaa'aru'nung. Ee'noko aa'na' uiarama aa'puu', 34“Ei, arekee' nkomerii'naang, Jiisuu'ke Nasareti'nunge? Da' ee nii' bata'koo poing? Ninge noru'dansi o'nong da' Kumponing-etaing Naning Meekung.”

35Teka Jiisuu'ke tee aka'puma aa'puu', “Kareauka', ee'noko da' teieta' banke'daravai.” Ee'noko teketa ma'naange teing-koo meu' te' doonko dua'antavura teieta banke'aru'nung tokoona' baikevua' tee. 36Ee'noko ookarai aa'na' ta'ninaara bii'ka kareaama aa'paako', “Aung aremurii'ke karai iirakutai karomaung purinto'ke aa'nunge ma'nari orenanka botovuriko banke'arikoo'?” 37Ee'noko doorenang aung-koong tee ookutunairue osinankai nanuu'nung temeng korovui otoininge.

Jiisuu'ke Piita Ba'doraa Taare-antavuu'na'

(Mat 8:14-17; Mak 1:29-39)

38Ee'noko tee teketa' donkonura teva pava dootuu'nava sipura Saimoni' bakanava'ke deto koinuu'. Ee'noko Saimoni' ba'doraa teke aa'na' siipavora otoko uipaarii' ninka teinge Jiisuu' nia'au' teni pakuvuu'naang. 39Ee'noko tee teni-anko donkonura tee siipa aka'puu'nung ee'noko tee uipaarii' namu'ke boimpuu'. Ee'noko namu'ke tenie deto i'amparara bau'uru' teing.

40Emu' tee tenang duaa' tumpario' ookarai biikaning siipa-po'nupoong tavo'aaru'nung amutemurii' siipa oto'evoroko'ning. Ee'noko teie tanka' ookara-koo naruna' naruna' pante'urima taare-antavuru'nung. 41Ee'noko mmau' nantoong-eta ma'nari banke'ariko' bokiaama aa'paama, “Da' tee Domang-anta Kumponinge tero nantoong marakavuru'nung, Kumponing bauring.” Teka teie orokovurima kara-koo taura'puriaruko', ai' teinge tee tasi'pau'nung tee tee Kumponinge tero Pako'pari'uu'nung˜ nantoong domampuri tarevuriainoo'koo.

42Ee'noko siimpoorovuma˜ nanuko Jiisuu' tenkenura baka oto'noo' beu' teke kunsiaraa'naang. Ee'noko nantoonge besi'aama porou' tee-anko. Ee'noko pinka'koo paaravaako'nung teing-ankoita tenkenuaroo'naang. 43Teka teie aa'puru' teing, “Ninge aa' daankiama'naang tee doorenang tampara napo' nii'ning osi-koo Kumponing bakaang muu'koong, ai' ning tee tee' nko-koo botomuu'nung.” 44Ee'noko tee teketa' Judia'nameensi'koo bera daankiarako' pava dootuu'nanka-koo.

Currently Selected:

Luukeꞌ 4: nasNTpo

Highlight

Copy