MATIUS 7
7
Mai lu' ulak pesala' kelunan
(Luk. 6:37-38,41-42)
1Mai keh ulak pesala' kelunan, dai Allah péh pesala' ka'ah ke' kepéh. 2 Uban hun keh ulak pesala' irah éh jah, adang Allah pesala' keh kepéh kivu jalan éh neu' keh inah ke'. La'ah kekat ukum éh neu' keh tong irah nah, pu'un éh teneng tong ka'ah ke' kepéh. 3Kineu' éh keh na'at moo' éh pu'un dalem maten padéé' keh, bang uvap éh dalem maten ko' tengéé' péh bé' ke' mega' éh. 4Kineu' keh bara' ngan padéé' keh, Jian akeu' mega' moo' jin maten ko', hun uvap dalem maten ko' tengéé' péh to de' ke'. 5O kelunan éh ngelayoo', ko' mega' uvap jin maten ko' tenah, boh ke' omok na'at lenaa' ngan bet moo' éh pu'un dalem maten padéé' keh nah.
6Mai keh mena' ineu'-ineu' éh anah Tuhan ngan aseu', adang réh pupah maneu' ka'ah kepéh, ngan mai keh mena' talem mutiara keh ngan idok, adang irah meték éh awah, ha' néh.
Tebaraa' tong menyat, pitah ngan ngatong
(Luk. 11:9-13)
7Ha' Yésus kepéh, Jian keh menyat jin Allah, boh keh omok alaa' éh, jian éh pitah boh keh pu'un, jian keh ngatong tong usit tapé boh Allah omok mukap éh ngan keh. 8Uban siget-siget kelunan éh menyat jin Allah iah éh omok alaa' éh, kenat péh séé' éh pitah omok éh alaa' éh penitah néh, ngan séé' éh ngatong tapé, tapé inah pu'un pukap ngan néh. 9Hun anak keh menyat roti, kineu', bateu' éh nena' keh ngan néh? 10Hun néh menyat seluang, kineu', torok éh nena' keh ngan néh? 11Na' péh ka'ah kelunan éh sa'at awah, jam keh mena' kekat éh jian ngan anak keh, makin péh Tamen keh tong seruga, adang Iah mena' kekat éh jian ngan kelunan éh menyat jin Iah, ha' néh.
12 Ha' Yésus kepéh, Jian keh maneu' ngan kelunan pekua' éh keneloo' keh naneu' kelunan éh jah tong Ka'ah. Uban iteu' néh sin ha' lem Surat Musa ngan ha' tebaraa' irah Nabi-Nabi sahau ha' Néh.
Tong usit tapé éh si'ik
(Luk. 13:24)
13Ha' Yésus kepéh, Jian keh masek tong usit tapé éh si'ik, uban ja'au usit tapé ngan pegawa jalan éh mihin keh tai luten meraka, ngan pinaa' kelunan éh pu'un tong néh. 14Bang usit tapé éh mihin keh alaa' urip, si'ik awah éh ngan tatip jalan inah, ngan kerat awah kelunan éh jam jalan inah, ha' néh.
Tong inan kayeu' ngan buaa' néh
(Luk. 6:43-44)
15Ha' Yésus kepéh, Jian keh mavaa' jian-jian tong kelunan éh bara' irah ke' nabi Tuhan bang ha' réh kenyo. Pu'un réh tuai barei'-okoo' domba, bang kenin réh mu'un barei' tepun éh luvaa'. 16Adang keh omok jam réh neu' kekat penganeu' réh. Sepakan suha' bé' éh omok ngebuaa' ngan buaa' néh buaa' agun. Inan suha' bé' éh ngebuaa' ngan buaa' néh buaa' ara. 17Kenat péh siget-siget inan kayeu' éh jian, pu'un éh ngebuaa' ngan buaa' néh jian, siget-siget inan kayeu' éh sa'at, pu'un éh ngebuaa' ngan buaa' néh sa'at. 18Inan kayeu' éh jian bé' éh omok ngebuaa' ngan buaa' néh malui, kenat péh inan kayeu' éh ngenyiwan, bé' éh omok ngebuaa' ngan buaa' néh jian. 19 Siget-siget inan kayeu' éh bé' ngebuaa' ngan buaa' éh jian, adang réh tebeng éh ngan motong éh awah. 20 Kenat péh jalan keh omok jam kekat irah éh tuai sohoo' Tuhan ngan irah éh tuai éh bé' sohoo' Tuhan, inah éh neu' kekat penganeu' réh, ha' néh.
Tong kelunan éh maneu' pengeloo' Tuhan
(Luk. 13:25-27)
21Ha' Yésus kepéh, Bé' éh siget-siget usah éh mateng Akeu', Tuhan, Tuhan, éh omok tai lem nihau Ké', bang kelunan éh maneu' kekat éh pengeloo' Tamen Ké' éh pu'un tong seruga, éh omok tai lem pengihau Ké'. 22Tong Dau Ké' tuai kepéh vam, pinaa' kelunan juk bara' ngan Ké', Tuhan, Tuhan, améé' pu'un perengah rengah jian dalem ngaran Ko', ngan pu'un mé' mega' balei' ngan maneu' telana' ja'au dalem ngaran Ko', ha' réh. 23 Bang ka' ha' Ké' ngan réh kepéh, Kelap keh jin siteu', ka'ah kelunan éh sa'at awah, bé' Akeu' jam ka'ah, ha' Ké' ngan réh, ha' néh.
Tong duah arong lamin
(Luk. 6:47-49)
24Ha' Yésus kepéh, Uban néh kenat kekat kelunan éh menéng ha' tebaraa' Ké' ngan kivu éh, iah pekua' ha' tapan tong kelunan éh jam seruh, éh maneu' lamin néh bau bateu'. 25Pu'un taa' kasi ngan baa' ja'au ngan kepu gahang nesung lamin inah, bang bé' lamin inah kuba' uban lihei' néh reken lem bateu'.
26Bang kekat kelunan éh menéng ha' tebaraa' Ké', bang bé' réh kivu éh, Iah pekua' ha' tapan kelunan éh palui éh maneu' lamin néh tong napun. 27Pu'un taa' kasi ngan baa' ja'au ngan kepu gahang nesung lamin inah, pelapah lamin inah kuba' ngan purat mu'un-mu'un, ha' néh.
Tong penyukat Yésus
28La'o Yésus bara' kekat tebaraa' inah ngan réh, béé kenin kekat irah éh menéng ha' tebaraa' Néh inah. 29 Uban iah nebaraa' réh ngan penyukat bé' éh barei' irah guru éh nebaraa' tong sohoo' lem Surat Musa.
Currently Selected:
MATIUS 7: PNT
Highlight
Share
Copy
Want to have your highlights saved across all your devices? Sign up or sign in
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia
