Exodo 3

Nan Nang-ayagan Apo Dios Ken Moses

3:1-21

1Isnan naminsan ay agew ay ipaspastol Moses nan kalnilo ya kalding katogangana ay Jetro ay padi id Midian et inpadaana nan ipaspastolna isnan naango ay pondag engganay inomdanda id Sinai ay bilig ay awnit menpap-ailaan Apo Dios. 2Dat menpaila ken siya isdi nan anghel Apo Dios ay kaneg menbidbidang ay apoy isnan tengan di kaiw. Inilan Moses ay menbidbidang san kaiw ngem adi kangkangkangpos. 3Danat kanan isnan nemnemna en, “Ay inayan pay na? Dan aped bomidbidang nan kaiw dapay adi kangkangkangpos. Kadya ngen ta somagsag-enak ta ilaek.”

4Idi mailan Apo Dios ay somagsag-en si Moses dat menkali isnan tengan san kaiw et kanana en, “Moses, Moses.” Dat somongbat si Moses ay mangwani en, “Ayta Apo, naayak ya.” 5Dat kanan Apo Dios en, “Adika somagsag-en. Kaanem nan palokam tay nadiosan nan naay ay lota ay tomatakdegam.” 6Dat itoloy Apo Dios ay mangwani en, “Sak-en nan Dios ay daydayawen din alal-apoyo id kasin ay da Abraham, Isaac yas Jacob.” Dat oppopen Moses nan angasna tay omegyat ay mang-ila ken Apo Dios. 7Dat kasin kanan Apo Dios en, “Inilak nan dadama ay mapalpaligatan nan ipogawko id Egipto. Dinngek nan dawatda ay mensegseg-ang ta mabadanganda. Gintekko am-in nan ligatda. 8Isonga inmaliyak tapno isalakak daida isnan iyEgipto ya ta ikaanko daida isnan kabaelan di iyEgipto ta iyeyko daida isnan gawigawis ya magabay ay ili. Isdi nan menteteean nan naayda ay Cananeo, Heteo, Amorreo, Perezeo, Heneo ya Jebuseo id wani. 9Dinngek et nan dawat nan naayda ay ipogawko ya iilaek nan dadama ay mangpalpaligatan nan iyEgipto ken daida. 10Et id wani ibaak sik-a ta omeyka isnan alin di Egipto ta ikaanmo nan ipogawko ay Israelita id Egipto.” 11Ngem dat kanan Moses ken Apo Dios en, “Bakenak met sino tasiyay di omeyak isnan ali ay mangikaan isnan Israelita id Egipto.” 12Dat kanan Apo Dios ken siya en, “Wawawawadaak ken sik-a. Nan mangpaneknek ken daida ay sak-en nan nangibaa ken sik-a et nan mangipangowam isnan ipogawko ay komaan id Egipto ay omali isna ta daydayawenyo sak-en isnan naay bilig.” 13Dat kasin kanan Moses en, “No pay omeyak isnan Israelita daket ibaga ken daida en inbaan nan Dios di alal-apoda id kasin sak-en ya no sootenda pay abes nan ngadana ya nan kanegna, ay ngan pay di esak kanan?” 14Dat kanan Apo Dios en, “Sak-en nan Wawawawada. Siya na nan kanam ken daida, ‘Inbaan nan makwani en apo#3:14 apo, et siya nan esay ngadan Apo Dios ay inbagana ken Moses ya isnan ipogawna ay Israelita. Isnan kalin di Hebreo Yahweh wenno Jehovah nan kakwaniyana. ay Wawawawada sak-en ken dakayo.’ ”

15Kinwanina pay en, “Ibagam isnan Israelita en sak-en nan apo ay Dios din alal-apoyo id kasin ay da Abraham, Isaac, yas Jacob nan nangibaa ken sik-a ay omey ken daida. Siya na nan ngadanko ay eng-engngana. Siya na nan awnit pangwanin nan am-in ay ipogaw ken sak-en. 16Enka dagopen nan aamam-an nan Israelita ta ibagam ken daida en sak-en ay apo ay Dios din alal-apoyo ay da Abraham, Isaac, yas Jacob nan ninpaila ken sik-a. Ibagam ken daida en gegetkek ya inilak nan mangpalpaligatan nan iyEgipto ken daida. 17Et ninemnemko ay ikaan daida id Egipto ay mapalpaligatanda ta iyeyko daida isnan ilin nan Cananeo, Heteo, Amorreo, Perezeo, Heneo ya Jebuseo ay gawigawis ya magabay ay ili. 18Awnit idngen nan ipogawko nan ibagam ken daida. Dakat maiboweg isnan aamam-an di Israelita ta omey kayo isnan alin di Egipto et kananyo ken siya en, ‘Nan apo ay Dios di Hebreo et ninpaila ken dakami. Isonga pangaasim ta palobosam dakami ay menbaat is tolo ay agew isnan pondag ta omey kami menpalti is igasingmi isnan apo ay Diosmi.’ 19Getkek ay adi palobosan nan ali dakayo malaksig no maipapati 20ngem awnitak osalen nan panakabalinko ay mang-ikkan is kaeegyat ay mangdosa isnan iyEgipto. No makwas dadi et awnit palobosan nan ali dakayo ay komaan id Egipto. 21Esak ipapangato nan ipogawko isnan nemnem di iyEgipto tapno no komaan kayo et wada nan ikakawityo. 22Et awnit omey nan wasdin bababain di Israelita isnan sagogongda ay iyEgipto ya isnan kompolni ay babai ay iyEgipto ay makibabaey ken daida ta menkedawda ken daida is badbado ya nan al-alkos di awak ay balitok ya palata. Ipaosalyo dana isnan an-akyo et siya na nan ikkanyo ay mangikawit isnan kokwan di iyEgipto.”

Currently Selected:

Exodo 3: xnn

Highlight

Copy