Exodo 4

Nan Nang-agtan Apo Dios Ken Moses Is Panakabalina

4:1-17

1Daet kanan Moses isnan apo en, “Ngem no pay adi mangpati nan Israelita ya adida mang-idnge dadapay kanan en egayka ninpaila ken sak-en, ngan pay di ikkak?” 2Dat kanan nan apo ken siya en, “Ngan nan sana ay ginegen-am?” Dat kanan Moses en, “Sokodko.” 3Dat kasin kanan nan apo en, “Itep-am isnan lota.” Idi intep-an Moses dat ninbalin ay oweg dat ninpangatagtag si Moses ay mangad-addawi. 4Ngem dat kanan nan apo ken Moses en, “Depapem isnan ikona.” Dat tet-ewa depapen Moses isnan ikona daet ninpangabalin kasin is sokod. 5Dat kasin kanan nan apo en, “Siya di nan ikkam tapno patiyenda ay ninpaila ken sik-a nan apo ay Dios din alal-apoda ay da Abraham, Isaac ya si Jacob.” 6Danat itoloy ay mangwani en, “Ipasgepmo nan ledengmo isnan badom.” Dat ikkan tet-ewa Moses et idi ipabalana nan ledengna et kega nakolit ay nalatelatekan is polaw. 7Danat kasin kanan ken Moses en, “Kasinmo ipasgep nan ledengmo isnan badom.” Dat kasin ipasgep Moses nan ledengna et idi ipabalana kasin et ginmawis ay kaneg san sigod ay kodilna. 8Danat kasin kanan en, “No adida patiyen wenno maawis isnan naay omona ay nakaskasdaaw et awnit patiyenda nan maikadwa. 9Ngem no adida kayet patiyen nan naay ay dowa ay nakaskasdaaw ya adida idnge nan kanam dakat omala is danom isnan ginawang ay Nile damet ibokbok isnan lota et awnit menbalin ay basa san danom.”

10Ngem dat kanan Moses isnan apo en, “Ngem apo, bakenak nalaing ay menkali enggana id kasin ya olay id wani ay inlogim ay makikalkali ken sak-en. Men-en-een-enak ay menkali ay kaneg aptiaptik nan dilak.” 11Dat kanan nan apo en, “Ay sino nan nangsapo isnan topek di ipogaw? Sino nan mangpatoweng ya mangpaomel ya sino nan mang-ited isnan makailaan wenno makowapan di ipogaw? Ay baken kad sak-en ay apo? 12Ala omeyka et. Sak-en nan mangbadang ken sik-a ay menkali ya awnitak ibaga nan kanam.” 13Ngem dat kayet kanan Moses en, “Pangaasim ta omibaaka is teken.” 14Dat makaliget nan apo ken Moses et kanana en, “Ay baken kad wada nan besatmo ay si Aaron ay apon gedan Levi? Getkek ay nalaing siya ay makikali. Kinatet-ewana et wada ay omal-ali ay mangsab-at ken sik-a et awnit dadama nan gasingna ay mang-ila ken sik-a. 15Kakalim siya dakat ibaga nan awnitna kanan et sak-en nan mangbadang ken dakayo ay makikali ya awnitak ibaga nan ikkanyo. 16Awnit siya nan makikalkali isnan ipogaw isnan ibagbagam. Siya nan kinatopekmo et kanegka Dios ay mangibagbaga isnan kankanana. 17Ikakawitmo nan sokodmo ta awnitmo osalen ay mang-ikkan isnan kaskasdaaw.”

Nan Sinmagongan Moses Id Egipto

4:18-20, 27-31

18Nakwas pay di dat somaa si Moses issan baey Jetro ay katogangana et kanana ken siya en, “Pangaasim kad ama ta palobosam sak-en ay somagong isnan kakabagyak id Egipto ta omeyak ilaen daida no kasano nan biyagda.” Dat palobosan Jetro et kanana ken Moses en, “Omeyka baw, sapay koma ta gawis nan omayam.”

19Ngem daan pay laeng si Moses id Midian dat kanan nan apo ken siya en, “Somagongka id Egipto tay natey et am-in san mangkayat ay mangpatey ken sik-a.” 20Isonga dat ayagan Moses si asawana ya nan an-akna et ipalogana daida isnan kabayo et omeyda id Egipto. Inkakawitna san sokod ay inbilin Apo Dios en ikawitna.

27Esapay omdan da Moses id Egipto et epdas nakikali nan apo ken Aaron ay nangibaga en, “Omeyka isnan pondag ta sab-atem nan besatmo ay si Moses.” Isonga dat omey et sab-atena si Moses isnan bilig ay menpap-ailaan Apo Dios danat bisitowen siya. 28Daet ibagan am-in Moses ken Aaron nan inbagan nan apo issan nintoyanda danapay ibaga gedan san am-in ay kaskasdaaw ay inbilin nan apo ay ikkana. 29Dat menboweg da Moses ken Aaron ay omey id Egipto. Omdanda pay isdi dadat dagopen am-in nan aamam-an di Israelita. 30Dat ibagan Aaron ken daida nan am-in ay inbagan nan apo ken Moses dapay ipailan am-in Moses san deeyday kaskasdaaw isnan sagangda 31et namati nan Israelita. Idi dinngeda ay inmey nan apo ay nang-ila ken daida ya gintekna nan mangpalpaligatan di iyEgipto ken daida dadat menpalintomeng ay mendayaw.

Currently Selected:

Exodo 4: xnn

Highlight

Copy