Exodo 5

Da Moses Ken Aaron Isnan Sagang Nan Alin Di Egipto

5:1-21

1Dat omey da Moses ken Aaron isnan alin di Egipto et kananda ken siya en, “Kinwanin nan apo ay Dios di Israel en, ‘Palobosam nan ipogawko ay omey isnan pondag ta menlagsakda isdi ay mangdayaw ken sak-en.’ ” 2Dat kanan san ali en, “Ay sino sa ay apo ay masapol di patiyek ta palobosak nan Israelita? Adiyak getgetken nan sana ay apo ay kankananyo et adyak palobosan daida.” 3Dat kanan da Moses ken Aaron en, “Ninpaila nan Dios di Hebreo ken dakami. Pangaasim ta palobosam dakami ay menbaat is tolo ay agew isnan pondag tay enkami menpalti is igasingmi isnan apo ay Diosmi. No adi kami omey et baka pateyena dakami is sakit wenno gobat.” 4Ngem dat kanan san ali ken da Moses ken Aaron en, “Ngan nan kayatyo ay kanan isnan mangtaktakanyo isnan oblan nan naayda ay ipogaw? Enkayo kitdin ta itoloy nan deeyday baa ay men-obla. 5Gapo tay inmadoado kayo mo dakami ay iyEgipto dat id wani et kaytenyo ay mensaldeng isnan oblayo.”

6Isonga issan deey met laeng ay agew et binilin san ali nan palamanmandal ay iyEgipto isnan men-ob-obla ya nan kakapatas ay Israelita et kanana ken daida en, 7“Isnan oblada ay mensapsapo is maisaad et inid-idyayo nan gomang ay itaptapida isnan kolayeng ngem id wani et adiyo et id-idya nan gomang ta daida nan makigad ay men-anap. 8Ngem masapol ay paliso kayet nan bilang nan sapowenda issan sigod ay sinapsapoda. Masapol ay maid kolangna is olay esa. Sadotda isonga menpakpakaasida ken sak-en ay mangwani en, ‘Palobosam kad dakami ta omey kami men-idaton ken Apo Dios.’ 9Isonga patalabakowenyo daida is madagdagsen pay tapno maid wayada ay mendenge isnan kamkampot.”

10Dat bomala san palamanmandal ya nan kakapatas et kananda isnan Israelita en, “Kinwanin nan ali en adina et kano agtan dakayo is gomang. 11Kanana en kigad kayo kano ay men-anap is gomang ay osalenyo ngem masapol ay adi makolangan nan bilang nan sapsapowenyo issan sigod.” 12Dat maiwakat nan Israelita ay men-anap is gomang 13dapay dagdagdagen nan palamanmandal daida ay men-ob-obla ta nan sapowenda ay maisaad et paliso nan kaad-adona isdin naag-agtanda is gomang. 14Sinaplisaplit nan iyEgipto ay palamanmandal nan kakapatas ay Israelita ay mangbanbantay isnan oblan nan iib-ada ay baa dadapay kankanan ken daida en, “Ayta dan baken paliso nan kaad-adon nan sapsapowenyo id wani isdin sinapsapoyo id kasin?”

15Dat omey nan kakapatas ay Israelita issan ali et menlilida ay mangwani en, “Apo, ayta dakan amed palpaligatan dakami? 16Maid gomang is idyada ken dakami dakami pay kayet mapilit ay somapo is dinamili ay maisaad. Dat id wani tay kolang nan sinapomi et saplisaplitenda dakami. Gapo isnan bilinmo et am-amed kami mapalpaligatan.” 17Dat kanan san ali en, “Sadot kayo od et adyanyo ay men-obla isonga dawatenyo ay palobosak dakayo ta omey kayo men-idaton isnan apo. 18Enkayo bawet men-obla. Maid gomang is maidya ken dakayo ngem masapol ay paliso kayet nan kaad-adon nan sapowenyo ay dinamili issan sigod.” 19Gintek et nan kakapatas ay am-amedda mapaligatan tay adida makatongpal issan bilin nan ali ay adida keskesayan nan bilang nan damiliyenda ay maisaad.

20Isnan binmalaanda et inilada da Moses ken Aaron ay mangseseed ken daida. 21Dadat kanan ken daida en, “Inilan nan apo nan inikkanyo et dosaena koma dakayo tay dakayo nan gapona ay linmiget nan ali ya nan opisyalisna ken dakami. Inagtanyo daida is gapo ay mangpateyanda ken dakami.”

Nan Inkalin Apo Dios Ay Badangna

5:22—6:11

22Dat menlowalo si Moses isnan apo et kanana en, “apo, ayta dakan paligaten nan ipogawmo? Ayta dakan aped inbaa sak-en ken daida? 23Enggana issan inmayak isnan ali ay nangibaga ken siya issan kinwanim daet amed pinaligat san ali nan ipogawmo dapay egaymo polos binadangan daida.”

Currently Selected:

Exodo 5: xnn

Highlight

Copy