Genesis 18
18
Inkalin Apo Dios Ay Maiyanak Si Isaac
18:1-15
1Isnan esay agew et ninpaila nan apo ken Abraham issan kad-an di kak-aiw id Mamre. Siya na nan inkana ay ninpaila. Idi itotokdon Abraham isnan pantewda isnan kag-aw 2danat ilaen ay wada nan tolo ay lalaki ay tomatakdeg isdi. Idi ilana daida danat ikakamo ay en mangsab-at ken daida. 3Dat men-galalasing ay mangwani, “Gagayyem, akayo adi ta entako menlang-ay isnan baeymi. 4Mangseseed kayo isnan poon di kaiw ay naay ta eyak omala is danom is idenasyo 5dakpay omala gedan is bassit ay makan ta waday ikilegyo ay mendaan ay omey is ayanyo. Dadama nan gasingko isnan inmaliyanyo isnan baeyko.” Dadat kanan, “Men-gasing kami abes ay inmali isnan kad-anyo.”
6Inkakamon Abraham ay songgep danat kanan ken Sara, “Ikamom kad ay men-oto is gawis ay tinapay tay wada nan sangaili tako.” 7Dat tomagtag et omey isnan kad-an di talakena et piliyena nan menlames ay anak di baka et idyana isnan baana danat kanan, “Ikamom ta paltiyem sa dakat otowen.” 8Nakaoto pay si asawana ya san baana dat men-ala si Abraham issan inotoda ya is gatas danat omey pakanen nan sangailida issan poon di kaiw.
9Idi nakakanda dadat kanan ken Abraham, “Into pay si Sara ay asawam?” Danat kanan, “Wada id leem.” 10Dat kanan nan esa ken daida ay nan apo, “Isnan maikasiyam ay bowan daket mensagong isna tay siya di nan mang-ipailaak isnan kabaelak ken Sara ay asawam tay awnit omanak is lalaki.”
Ngem si Sara et wada isnan dokog di eneb ay mang-inanaag isnan kankananda. 11Si Abraham et naam-aam-ama ya nain-iin-ina abes si Sara et natdok nan basana 12isonga dat men-ammeng si Sara et kanana isnan nemnemna, “Ay tet-ewa ngen ay omanakak dakpay nain-iin-ina ya naam-aam-ama gedan si asawak?” 13Dat kanan nan apo ken Abraham, “Dan aped men-am-ammeng si Sara ay mangnemnem no tet-ewa ay omanak siya dapay nain-iin-ina? 14Ay kanana en waday adi mabalin is ikkak ay apo? Ngem awnit tomet-ewa san kinwanik tay isnan maikasiyam ay bowan daket mensagong isna tay siya di nan omanakan Sara.” 15Ngem gapo tay omegyat si Sara isonga inisotna ay mangwani, “Egayak met nin-ammeng.” Ngem kinwanin Apo Dios, “Nin-ammengka met ah.”
Nan Ninseg-angan Abraham Pala Isnan iSodoma
18:16-33
16Kinwanina di dat ipangon Abraham san lalalaki enggana isnan maoosdongan di Sodoma. 17Dat kanan nan apo isnan nemnemna, “Waay ipagtekko ken Abraham nan awnitko ikkan id Sodoma ya id Gomorra 18tay siya nan pinilik ay apon di ipogawko ya inbagak en awnit omadoado nan ap-ona. Gapo ken siya et awnitak badangan nan adoado ay ipogaw isnan kailiili. 19Pinilik siya tasiyay ibilina koma isnan an-akna ya ap-ona ay tongpalenda sak-en ya ikkanda nan gawis ya osto. No siya di nan ikkanda et tongpalek am-in ay insapatak ken siya.”
20Isonga dat kanan nan apo ken Abraham, “Dinngek nan dadama ay ngawi ay ik-ikkan nan ipogaw id Sodoma ya id Gomorra et masapol ay madosada. 21Id wani lomayogak ay mang-ila no tet-ewa nan dinngek ta engewek daida.”
22Dat komaan san dowa ay lalalaki et omeyda id Sodoma ngem nan apo et nataynan ken Abraham. 23Dat kanan Abraham isnan apo, “Ay tet-ewa ay engewem am-in ay ipogaw isdi olay no gawis nan tap-ina? 24No kaspangaligan waday limampoo is gawis ken daida, ay engewem kayet nan sinpangili? Ay adi mabalin ay adim engewen tasiyay adi katey san limampoo? 25Waay adim tet-ewa itapi ay mangpatey isnan gawis! Baken kapapati ay ikkam di! Tay no siya di nan ikkam et maitapi ay madosa nan gawis isnan ngawi. Waay baken di is ikkam tay nan mangbanag isnan am-in ay ipogaw et masapol ay osto nan ik-ikkana.” 26Dat teben nan apo, “No waday das-ak is limampoo is gawis id Sodoma et adiyak engewen nan ilida gapo ken daida.”
27Kinwanin kasin Abraham, “apo, gapo tay inlogik ay ninkali et palobosam koma sak-en ta itoloyko nan kayatko ay kanan olay no apedak ipogaw et kedeng. 28No kaspangaligan pay waday epatpoo ya lima is gawis, ay engewem kayet tay kolang is lima?” Dat teben nan apo, “Adiyak engewen no waday epatpoo ya lima is gawis.” 29Dat itoloy Abraham ay mangwani, “No pay waday epatpoo et kedeng?” Dat kanan nan apo, “Adiyak engewen no waday epatpoo.” 30Dat kanan Abraham, “apo, pangaasim ta adika makalkaliget no menkaliyak kayet. No pay waday tolompoo et kedeng?” Dat teben nan apo, “Adiyak engewen no waday tolompoo isdi.” 31Dat kanan Abraham, “Pangaasim Apo ta pakawanem sak-en isnan mangitoloyak ay menkali. No kaspangaligan pay waday dowampoo et kedeng?” Dat teben kasin nan apo, “Adiyak engewen no waday dowampoo.” 32Dat kanan Abraham kayet, “Pangaasim Apo ta adika makalkaliget ta kanak na et kedeng. No pay simpoo et kedeng nan wada?” Tinban kasin nan apo, “Adiyak engewen no waday simpoo is gawis isdi.” 33Idi nakakali nan apo dat komaan dapay somaa si Abraham.
Currently Selected:
Genesis 18: xnn
Highlight
Share
Copy
Want to have your highlights saved across all your devices? Sign up or sign in
© 1984 (NT), Wycliffe Bible Translators, Inc. All rights reserved.
© 2005 (OT), Wycliffe Bible Translators, Inc. All rights reserved.
