Matyu 9

Jisas kumba tava nashindari man or mbarik jivik or nari

(Mk 2:1-12; Lk 5:17-26)

1Urik Jisas botik or lawuhu leukun indiyok or mbuhu yanga orhik ormu ira. #Mt 4:13 2Urik ma lar kumba tava nashindarin teyek li ewehe orhik limu kisha laharaha limu hishira, “Avak or mbanak jivik nakwa ri.” Karem limu hishira. Jisas os li hishiri oson angop or heyeri sir. Uri osik ma oton ormu mbara. “Jikisi anhi, ajewa hala! Kavakava mihi angop a laha ermbewa sir.” #Jn 17:2

3Karem or mbarik mashi Moseshin sawendari ma lal orok li sihi mashi oson li misihi lihi ambek limu mbara, “Ayo, ma toto lawe toria! Wa Avui Wasilakahi farniyik or sikwak ormu mbandu?”

4Hako Jisas os wavu wavu lihik li hishirin angop or heyeri osik ormu mbara, “Mberem ushiwak anin ji wapkava hishindu? #Mt 12:25; Lk 9:47; Jn 2:25 5Mberem ji hishindu, kavakava ma roto undan a yoko ermbendahi os mo orin a mbanak jivik nandahi or? Hako mberem a undahik ji hishindu? 6Avak a mukunak ji heyekwa sir, Ma Jikisi Avui Wasilakahi oto kavakava ma undan or yoko ermbendahi sir.” Karem or mbaha ma oton ormu mbara, “Mir usasihi teye mihin laha aka mihik ika!” 7Karem or mbarik ma oto or usasihi aka orhik ormu ira. 8Urik ma ol orok liri ondo oson li heyehe li ajehe limu mbara, “Ayo, mberemhi tos ter nanduwa! Avui Wasilaka kwambu orhin ma misambik fehendan or handuwa!” Karem li mbaha hi Avui Wasilakahin limu hausimbausira.

Jisas Matyu orin or tiyakmbaha nor ushari

(Mk 2:13-17; Lk 5:27-32)

9Urik Jisas nombok or ihi takis yan landa ma lar, hi orhi Matyu, opis orhik lerawun or larik ormu heyera. Uhu ormu mbara, “Mir usaha anin tiya shi ika!” Urik Matyu or usaha Jisasin or tiyaha frimu ira.

10Jisas aka Matyuhik or irik ol takis yan landari ma lal nga ol kavakavan undari ma lal nga li taha or nga ol orin tiyandari ma nga nakrem limu ara. 11Urik Farisi lal oson li heyehe ol orin tiyandari man limu mbahanjira, “Mberem ushiwak tisa jihi oto ol takis yan landa ma nga ol kavakavan unda ma nga nakrem or lihi andu? Os erem or uwa kava sir.”#9:11 Farisi ondo lo mbele mbele ondon li tiyaha kwambu lihik misokome Avui Wasilakahik jivik li nakurik hishiri lir. Lir li hishiri, os kavakavan unda ma ondo nga nakrem li li nahi, kavakava ol ma ondo unda avak lihik nakwa lir. Takis yan landa ma ondo yanga Romik fehenda ma nga li ananaimbletolorik Farisi li hishiri, lir ma kava lir. #Lk 15:2

12Jisas mashi oson or misihi ormu mbara, “Ma ol jipmisinda mbeek doktak inda ambu lir. Ma ol kavamisinda nom doktak inda lira. 13An ma ol kavakavan unda ondon jivinakurik a rari nir. An mbeek ma ol lihinjik hishihi mba, “An ma jivi. An mbeek mbele kava las a unda ambu nir,” karem mbanda ma ondon jivinakurik a rari ambu nir, wahau. Indik ji ihi mashi os Avui Wasilakahi jekambak li kayehendarin armek ji heyehe ji yarika. Karem li kayeri sir, “An mbeek ofa os anin ji hahandan a rupshinda ambu nir. Hako na rupshiwa karem, jir avak man sunguwavu jihi mende nga armek ji uka.” Karem li kayeri oson ji heyehe jivai yarika, an ma kava ondonjik a rari nir.” #Hos 6:6; Mt 12:7

Jisas akwan halandari mashin or saweri

(Mk 2:18-22; Lk 5:33-39)

14Urik Jonin tiyandari ma ondo Jisasin li heyekurik li taha limu silira, “Nir nga Farisi nga akwan ni halanda nir. Hako mberem ushiwak ol mirin tiyanda ma ondo akwan li halawan li halandu?” #Lk 18:12 15Karem li mbarik Jisas mu mbara, “Mberem ji hishindu, os ma lar or nokoplaha hiyawu wasilakan or uwa wolo, orhi ma ondo akwan nakrem or nga anda ol mo wahau? Akwan anda ol te! Akwan li aha or nga rupshinda lir. Hako kumak ma oton li tolo laha ishinakop akwan halakwa ola.”

16Uhu sauheima las nga normu sawera, “Os ma lar kowe orhi si frehe nahi, mbeek koutakri akri las or laha koushimbla orok or ewetlavandahi ambu sir. Mberem ushiwak? Os erem or u nahi, kowe oson or yokowa wolo koutakri akri oso avak si ramushihi awarikandak nakwa osa. Uhu koushimbla oson si unak wasilaka mendek frehekwa sir. 17Uhunda hom ma lar mbeek wain uku akrin or laha memesishi masi orok ngorondahi ambu ri. Os erem or u nahi, wain uku oso avak si kishalarasanak memesishi masi oso avak numbufaakwa osa. Ushinak wain uku avak misambik ngorokwa osa. Karem unda osik wain uku akrin memesishi akrik li ngoroshinak wain uku nga memesishi nga avak jivik fri naka.”

Jisas or mbarik nokove os kowe orhin tolori nga jikisi os hari nga jivik fri nari

(Mk 5:22-43; Lk 8:41-56)

18Jisas mashin or sawerako namber Judama li lotu undari akan washilindari ma lar orhik or taha kumbambongon or huvuhu ormu tlara, “Jikisi anhi angop hawa sir! Hako mi raha tava mihin hauowehe mbanak si usahaka.” 19Urik Jisas or usaha orin or tiyaha frimu ira. Urik ol orin tiyandari ma er nga limu ira.

20Li irik kolok nokove las asama 12-pelak fi nom ermbendari oso Jisashi kumayok si taha kousamba orhin simu tolora. 21Sihinjik karem hishiri sir, “Men kowe orhi nom a toloho avak jivik a nakwa nir.” Karem si hishihi simu tolora. #Mt 14:36 22Urik Jisas or tormblehe sirin or heyehe ormu mbara, “Apmanuwa, ajewa hala. Os anin nyi hishiowenda nombo orok os nyimu jivik nanduwa.” Oro wolo mendek jivik simu nara.

23Urik Jisas er or ihi Jairushi akak or taha nor heyeri ma musha orok li lihi holmba owehe matlahukwan li koroho limu tlara. 24Urik ormu mbara, “Mbermbar hikrik ji tala ika! Jikisi toso hawa ambu sir. Tos men wa suknyandu.” Karem or mbarik orin li okolehe limu hayira. 25Urik or mbashirik hikrik li tala irakorik akak or layihi jikisi osohi tavan or tolorik simu usahara. 26Urik jikisi oson or mbarik si usahari mashi oso simbalesik yanga yangak simu ira.

Jisas or mbarik misokome tumundari ma frijip nga ma or mambla jihindari nga jivik li nari

27Urik Jisas yanga oson or hala irik misokome tumundari ma frijip orin fri tiya ihi frimu ushaha tlara, “Jisas nirambara Devithi mirin, shirnjik mi hishiwa!” #Mt 20:29-34 28Karem fri mbarik Jisas er or ihi aka os or lindari mishi orok or layirik frir er nga fri lundiyaha akak frimu layira. Urik ormu silira, “Shi hishiwa, am an mbanak jivik shi naku, karem shimu hishindu?” Urik frimu mbara, “He shi hishiwa, mir erem undahi mira.” 29Karem fri mbarik tava orhin misokome frihik or hauowehe ormu mbara, “Os anin shi hishiowenda nombo orok avak jivik nakwa shira.” 30Karem or mbarik kolok misokome frihi huririk frimu heyera. Urik ormu mbara, “Ai ai, kas a uwa kason avak ma lal shi sawewa shi hala.” #Mt 8:4 31Hako, wahau, os jivik fri nari mashi oson yanga yangak frimu saweyara.

32Am fri ishirik ma or mambla jihi maimbandari ambun Jisashik limu laharara. Ma oto wasimalengamba tolondari orik maimbandari ambu ri. 33Urik Jisas wasimalengamba oton or mbru ermbeshirik ormu maimbara. Urik ma amber oson li heyehe limu mbara, “Ayo, tos ter nawak ni heyewa oso himi kas mbeek mas yanga nihi Israel torok talarik ni heyeri ambu os te!” #Mk 2:12

34Hako Farisi lal limu mbara, “Wasimalengamba ondo malakama lihi#9:34 Wasimalengamba malakama lihi Satan oria. orin or oloshiwak wasimalengamba ondon ormu mbru ermbenduwa.” #Mt 12:24; Mk 3:22; Lk 11:15

Jisas hulaima nokopmanjik or hishihi nor holori

35Jisas yanga yangak amber hom ormu yara. Uhu aka os Judama li lotu undari mishik or layihi mashi os Avui Wasilaka lirin or arangoshinak jip li likuri mashi oson ormu sawera. Uhu ma ol kavamisindarin or mbarik jivik limu nara. #Mt 4:23; Mk 1:39 36Uhu ma orhik tari ondonjik ormu holora. Mberem ushirik? Or heyeri lir nomorawun li kishaha mbeek ma lar lirin jelyakurik nari ambu ri. Lir sipsip ol ma ngashi ambu hom nandari lir. Karem uri osik lirnjik or holoho #Nam 27:17; 1 Kin 22:17; Sek 10:2; Mt 14:14; Mk 6:34 37ol orin tiyandari man ormu mbara, “Akwa musha mende angop ukruwa lir. Hako mbeek sakwa ma lal mushak nawa ambu lir. #Lk 10:2 38Uwosik noumashama Avui Wasilakan ji sawenak ma lal or mbashinak li ihi akwa orhin li saha aka orhik li oweka.”

Currently Selected:

Matyu 9: sim

Highlight

Copy