San Juan 2

Kaná çxhabte ptamunisa

1-3Tekh en skhẽwniite', Galilea kiwesu Kaná çxhabte ptamusáa ũsu'tx. Aça' Jesuswa pi'kxni pa'jçxa ũsu'k, txãa yakh ih u'jusawe'sx yã'jçxa. Jesus njĩ'jwa kxtee ũsu'k, naapkaçxha' vxino pçuute', Jesusa's na'jĩnak pta'sx:

—Vxino pçuk jĩk.

4Aça' Jesusa' na'wẽk pas:

—¿Kĩh yũukahnkwe adxa's txã'wẽ pta'sxi'? adx en yuu ãhmeya' jĩte', 5njĩ'ja' kxtee selpisaawe'sxtxi na'jĩk:

—Txãa ma'wẽ jxkaathe', kxtey myũuwe jĩna.

6Kxte' seis kiwe mitxh walasatx ũsu'. Txãa yu' judiuwe'sx khweeçxawa'j yu' awnisatx yu'. Mitxh iisa oçxenta meeçxawa cien litro yu' khẽesatx yu'. 7Txajũ' Jesusa' jxkaakh kxtee selpisaawe'sxtxi':

—Naa mitxhsu jxuka yu' uta mawwe jĩte', kxtey yuutx. 8Txajũ' Jesusa' na'jĩnak we'we txãawe'sxtxi': Naa mitxhte le'çxkuẽ pa'kxçxa boda namu's me'jwe yusya' jĩte', txãawe'sxa' kxtey yuutx. 9Txajũ' boda namu' tudxçxawa, jiyume' yu'a's txã'wẽ vxino vxitnitewa. Kxtee selpisaawe'sxçxáatx jii yu', yu'a's txã'wẽ vxino vxitnisatewa. Txajũ' boda namu' ptamusa's pa'yaçxa 10na'jĩnak we'we:

—Maawa vxino ewsa's khuẽ'ytxi nyafxte yusu' pi'kxnisatx, txãa e'sutx vxino açxamée ewsa's yusu'. Nawa idxa' txã'wẽ yũumée vxino wejx ewsa'sgu nmehte yus jĩk.

11Jesusa' Galilea kiwesu Kaná çxhabtek txã'wẽ kim yuhwa ãjãnimeesa's kaavxya'j. Txã'wẽ yũuçxak txajx ewuni's khiyu'j, aça' txãa yakh u'jusawe'sxa' jiyutx Jesus kimtewa.

12Txãa e'su' Jesusa' Kapernaum çxhabnak u'j, txajx njĩ'j vxite' txajx nyakhwe'sx, txãa yakh u'jusawe'sx yã'jçxa.

Dxuus yatte txweyna ũssatx Jesus kasxisxni

(Mt 21.12-13; Mr 11.15-18; Lk 19.45-46)

13Judiuwe'sx fxiesta Paskua en ãjãçte', Jesusa' Jerusalen çxhabna u'kh. 14Sa' dxuus yatte u'kaçxa', bwey, piisxáa, tub çxihmetx txweyna ũstek uy, vxite' vxyuu yu'pthehna ũssatx. 15Sa' Jesusa' txã'wẽ yũuna ũste uyçxa', kha'txa pheu'jçxa eka kasxisxku nasa vxite' niimaltxi jxuka. Sa' txã'wẽy vxyuu yu'pthehna ũsni mesatxwa jxuka pũsxku petx vxyu yã'jçxa. 16Sa' kxtee tub çxihme txweysatxi' na'jĩk:

—Naatxi' ayjxu jxuka mkaasxisxwe. Adx Tata yatte' txweyna vxyuu yu'pthehna ũswa'jme'.

17Txã'jĩte', Jesus yakh u'jusawe'sxa' yajkxtxi Dxus librute na'wẽ fxi'jni's: Dxuus yatte' ewmée yũuni's weh yuhwa peejxmeeth jĩni's.

18Txajũ' judiuwe'sxa' ũusçxa we'wenatx pẽjx:

—Kim jxkaathe txã'wẽ yũuçxawa, kwe'sxtxi mpeeta'sx jĩte', 19Jesus pasçxa':

—Naa dxuus yata's pẽtxtewa, adxa' tekh ente' ki' kiisya' ãjãwa'jsath.

20Txajũ' judiuwe'sxa' iiweeçx we'wena na'jĩtx:

—Naa dxuus yata's kuarenta y seis anxutetx txahna jxã'j, aça' idxa' ¿tekh enteçxáa txajxa' ewuudxijíima'g?

21Nawa Jesusa' txajx kakwe'sku dxuus yata' jĩna we'we'. 22Aça' uuçxa ki' ĩtxi yuute', txãa yakh u'jusawe'sxa' yajkxtxi txã'wẽ we'weni's. Sa' Dxus libru' isane' we'we', aça' Jesuswa isasa's íiçxáane' we'we' sũhna ewtxi jiyu.

Jesus nasaa ũus yaakxnitx jiyuni

23Judiuwe'sx fxiesta ente Jesus Jerusalente ũste', nasa wala kuh jiyutx Jesusa' Dxus tasxu yuusatewa, txã'wẽ kim yuhwa ãjãnimeesa's kaavxya'ja'pha'ga. 24Nawa Jesusa' txãawe'sx ma'wẽsatewa jxuka jiiyã'kh yu', txãasak txã'wẽ jiyutx sũju'çmée. 25Txãa nasa' txã'wẽsata' jĩna pta'sxi peejx yu'çme', txãa pa'gatey nasaa ũus yaakxnitx jxuka jiiyã'kh yu' naa pa'ga.

Currently Selected:

San Juan 2: pbbNNT

Highlight

Copy