Génesis 26
26
Isaac Guerar pꞌuurude banada
1Aɨ naaweda, ma warrarã tꞌodai naaweda, Isaac badamãi audupai jarra oojida. Ma jarra awara baji naawedapema Abrahampa unuda kꞌãyaara. Jarrara paraakꞌãri, Isaac wãji Guerar pꞌuurudee chi wẽra ome. Mama bapachi filisteorã rey, tꞌɨ̃jarapatapꞌedaa Abimélec.
2Mama pꞌanɨde Tachi Akꞌõrepa ichi unupiji Isaacmaa mãikꞌaapa mãgaji:
—Wãnaapáde aji, Egipto eujãdee. Béeji mɨa jararumãi. 3Nãgaweda béeji na eujãde. Mɨ pɨ ome baitꞌee mãikꞌaapa pɨ bendiciaitꞌee. Pɨdeepa warrarã chokꞌara uchiapiitꞌee. Mɨa pɨ akꞌõre Abrahammaa jaradakꞌa, na eujã teeitꞌee pɨmaa mãikꞌaapa pɨdeepa uchiadaitꞌeerãmaa. 4Mɨa ãra chokꞌara ĩwapiitꞌee lucero pajãde nɨ̃bɨkꞌa. Ãramaa na eujã jõmaweda teeitꞌee. Ma awara pɨdeepa uchiadaitꞌeerã kꞌapꞌɨa mɨa na pꞌekꞌau eujãdepemaarã jõmaweda bendiciaitꞌee. 5Mɨa mãga ooitꞌeeda aji, pɨ akꞌõrepa mɨ pedee ijãada perã, mɨa jaradakꞌa ooda perã mãikꞌaapa mɨa irumaa jarateedakꞌa ooda perã.
6Tachi Akꞌõrepa mãga jarada tꞌẽepai, Isaac Guerarde beeji. 7Mama bɨde mãpemaarãpa iidi pꞌaneejida Rebeca pari, iru kꞌĩra wãree bada perã. Mãga ũrikꞌãri, Isaacpa jaraji Rebeca ichi ɨ̃pewẽra. Ichi wẽrada a kꞌinia–e paji, ãrapa ichi peedai jĩakꞌaapa Rebeca kꞌapꞌɨa.
8Taarã pakꞌãri, ewari aba rey Abimelecpa ichi tedepema ventanadeepa akꞌɨkꞌãri, unuji Isaacpa chi wẽra wëre iru bɨ. Mãgá kꞌawa ataji Rebeca iru wẽra.
9Mãpai Abimelecpa Isaac atapipꞌeda, irumaa mãgaji:
—Rebeca pɨ wẽrada aji. ¿Mãga–ekꞌã? ¿Sãapꞌeda pɨchi ɨ̃pewẽrada ajima? aji.
Isaacpa pꞌanauji:
—Kꞌĩsiajida aji, mɨ peedai iru kꞌapꞌɨa.
10Mamĩda Abimelecpa mãgaji:
—¿Sãapꞌeda taimaa mãga oojima? aji. Tai pꞌuurudepemapa iru atakꞌaji ichi wẽra papiitꞌee. Mãga ooda paara, pꞌekꞌau kꞌachia ookꞌajida aji, Tachi Akꞌõre kꞌĩrapite.
11Ma tꞌẽepai Abimelecpa mãgaji jõmaweda ichi pꞌuuru pidaarãmaa:
—Apidaapa na ɨmɨkꞌĩramaa wa chi wẽramaa ne–inaa kꞌachia ooruta pɨrã, mɨa mãgɨ́ peepiitꞌeeda aji.
12Mama bɨde ma año Isaacpa ne–uuji mãikꞌaapa waibɨa ewaji, Tachi Akꞌõrepa iru bendicia bada perã. 13Pꞌaratꞌara, netꞌaara paraaji. 14Tachi Akꞌõrepa iru ovejaarã, pꞌakꞌaarã, esclavoorã paara ĩwapiji.
Ma kꞌaurepa filisteorãpa Isaac kꞌĩra unuamaa iru pꞌaneejida. 15Maperã Isaacpa iru bada pozo yooropa ipuru tꞌapꞌakꞌoojida. Abraham atꞌãri chokꞌai bɨde ichi mimiapataarãpa ma pania tꞌɨpata pozo kꞌoro atajida.
16Ma jõmaade kꞌĩsiapꞌeda, rey Abimelecpa Isaacmaa mãgaji:
—Wãpáde aji, namãikꞌaapa, pɨchi eere pꞌanɨɨrã ome, parã chokꞌaraara pꞌanɨ perã tai eere pꞌanɨɨrã kꞌãyaara.
17Aramãgá Isaac wãji ichideerã ome Guerar eujã jewedaadee. Mama pꞌaneejida. 18Mama pꞌanɨde awaraa pania tꞌɨpata pozo chi akꞌõrepa kꞌoropida mãikꞌaapa ichi piuda tꞌẽepai filisteorãpa tꞌapꞌakꞌoodapꞌedaa, waya kꞌoropiji. Ma pozo chi akꞌõrepa naaweda tꞌɨ̃ bɨdakꞌa tꞌɨ̃ bɨji.
19Ewari aba Isaac mimiapataarãpa ma Guerar eujã jewedaade pozo chiwidi kꞌoromaa pꞌanɨde, pania poátrɨ uchia bɨ unujida.
20Mamĩda ma eujãdepema oveja akꞌɨpataarãpa mãga unudakꞌãri, chõo jɨrɨ chejida Isaac oveja akꞌɨpataarã ome. Jarajida ma pania poátrɨ bɨmãi ãchidé paji. Ma chõodapꞌedaa kꞌaurepa Isaacpa ma pozo tꞌɨ̃ bɨji Pleito, pia jaraitꞌeera “chõopata”. 21Ma tꞌẽepai Isaac mimiapataarãpa awaraa pozo kꞌorojida mãikꞌaapa ma eujãdepemaarã waya chõo chejida ma kꞌapꞌɨa. Mapa Isaacpa ma pozo tꞌɨ̃ bɨji “kꞌĩra unuamaa pꞌanapata”.
22Maapꞌeda Isaac mamãikꞌaapa tꞌɨmɨ́ wãji mãikꞌaapa awaraa pozo kꞌoropiji. Ma eujãdepemaarã ma kꞌapꞌɨa chõo cheda–e paji.
Isaacpa ma pozo tꞌɨ̃ bɨji Rejobot#26.22 Hebreo pedeede Rejobot jara kꞌinia bɨ “eujã ewaraa kꞌobɨ”. mãikꞌaapa jaraji:
—Ɨ̃rara na eujã ewaraa kꞌobɨde pia pꞌanapataadaitꞌee mãikꞌaapa ĩwadaitꞌeeda aji.
23Mamãikꞌaapa Bersebade banaji.
24Ma panadapꞌedaa pꞌãrikꞌua Tachi Akꞌõrepa Isaacmaa ichi unupiji mãikꞌaapa mãgaji:
—Mɨ pɨ akꞌõre Abraham Akꞌõre Waibɨa. Waaweenaapáde aji, mɨ pɨ ome bairã. Mɨ mimiapari Abraham kꞌaurepa pɨ bendiciaitꞌee mãikꞌaapa pɨdeepa uchiadaitꞌeerã ĩwapiitꞌeeda aji.
25Mãpai Isaacpa mama altar ooji Tachi Akꞌõremaa ɨtꞌaa tꞌɨ̃pariitꞌee. Mama pꞌaneejida mãikꞌaapa mama Isaacpa pozo pania tꞌɨpataadaitꞌee kꞌoropiji chi mimiapataarãmaa.
Isaac Abimélec ome pedeeteeda
26Mama pꞌanɨde rey Abimélec Guerar eujã jewedaadeepa cheji Isaac ome pedeede. Ichi ũraapari Ajuzat mãikꞌaapa chi soldaorã poro waibɨa Ficol aukꞌa nipajida. 27Pachedakꞌãri, Isaacpa mãgaji:
—¿Parãpa mɨ kꞌiniada–e pꞌanɨ–ekꞌã? aji. Mapa mɨ pãchi eujãdeepa jëretꞌaajida. Mãga bɨta, ¿sãapꞌeda mɨ ome pedee chejidama? aji.
28Pꞌanaujida:
—Kꞌawa pꞌanɨda ajida, Tachi Akꞌõre pɨ ome bapari. Mapa kꞌĩsia iru pꞌanɨ pɨ ome pacto oodaitꞌee chõoda–ee pꞌanapataadaitꞌee. Nãga kꞌĩsia iru pꞌanɨ. 29Jarapáde ajida, pɨa maarepida ne–inaa kꞌachia oo–e paitꞌee tai pꞌuuru ome, taipa parã ichiakꞌau iru pꞌanapatapꞌedaa perã. Pɨmaa ne–inaa kꞌachia oodai kꞌãyaara, pɨ pia akꞌɨpachida mãikꞌaapa pɨ tai eujãdeepa pëikꞌãri, tꞌãri pia pëijida. Unu pꞌanɨda ajida, Tachi Akꞌõrepa pɨ bendiciamaa bɨ.
30Maapꞌeda Isaacpa ãchi–itꞌee fiesta pia ooji. Nekꞌojida mãikꞌaapa ne–inaa tojida. 31Aɨ norema tapꞌeda pꞌirabaidakꞌãri, Tachi Akꞌõre kꞌĩrapite juraajida chõoda–ee pꞌanapataadaitꞌee. Mãpai kꞌõpꞌãyoorãkꞌa despediidapꞌeda, kꞌãiwee wãjida.
32Ma ewateweda Isaac mimiapataarãpa jara chejida pania unudapꞌedaa ãchia pozo kꞌoro wãdapꞌedaade. 33Isaacpa ma pozo tꞌɨ̃ bɨji Seba.#26.33 Hebreo pedeede Seba jara kꞌinia bɨ “juraada”. Maadamãiipa pꞌuuru mama bɨ tꞌɨ̃jarapachida Berseba.
34Taarã pakꞌãri, Esaú cuarenta años iru bakꞌãri, hitita pida Beerí kꞌau tꞌɨ̃jarapatapꞌedaa Judit ataji chi wẽra papiitꞌee. Ichiaba ataji hitita pida Elón kꞌau, tꞌɨ̃jarapatapꞌedaa Basemat.#26.34 Ma hititaarãpa awaraa akꞌõre waibɨa apatade ijãapachida.
35Ma wẽraarã kꞌaurepa Isaac mãikꞌaapa Rebeca o–ĩa pꞌanadakꞌaa paji.
Currently Selected:
Génesis 26: sjaB
Highlight
Share
Copy
Want to have your highlights saved across all your devices? Sign up or sign in
©2005, 2010, 2015 Wycliffe Bible Translators, Inc. All rights reserved.
