Juan 8

1Mamĩda Jesús wãji Olivo Eedee. 2Aɨ norema tapꞌeda, waya cheji Tachi Akꞌõre te waibɨadee. Mama pachekꞌãri, eperãarã chokꞌara chejida irumaa. Mapa iru su–akꞌɨ beeji mãikꞌaapa jarateemaa beeji.

Wẽra chi kꞌima–ee ome kꞌãida

3Moisepa pꞌãda jarateepataarãpa fariseorã ome aneejida wẽra unu atadapꞌedaa pꞌekꞌau oomaa bɨ. Eperãarã taide ata bɨjida 4mãikꞌaapa Jesumaa mãgajida:

—Tachi Jarateepari, taipa na wẽra miakꞌãi bɨta unujidada ajida, awaraa ome nɨ̃bɨ. 5Akꞌõre Ũraa pꞌãdade Moisepa jaraji nãgee wẽraarã mãupa batꞌa peetꞌaadamerã.#8.5 Levítico 20.10; Deuteronomio 22.22-24. Mamĩda taipa kꞌawaa kꞌinia pꞌanɨ ¿pɨa kꞌãata jara bɨ?

6Ãchia mãga iidijida Jesupa Moisepa pꞌãda merai jĩakꞌaapa. Mãgá ɨmɨateekꞌajida. Mamĩda Jesupa made tꞌĩupi–e paji. Edaa ɨ̃jaabaipꞌeda, pꞌãmaa beeji yooro pꞌorade ichi jua kꞌɨ̃pa. 7Mãpai ãchia iidi jõnɨde Jesús jĩpꞌa su–akꞌɨ beeji mãikꞌaapa mãgaji:

—Naapɨara ichimaa mãupa batꞌapáde aji, parãdepema chi pꞌekꞌau kꞌachia wẽe bɨpa.

8Maapꞌeda waya edaa ɨ̃jaabaipꞌeda, yooro pꞌorade waya pꞌãmaa beeji ichi jua kꞌɨ̃pa. 9Mãgɨ́ pedee ũridakꞌãri, jõmaweda aba–abaa uchia wãdapa erreudachida. Naapɨara wãjida chonaarã, maapꞌeda apemaarã. Jesús ituaba beeji mãgɨ́ wẽra ome. 10Mapa Jesús jĩpꞌa su–akꞌɨ beepꞌeda, irumaa iidiji:

—¿Sãma pꞌanɨma? aji. ¿Apidaapa pɨ pee kꞌiniada–e pajikꞌã? aji.

11Ma wẽrapa mãgaji:

—Apidaapa, Tachi Waibɨa.

Jesupa mãgaji:

—Mɨa pida pɨ pee kꞌinia–eda aji. Ɨ̃rá wãpáde aji, mãikꞌaapa ɨ̃raweda pꞌekꞌau kꞌachia oo amáaji.]

Jesús ɨ̃daa pɨkꞌa bɨ na pꞌekꞌau eujãdepemaarã–itꞌee

12Mãpai Jesupa waya jarateemaa beeji eperãarãmaa:

—Mɨda aji, ɨ̃daa pɨkꞌa bɨ na pꞌekꞌau eujãdepemaarã–itꞌee, mɨa ãramaa Tachi Akꞌõre o akꞌɨpipari perã. Mɨde ijãa bɨ pꞌãriu pɨkꞌa bɨde nipa–e paitꞌee, Tachi Akꞌõre kꞌawa–ee. Ma kꞌãyaara ichita chokꞌai bapariitꞌee, ɨ̃daa pɨkꞌa bɨde Tachi Akꞌõre ode nipapari perã.

13Mãpai fariseorãpa irumaa mãgajida:

—Pɨchi kꞌĩsiadoopa mãgɨ́ pedee jaramaa bɨda ajida. Awaraa wẽ–e perã aukꞌa jaraitꞌee, pari pɨ pedeemaa bɨda ajida.

14Jesupa pꞌanauji:

—Mɨ pedeekꞌãri, wãarata jarapari. Mɨa kꞌawa bɨda aji, sãmãikꞌaapa cheda mãikꞌaapa sãmaa wãitꞌee. Jõdee parãpa mãga kꞌawada–e pꞌanɨ. 15Awaraarãpa oo pꞌanɨ ɨ̃rɨpai akꞌɨpata jaradaitꞌee pia wa kꞌachia. Jõdee mɨa mãgá akꞌɨ–epɨ. 16Mamĩda eperãpa oo bɨ akꞌɨkꞌãri, mɨa jararu pɨrã pia wa kꞌachia, wãarata jaraitꞌee, mɨ pëidapa mɨ kꞌaripapari perã. Mɨchi ituabaapa eperãarãpa oopata mãgá akꞌɨkꞌaa. 17Pãchi ũraa pꞌãdade jara bɨ eperã omeerãpa ne–inaa unudapꞌedaa aukꞌa jaradakꞌãri, ma jarada wãara. Aukꞌa bɨ mɨ ome. 18Mɨchia oo bɨ jarapari mãikꞌaapa mɨ Akꞌõre, mɨ pëidapa, aukꞌa jarapari.

19Mãpai ãchia iidijida:

—¿Sãma bɨma ajida, pɨ Akꞌõre?

Jesupa pꞌanauji:

—Parãpa mɨ wãara kꞌawada–eda aji. Mɨ Akꞌõre jida wãara kꞌawada–e. Mɨ wãara kꞌawa pꞌanadapꞌedaa paara, mɨ Akꞌõre jida wãara kꞌawa pꞌanakꞌajidada aji.

20Jesupa mãga jaraji, Tachi Akꞌõre te waibɨade primisia ɨapatamãi jaratee bɨ misa. Eperãarã chokꞌara mama wãyaa wãjida mĩda, apidaapa iru jitada–e paji irua jarateeda kꞌaurepa, ewari Tachi Akꞌõrepa awara bɨda ma–itꞌee waide pa–e bada perã.

Jesupa ichi wãitꞌee bɨmaa pꞌoyaa wãda–eda ada

21Mãpai waya Jesupa mãgaji:

—Mɨ ãyaa wãitꞌeeda aji. Parãpa mɨ jɨrɨdaitꞌee. Mamĩda mɨ unuda–e paitꞌee. Atuadaitꞌee pãchia pꞌekꞌau kꞌachia oopata kꞌaurepa. Mapa mɨ wãitꞌee bɨmaa parã pꞌoyaa wãda–eda aji.

22Mãga ũridakꞌãri, judiorã poroorã pedee para beeji:

—Tachi pꞌoyaa wãda–eda a bɨ, iru wãitꞌee bɨmaa. ¿Ichi juadoopa piutꞌee–epaama? aji.

23Mãpai Jesupa ãchimaa mãgaji:

—Parã ekꞌaripemaarãda aji. Mamĩda mɨ ɨtꞌaripema. Parã na pꞌekꞌau eujãdepema. Mamĩda mɨ na pꞌekꞌau eujãdepema–e. 24Mapa mɨa jaraji parã atuadaitꞌee pãchia pꞌekꞌau kꞌachia oopata kꞌaurepa. Wãara mãgá atuadaitꞌeeda aji, ijãada–e pꞌanɨ pɨrã Mɨta jõmaarã Akꞌõre Waibɨa. Mɨa aupaita eperãarãpa pꞌekꞌau kꞌachia oopata wẽpapii.

25Mãpai irumaa iidijida:

—Pɨ, ¿kꞌaima? ajida.

Jesupa pꞌanauji:

—Mɨ chedakꞌãriipa, parãmaa mãga jaraparida aji. 26Mɨa unupari pãchia ne–inaa kꞌachia oopata mãikꞌaapa pedee chokꞌaraapa parã ɨmɨateekꞌaji. Mamĩda mãga oo–e paitꞌee. Jĩpꞌa jaraitꞌee mɨ pëidapa jarapi bɨkꞌa na pꞌekꞌau eujãdepemaarãmaa. Irua ichita wãarata jaraparida aji.

27Mamĩda ãchia kꞌawada–e paji, Jesupa jarakꞌãri ichi Tachi Akꞌõrepa pëida. 28Mapa Jesupa mãgaji:

—Parãpa Eperã Akꞌõre Truadepema kurusode jiradakꞌãri peedaitꞌee, kꞌawaadaitꞌee Mɨta Tachi Akꞌõrepa pëida. Ma awara kꞌawaadaitꞌee mɨa ne–inaa jõma oopari irua oopi bɨkꞌa mãikꞌaapa jõma jarapari irua jarapi bɨkꞌa. 29Mɨ pëida na pꞌekꞌau eujãdee mɨ ome baparida aji. Mɨ ituaba atabëi–epɨ, irua kꞌinia bɨkꞌa oopari perã.

30Jesupa mãga jarakꞌãri, eperãarã chokꞌara irude ijãajida.

Abrahamdeepa uchiadapꞌedaada apatapꞌedaarã

31Mãpai Jesupa judiorã irude ijãadapꞌedaarãmaa mãgaji:

—Parãpa oo pꞌanɨ pɨrã mɨa ũraa bɨkꞌa, wãara mɨ kꞌõpꞌãyoorã. 32Mãga ooruta pɨrã, kꞌawaadaitꞌee Tachi Akꞌõrepa wãarata jara pëida mãikꞌaapa ma kꞌaurepa waa esclavoorã pꞌanada–e paitꞌeeda aji.

33Ãchia pꞌanaujida:

—Tai Abrahamdeepa uchiadapꞌedaarã. Mapa tai esclavoorã–epɨ. Apidaa jua ekꞌari pꞌanadakꞌaa. Tachi Akꞌõre juadepai pꞌanapata. ¿Sãapꞌeda taimaa jara cheruma ajida, waa esclavoorã pꞌanada–e paitꞌee?

34Jesupa pꞌanauji:

—Mɨa wãarata jararu. Jõmaweda pꞌekꞌau kꞌachia oopataarã esclavoorãkꞌa pꞌanɨda aji, pꞌekꞌau kꞌachia jua ekꞌari pꞌanapata perã. 35Kꞌĩsiadáma nãgɨde. Esclavo ichita ba–e chipari tede. Jõdee ma te chipari warra ichita bapari ma tede, ichi akꞌõrede perã. 36Mapa Tachi Akꞌõre Warrapa parã pꞌekꞌau kꞌachia jua ekꞌariipa uchia ataru pɨrã, wãara uchiadaitꞌee. 37Mɨa kꞌawa bɨ parã Abrahamdeepa uchiadapꞌedaarã. Mamĩda mɨ peetꞌaa kꞌinia pꞌanɨ, mɨ ũraa wãara ijãa kꞌiniada–e pꞌanadairã. 38Mɨa jaraparida aji, mɨ Akꞌõrepa mɨmaa akꞌɨpida. Jõdee parãpa oopata pãchi akꞌõrepa jarateedakꞌa.

39Mãpai ãchia mãgajida:

—¡Tai akꞌõre Abrahamda! ajida.

Mamĩda Jesupa pꞌanauji:

—Parã wãara Abraham warrarã pada paara, irua oodakꞌa ookꞌajidada aji. 40Mamĩda mãga ooda–e pꞌanɨ. Mɨa parãmaa Tachi Akꞌõre wãarata jaraji, irua mɨmaa mãga jarada perã. Mamĩda ɨ̃rá parãpa mɨ peetꞌaa kꞌinia pꞌanɨ. Abrahampa mãga oo–e paji Akꞌõre pedee jarapataarã ome. 41Parãpa ne–inaa kꞌachia oomaa pꞌanɨda aji, pãchi akꞌõrepa ooparikꞌa.

Ãchia mãgajida:

—¡Tai awaraa akꞌõredeepa uchiada–e pajida! ajida. ¡Akꞌõre abapaita iru pꞌanɨda! ajida. ¡Mãgɨ́ Tachi Akꞌõre!

42Jesupa pꞌanauji:

—Tachi Akꞌõre wãara parã akꞌõre pada paara, mɨ kꞌinia iru pꞌanakꞌajidada aji, mɨ Tachi Akꞌõremãiipa cheda perã. Mapa mɨ nama bɨ. Mɨchi kꞌĩradoopa nama che–e paji. Tachi Akꞌõrépata mɨ pëiji. 43¿Parãpa mɨa jaratee bɨ atꞌãri kꞌawada–e pꞌanɨkꞌã? Parãpa mɨ ũraa ũri kꞌiniada–e pꞌanɨ. Maperãpɨ mɨa jara bɨ kꞌawada–e pꞌanɨ. 44Parã akꞌõre Netuara Poro Waibɨa. Ichideerã perã ichia oopi kꞌiniata oo kꞌinia pꞌanɨ. Na eujã beedakꞌãriipa ichia eperãarã peeyaa bapari. Ma awara ne–inaa wãara unuamaa iru bapari, wãarata kꞌawakꞌaa perã. Seewa jarapari wãarakꞌa; mãga bapari. Ichi seewa–idaa beerã akꞌõre, seewa–idaa bapari perã. 45Mamĩda mɨa Tachi Akꞌõre wãarata jarakꞌãri, parãpa mɨ pedee ijãadakꞌaa. 46¿Kꞌaipa akꞌɨpii mɨa pꞌekꞌau kꞌachia aba pida ooda? ¡Mãga pꞌoyaa ooda–e! Mãga bɨta, mɨa wãarata jarakꞌãri, ¿parãpa sãapꞌeda mɨ pedee ijãada–ema? 47Tachi Akꞌõredeerãpa iru Ũraa ũri kꞌinia pꞌanapata. Mamĩda parã Akꞌõredeerã–e pꞌanadairã, iru ũraa ũri kꞌiniadakꞌaada aji.

Abraham tꞌoi naaweda, Jesús bapachi

48Mãpai judiorã poroorãpa Jesumaa mãgajida:

—¿Pɨ Samariadepema–ekꞌã?#8.48 Ãchia mãga jarajida Jesús oo iru pꞌanadapꞌedaa perã. Judiorãpa Samaria pidaarã kꞌĩra unuamaa iru pꞌanapachida. ajida. Ma awara pɨchi kꞌapꞌɨade netuara merãtɨa bɨda ajida.

49Jesupa pꞌanauji:

—Mɨ kꞌapꞌɨade netuara wẽe bɨda aji. Ma kꞌãyaara mɨa mɨ Akꞌõre waawee bapari. Mamĩda parãpa mɨ waaweedakꞌaa. 50Mɨa jɨrɨ–e bɨ eperãarãpa mɨ tꞌo pꞌanadamerã, mɨ Akꞌõrepa mãga kꞌinia bɨ mĩda. Iruata akꞌɨ bɨ parãpa oopata mãikꞌaapa jaraitꞌee pia wa kꞌachia. 51Mɨa wãarata jararu. Eperãpa mɨ ũraa ũripꞌeda, ooru pɨrã ma ũraade jara bɨkꞌa, piu–e paitꞌeeda aji.

52Mãpai ma judiorãpa mãgajida:

—¡Ɨ̃rapɨ kꞌawa pꞌanɨ wãara pɨ kꞌapꞌɨade netuara merãtɨa bɨ! Abraham mãikꞌaapa Tachi Akꞌõre pedee jarapataarã jõmaweda piujida. Mamĩda pɨa jara bɨ pɨ ũraa jara bɨkꞌa oopari piu–e paitꞌee. 53Mãgara, ¿pɨ waibɨara bɨkꞌã tai chonaarãwedapema piuda Abraham kꞌãyaara? ¿Waibɨara bɨkꞌã Tachi Akꞌõre pedee jarapataarã piudapꞌedaa kꞌãyaara? ¿Kꞌãata kꞌinia bɨma ajida, taipa kꞌĩsiadamerã pɨde?

54Jesupa pꞌanauji:

—Mɨa jarada paara mɨ waibɨara bɨ awaraarã kꞌãyaara, pari mãga jarakꞌaji. Mamĩda mɨ Akꞌõrépata mãga jarapari. Mãgɨ́ Akꞌõre parãpa “Tachi Akꞌõre” apata. 55Mamĩda parãpa Tachi Akꞌõre kꞌawada–e pꞌanɨ. Jõdee mɨa iru wãara kꞌawa bɨ. Mɨa iru kꞌawa–e bɨda ada paara, seewa–idaa bakꞌaji parã jĩakꞌa. Mamĩda mãga–e. Mɨa wãara iru kꞌawa bɨ mãikꞌaapa oopari irua jara bɨkꞌa. 56Pãchi chonaarãwedapema Abraham o–ĩadachi mɨ na eujãdee cheda unuitꞌee bada perã. Wãara mãga unuji mãikꞌaapa o–ĩa beejida aji.

57Mãpai ãchia mãgajida Jesumaa:

—Pɨ waide cincuenta años wẽe bɨ. Mãga bɨta, ¿Abraham unujida a bɨkꞌã? ajida.

58Jesupa pꞌanauji:

—Mɨa wãarata jararu. Abraham tꞌoi naaweda, Mɨta bapachida aji.

59Mãga ũridakꞌãri, ãchia mãu pꞌe atajida batꞌadaitꞌee Jesumaa, ichi Tachi Akꞌõreda ada perã. Mamĩda Jesús mirudachi mãikꞌaapa Akꞌõre te waibɨadeepa uchiadachi.

Currently Selected:

Juan 8: sjaB

Highlight

Copy