Lucas 13

Pꞌekꞌau kꞌachia oo amaadaipia bɨ

1Maapai eperãarã ũkꞌuru wãjida Jesús akꞌɨde. Nepɨrɨjida Pilatopa Galilea eujãdepema ɨmɨkꞌĩraarã peepida, ãrapa pꞌaareerãmaa ne–animalaarã peepidapꞌeda, paapidakꞌãri. Mãgá ma eperãarã waa pꞌoira beeji ma ne–animalaarã waa ome. 2Mãga ũripꞌeda, Jesupa mãgaji:

—¿Parãpa kꞌĩsia pꞌanɨkꞌã aji, Tachi Akꞌõrepa mãga pꞌasapiji ma Galilea eujãdepemaarãpa pꞌekꞌau kꞌachiara oodapꞌedaa perã ma eujãdepemaarã awaraarã kꞌãyaara? 3Mãga–e. Mamĩda pãchia pꞌekꞌau kꞌachia oopata oo amaada–e pɨrã, ichiaba piudaitꞌee. 4Mãga–e pɨrã ¿kꞌĩsia pꞌanɨkꞌã dieciocho piudapꞌedaarã Siloé torre tꞌeekꞌãri, mãgá piujida ne–inaa kꞌachiara oopachida perã awaraa Jerusalendepemaarã kꞌãyaara? 5Mãga–e. Mamĩda pãchia pꞌekꞌau kꞌachia oopata oo amaada–e pɨrã, ichiaba piudaitꞌee.

Jesupa nepɨrɨda higuera bɨɨrɨde

6Mãpai Jesupa nãga nepɨrɨji jarateeitꞌee:

—Eperãpa higuera bɨɨrɨ uu iru baji ichi uva kꞌãide. Ewari aba akꞌɨnaji, higojõ chau bɨ jĩakꞌaapa. Mamĩda chau–ee baji. 7Mapa jaraji eperã chi ne–uu akꞌɨ baparimaa: “Año õpee iru bɨda aji, higojõ jɨrɨ che bɨ nama. Mamĩda unukꞌaada aji. Tꞌɨapꞌetꞌaapáde aji. ¿Kꞌãare–itꞌee ichi kꞌinia jãma bainɨ̃ bayama aji, eujã jɨ̃amaa?” 8Mamĩda ma eujã akꞌɨparipa pꞌanauji: “Señor, ichiakꞌau bɨpáde aji, na año aupai. Yooro pꞌoiraitꞌee ujãra ome mãikꞌaapa arii pꞌe bɨnaitꞌeeda aji. 9Mãga ookꞌãri, ¿chau–e paikꞌã? aji. Mata chau–e pɨrã, tꞌɨapꞌetꞌaaitꞌeeda” aji.

Jesupa wẽra eburukꞌukꞌua bada jɨpada

10Ewari aba ɨ̃ipata ewate Jesupa jarateemaa baji Tachi Akꞌõre Ũraa jarateepata tede. 11Mama baji wẽra dieciocho años kꞌayaa bɨ. Netuarapa ma wẽra eburukꞌukꞌuapiji. Mapa jĩpꞌa pꞌoyaa bainɨ̃ beekꞌaa paji. 12Jesupa ma wẽra unu atakꞌãri, tꞌɨ̃ ataji mãikꞌaapa mãgaji:

—Wẽra, pɨ jɨpa bɨda aji.

13Mãpai ichi jua bɨji ma wẽra ekꞌarra ɨ̃rɨ. Aramata jĩpꞌa bainɨ̃ beeji mãikꞌaapa Akꞌõremaa ɨtꞌaa tꞌɨ̃maa beeji o–ĩapa. 14Mamĩda ma Akꞌõre Ũraa jarateepata tedepema poro waibɨa kꞌĩraudachi, ɨ̃ipata ewate Jesupa jɨpatꞌaada perã. Mapa eperãarãmaa mãgaji:

—Ewari seis paraada aji, mimiadaitꞌee. Chedapáde aji, mãgɨ́ ewate jɨpapide. Ɨ̃ipata ewate chenaadapáde aji.

15Mãpai Tachi Waibɨapa pꞌanauji:

—¡Mamĩda parãpa paara oodakꞌaa pãchia jarateepatakꞌa! ¡Ɨ̃ipata ewate ichiaba mimiapata! ¿Ɨ̃ipata ewate pãchi pꞌakꞌa maa–e pɨrã burro ẽrapata–ekꞌã aji, ateedaitꞌee pania topide? 16Na wẽra Abrahamdeepa uchiada Satanapa dieciocho años kꞌayaa iru baji. ¿Ɨ̃ipata ewate pꞌoyaa jɨpaikꞌaraa baji–ekꞌã? aji.

17Jesupa mãga jarakꞌãri, ichi kꞌĩra unuamaa iru pꞌanadapꞌedaarã kꞌĩra nejasia pꞌaneejida eperãarã kꞌĩrapite. Mamĩda arii pꞌanadapꞌedaarã o–ĩa para baji Jesupa ne–inaa pia ooda kꞌaurepa.

Mostaza taude nepɨrɨda

(Mateo 13.31-32; Marcos 4.30-32)

18Jesupa ichiaba awaraa nepɨrɨji jarateeitꞌee:

—¿Kꞌãarekꞌa bɨma aji, Tachi Akꞌõrepa eperãarã ichi jua ekꞌari bɨkꞌãri, ichideerã pꞌaneedamerã? ¿Kꞌãare ome aukꞌa bɨma? aji. 19Mostaza tau pꞌisi kꞌedéekꞌata bɨda aji, eperãpa uuda ichi te ãukꞌidaa. Wari wãpachi pakꞌurukꞌa nɨ̃beerumaa. Waibɨa nɨ̃beekꞌãri, chi jua tꞌaide ipanaarã chepata ɨ̃idaitꞌee.

Levadurade nepɨrɨda

(Mateo 13.33)

20Ichiaba Jesupa nãga nepɨrɨji jarateeitꞌee:

—¿Kꞌãarekꞌa bɨma aji, Tachi Akꞌõrepa eperãarã ichi jua ekꞌari bɨkꞌãri, ichideerã pꞌaneedamerã? 21Wẽrapa levadura pꞌoiraparikꞌa bɨ harina waibɨa ome, pan masa pia warimerã.

Tachi Akꞌõre truadee wãitꞌee puerta pꞌĩrupꞌee pɨkꞌa bɨ

(Mateo 7.13-14, 21-23)

22Jerusalén ode wãdade Jesupa jarateeji pꞌuuru bee chaa mãikꞌaapa aɨ ikꞌaawa eperãarã pꞌanapatamãi. 23Maapai eperãpa iidiji:

—Tachi Waibɨa, ¿eperãarã chokꞌara–ee Akꞌõre eujãdee wãdaitꞌeekꞌã? aji.

Jesupa pꞌanauji:

24—Tachi Akꞌõre truadee wãitꞌee puerta pꞌĩrupꞌee bɨde tꞌĩupatákꞌata bɨ. Mɨa jara bɨ: Eperãarã chokꞌara wã kꞌinia pꞌanadaitꞌee Tachi Akꞌõre truadee. Mamĩda pꞌoyaa wãda–e paitꞌee. 25Te chipari pꞌirabaipꞌeda, ichi puerta jɨ̃a nɨ̃bɨparikꞌa, mãga pɨkꞌa ewari cherude mɨ, parã poro waibɨapa Akꞌõre truadepema puertakꞌa bɨ jɨ̃aitꞌee. Mãpai parã taawa pꞌanɨɨrãpa mãgadaitꞌee: “Tachi Waibɨa, ewapáde adaitꞌee tai tꞌĩudaitꞌee.” Mamĩda mɨa pꞌanautꞌee: “Mɨa parã kꞌawa–e bɨ. Mapa parã tꞌĩupi–e paitꞌee. Parã mɨchideerã–eda aitꞌee.” 26Mãpai parãpa jara pꞌaneedaitꞌee: “Tai pɨ ome nekꞌopachida mãikꞌaapa ne–inaa topachida. Tai pꞌuuru jãde pɨa jaratee nipapachida” adaitꞌee. 27Mamĩda mɨa pꞌanautꞌee: “¿Mɨa jara–e pajikꞌã parã mɨchideerã–e? ¡Ãyaa wã́tɨ mɨ ikꞌaawaapa, ne–inaa kꞌachia oopataarã!” 28Parãpa unudakꞌãri Abraham, Isaac, Jacob, jõmaweda Akꞌõre pedee jarapataarã ome Tachi Akꞌõre truade, kꞌawaadaitꞌee parã taawa pꞌanɨ. Mãpai jẽedaitꞌee mãikꞌaapa pãchi kꞌida kierrkierree para baitꞌee pꞌuapa. 29Eperãarã chedaitꞌee norte eereepa, sur eereepa, akꞌõrejĩru uchiapari eereepa mãikꞌaapa akꞌõrejĩru baaipari eereepa. Mãɨrãta su–akꞌɨ pꞌana chedaitꞌee nekꞌode Tachi Akꞌõre ome ichi truade. 30Maapai chi ɨ̃rapema ekꞌariara beerã Tachi Akꞌõrepa waibɨara papiitꞌee. Jõdee ɨ̃rapema waibɨara beerã irua ekꞌariara papiitꞌee.

Jesús jẽeda Jerusalén pꞌuuru pidaarã pari

(Mateo 23.37-39)

31Mãpai fariseorã ũkꞌuru chejida mãikꞌaapa mãgajida Jesumaa:

—Wã́ji namãikꞌaapa, Herodepa pɨ peetꞌaa kꞌinia bairã.

32Irua pꞌanauji:

—Wã́tɨ jarade jã ikꞌawaa bɨmaa: “Idi mãikꞌaapa nu uchiapikꞌooitꞌee netuara merãtɨa bee eperãarã kꞌapꞌɨadeepa mãikꞌaapa kꞌayaa beerã jɨpakꞌooitꞌee. Maapꞌeda nunorema parumaa aupaitꞌee.” 33Mamĩda idi, nu mãikꞌaapa nunorema ichita wãitꞌee mɨchi ode, pia–e bairã Akꞌõre pedee jarapari Jerusalén pꞌuurudeepa taawa piumerã.

34ʼ¡Jerusalén, Jerusalén, pɨdepemaarãpa Tachi Akꞌõre pedee jarapataarã peepata mãikꞌaapa irua pëida eperãarã mãupa batꞌa peepata! Atꞌapai mɨa pɨdepemaarã araa pꞌe kꞌinia bapachi, etꞌerre wẽrapa chi chakꞌeerã pꞌe ataparikꞌa ichi isia ekꞌari. Mamĩda parãpa kꞌiniada–e paji. 35¡Ũrítɨ! ¡Pãchi te ituaba beeitꞌee, Tachi Akꞌõrepa parã waa akꞌɨ–e paitꞌee perã! Mɨa jara bɨ: Parãpa mɨ waa unuda–e paitꞌee ewari cherude nãga jararutamaa:

‘¡Tachi Akꞌõrepa ichia pëida ichita pia akꞌɨ bapariitꞌee!’ (Salmos 118.26)

Currently Selected:

Lucas 13: sjaB

Highlight

Copy