Lucas 12

Jesupa ũraada fariseorãkꞌa pꞌananaadamerã

1Jesús atꞌãri mama bɨde eperãarã audupɨara see nɨ̃ba cheji iru badamãi. Audú cho–kꞌara#12.1 Griego pedeede: miles y miles. nɨ̃bada perã, awaraarã bɨɨrɨ ɨ̃rɨ paara tꞌɨakꞌoo wãpachida. Mãpai Jesupa jarateemaa beeji chi kꞌõpꞌãyoorãmaa:

—Kꞌĩrakꞌaupai fariseorã levadura ome; pia jaraitꞌeera, ãchia jarateepata ome. Jarateepatada apata Tachi Akꞌõrepa kꞌinia bɨ eperãarãpa oodamerã. Mamĩda ãchia mãga oodakꞌaa, tꞌãri kꞌachia pꞌanadairã. 2Tachi Akꞌõrepa ãchi kꞌĩsia tꞌãridepai kꞌawaapiitꞌee mãikꞌaapa ãchia ne–inaa mera oopata unupiitꞌee. 3Wãara ne–inaa jõmaweda parãpa mera jarapata irua tau taawa kꞌawaapiitꞌee. Pãchi puerta jɨ̃adapꞌeda pedee mera jaradapꞌedaa paara tau taawa kꞌawaapiitꞌee terraza ɨ̃rɨɨpa biarukꞌa.

Kꞌaita waaweedaipia bɨ

(Mateo 10.26-31)

4—Mɨchi kꞌõpꞌãyoorã, mɨa nãga jara bɨ. Waaweenáatɨ parã jɨrɨ pꞌanɨɨrã peedaitꞌee, ãrapa parã pꞌoyaa atuapida–e perã tokꞌarradee. 5Jaraitꞌee kꞌaita waaweedaipia bɨ. Tachi Akꞌõre waawéetɨ iruata tachi piupii perã mãikꞌaapa atuapii perã. Wãara iruta waaweedaipia bɨ.

6ʼ¿Netopata–ekꞌã ipana chakꞌe joisomaa pꞌaratꞌa tau omee pari? Eperãarãpa mãga oopata ipana chakꞌe makꞌɨara vale–e bɨ jĩakꞌaapa. Mamĩda Tachi Akꞌõrepa ma ipana chakꞌeerã pia akꞌɨpari. 7Parã jida mãgá akꞌɨpari. Parã puda paara irua juasia iru bɨ. Mapa waaweenáatɨ, Tachi Akꞌõrepa parã kꞌiniara iru bapari perã ipanaarã kꞌãyaara.

Jesucristode ijãapatada apataarã awaraarã kꞌĩrapite

(Mateo 10.32-33; 10.19-20; 12.32)

8—Mɨa nãga jara bɨ. Eperãpa tau taawa jararu pɨrã ichi Jesucristode ijãapari, mɨ, chi Eperã Akꞌõre Truadepemapa pida jaraitꞌee: “Mãgɨ́ mëré” Tachi Akꞌõre angeleerã kꞌĩrapite. 9Mamĩda eperãpa meraru pɨrã mɨde ijãapari, mãgara mɨa pida meraitꞌee. “Mãgɨ́ mëre–eda” aitꞌee Tachi Akꞌõre angeleerã kꞌĩrapite.

10ʼTachi Akꞌõrepa eperãarãpa pꞌekꞌau kꞌachia oopata wẽpapikꞌãri, wẽpapii ãchia ikꞌachia jarapata paara Eperã Akꞌõre Truadepema ãpɨte. Mamĩda ikꞌachia jararuta pɨrã iru Jaure ãpɨte, mãgee pꞌekꞌau kꞌachia wẽpapi–e paitꞌee.

11ʼParã mɨde ijãapata kꞌaurepa eperãarãpa parã ateedakꞌãri Akꞌõre Ũraa jarateepata tede maa–e pɨrã charraarãmaa mãikꞌaapa poro waibɨarãmaa ɨmɨateedaitꞌee, kꞌĩsianáatɨ sãga pꞌanaudaitꞌee maa–e pɨrã kꞌãata jaradaitꞌee. 12Mãɨrã kꞌĩrapite panadakꞌãri mãikꞌaapa pedeedaitꞌee pakꞌãri, Tachi Akꞌõre Jaurepa jarateeitꞌee, pꞌanau kꞌawaadamerã.

Jesupa nepɨrɨda pꞌaratꞌa paraa bɨ, kꞌĩsia kꞌawa–ee bɨde

13See nɨ̃badadepema abaapa Jesumaa mãgaji:

—Tachi Jarateepari, jaráji mɨ ɨ̃pemamaa tai akꞌõrepa netꞌaa bëida tꞌoomerã mɨ ome.

14Jesupa pꞌanauji:

—Kꞌõpꞌãyo, ¿kꞌaipa mɨ bɨjima aji, parã charrakꞌa mãga jaramerã?

15Ichiaba mãgaji:

—Kꞌĩrakꞌaupai netꞌaa kꞌɨ̃adai. Eperãarã tꞌãri o–ĩa pꞌanadakꞌaa netꞌaara pꞌe iru pꞌanadairã.

16Mãpai Jesupa nãga nepɨrɨji jarateeitꞌee ma etꞌewa jaradade:

ʼEperã pꞌaratꞌara bɨ bapachi. Ne–uu waibɨa iru bada perã, netꞌatau waibɨa ewapachi. 17Mapa kꞌĩsia beeji: “¿Kꞌãata ooyama? aji. Te wẽe bɨ mɨchi netꞌatau jõmaweda ɨaitꞌee.” 18Mãpai ma pꞌaratꞌara bɨpa kꞌĩsia ataji. “Kꞌawa bɨda aji, kꞌãata ooitꞌee. Mɨ netꞌatau ɨapata te wãraitꞌee mãikꞌaapa awaraa te waibɨara oo ataitꞌee. Mãgá mɨchi netꞌatau netꞌaa iru bɨ ome, jõmaweda ɨayada aji, ma tede. 19Maapai mɨa jarai mɨchi tꞌãridepai: ‘Mɨa netꞌaara iru bɨ. Nãgɨ́ ome año chokꞌara pia bapariitꞌee. Ɨ̃rá ɨ̃iitꞌee, nekꞌoitꞌee, ne–inaa toitꞌee mãikꞌaapa o–ĩa bapariitꞌeeda’ aji.” 20Mamĩda ma pꞌaratꞌara bɨpa mãga kꞌĩsia bɨde Tachi Akꞌõrepa irumaa mãgaji: “¡Pɨ kꞌĩsia kꞌawa–ee bɨ! Idi weda pꞌãrikꞌua pɨ piutꞌee. Maapꞌeda, ¿kꞌaipa ataitꞌeema aji, pɨa netꞌaara ɨa iru bɨ?”

21Ma nepɨrɨ aupakꞌãri, Jesupa mãgaji:

—Mãgá uchiaitꞌeeda aji, eperãpa netꞌaara pꞌe atakꞌãri ichi–itꞌee, Tachi Akꞌõrede ijãa–ee.

Tachi Akꞌõrepa chi warrarã pia akꞌɨpari

(Mateo 6.25-34)

22Maapꞌeda Jesupa mãgaji chi kꞌõpꞌãyoorãmaa:

—Mɨa jara bɨ: Kꞌĩsia jõnanáatɨ kꞌãata kꞌodaitꞌee mãgá chokꞌai pꞌanadaitꞌee. Ichiaba kꞌĩsianáatɨ sãga pꞌaru atadaitꞌee. 23Tachi Akꞌõrepa tachi chokꞌai pꞌanapipari. Iruata tachimaa chikꞌo teeitꞌee. Ma awara irua tachi kꞌapꞌɨa ooda perã, tachimaa pꞌaru teeitꞌee. 24Pɨchá, akꞌɨ́tɨ jã ipanaarã. Ãchia netꞌatau uudakꞌaa, ewadakꞌaa mãikꞌaapa ɨa bɨdakꞌaa chi netꞌatau ɨapatamãi. Mamĩda Tachi Akꞌõrepa ne–inaa teepari kꞌodamerã. ¡Iru–itꞌee parã pipɨara pꞌanɨ ipanaarã kꞌãyaara! 25Eperã audú kꞌĩsia nɨ̃bɨpa hora aba pida waa chokꞌai ba–e pai. 26Ma ne–inaa ma–ãri pꞌoyaa oodakꞌaa pɨrã, ¿sãapꞌeda kꞌĩsia jõnɨma awaraa ne–inaa pꞌoyaa ooda–e pꞌanadakꞌãri?

27ʼAkꞌɨ́tɨ sãga nepꞌono waripata. Mimiadakꞌaa mãikꞌaapa pꞌaru kꞌadakꞌaa mãgá pi–ia pꞌanadaitꞌee. Mamĩda mɨa jara bɨ: Rey Salomonpa pꞌaratꞌara, netꞌaa pia iru bapachi mĩda, iru pꞌaru piara jɨ̃ bakꞌãri, eperãarãpa iru pi–iara unuda–e paji nãgɨ́ nepꞌono kꞌãyaara. 28Tachi Akꞌõrepa na pꞌũajara pia tꞌonopipari. Idi wari wã. Mamĩda nu uratɨdaikꞌãri, tꞌɨpɨtaude paa jõdariitꞌee. Tachi Akꞌõrepa mãgá pia akꞌɨ bɨ pɨrã nepꞌono pꞌũajara tꞌãide nɨ̃bɨ, audupɨara parã akꞌɨ bapariitꞌee, atꞌãri irude makꞌɨara ijãada–e pꞌanɨ mĩda. 29Tachi Akꞌõrepa mãgá ichia ooda pia akꞌɨ bapari perã, kꞌĩsia jõnanáatɨ jɨrɨdaitꞌee ne–inaa kꞌodaitꞌee maa–e pɨrã ne–inaa todaitꞌee. 30Mãga kꞌĩsiapata na pꞌekꞌau eujãdepema ijãadakꞌaa beerãpa. Mamĩda parã́pata ɨtꞌaripema Akꞌõre Waibɨa iru pꞌanɨ. Irua kꞌawa bɨ ne–inaa parãpa falta pꞌanɨ. 31Maperãpɨ jɨrɨ́tɨ pꞌanapataadaitꞌee iru jua ekꞌari. Mãga ooruta pɨrã, ma ne–inaa jõma iru pꞌanadaitꞌee.

Ɨtꞌaripema ne–inaa pia

(Mateo 6.19-21)

32—Kꞌõpꞌãyoorã, parã mɨchi ovejaarãkꞌa pꞌanɨ. Mapa waaweenáatɨ. Parã chokꞌara–ee pꞌanɨ. Mamĩda Tachi Akꞌõrepa parã kꞌinia iru bɨ. Mapa parã bɨji ichi jua ekꞌari, ichideerã pꞌaneedamerã. 33Maperã parãpa netꞌaa iru pꞌanɨ netokꞌóotɨ mãikꞌaapa chupɨria beerãmaa téetɨ. Na pꞌekꞌau eujãdepema muchila atadai kꞌãyaara, óotɨ Tachi Akꞌõrepa kꞌinia bɨkꞌa. Mãgá atadai ɨtꞌaripema ne–inaa, sore pakꞌaa. Ma ne–inaa pi–ia bɨmãi nechɨapataarã pꞌoyaa tꞌĩudakꞌaa mãikꞌaapa polillapa pꞌoyaa ãridakꞌaa. 34Na pꞌekꞌau eujãdepema ne–inaa pia audú ata kꞌinia bakꞌãri, pɨ tꞌãri araa baitꞌee ma ne–inaa ome. Jõdee ɨtꞌaripema ne–inaa pia audú ata kꞌinia bakꞌãri, pɨ tꞌãri araa baitꞌee mãgɨ́ ne–inaa ome.

Jesupa jarateeda ijãapataarã poro waibɨa waya cheitꞌee ewatede

35—Mɨ parã poro waibɨa perã, mɨ waya cheitꞌee nɨdaipia bɨ, mimiapataarãpa pꞌaru jɨ̃dapꞌeda lámpara kꞌoopatakꞌa ãchi chipari cheru misa. 36Mimiapataarãpa nɨpatakꞌa chipari teedaa cheru misa miakꞌãipata fiesta oopꞌeda, puerta ewadaitꞌee iru tꞌɨ̃kꞌãri, mãga pɨkꞌa parã nɨdaipia bɨ parã poro waibɨa cheitꞌee ewate. 37Ma mimiapataarã chiparipa ãra pia akꞌɨpariitꞌee, chokꞌai pꞌanaruta pɨrã iru pachekꞌãri. Mɨa jara bɨ: Irua ãra mãgá unukꞌãri, jaraitꞌee su–akꞌɨ pꞌaneedamerã mesade, ichia ãchimaa chikꞌo teeru misa. 38Ichia ma mimiapataarã pia akꞌɨpariitꞌee mãgá chokꞌai pꞌanadakꞌãri, ichi esapɨte maa–e pɨrã ɨ̃datɨpodopa cheru pɨjida. 39Mamĩda nãga kꞌawáatɨ parãpa. Te chiparipa kꞌawa bada paara nechɨapari cheitꞌee hora ichi netꞌaa chɨa ataitꞌee, chokꞌai bakꞌaji ma nechɨapari ichi tede tꞌĩupiamaapa. 40Mãgá parã jida chokꞌai pɨkꞌa pꞌanadaipia bɨ, atu pꞌanɨde mɨ, chi Eperã Akꞌõre Truadepema, cheitꞌee perã.

Mimiapari pia mimiapari kꞌachia ome

(Mateo 24.45-51; Marcos 13.34-37)

41Pedropa Jesumaa iidiji:

—Tachi Waibɨa, ¿ma pedee nepɨrɨjikꞌã aji, tai–itꞌee aupai, wa jõmaarã–itꞌee?

42Jesupa nãga nepɨrɨji: ¿Sãgá baparima aji, mimiapataarã poro waibɨa pia? Mãgɨpa kꞌĩsia kꞌawaa oopari chiparipa oopi bɨkꞌa. Pia akꞌɨpari chipari netꞌaa atabëida ichi juade mãikꞌaapa chiparimaa nekꞌopipꞌeda, mimiapataarãmaa chikꞌo tawapari. 43O–ĩa bapari chipari pachekꞌãri, ichi mimiamaa unu chepari perã. 44Mɨa wãarata jararu. Chiparipa mãga unu chekꞌãri, jõma ichia netꞌaa iru bɨ bɨitꞌee ma mimiapari jua ekꞌari akꞌɨ bamerã. 45Mamĩda ma mimiapari tꞌãri kꞌachia bɨ pɨrã, nãga kꞌĩsiai: “Taarãitꞌee mɨ chipari.” Mapa apemaarã mimiapataarã wɨmaa beei mãikꞌaapa tomaa beei, nekꞌomaa beei toyaa beerã ome. 46Mamĩda ma mimiapari kꞌachia atu bɨde, chi te chipari pacheitꞌee. Mãpai irua ooda kꞌawaa atakꞌãri, iru miapiitꞌee mãikꞌaapa ãyaa pëitꞌaaitꞌee awaraa ijãadakꞌaa beerã chupɨria chitoonɨmaa.

47ʼMimiaparipa kꞌawaakꞌãri chiparipa oopi bɨ, mamĩda chipari nɨ–e mãikꞌaapa oo–e irua kꞌinia bɨkꞌa, chiparipa ma mimiapari wɨma chokꞌara wɨpiitꞌee. 48Mamĩda mimiaparipa mãgee ne–inaa kꞌachia ooru pɨrã kꞌawa–eeta, makꞌɨara wɨpi–e paitꞌee. Tachi Akꞌõrepa eperãmaa kꞌĩsia kꞌawaapikꞌãri ne–inaa oo kꞌawaamerã, kꞌinia bɨ ma eperãpa mãga oomerã, ma ne–inaa chaaree bɨ mĩda. Ma awara eperãarã bɨkꞌãri ma eperã jua ekꞌari, kꞌinia bɨ irua ãra pia akꞌɨ bapariimerã, chaaree bɨ mĩda.

Jesús kꞌaurepa tachi ëreerã ome tꞌãri aukꞌa pꞌanada–e paitꞌee

(Mateo 10.34-36)

49—Mɨ cheji na pꞌekꞌau eujãdee tꞌɨpɨtaukꞌa kꞌoode, aɨde ijãadakꞌaa beerã miapiitꞌee. ¡Mãga oo aupada paara, mɨ o–ĩa bakꞌaji! 50Mamĩda aɨ naaweda mɨmaa ne–inaa kꞌachia pꞌasaitꞌee. Chupɨria nɨ̃baitꞌee mãga parumaa. 51¿Parãpa kꞌĩsia pꞌanɨkꞌã mɨ cheji eperãarã kꞌãiwee pꞌanapide? Mãga–e. Kꞌĩsia awara–awaraa papideta cheji. 52Idideepa te pidaarã joisomaadepema õpeerãpa mɨde ijãadaitꞌee; jõdee omeerãpa ijãada–e paitꞌee. Maa–e pɨrã omeerãpa ijãadaitꞌee; jõdee õpeerãpa ijãada–e paitꞌee. Mɨ kꞌaurepa tꞌãri aukꞌa pꞌanada–e paitꞌee. 53Akꞌõre tꞌãri aukꞌa ba–e paitꞌee chi warra ome maa–e pɨrã chi warra tꞌãri aukꞌa ba–e paitꞌee chi akꞌõre ome. Nawe tꞌãri aukꞌa ba–e paitꞌee chi kꞌau ome maa–e pɨrã chi kꞌau tꞌãri aukꞌa ba–e paitꞌee chi nawe ome. Pꞌãkꞌõre tꞌãri aukꞌa ba–e paitꞌee chi ãigu ome maa–e pɨrã chi ãigu tꞌãri aukꞌa ba–e paitꞌee chi pꞌãkꞌõre ome.

Ewari kꞌawa pꞌanɨɨrã

(Mateo 16.1-4; Marcos 8.11-13)

54Jesupa ichiaba mãgaji eperãarã arii pꞌanadapꞌedaarãmaa:

—Parãpa unudakꞌãri jɨ̃arara uchiaruta akꞌõrejĩru baaipari eere, jarapata kꞌoi cheitꞌee. Mãga pꞌasapari parãpa jarapatakꞌa. 55Ichiaba nãu pꞌuakꞌãri sur eereepa, jarapata wãsia nɨ̃baitꞌee. Mãga pꞌasapari. 56¡Kꞌĩsia atua pꞌanɨɨrã! Parãpa mãgá pajã mãikꞌaapa eujã akꞌɨ pꞌanɨpa eu kꞌachia wa eu pia kꞌawa pꞌanɨ pɨrã, ¿sãapꞌeda ne–inaa mɨa oomaa bɨ kꞌawada–e pꞌanɨma? aji.

Tꞌãri aukꞌa pꞌanapataadaipia bɨ

(Mateo 5.25-26)

57ʼMɨa oo bɨ mãikꞌaapa jaratee bɨ akꞌɨ́tɨ kꞌawaadaitꞌee Tachi Akꞌõrepa oopi bɨ wa mãga–e. Mãpai parã tꞌãri aukꞌa bɨ́tɨ iru ome. 58Eperã nepɨra iru bɨ pɨrã pɨ ome mãikꞌaapa pɨ charramaa atee kꞌinia bɨ pɨrã, wãi naaweda tꞌãri pia pedeeipia bɨ iru ome tꞌãri aukꞌa bɨdaitꞌee. Maa–e pɨrã charra kꞌĩrapite panadakꞌãri, mãgɨpa pɨ ata bɨi jɨ̃apataarã juade carcelde tꞌɨ nɨ̃bɨnadamerã. 59Mɨa wãarata jararu. Mamãikꞌaapa uchia–e pai pꞌaratꞌa jõmaweda pꞌaa–emaa.

Currently Selected:

Lucas 12: sjaB

Highlight

Copy