Lucas 11

Jesupa jarateeda ɨtꞌaa tꞌɨ̃ kꞌawaadamerã

(Mateo 6.9-15; 7.7-11)

1Ewari aba Jesús ɨtꞌaa tꞌɨ̃ aupakꞌãri, kꞌõpꞌãyo abaapa mãgaji:

—Tachi Waibɨa, jaratéeji taipa ɨtꞌaa tꞌɨ̃ kꞌawaadamerã, Juan Bautistapa chi kꞌõpꞌãyoorãmaa jarateedakꞌa.

2Mãpai Jesupa mãgaji:

—Parã ɨtꞌaa tꞌɨ̃dakꞌãri, nãga jarátɨ:

Tachi Akꞌõre ɨtꞌari bɨ,

pɨ tꞌɨ̃ awaraa tꞌɨ̃ kꞌãyaara pipɨara bɨ.

Eperãarã bɨ́ji pɨchi jua ekꞌari pɨchideerã pꞌaneedamerã.

[Óoji pɨchia kꞌinia bɨkꞌa na pꞌekꞌau eujãde, ɨtꞌari ooparikꞌa.]

3Tai–itꞌee chikꞌo téeji ewari chaa kꞌodaitꞌee.

4Taipa pꞌekꞌau kꞌachia oopata chupɨria kꞌawáaji mãikꞌaapa perdonáaji

taipa perdonaapatakꞌa, awaraarãpa taimaa ne–inaa kꞌachia oodakꞌãri.

Tai kꞌachiade baaipináaji.

Tai kꞌaripa atáji Netuara Poro Waibɨa juadeepa.

5Ichiaba Jesupa mãgaji:

—Kꞌĩsiadáma nãgɨde. Parãdepemapa kꞌõpꞌãyo iru bai. Esapɨte pɨ wãi iru temaa mãikꞌaapa jarai: “Kꞌõpꞌãyo, mɨ–itꞌee pan õpee téeji, 6kꞌõpꞌãyo aba etꞌewapai tꞌɨmɨɨpa pacheda perã mɨ temãi. Maarepida wẽe bɨ teeitꞌee kꞌomerã.” 7Mãga pꞌasada paara, irua jara–e pai: “Mɨ ichiakꞌau bɨ́ji. Puerta jɨ̃a iru bɨ. Mɨ warrarã mɨ ome nama kꞌãi pꞌanɨpɨ. Mapa pꞌirabai–eda a–e pai, pɨmaa ne–inaa teede.” 8Mɨa jara bɨ: Mãgɨ́ kꞌõpꞌãyo pꞌirabai–e pɨrã ne–inaa teeitꞌee pɨ ichi kꞌõpꞌãyo perã, mãgara pꞌirabaiitꞌee waa iidi nɨ̃banaamerã. Teeitꞌee ne–inaa jõma pɨa falta bɨ. 9Maperã mɨa nãga jara bɨ. Iidipatáatɨ Tachi Akꞌõremaa. Irua teeitꞌeepɨ. Jɨrɨpatáatɨ. Irua kꞌawapiitꞌeepɨ. Eperãpa puerta tꞌaide tꞌɨ̃parikꞌa, Akꞌõremaa tꞌɨ̃patáatɨ. Irua parã kꞌaripaitꞌeepɨ. 10Chi iidi bɨmaa Tachi Akꞌõrepa teepari; chi jɨrɨ bɨmaa Tachi Akꞌõrepa kꞌawapipari mãikꞌaapa chi tꞌɨ̃ bɨmaa ewapari.

11ʼ¿Parãdepema akꞌõrepa taama teeikꞌã ichi warramaa, irua chikꞌo iidikꞌãri? 12Maa–e pɨrã, ¿tusõre teeikꞌã irumaa, ne–ɨmɨ iidikꞌãri? 13¡Mãga–epɨ! Parã, ne–inaa kꞌachia oopataarã mĩda, pãchi warrarãmaa netꞌaa pia tee kꞌawa pꞌanɨ. Parãpa mãga ooruta pɨrã, ¡audupɨara pãchi ɨtꞌaripema Akꞌõre Waibɨa ichi Jaure teeitꞌee chi iidirutaarãmaa!

Jesús Netuara Poro Waibɨa jua ekꞌari bɨda adapꞌedaa

(Mateo 12.22-30; Marcos 3.20-27)

14Ewari aba Jesupa netuara uchiapimaa baji eperã pedee atua bɨ kꞌapꞌɨadeepa. Ma netuara uchiakꞌãri, ma eperã pedee beeji. Mãga unudakꞌãri, arii pꞌanadapꞌedaarã akꞌɨtrua para beeji. 15Mamĩda ũkꞌuruurãpa mãgajida:

—Beelzebú, Netuara Poro Waibɨa juapata jãgá netuaraarã uchiapiparida ajida.

16Mãpai awaraarãpa Jesús ɨmɨatee kꞌinia pꞌanadapꞌedaa perã, iidijida ne–inaa oomerã Tachi Akꞌõrepapai oopari. Mãga ooru pɨrã, kꞌawadayada ajida, Tachi Akꞌõre juapa ooda. 17Mamĩda Jesupa kꞌawaji ãchia kꞌĩsia pꞌanɨ. Mapa mãgaji:

—Pꞌuuru pidaarãpa ãchi aukꞌaarã jëreruta pɨrã, waa araa pꞌanapataada–e pai. Ãchi itu jõdaridaitꞌee mãikꞌaapa ãchi te ãri baibeeitꞌee. 18Mãga pɨkꞌa Netuara Poro Waibɨapa ichi aukꞌaarã jëreru pɨrã, ãchi itu jõdaridai. Parãpa jara pꞌanɨkꞌa mɨ Beelzebú eere bada paara, ichideerã jëre–e pakꞌaji. 19Ma awara mãga pada paara ¿kꞌai juapa parã eere pꞌanɨɨrãpa netuaraarã uchiapipatama? ¡Netuara juapa–epɨ! Ãchiata akꞌɨpipata parã pia kꞌĩsiada–e pꞌanɨ. 20Jõdee mɨa netuaraarã uchiapipari pɨrã Tachi Akꞌõre Waibɨa juapa, jara kꞌinia bɨ ɨ̃rá Tachi Akꞌõredeerã poro waibɨa nama bɨ.

21ʼEperã juataura bɨpa ichi te jɨ̃akꞌãri espada ome, kꞌĩsia bɨ apida tꞌĩuda–e pai ichi netꞌaa chɨade. 22Mamĩda eperã iru kꞌãyaara juataura bɨ cheru pɨrã mãikꞌaapa iru pꞌoyaaru pɨrã, iru espada jãri atai mãikꞌaapa iru netꞌaa pꞌe atadari. Mɨ waibɨara bɨ Netuara Poro Waibɨa kꞌãyaara. Mapa netuaraarã mɨ jua choodakꞌaa.

23ʼEperã mɨ eere bɨ–e pɨrã, mɨ kꞌĩra unuamaa iru bɨ. Ichiaba mɨ kꞌaripa–e bɨ pɨrã awaraarã Tachi Akꞌõre jua ekꞌari pꞌanapataadamerã, eperãarã ãyaa pëipari mɨ ikꞌaawaapa.

Netuara eperã kꞌapꞌɨade waya merãtɨa bada

(Mateo 12.43-45)

24—Eperã kꞌapꞌɨadeepa netuara uchiapidakꞌãri, mãgɨpa jɨrɨ nipapari eujã pꞌũasaa sãma ɨ̃iitꞌee. Mamĩda unu–e pakꞌãri, kꞌĩsiapari: “Waya merãtɨanaitꞌee ma eperã kꞌapꞌɨade, mɨ naaweda badamãi.” 25Chekꞌãri, unu chepari ma eperã kꞌapꞌɨa pi–ia bɨ; te barrepꞌeda, sɨɨpꞌeda pi–ia bɨkꞌa. 26Mãga unukꞌãri, jɨrɨnapari awaraa netuara siete kꞌachiara ichi kꞌãyaara mãikꞌaapa ma eperã kꞌapꞌɨade merãtɨa chepata. Mãgá ma eperã audupɨara kꞌachiade beeitꞌee naaweda bada kꞌãyaara.

Wãara tꞌãri o–ĩa pꞌanɨɨrã

27Jesupa mãgá pedeemaa bɨde arii pꞌanadapꞌedaarãdepema wẽrapa mãgaji:

—¡Tꞌãri o–ĩa bapari pɨ nawe, chi pɨ tꞌoda mãikꞌaapa warida!

28Jesupa pꞌanauji:

—¡Ma kꞌãyaara tꞌãri o–ĩara bapari chi Tachi Akꞌõre pedee ũripꞌeda, ooparipa ma jara bɨkꞌa!

Ne–inaa eperãarãpa pꞌoyaa oodakꞌaa unu kꞌinia pꞌanadapꞌedaa

(Mateo 12.38-42; Marcos 8.12)

29Mãgá pedee bɨde eperãarã cho–kꞌara chepachida iru ikꞌaawa seedarutamaa. Mãpai ichia jaramaa beeji ãramaa:

—Parã ɨ̃rapemaarã tꞌãri kꞌachia–idaa pꞌanɨda aji. Iidipata mɨa oomerã ne–inaa eperãarãpa pꞌoyaa oodakꞌaa ãchi juadoopa. Mamĩda Tachi Akꞌõrepa ooitꞌee chonaarãweda Jonás ome oodakꞌa. 30Tachi Akꞌõrepa Jonás pëidakꞌa Nínive pꞌuurudepemaarãmaa ichi pedee jaramerã, mãga pɨkꞌa mɨ, chi Eperã Akꞌõre Truadepema pëiji ichi pedee jaramerã parã ɨ̃rapemaarãmaa. 31Tachi Akꞌõre ewari waibɨa ewate irua parã ɨ̃rapemaarãpa oopatapꞌedaa akꞌɨkꞌãri jaraitꞌee pia wa kꞌachia, Reina Sur Eerepemapa parã ɨmɨateeitꞌee Tachi Akꞌõrepa kꞌachiadee pëimerã. Chonaarãweda ma reina tꞌɨmɨɨpa cheji Rey Salomón kꞌĩsia kꞌawaa bɨ pedee ũride. Mamĩda nama bɨ aba waibɨara bɨ Salomón kꞌãyaara. 32Ma ewate ichiaba Nínive pꞌuuru pidaarãpa parã ɨ̃rapemaarã ɨmɨateedaitꞌee, Tachi Akꞌõrepa parã kꞌachiadee pëimerã. Chonaarãweda Tachi Akꞌõrepa Jonás pëikꞌãri Nínive pidaarãmaa, ãrapa pꞌekꞌau kꞌachia oopatapꞌedaa oo amaa wãjida. Mamĩda parã ɨ̃rapemaarãpa pꞌekꞌau kꞌachia oopata oo amaada–e, aba Jonás kꞌãyaara waibɨara bɨpa jara cheji mĩda mãga oodamerã.

Jesupa tachi taude jarateeda

(Mateo 5.15; 6.22-23)

33—Lámpara kꞌoodakꞌaa mera bɨdaitꞌee ne–inaa ekꞌari. Ma kꞌãyaara kꞌoodakꞌãri, ne–inaa ɨ̃rɨ ɨtꞌɨ́ ata bɨpata, jõma te jãde pꞌanɨɨrãpa ɨ̃daa unudamerã. 34Tachi tau lamparakꞌa ɨ̃daa pɨkꞌa bɨ tachi kꞌapꞌɨa–itꞌee. Pɨchi tau pia bakꞌãri, kꞌapꞌɨa jõmaweda ɨ̃daa pɨkꞌa bɨde baitꞌee. Mamĩda pɨchi tau kꞌachia bɨ pɨrã, kꞌapꞌɨa jõmaweda pꞌãriu pɨkꞌa bɨde baitꞌee. 35Kꞌĩrakꞌaupai pɨ ɨ̃daa pɨkꞌa bɨ pꞌãriu pɨkꞌa padarii. Pia jaraitꞌeera, kꞌĩrakꞌaupai kꞌĩsiai pɨa Tachi Akꞌõre wãara kꞌawa bɨ, mɨ ũraade ijãa–e bɨ mĩda. 36Mɨ ũraade ijãa bɨ kꞌaurepa pɨ kꞌapꞌɨa jõmaweda ɨ̃daa pɨkꞌa bɨde bɨ pɨrã, Tachi Akꞌõre wãara kꞌawaitꞌee, lámpara uruade ne–inaa pia unupatakꞌa.

Jesupa jarada fariseorãmaa mãikꞌaapa Moisepa pꞌãda jarateepataarãmaa

(Mateo 23.1-36; Marcos 12.38-40; Lucas 20.45-47)

37Jesús pedee aupakꞌãri, fariseo abaapa jaraji ichi ome wãmerã ichi temaa nekꞌode. Ma tede tꞌĩupꞌeda, Jesús mesade su–akꞌɨ beeji. 38Ma fariseo pꞌera pɨkꞌa baji Jesupa ichi jua sɨɨ–e pada perã nekꞌoi naaweda, fariseorãpa oopatakꞌa. 39Mamĩda Jesupa mãgaji:

—Parã fariseorãpa vaso mãikꞌaapa pꞌaratꞌu taawaikꞌa eere pi–ia sɨɨpatada aji. Mamĩda mãgɨ́ edajãde ipuru bɨ ne–inaa kꞌachiapa, parã tꞌãri kꞌachia pꞌanadairã. Chĩara netꞌaa chɨapata mãikꞌaapa chĩara kꞌũrapata. 40¡Parã kꞌĩsia kꞌawada–ee pꞌanɨ! ¿Kꞌawada–e pꞌanɨkꞌã chi parã kꞌapꞌɨa oodapa parã tꞌãri ichiaba ooda? 41Eperãarã chupɨria kꞌawáatɨ mãikꞌaapa tꞌãripa ãchimaa ne–inaa téetɨ. Mãpaipɨ Tachi Akꞌõrepa parã pia akꞌɨpariitꞌee.

42ʼ¡Aai, Tachi Akꞌõrepa parã fariseorã kꞌachiadee pëiitꞌee! Tachi Akꞌõre–itꞌee nãgee aliño awara bɨpata: menta, ruda, awaraa ne–inaa kꞌarra ome; mãgɨ́ diezdepema chaa, aba. Mamĩda parã–itꞌee pꞌua–e bɨ ne–inaa oodaitꞌee Akꞌõrepa oopi bɨkꞌa, iru kꞌinia iru pꞌanadairã. Mãgata oodaipia bɨ parãpa ne–inaa oopata ome.

43ʼ¡Aai, Tachi Akꞌõrepa parã fariseorã kꞌachiadee pëiitꞌee! Tachi Akꞌõre Ũraa jarateepata tede pꞌanadakꞌãri, su–akꞌɨ beepari pipɨara bɨde su–akꞌɨ pꞌaneepata, kꞌinia pꞌanapata perã eperãarãpa parã akꞌɨdamerã ãchi waibɨarãkꞌa. Ma awara calle jãde nipadakꞌãri, kꞌinia pꞌanapata jõmaarãpa parãmaa saludaadamerã, ãchi poro waibɨarã ome oopatakꞌa.

44ʼ¡Aai, Tachi Akꞌõrepa parã kꞌachiadee pëiitꞌee! Eperãarã pariatua jãɨra ɨ̃rɨ tꞌɨapata, kꞌawada–ee aɨde eperã piuda bɨ. Parã ma jãɨrákꞌata pꞌanɨ, pãchi tꞌãride kꞌĩsia kꞌachia iru pꞌanadairã.

45Mãpai Moisepa pꞌãda jarateeparipa mãgaji:

—Tachi Jarateepari, pɨa ma pedee jarakꞌãri, ichiaba taimaa ikꞌachia jara bɨda aji.

46Mamĩda Jesupa mãgaji:

—¡Aai, Tachi Akꞌõrepa parã Moisepa pꞌãda jarateepataarã ichiaba kꞌachiadee pëiitꞌee! Eperãarãmaa audú ne–inaa chokꞌara oopipata tachi chonaarãpa chonaarãweda oopatapꞌedaakꞌa. Mamĩda ãrapa ma jõma pꞌoyaa ooda–e pakꞌãri parãpa jarapatakꞌa, maarepida kꞌaripada–e.

47ʼ¡Aai, Tachi Akꞌõrepa parã kꞌachiadee pëiitꞌee! Pi–ia oopata chonaarãwedapema Akꞌõre pedee jarapataarã ɨadapꞌedaamãi, eperãarãpa ãra kꞌirãpadamerã. ¡Mamĩda parã chonaarã́pata ãra peekꞌoojida! 48Parãpa mãga oodakꞌãri, akꞌɨpipata aukꞌa ookꞌajida pãchi chonaarãpa oodapꞌedaakꞌa, parã ɨ̃rapemaarãpa aukꞌa ũridaamaa pꞌanapata perã Akꞌõre pedee jarapataarãpa jara pꞌanɨ. Ãchia ma Akꞌõre pedee jarapataarã peekꞌoojida mãikꞌaapa parãpa mãgɨɨrã ɨadapꞌedaamãi pi–ia oopata.

49ʼMapa Tachi Akꞌõrepa na kꞌĩsia kꞌawaa pedee jaraji: “Mɨ pedee jarapataarã pëiitꞌeeda aji, mɨ ũraa jarateepataarã ome. Mamĩda ũkꞌuru peedaitꞌee; jõdee awaraarã jɨrɨdaitꞌee miapidaitꞌee.” 50Parã chonaarãpa mãga oopachida. Akꞌõre pedee jarapataarã peepachida. Maperã ɨ̃rá Tachi Akꞌõrepa parã kꞌachia ooitꞌee. 51Na eujã oodakꞌãriipa iru pedee jarapataarã peepata; Abeldeepa Zacarías parumaa. Ma Zacarías peejida Tachi Akꞌõre tede, te tꞌĩupata altarmãi esajĩakꞌa. Maperãpɨ mɨa jara bɨ: Tachi Akꞌõrepa ɨ̃rapemaarã kꞌachia ooitꞌee ma oopatapꞌedaa pari.

52ʼ¡Aai, Tachi Akꞌõrepa parã Moisepa pꞌãda jarateepataarã kꞌachiadee pëiitꞌee! Eperãarãpa llave iru pꞌanapatakꞌa puerta ewadaitꞌee, mãga pɨkꞌa parãpa Tachi Akꞌõre Ũraa iru pꞌanapata. Mamĩda ma ũraade jara bɨ awaraarãmaa kꞌawapidaamaa pꞌanɨ. Kꞌiniadakꞌaa awaraarãpa ma pedee ũridamerã mãikꞌaapa oodamerã irua jara bɨkꞌa.

53-54Jesupa ma jõma jarapꞌeda, ma Moisepa pꞌãda jarateepataarã mãikꞌaapa fariseorã kꞌĩraudachida. Iidida chokꞌara iidi pꞌaneejida iru kꞌachiade baaipidai jĩakꞌaapa irua pꞌanauda kꞌaurepa. Mamĩda pꞌoyaa ɨmɨateeda–e paji.

Currently Selected:

Lucas 11: sjaB

Highlight

Copy