Lucas 15

Oveja atua badade nepɨrɨda

(Mateo 18.10-14)

1Ma tꞌẽepai Cesar–itꞌee impuesto pꞌepataarã mãikꞌaapa awaraa kꞌachia oopataarãda apatapꞌedaa kꞌaitꞌa chejida Jesús pedee ũride. 2Mapa fariseorã Moisepa pꞌãda jarateepataarã ome iru ãpɨte ikꞌachia pedeejida:

—Jãgɨpa pꞌekꞌau kꞌachia oopataarã auteebaipari mãikꞌaapa nekꞌopari ãra ome.

3Mãpai Jesupa nãga nepɨrɨji jarateeitꞌee:

4—Parãdepema abaapa cien oveja iru bɨ pɨrã mãikꞌaapa madepema aba atuadaru pɨrã, ¿atabëi–e paikꞌã aji, chi apemaarã noventa y nueve ãchi pꞌanapatamãi chi atuadaida jɨrɨnaitꞌee unu atarumaa? 5Unu atakꞌãri, o–ĩapa pɨ ikꞌia ɨ̃rɨ jira atapꞌeda, 6aneeitꞌee mãikꞌaapa pachekꞌãri teeda, pɨchi kꞌõpꞌãyoorã tꞌɨ̃ pꞌe ataitꞌee. Mãpai mãgaitꞌee: “O–ĩa pꞌanadáma mɨ oveja atua bada unu atada perã.” 7Mɨa jara bɨ: Akꞌõre truade mãgá ichiaba audú o–ĩadaipata pꞌekꞌau kꞌachia ooparipa ichia pꞌekꞌau kꞌachia oopata oo amaakꞌãri mãikꞌaapa Tachi Akꞌõrede ijãa beekꞌãri. O–ĩara pꞌanapata ma kꞌapꞌɨa, o–ĩa pꞌanadai kꞌãyaara noventa y nueve tꞌãri pia beerã kꞌapꞌɨa.

Pꞌaratꞌa tau atua badade nepɨrɨda

8—Wẽrapa pꞌaratꞌa tau diez iru bɨpa madepema aba atuadaru pɨrã, ¿lámpara kꞌoo atapꞌeda, piakꞌãa te jã barremaa bee–e paikꞌã unu atarumaa? 9Unu atakꞌãri, chi kꞌõpꞌãyoorã tꞌɨ̃ pꞌe ataitꞌee mãikꞌaapa mãgaitꞌee: “O–ĩa pꞌanadáma mɨa unu atada perã pꞌaratꞌa tau atuadaida.” 10Mɨa jara bɨ: Angeleerãpa ichiaba mãgá o–ĩadaipata pꞌekꞌau kꞌachia ooparipa ichia pꞌekꞌau kꞌachia oopata oo amaakꞌãri mãikꞌaapa Tachi Akꞌõrede ijãa beekꞌãri.

Eperãpa chi warrapa kꞌachia ooda perdonaada

11Jesupa ichiaba nãga nepɨrɨji jarateeitꞌee:

—Eperãpa warrarã omé iru baji. 12Ewari aba chi kꞌũtrãara badapa mãgaji chi akꞌõremaa: “Akꞌõre, teepáde aji, mɨ eerepema netꞌaa pɨ piukꞌãri atabëiitꞌee bɨdepema.” Mãga ooji chi akꞌõrepa. Ma kꞌũtrãa eerepema netꞌaa teeji irumaa. 13Maapꞌeda ma warra tꞌẽepemapa ichi eerepema netꞌaa pꞌe atapꞌeda, netokꞌooji mãikꞌaapa ma pꞌaratꞌapa tꞌɨmɨ́ wãji awaraa todee. Mama pꞌaratꞌa pariatua gasta wãpachi mãikꞌaapa jõtꞌaaji ichia oo kꞌiniata oo bɨpa. 14Ma awara pꞌaratꞌa jõma jõdaikꞌãri, atꞌapai jarra oojida ma eujãde. Maperã jarra choomaa beeji. 15Mapa wãji mimia jɨrɨde ma eujãdepema eperãmaa. Ma eperãpa pëiji sinaarã jɨ̃ade. 16Audú jarrapa bi jãwaa kꞌinia bapachi sinaarã chikꞌopa. Mamĩda apidaapa nekꞌopidakꞌaa paji. 17Mãpai kꞌĩsia beeji: “Mɨ akꞌõre tede mimiapataarã chokꞌaraarãpa nekꞌodaitꞌee iru pꞌanɨda aji. ¡Jõdee mɨ nama jarrapa piu wã! 18Mɨ akꞌõremaa wãitꞌeeda aji. Panakꞌãri, nãga jaraitꞌeeda aji: Akꞌõre, mɨa pꞌekꞌau kꞌachiata ooji Tachi Akꞌõre kꞌĩrapite mãikꞌaapa pɨ ãpɨte. 19Waa pɨchi warrakꞌa mɨ iru banáaji. Jĩpꞌa pɨchi mimiaparikꞌa iru báji anaitꞌee.” 20Maapꞌeda cheji chi akꞌõre temaa.

ʼAtꞌãri tꞌɨmɨ́ cheru weda, chi akꞌõrepa unu ataji mãikꞌaapa chupɨria kꞌawaaji. Pꞌiraji chi warramaa mãikꞌaapa wëre atapꞌeda, kꞌĩra ɨ̃tꞌaaji. 21Mãpai chi warrapa mãgaji: “Akꞌõre, mɨa pꞌekꞌau kꞌachiata oojida aji, Tachi Akꞌõre kꞌĩrapite mãikꞌaapa pɨ ãpɨte. Waa pɨchi warrakꞌa iru banáaji. Jĩpꞌa pɨchi mimiaparíkꞌata iru báji.” 22Mamĩda chi akꞌõre audú o–ĩa bada perã, mãgaji chi mimiapataarãmaa: “Pꞌaru pipɨara bɨta atanátɨ mãikꞌaapa jɨ̃ bɨ́tɨ. Ichiaba ichi juade sortija jɨ̃ bɨ́tɨ mãikꞌaapa ichi bɨɨrɨde chancla jɨ̃ bɨ́tɨ. 23Anéetɨ pꞌakꞌa poreera bɨta mãikꞌaapa peetꞌáatɨ. ¡Kꞌodaitꞌee mãikꞌaapa pëiradaitꞌee! 24¡Mɨ warra piu pɨkꞌa bada waya chokꞌai bɨ! ¡Chi atua pɨkꞌa bada unu atajidapɨ!” Mãpai fiesta oojida.

25ʼMãɨmisa chi warra naapema ne–uu kꞌãide baji. Teedaa chekꞌãri, ũri cheji o–ĩa pëira para bɨ. 26Mapa mimiapari aba tꞌɨ̃ ataji mãikꞌaapa iidiji: “¿Sãga jõnɨma?” aji. 27Mãpai ma mimiaparipa mãgaji: “Pɨ ɨ̃pema pachejida aji. Pɨ akꞌõrepa pꞌakꞌa poreera bɨta peepiji, iru kꞌapꞌɨa kꞌayaa wẽe pacheda perã.” 28Mãga ũrikꞌãri, chi ɨ̃pema ne–uu kꞌãideepa cheda kꞌĩraudachi mãikꞌaapa teedaa tꞌĩuamaa beeji. Maperã chi akꞌõre taawaa uchiaji enenee pedeede tꞌĩumerã. 29Mamĩda chi warrapa mãgaji chi akꞌõremaa: “Pɨa kꞌawa bɨda aji, mɨ taarã mimiadoo. Ichita kꞌĩra jĩpꞌa oodoo pɨa jaradakꞌa. Mamĩda mɨmaa tee–e paji cabra chakꞌe pida, o–ĩa nekꞌomerã mɨchi kꞌõpꞌãyoorã ome. 30Jõdee pɨ warra pacheda–itꞌeeta peepiji pꞌakꞌa poreera bɨ, jõma pɨchi pꞌaratꞌa teeda jõtꞌaaji mĩda prostitutaarã ome.”

31ʼMãpai chi akꞌõrepa pꞌanauji: “Warra, pɨ ichita mɨ ome bapari. Netꞌaa jõmaweda mɨa iru bɨ përé. 32Mamĩda ɨ̃rá o–ĩa pꞌanadaipia bɨ pɨ ɨ̃pema piu pɨkꞌa bada chokꞌai bairã; chi atua bada unu atadapꞌedaa perã.”

Currently Selected:

Lucas 15: sjaB

Highlight

Copy