Lucas 16

Mimiapataarã poro waibɨade nepɨrɨda

1Jesupa ichiaba nãga nepɨrɨji chi kꞌõpꞌãyoorãmaa jarateeitꞌee:

—Eperã pꞌaratꞌara bɨ bapachi. Ichia iru baji mimiapataarã poro waibɨa ichi jua ekꞌari. Ewari aba mãgɨ́ ɨmɨateejida irua netꞌaa pariatua atuapi bada perã. 2Mapa chi mimia chiparipa tꞌɨ̃ atapꞌeda, mãgaji: “¿Wãarakꞌã aji, pɨ ãpɨte jara chedapꞌedaa? Ɨ̃raweda pꞌã téeji jõmaweda mɨ netꞌaa iru bɨ, pɨ waa mɨ mimiapataarã poro waibɨa pa–e paitꞌee perã.” 3Mãga ũrikꞌãri, ma mimiapataarã poro waibɨapa kꞌĩsiaji: “Ɨ̃rá ¿sãgapɨ ooitꞌeema mɨ mimia chiparipa mɨ mimia wẽe bɨkꞌãri? Juatau wẽe bɨ mimia chaaree ooitꞌee mãikꞌaapa kꞌĩra nejasia bɨ ne–iidipariitꞌee. 4Kꞌawa bɨda aji, sãga ooitꞌee eperãarãpa mɨ auteebaidamerã mimia wẽe beekꞌãri.” 5Mãpai tꞌɨ̃piji aba–abaa chedamerã chi paraa pꞌanadapꞌedaarã chi mimia chiparimaa. Chi naa chedamaa iidiji: “Pɨa ¿jõmasaa paraa bɨma aji, mɨchi poro waibɨamaa?” 6Pꞌanauji: “Aceite olivodee ooda ochocientos galones paraa bɨda” aji. Mãpai ma mimiapataarã poro waibɨapa mãgaji: “Acha bɨda aji, pɨa paraa bada pꞌãda. Nãgɨ́ jẽtꞌáaji mãikꞌaapa awaraata oo atapáde aji, cuatrocientos pari.” 7Maapꞌeda iidiji awaraamaa: “¿Pɨa jõmasaa paraa bɨma?” aji. Ma eperãpa pꞌanauji: “Trigo bulto cien paraa bɨda” aji. Mãpai mimiapataarã poro waibɨapa mãgaji: “Acha bɨda aji, pɨa paraa bada pꞌãda. Nãgɨ́ jẽtꞌaapꞌeda, awaraata oo atapáde aji, ochenta bulto pari.” 8Chi mimia chiparipa kꞌawaji ma mimiapataarã poro waibɨa kꞌachia bada ikꞌawaa bɨ. Mapa ɨtrɨa–e paji. Ichiaba mãga pɨkꞌa pꞌanɨ na pꞌekꞌau eujãdepema ijãadakꞌaa beerã. Ikꞌawaara pꞌanapata Tachi Akꞌõredeerã kꞌãyaara.

9ʼMaperã mɨa parãmaa ũraaitꞌee. Na pꞌekꞌau eujãdepema netꞌaa iru pꞌanɨ téetɨ kꞌõpꞌãyoorã atadaitꞌee mɨ–itꞌee. Mãga ooruta pɨrã, ma netꞌaa jõdaikꞌãri, Tachi Akꞌõrepa parã auteebaiitꞌee ichi truade.

Chisãgɨta tachi chipari; Tachi Akꞌõre wa pꞌaratꞌa

10—Chi tꞌãri jĩpꞌa bɨpa netꞌaa chokꞌara–ee iru bɨ pɨjida, awaraarãmaa teeru pɨrã, aukꞌa teepariitꞌee netꞌaa chokꞌara iru bakꞌãri. Jõdee chi kꞌũrayaa bɨpa teeamaa bɨ pɨrã netꞌaa chokꞌara–ee iru bɨdepema, aukꞌa teeamaa bapariitꞌee netꞌaara iru bakꞌãri. 11Mapa parã tꞌãri jĩpꞌa pꞌanada–e pɨrã na pꞌekꞌau eujãdepema netꞌaa, pꞌaratꞌa ome, ¿kꞌaipa ɨtꞌaripema netꞌaa parã jua ekꞌari bɨima? 12Ichiaba na pꞌekꞌau eujãde pꞌanɨde chĩara netꞌaa tꞌãri jĩpꞌa akꞌɨda–e pɨrã, ¿kꞌaipa parãmaa ɨtꞌaripema netꞌaa pia teeima?

13ʼEperã chipariirã omé jua ekꞌari mimia baikꞌaraa bɨ. Mãga bɨ pɨrã, chipari aba kꞌĩra unuamaa iru bai mãikꞌaapa chi apema kꞌinia iru bai, maa–e pɨrã abaapa jara bɨkꞌa ooi mãikꞌaapa chi apemapa jara bɨkꞌa ooamaa bai. Mãga pɨkꞌa apidaapa ooda–e pai Tachi Akꞌõrepa jara bɨkꞌa; pꞌaratꞌa, netꞌaa pia pꞌe bɨ misa.

Jesupa fariseorãmaa jarada

14Fariseorãpa ma ũraa ũridakꞌãri, Jesús oo iru pꞌaneejida, pꞌaratꞌa kꞌinia pꞌanadapꞌedaa perã. 15Mapa Jesupa mãgaji:

—Parã tꞌãri pia beerãkꞌa pꞌanapata eperãarã kꞌĩrapite. Mamĩda Tachi Akꞌõrepa kꞌawa bɨ kꞌĩsia kꞌachia parã tꞌãride iru pꞌanɨ. Ne–inaa parãpa audupɨara kꞌinia iru pꞌanɨ; ma ne–inaa Tachi Akꞌõrepa unuamaa iru bapari.

Jesupa jarada Moisepa pꞌãdade

16—Moisepa ũraa pꞌãdakꞌãriipa mãikꞌaapa Tachi Akꞌõre pedee jarapataarãpa ũraa pꞌãdakꞌãriipa Juan Bautistapa ũraa jarada parumaa, eperãarãpa jɨrɨpachida Tachi Akꞌõredeerã pꞌaneedaitꞌee ma ũraade jara bɨkꞌa oo pꞌanɨpa. Mamĩda ma ũraa jõru. Juan badakꞌãriipa mɨa pedee pia jarateepari, eperãarãpa kꞌawaadamerã mɨ kꞌaurepa Tachi Akꞌõrepa eperãarã bɨitꞌee ichi jua ekꞌari, ichideerã pꞌaneedamerã.

17ʼPajã mãikꞌaapa na pꞌekꞌau eujã jõdaridai, jõma Tachi Akꞌõrepa ũraa pꞌãpidade jara bɨkꞌa pꞌasai naaweda.

Jesupa jarateeda miakꞌãi pꞌanɨɨrã mia amaanaadamerã

(Mateo 19.1-12; Marcos 10.1-12)

18—Eperãpa ichi wẽra amaatꞌaaru pɨrã mãikꞌaapa miakꞌãiru pɨrã awaraa ome, pꞌekꞌau oomaa bɨ Tachi Akꞌõre kꞌĩrapite. Ichiaba eperã miakꞌãiru pɨrã wẽra amaatꞌaada ome, pꞌekꞌau oomaa bɨ Tachi Akꞌõre kꞌĩrapite.

Pꞌaratꞌara bada mãikꞌaapa Lázaro, chupɨria chada

19—Eperã pꞌaratꞌara bɨ bapachi. Mãgɨ́ pꞌaru pi–ia jɨ̃pachi mãikꞌaapa ewari chaa fiesta waibɨa oopachi. 20Ichiaba mama bapachi eperã chupɨria chɨ tꞌɨ̃jarapatapꞌedaa Lázaro. Mãgɨ́ kꞌapꞌɨa jõma aida–idaa baji. Eujãde su–akꞌɨ beepachi ma pꞌaratꞌara bɨ te tꞌĩupatamãi. 21Mãga oopachi ma pꞌaratꞌara bɨ mesadeepa chikꞌo baaida kꞌo kꞌinia bada perã. Mama bɨde usaarãpa iru aida senepachida. 22Ewari aba ma chupɨria chɨ jai–idaaji mãikꞌaapa angeleerãpa iru jaure ɨtꞌaa ateejida Abraham ome bade. Ichiaba ma pꞌaratꞌara bada piuji mãikꞌaapa ɨajida.

23ʼMa pꞌaratꞌara bada jaure chupɨria nɨ̃baji piudapꞌedaarãmãi. Mamãikꞌaapa ɨtꞌaa akꞌɨkꞌãri, tꞌɨmɨɨpa unuji Abraham Lázaro ome. 24Mãpai biaji: “Mɨchi chonaarã akꞌõchona Abraham, ¡mɨ chupɨria kꞌawáaji! Lázaro jua kꞌɨ̃ paniade beepíji mãikꞌaapa pë́iji mɨ kꞌĩrame kꞌurãtɨpide, na tꞌɨpɨtaude chupɨria nɨ̃bairã.” 25Mamĩda Abrahampa pꞌanauji: “Warra, kꞌirãpáji pɨ pia bapachi chokꞌai bakꞌãri; jõdee Lázaro chupɨria bapachi. Ɨ̃rá iru ɨ̃imaa bɨ nama; jõdee pɨ chupɨria nɨ̃bɨ. 26Ma awara tachi pꞌanɨ esajĩakꞌa waibɨa kꞌõotꞌari jira bɨ. Mapa chi nãikꞌaapa wã kꞌinia pꞌanɨɨrã pꞌoyaa wãda–e jãmaa. Ichiaba chi jãikꞌaapa che kꞌinia pꞌanɨɨrã pꞌoyaa cheda–e namaa.”

27ʼMãpai ma pꞌaratꞌara badapa mãgaji: “Mãgara akꞌõchona Abraham, mɨ chupɨria kꞌawáaji. Pë́iji Lázaro mɨchi akꞌõre temaa. 28Mama mɨchi ɨ̃pemaarã joisomaa pꞌanapata. Jara pë́iji chenaadamerã namaa, mɨ mia nɨ̃bɨmaa.” 29Mamĩda Abrahampa pꞌanauji: “Ãrapa iru pꞌanɨda aji, Moisepa pꞌãda mãikꞌaapa Tachi Akꞌõre pedee jarapataarãpa pꞌãdapꞌedaa. Mãgɨ́ ũraa ũridaipia bɨ mãikꞌaapa Akꞌõrede ijãadaipia bɨ.” 30Mamĩda ma pꞌaratꞌara badapa pꞌanauji: “Wãarada aji, akꞌõchona Abraham. Mamĩda piuda chokꞌai pꞌirabaipꞌeda, wãru pɨrã ãramaa, mãgara wãara ãchia pꞌekꞌau kꞌachia oopata oo amaadaitꞌee mãikꞌaapa Akꞌõrede ijãadaitꞌee.” 31Mamĩda Abrahampa mãgaji ma pꞌaratꞌara badamaa: “Moisepa pꞌãda mãikꞌaapa Akꞌõre pedee jarapataarãpa pꞌãdapꞌedaa ũri kꞌiniada–e pꞌanɨ pɨrã, ichiaba ijãada–e paitꞌee eperã piuda pꞌirabaipꞌeda, wãru pɨjida ãramaa jarade.”

Currently Selected:

Lucas 16: sjaB

Highlight

Copy