Lucas 4

Netuara Poro Waibɨapa Jesús kꞌachiade baaipiitꞌee pada

(Mateo 4.1-11; Marcos 1.12-13)

1Akꞌõre Jaure Jesús ome bapachi mãikꞌaapa irua Jesús wãpiji Jordán todeepa eujã pania wẽe bɨmaa. 2Mama baji kꞌãima cuarenta. Mãga nɨde Netuara Poro Waibɨapa ne–inaa kꞌachia oopi kꞌinia baji Jesumaa. Mama bɨde Jesús nekꞌo–ee bada perã, jarrapisia nɨ̃beeji. 3Mãpai Netuara Poro Waibɨapa mãgaji:

—Wãara pɨ Tachi Akꞌõre Warra pɨrã, na mãu pan papitꞌaapáde aji.

4Jesupa pꞌanauji:

—¡Oo–eda! aji. Tachi Akꞌõre Ũraa pꞌãdade jara bɨ:

‘Eperã chikꞌo kꞌo bɨpapai chokꞌai bakꞌaa. Tachi Akꞌõre pedee kꞌawa bɨpa ichita chokꞌai bapari.’ (Deuteronomio 8.3)

5Maapꞌeda Netuara Poro Waibɨapa iru ee ɨtꞌɨara bɨ nokꞌode ateeji. Jõmaweda na pꞌekꞌau eujãdepema pꞌuuru akꞌɨpiji mãikꞌaapa mãgaji:

6—Mɨa pɨ jã pꞌuurudepemaarã poro waibɨa papiyada aji. Ãchi netꞌaa pia jõmaweda përé papii. Mëré perã chi tee kꞌinia bɨmaa teei. 7Mɨ kꞌĩrapite bedabaipꞌeda, mɨmaa ɨtꞌaa tꞌɨ̃rura, jõmaweda përé payada aji.

8Jesupa pꞌanauji:

—¡Oo–eda! aji. Tachi Akꞌõre Ũraa pꞌãdade jara bɨ:

‘Tachi Akꞌõre Waibɨamaa aupai ɨtꞌaa tꞌɨ̃patáatɨ mãikꞌaapa jĩpꞌa oopatáatɨ irua jara bɨkꞌa.’ (Deuteronomio 6.13)

9Tꞌẽepai Netuara Poro Waibɨapa iru ateeji Jerusalén pꞌuurudee. Mama Tachi Akꞌõre te waibɨa ekꞌarra ɨ̃rɨ ɨtꞌɨ́ ateeji mãikꞌaapa mãgaji:

—Wãara pɨ Tachi Akꞌõre Warra pɨrã, namãikꞌaapa jɨ̃tɨdaipáde aji, 10Tachi Akꞌõre Ũraa pꞌãdade jara bairã:

‘Akꞌõrepa ichi angeleerã pëiitꞌee pɨ kꞌaripadamerã. 11Ãchia pɨ jita atadaitꞌee mãikꞌaapa pɨ tꞌɨdɨkꞌadaitꞌee, pɨchi bɨɨrɨ pida mãumaa pꞌu oopiamaapa.’ (Salmos 91.11-12)

12Jesupa pꞌanauji:

—¡Jɨ̃tɨ–eda! aji. Ichiaba Tachi Akꞌõre Ũraa pꞌãdade jara bɨ:

‘Ne–inaa pariatua oonáaji kꞌawaaitꞌee wãara Tachi Akꞌõre Waibɨapa tachi akꞌɨpari wa mãga–e.’ (Deuteronomio 6.16)

13Netuara Poro Waibɨapa pꞌoyaa–e pakꞌãri Jesús ome, atabëiji awaraa ewaride cheitꞌee.

Jesupa naapɨara jarateeda Galilea eujãde

(Mateo 4.12-17; Marcos 1.14-15)

14Jesús wãji Galilea eujãdee. Ne–inaa jõmaweda oopachi Akꞌõre Jaurepa oopi bɨkꞌa. Maperã iru tꞌopachida ma eujã jõmaade. 15Irua jarateepachi Akꞌõre Ũraa jarateepata tede pꞌuuru bee chaa. Maapai jõmaarãpa iru pia akꞌɨpachida.

Jesús Nazaret pꞌuurudee wãda

(Mateo 13.53-58; Marcos 6.1-6)

16Maapai Jesús wãji ichi warida pꞌuuru Nazaretdee. Ichia oopatakꞌa ɨ̃ipata ewate pakꞌãri, tꞌĩuji Akꞌõre Ũraa jarateepata tede. Ma ewate bainɨ̃ beeji Akꞌõre Ũraa pꞌãda leeitꞌee. 17Irumaa teejida Akꞌõre pedee jarapari Isaíapa pꞌãda. Ewatꞌɨ atapꞌeda unuji na pedee mãikꞌaapa leeji:

18—‘Tachi Akꞌõre Jaure mɨ ome bapari, Akꞌõrepa mɨ jɨrɨtꞌerada perã pedee pia jarateemerã chupɨria beerãmaa. Mɨ pëiji jaramerã carcelde pɨkꞌa beerã uchiapiitꞌee mãikꞌaapa tau pꞌãriu beerãmaa unupiitꞌee; ma awara chupɨria beerã kꞌaripaitꞌee mãikꞌaapa ichi eperãarã pia akꞌɨ bapariitꞌee. 19Mãga mɨmaa jarapiji irua eperãarã pia oo kꞌinia bairã na año irua jɨrɨtꞌeradade.’ (Isaías 61.1-2)

20Mãga pedeepꞌeda, Jesupa ma pꞌãda pɨratꞌɨ ataji mãikꞌaapa teeji Akꞌõre Ũraa jarateepata te akꞌɨparimaa. Mãpai su–akꞌɨ beeji jarateeitꞌee. Jõma arii pꞌanadapꞌedaarãpa irumaa akꞌɨ para beeji. 21Mãpai irua mãgaji:

—Idi weda parã tꞌãide pꞌasamaa bɨ ma ũraa pꞌãdade jara bɨkꞌa.

22Mãga ũridakꞌãri, arii pꞌanadapꞌedaarãpa iru tꞌo pꞌanajida mãikꞌaapa akꞌɨtrua para beeji, irua pedee pia jarapachi perã. Ãchi pitapai iidi para beeji:

—¿Sãga jarayama ajida, ma pꞌãdade jara bɨkꞌa idi pꞌasaru? ¿Na José warra–ekꞌã? ajida.

23Mãpai Jesupa mãgaji:

—¿Parãpa na pedee jarapata jara kꞌinia pꞌanɨ–ekꞌã? aji. Eperãpa mɨ medicoda akꞌãri, kꞌawa pꞌanɨ wãara pedee jara bɨ ichi kꞌayaadaipꞌeda, jɨpa beeru pɨrã ichi juadoopa. Mapa pɨ wãara Tachi Akꞌõrepa pëida pɨrã pɨa jara bɨkꞌa, mãgara nama pɨchi warida pꞌuurude ne–inaa pia óoji pɨa oodakꞌa Capernaum pꞌuurude.

24Mãpai Jesupa mãgaji:

—Mɨa wãarata jararu. Tachi Akꞌõre pedee jarapari pꞌuurudepemaarãpa iru pedee ũridaamaa pꞌanapata. Mapa parãpa mɨ pedee ijãa kꞌiniada–e pꞌanɨ. 25Ichiaba mãga paji chonaarãweda Tachi Akꞌõre pedee jarapari Elías ome. Kꞌoi che–e bɨde año õpee apꞌeda esa–aukꞌa, jarra oojida Israel eujã jõmaade. 26Mamĩda parã chonaarãpa Tachi Akꞌõrede ijãada–e pꞌanadapꞌedaa perã, irua Elías pëi–e paji Israel eujãdepema pꞌẽtrãarã kꞌaripade. Ma kꞌãyaara pëiji Sarepta pꞌuurudee, Sidón pꞌuuru kꞌaitꞌa, mãpema pꞌẽtrãa#4.26 Ma pꞌẽtrãa eujãdepemaarã mãikꞌaapa Naamán eujãdepemaarã Israel pidaarã–e paji. 1 Reyes 17.1, 8-16. kꞌaripamerã. 27Ichiaba Akꞌõre pedee jarapari Eliseo chokꞌai bakꞌãri, Israel eujãde leprapa kꞌayaa beerã chokꞌara paraaji. Mamĩda irua apida jɨpa–e paji. Aba Siria eujãdepema kꞌayaa bada tꞌɨ̃jarapatapꞌedaa Naamán#4.27 2 R 5.1-14. jɨpa beeji iru juapa.

28Mãga ũridakꞌãri, ma Akꞌõre Ũraa jarateepata tede pꞌanadapꞌedaarã jõmaweda kꞌĩraudachida Jesús ome. 29Jita atajida mãikꞌaapa jidi babataa atadachida pꞌuurudeepa. Ateejida ee nokꞌode ɨra bada eere mãikꞌaapa sĩa batꞌatꞌaanadaitꞌee paji piudaimerã. 30Mamĩda Jesús ãchi juadeepa uchiadaipꞌeda, wãyaaji ãchi esajĩakꞌa.

Netuara eperã kꞌapꞌɨade merãtɨa bada

(Marcos 1.21-28)

31Maapꞌeda Jesús wãji Capernaum pꞌuurudee. Mãgɨ́ pꞌuuru Galilea eujãde bɨ. Ɨ̃ipata ewate Tachi Akꞌõre Ũraa jarateemaa beeji Akꞌõre Ũraa jarateepata tede. 32Mãpemaarãpa iru pedee ũridakꞌãri, akꞌɨtrua para beeji irua jĩpꞌa jarateeda perã Tachi Akꞌõrepa jarateepidakꞌa.

33Mama baji ɨmɨkꞌĩra netuara merãtɨa bada iru kꞌapꞌɨade. Jesús jarateeda ũrikꞌãri, netuarapa golpe biapiji:

34—Aai, Jesús Nazaretdepema, ¿kꞌãata oo chejima aji, taimaa? ¡Tai ichiakꞌau bɨ́ji! ¿Tai kꞌenatꞌaadeta cherukꞌã? ajida. Mɨa pɨ kꞌawa bɨda aji. Pɨta chi kꞌachia wẽe bapari, Akꞌõre Waibɨapa pëida.

35Mãpai Jesupa ma netuara ɨtrɨatꞌaaji:

—¡Kꞌĩupꞌee beepáde aji mãikꞌaapa uchiapáde aji, na eperã kꞌapꞌɨadeepa!

Mãpai ma netuarapa ma eperã te jãde baaipiji jõmaarã kꞌĩrapite mãikꞌaapa uchiadachi, iru pꞌua oo–ee. 36Mãga unudakꞌãri, jõmaweda akꞌɨtrua para beeji mãikꞌaapa ãchi pitapai pedee para beeji:

—¡Aai, irua jarateeda waide nama ũridakꞌaada! ajida. ¡Eperã poro waibɨakꞌa jaratee bɨ! Netuaraarãpa pida iru pedee ũri pꞌanɨ mãikꞌaapa uchiapata, iru Tachi Akꞌõre kꞌapꞌɨa pari pedeepari perã.

37Jesupa mãga ooda perã, irude nepɨrɨpachida pꞌuuru bee chaa Galilea eujãde.

Jesupa Simón Pedro pꞌãkꞌõre jɨpada

(Mateo 8.14-15; Marcos 1.29-31)

38Jesús uchiakꞌãri Akꞌõre Ũraa jarateepata tedeepa, wãji Simón Pedro temaa. Simón pꞌãkꞌõre kꞌayaa baji kꞌɨamiapa. Mapa chupɨria iidijida Jesumaa iru jɨpamerã. 39Iru ikꞌaawa akꞌɨnɨ̃ banaji mãikꞌaapa ma kꞌɨamia ɨtrɨatꞌaaji. Aramata tuudachi. Mãpai chi kꞌayaa bada pꞌirabaipꞌeda, nekꞌopiji Jesumaa mãikꞌaapa chi kꞌõpꞌãyoorãmaa.

Jesupa kꞌayaa beerã chokꞌara jɨpada

(Mateo 8.16-17; Marcos 1.32-34)

40Kꞌeudaikꞌãri, kꞌayaa kꞌĩra tꞌãdoo iru beerã aneejida Jesumaa. Iru jua bɨkꞌãri mãɨrã ɨ̃rɨ, jɨpakꞌoodachida. 41Ichiaba eperãarã chokꞌara kꞌapꞌɨadeepa netuara merãtɨa beeda bia uchiakꞌoodachida:

—Pɨta Tachi Akꞌõre Warrada ajida.

Mamĩda Jesupa ɨtrɨakꞌooji pedeepiamaapa, ãchia kꞌawa pꞌanadapꞌedaa perã iru Tachi Akꞌõrepa pëida eperãarã kꞌaripamerã.

Jesupa Judea eujãde jaratee nipada

(Marcos 1.35-39)

42Taujaaweda Jesús uchiaji ma pꞌuurudeepa wãitꞌee eperãarã pꞌanadakꞌaamaa. Mamĩda pꞌuuru pidaarãpa jɨrɨnajida mãikꞌaapa chupɨria iidijida wãnaamerã awara ãyaa. 43Mamĩda Jesupa mãgaji:

—Awaraa pꞌuurudee ichita wãitꞌee pedee pia jarateede, ichiaba kꞌawaadamerã Tachi Akꞌõrepa ãra bɨ kꞌinia bɨ ichi jua ekꞌari ichideerã pꞌaneedamerã. Ma–itꞌeepɨ irua mɨ pëiji.

44Mãgá Jesupa jaratee nipapachi Akꞌõre Ũraa jarateepata te bee chaa judiorã pꞌanapata eujãde.

Currently Selected:

Lucas 4: sjaB

Highlight

Copy