Lucas 6

Ɨ̃ipata ewate trigo kꞌɨmɨ chakꞌeerã pꞌedapꞌedaa

(Mateo 12.1-8; Marcos 2.23-28)

1Judiorã ɨ̃ipata ewate Jesús nipaji trigo kꞌãide. Ma wãyaa wãde chi kꞌõpꞌãyoorãpa trigo kꞌɨmɨ chakꞌeerã oromaa pꞌaneejida. Jua jãde siratꞌɨdapꞌeda, chi trigo tau chakꞌeerã kꞌopachida. 2Mãga unudakꞌãri, ũkꞌuru arii pꞌanadapꞌedaa fariseorãpa iidijida:

—¿Sãapꞌeda parãpa oo pꞌanɨma ajida, tachi ũraade jara bɨ oonaadamerã? Ɨ̃ipata ewate mimiadaikꞌaraa bɨda a bɨ.

3Jesupa kꞌawaji chi kꞌõpꞌãyoorãpa ne–inaa kꞌachia ooda–e paji ma trigo tau kꞌodakꞌãri. Mapa pꞌanauji:

—¿Parãpa Akꞌõre Ũraa pꞌãdade leeda–e pꞌanɨkꞌã aji, Rey Davidpa ooda chonaarãweda jarrapisiadaidakꞌãri chi kꞌõpꞌãyoorã ome? 4Tꞌĩuji Tachi Akꞌõre te ne–edee oodade mãikꞌaapa ataji pan awara bɨdapꞌedaa Tachi Akꞌõre–itꞌee. Mãgɨ́ pan ũkꞌuru kꞌoji mãikꞌaapa teeji chi kꞌõpꞌãyoorãmaa aukꞌa kꞌodamerã. Mãga oojida, pꞌaareerãpapai mãgɨ́ pan kꞌodaipia baji mĩda. Tachi Akꞌõrepa ãra miapi–e paji mãga oodapꞌedaa kꞌaurepa.

5Jesupa ichiaba mãgaji:

—Ɨ̃ipata ewate mɨ, chi Eperã Akꞌõre Truadepema jua ekꞌari bɨda aji.

Eperã jua chiwa bada

(Mateo 12.9-14; Marcos 3.1-6)

6Awaraa ɨ̃ipata ewate Jesús tꞌĩuji Tachi Akꞌõre Ũraa jarateepata tede mãikꞌaapa jarateemaa beeji. Mama baji eperã jua juaraarepema chiwa bɨ. 7Moisepa pꞌãda jarateepataarã fariseorã ome Jesús ɨmɨatee kꞌinia pꞌanajida. Mapa akꞌɨ pꞌanajida Jesupa ma kꞌayaa bɨ jɨpai maa–e pɨrã jɨpa–e pai ma ewate. 8Mamĩda Jesupa kꞌawaji ãrapa kꞌĩsiadapꞌedaa. Mapa ma jua chiwa bɨmaa jaraji:

—Pꞌirabáiji mãikꞌaapa jõmaarã esajĩakꞌa akꞌɨnɨ̃ béeji.

Aramãgá ma eperã ɨtꞌa akꞌɨnɨ̃ beeji. 9Mãpai Jesupa mãgaji apemaarãmaa:

—Mɨa parãmaa ne–inaa iidiitꞌee. ¿Kꞌãata oodaipia bɨma aji, ɨ̃ipata ewate; ne–inaa pia maa–e pɨrã ne–inaa kꞌachia? ¿Eperã kꞌaripadaipia bɨkꞌã piunaamerã maa–e pɨrã piupidaipia bɨkꞌã? aji.

10Tꞌẽepai mãɨrãmaa akꞌɨji. Maapꞌeda ma eperã jua chiwa bɨmaa mãgaji:

—Pɨchi jua jĩrupáde aji.

Mãpai jua jĩruji. Aramata jɨpa beeji. 11Mamĩda mãɨrãpa mãga unudakꞌãri, audú kꞌĩraudachida mãikꞌaapa pedeeteemaa pꞌaneejida Jesús peepitꞌaadaitꞌee.

Jesupa kꞌõpꞌãyoorã doce jɨrɨtꞌerada ichi ome nipapataadamerã

(Mateo 10.1-4; Marcos 3.13-19)

12Maapai Jesús ee nokꞌodee wãji ɨtꞌaa tꞌɨ̃de. Mama ewariji ɨtꞌaa tꞌɨ̃maa. 13Ãstaawa pakꞌãri, ichi ome nipapataarã tꞌɨ̃ji. Mãɨrãdepema jɨrɨtꞌeraji doce mãikꞌaapa ãra tꞌɨ̃ bɨji apóstoles.#6.13 Mãgɨ́ pedee jara kꞌinia bɨ: Jesupa pëida. 14Nãgɨɨrã paji: Simón, Jesupa ichiaba tꞌɨ̃ bɨda Pedro; chi ɨ̃pema Andrés; Santiago; Juan; Felipe; Bartolomé; 15Mateo; Tomás; Alfeo warra Santiago; Simón Celote apatapꞌedaa;#6.15 Roma jua ekꞌariipa uchia kꞌinia pꞌanadapꞌedaarã tꞌɨ̃jarapachida Celote eerepemaarã. 16Santiago warra Judas mãikꞌaapa Judas Iscariote; ma tꞌẽepai Jesús traicionaada.

Jesupa eperãarã chokꞌaraarãmaa jarateeda

(Mateo 4.23-25)

17Ma kꞌõpꞌãyoorã jɨrɨtꞌerapꞌeda, Jesús edaa cheji ma ee ɨtꞌɨa bɨdeepa ãra ome mãikꞌaapa pachejida eujã jewedaade. Mama chipꞌe pꞌanajida iru ome nipapatapꞌedaarã mãikꞌaapa awaraa eperãarã chokꞌara: Judea eujãdepemaarã, Jerusalén pꞌuurudepemaarã, pꞌusa ide pꞌanɨ Tiro pꞌuurudepemaarã Sidón pꞌuurudepemaarã ome. 18Che pꞌanajida Jesús pedee ũridaitꞌee mãikꞌaapa irua ãchi kꞌayaa jɨpamerã. Mama bɨde Jesupa netuara merãtɨa iru beerã ichiaba jɨpakꞌooji. 19Eperãarã jõmaarãpa Jesús kꞌapꞌɨa tꞌõbai kꞌinia pꞌanapachida, iru juapa ãchi jõmaweda jɨpakꞌooda perã.

Jesupa jarateeda tꞌãri o–ĩa pꞌanapataadamerã

(Mateo 5.1-12)

20Maapꞌeda Jesupa ichi ome nipapataarãmaa akꞌɨji mãikꞌaapa mãgaji:

—Tꞌãri o–ĩa pꞌanɨ, parã chi chupɨria chedeerã. Tachi Akꞌõre kꞌawa kꞌinia pꞌanadairã, irudeerã pꞌanadaitꞌee.

21Tꞌãri o–ĩa pꞌanɨ, parã chi jarrapisia jõnɨɨrã, parãmaa Tachi Akꞌõrepa nekꞌopiitꞌee perã. Ichiaba tꞌãri o–ĩa pꞌanɨ, parã chi ɨ̃raweda jẽe jõnɨɨrã tꞌãri pꞌuapa, tꞌẽepai Tachi Akꞌõrepa parã ëipiitꞌee perã.

22Tꞌãri o–ĩa pꞌanɨ eperãarãpa parã kꞌĩra unuamaa iru pꞌaneedakꞌãri; yiaraa iru pꞌaneedakꞌãri; parãmaa ikꞌachia pedeedakꞌãri, maa–e pɨrã parã ãpɨte pedee kꞌachia jaradakꞌãri mɨ, chi Eperã Akꞌõre Truadepemade ijãapata perã.

23Mãga oodakꞌãri, tꞌãri o–ĩa, kꞌãiwee pꞌanéetɨ, Tachi Akꞌõrepa ne–inaa pi–ia teeitꞌee perã, parã iru truade panadakꞌãri. Chonaarãweda ichiaba mãgá ne–inaa kꞌachia oopachida Tachi Akꞌõre pedee jarapataarãmaa.

24Mamĩda ¡aai, Tachi Akꞌõrepa kꞌachiadee pëiitꞌeepɨ parã, chi pꞌaratꞌara beerã, na pꞌekꞌau eujãdepai o–ĩa pꞌanadaitꞌee perã!

25¡Aai, Tachi Akꞌõrepa kꞌachiadee pëiitꞌeepɨ parã, chi ɨ̃raweda bi jãwaa pꞌanɨɨrã, tꞌẽepai jarrapisia pꞌaneedaitꞌee perã!

¡Aai, Tachi Akꞌõrepa kꞌachiadee pëiitꞌeepɨ parã, chi ɨ̃raweda ëi jõnɨɨrã, tꞌẽepai jẽe jõnadaitꞌee perã tꞌãri pꞌuapa!

26¡Aai, Tachi Akꞌõrepa kꞌachiadee pëiitꞌeepɨ parã, chi jõmaarãpa tꞌo pꞌanapataarã! ¡Mãga oopachida Judea eujãdepemaarã chonaarãpa, seewata Tachi Akꞌõre pedee jarapatada apatapꞌedaarã ome!

Jesupa jarateeda kꞌĩra unuamaa iru pꞌanapataarãde

(Mateo 5.38-48; 7.12)

27—Mamĩda parã, mɨ pedee ũri pꞌanɨɨrãmaa mɨa jara bɨ: Parã kꞌĩra unuamaa iru pꞌanapataarã kꞌinia iru pꞌanapatáatɨ mãikꞌaapa ãramaa ne–inaa pia óotɨ. 28Pia óotɨ ãrapa parã kꞌachia oopata pari. Ɨtꞌaa tꞌɨ̃patáatɨ pãchimaa ikꞌachia jarapataarã pari. 29Eperãpa pɨ kꞌĩra tarramaa sĩru pɨrã, aukꞌa oonáaji irumaa. Ma kꞌãyaara chi apema kꞌĩra tarra akꞌɨpíji, aukꞌa sĩmerã. Ichiaba eperãpa pɨchi ɨ̃rɨpema pꞌaru jɨ̃ bɨ jãri ataru pɨrã, ichiaba pɨchi camisa tꞌãri pia téeji. 30Apidaapa pɨmaa ne–inaa iidiruta pɨrã, téeji. Ichiaba pɨ netꞌaa jãri ataruta pɨrã, iidináaji waya pɨmaa teemerã. 31Óotɨ apemaarãmaa parãpa kꞌinia pꞌanɨkꞌa ãchia parãmaa oodamerã.

32ʼParãpa kꞌinia iru pꞌanɨ pɨrã pãchi kꞌinia iru pꞌanapataarã aupai, ¿ne–inaa pipɨara oomaa pꞌanɨkꞌã? Pꞌekꞌau kꞌachia ooyaa beerãpa paara mãga oopata. 33Parãpa ne–inaa pia oo pꞌanɨ pɨrã pãchi pia oopataarãmaa aupai, ¿ne–inaa pipɨara oomaa pꞌanɨkꞌã? Pꞌekꞌau kꞌachia oopataarãpa paara mãga oopata. 34Ichiaba pãchi netꞌaa presta pëiruta pɨrã, ma pari awaraa netꞌaa jitaitꞌee aupai, ¿ne–inaa pipɨara oomaa pꞌanɨkꞌã? Pꞌekꞌau kꞌachia oopataarãpa pida prestapata ãchi pitapai, ma pari ne–inaa jitadaitꞌee. 35Parãpa pãchi kꞌĩra unuamaa iru pꞌanapataarã kꞌinia iru pꞌanapataadaipia bɨ mãikꞌaapa ãra pia oopataadaipia bɨ. Ãramaa netꞌaa prestadaipia bɨ, nɨda–ee ne–inaa jitadaitꞌee ma pari. Mãga ooruta pɨrã, Tachi Akꞌõrepa ne–inaa pia teeitꞌee parãmaa mãikꞌaapa parã Akꞌõre Waibɨa warrarã pꞌanadaitꞌee. Iruata ne–inaa pia oopari gracias jaradakꞌaarãmaa mãikꞌaapa tꞌãri kꞌachia–idaa beerãmaa paara. 36Maperã awaraarã chupɨria kꞌawáatɨ pãchi Akꞌõre Waibɨapa ooparikꞌa.

Awaraarãpa oopata ãpɨte ikꞌachia jaradaikꞌaraa bɨ

(Mateo 7.1-5)

37—Awaraarãpa ne–inaa oopata akꞌɨnáatɨ jaradaitꞌee ne–inaa kꞌachia oomaa pꞌanɨ. Mãgá Tachi Akꞌõrepa aukꞌa oo–e paitꞌee parã ome. Ne–inaa kꞌachia aupai jɨrɨnáatɨ pedee kꞌachia jaradaitꞌee awaraarã ãpɨte, maa–e pɨrã Tachi Akꞌõrepa aukꞌa jɨrɨitꞌee parãpa ne–inaa kꞌachia oopata aupai jaraitꞌee, pꞌanadakꞌãri iru kꞌĩrapite. Chĩarapa parãmaa ne–inaa kꞌachia ookꞌãri, perdonáatɨ. Mãgá Tachi Akꞌõrepa parãpa ne–inaa kꞌachia oopata perdonaaitꞌee. 38Awaraarãmaa téetɨ. Mãgá Tachi Akꞌõrepa parãmaa teeitꞌee. Tꞌãri pia teedakꞌãri awaraarãmaa, ma pari irua audupɨara teeitꞌee parãmaa. Irua parãmaa ooitꞌee parãpa oopatakꞌa awaraarãmaa.

39Ichiaba Jesupa nãga nepɨrɨji jarateeitꞌee, chi kꞌõpꞌãyoorãpa kꞌawaa wãdamerã oodaitꞌee irua jara bɨkꞌa.

—Pꞌananáatɨ chi wãara kꞌawada–e pꞌanɨɨrãkꞌa. Mãgɨɨrã tau pꞌãriu beerã́kꞌapɨ pꞌanɨ awaraa tau pꞌãriu beerã atee kꞌinia pꞌanadakꞌãri awara ãyaa. ¿Ãchi omee weda uriade baainada–e paikꞌã? 40Mɨ ũraa kꞌawaa wãdakꞌãri, pia pꞌanapataadaitꞌee. Estudiante apida ichi jarateepari kꞌãyaara kꞌawaara bɨ–e. Mamĩda jõmaweda estudia aupakꞌãri, ichi jarateepari jĩakꞌa uchiai.

41ʼ¿Kꞌãare–itꞌee akꞌɨ bɨma nejarra pɨchi aukꞌaa tau jãde bɨ, mamĩda unu–e bɨ pakꞌuru pɨchi tau jãde bɨ? 42Pɨchi tau jãde pakꞌuru iru bɨ pɨrã, ¿sãga pɨchi aukꞌaamaa jaraima: “Ɨ̃pema, mɨmaa ẽepíji jã nejarra pɨchi tau jãde bɨ”? ¡Seewata pɨa chĩara kꞌaripa kꞌinia bɨ, irua oo bɨ akꞌɨkꞌãri! Naapɨara ẽtꞌaipia bɨ ma pakꞌuru pɨchi tau jãde bɨ. Mãpaipɨ pia unui ma nejarra pɨchi aukꞌaa tau jãde bɨ mãikꞌaapa mãgá iru kꞌaripai.

Pakꞌuru kꞌawaapata chi nejõdeepa

(Mateo 7.17-20; 12.34-35)

43—Nejõ bɨɨrɨ pia bɨpa nejõ kꞌachia chaukꞌaa. Jõdee nejõ bɨɨrɨ kꞌachia bɨpa nejõ pia chaukꞌaa. 44Nejõ bɨɨrɨ chaa kꞌawapata chi nejõdeepa. Eperãarãpa higojõ orodakꞌaa pakꞌuru ɨɨrɨ–idaa bɨdeepa. Ichiaba uva orodakꞌaa mãgee pakꞌurudeepa. 45Mãga pɨkꞌa eperã tꞌãri pia bɨpa pedee pia jarapari, kꞌĩsia pia iru bairã ichi tꞌãride. Jõdee eperã tꞌãri kꞌachia bɨpa pedee kꞌachia jarapari, ichi tꞌãride kꞌĩsia kꞌachia iru bairã. Ma kꞌĩsia jõma uchiaru ichi tꞌãrideepa ichi itꞌaipa jarapari.

Jesupa te oopataarãde nepɨrɨda

(Mateo 7.24-27)

46—¿Kꞌãare–itꞌee parãpa mɨ tꞌɨ̃jarapatama: “Tachi Waibɨa, Tachi Waibɨa”, mamĩda ooda–e pꞌanɨ mɨa jara bɨkꞌa? 47Mɨa jaraitꞌee kꞌaikꞌa bɨ chi mɨmaa cheru ũriitꞌee mɨ pedee mãikꞌaapa oopariitꞌee mɨa jara bɨkꞌa. 48Mãgɨ́ eperã te oo bɨ́kꞌata bɨ. Naapɨara irua edú kꞌoropꞌeda, chi te bɨɨrɨ mãu ɨ̃rɨ bɨpari. Maapꞌeda to chekꞌãri, wee jira beepari ma te bɨɨrɨ sudamãi. Mamĩda pꞌoyaa mimikꞌapi–e, basa mãu ɨ̃rɨ bɨda perã. Mãgɨ́ eperãpa ichi te mãgá basa mãu ɨ̃rɨ pia oopari perã, jõ–e paitꞌee. 49Jõdee chi mɨ ũraa ũripꞌeda, oo–e bɨpa mɨa jara bɨkꞌa nãga pɨkꞌa bɨ. Ichi te ookꞌãri, te bɨɨrɨ pariatua supari ipu nãusaade, basa wẽe. Maapꞌeda to chekꞌãri mãikꞌaapa wee jira beekꞌãri ma te bɨɨrɨ sudamãi, ma te tꞌeedaipari mãikꞌaapa jõmaweda jõdaipari, chi te chipari paara.

Currently Selected:

Lucas 6: sjaB

Highlight

Copy