Lucas 8

Wẽraarãpa Jesús kꞌaripapatapꞌedaa

1Ma tꞌẽepai Jesús nipapachi pꞌuuru beede mãikꞌaapa aɨ ikꞌaawa pꞌuuru kꞌaipee beede. Jaratee nipapachi Akꞌõrepa pedee pia jara pëida; irua eperãarã bɨ kꞌinia bɨ ichi jua ekꞌari, ichideerã pꞌaneedamerã. Chi kꞌõpꞌãyoorã doce aukꞌa nipapachida iru ome. 2Ichiaba wẽraarã nipapachida iru ome. Aɨ naaweda ma wẽraarã ũkꞌuru netuara kꞌapꞌɨade merãtɨa pꞌanajida mãikꞌaapa ũkꞌuru kꞌayaa pꞌanajida. Mamĩda Jesupa ma jõmaweda jɨpaji. Mãɨrãdepema paji María, ichiaba tꞌɨ̃jarapatapꞌedaa Magdalena. Iru kꞌapꞌɨadeepa Jesupa netuara siete uchiapiji. 3Ichiaba baji Cuza wẽra tꞌɨ̃jarapatapꞌedaa Juana. Ma Cuza Rey Herodes tedepema mimiapataarã poro waibɨa paji. Ichiaba baji Susana, awaraa wẽraarã chokꞌara ome. Ma wẽraarãpa Jesús chi kꞌõpꞌãyoorã ome kꞌaripapachida; teepachida netꞌaa mãikꞌaapa pꞌaratꞌa.

Netꞌatau pꞌoparide nepɨrɨda

(Mateo 13.1-9; Marcos 4.1-9)

4Maapai eperãarã chokꞌara uchiajida pꞌuurudeepa Jesús akꞌɨde. Mãgá eperãarã chokꞌara chipꞌedachida. Mãga nɨde Jesupa na pedee nepɨrɨji Akꞌõre Ũraa jarateeitꞌee:

5—Eperã wãji netꞌatau pꞌode. Ma pꞌo wãkꞌãri, ũkꞌuru baaijida o jãde. Tꞌẽepai mama eperãarã bɨɨrɨpa tꞌɨakꞌoojida mãikꞌaapa ipanaarãpa kꞌokꞌoo chejida. 6Ũkꞌuru baaijida mãu–idaade mãikꞌaapa tꞌonojida mĩda, taarã–e weda pɨɨkꞌoodachi, pania wẽede baaidapꞌedaa perã. 7Ũkꞌuru baaijida ne–ɨɨrɨ–idaade mãikꞌaapa aukꞌa tꞌonojida. Mamĩda ne–ɨɨrɨ kꞌapꞌipꞌiara waripari perã, mãgɨ́ netꞌatau tꞌono wãdapꞌedaa piukꞌoodachida. 8Jõdee awaraa netꞌatau baaijida eujã piade. Mãgɨ́ tꞌonojida, warijida mãikꞌaapa pia chaujida. Ũkꞌuru netꞌatau abaadeepa tau cien uchiajida.

Nepɨrɨpꞌeda, Jesupa golpe pedeeji:

—¡Pia kꞌĩsíatɨ parãpa etꞌewa ũridapꞌedaade kꞌawaadamerã kꞌãata jara kꞌinia bɨ!

Sãapꞌeda Jesupa nepɨrɨpachi jarateeitꞌee

(Mateo 13.10-17; Marcos 4.10-12)

9Ma tꞌẽepai Jesús kꞌõpꞌãyoorãpa iidijida:

—¿Kꞌãata jara kꞌinia bɨma ajida, pɨa nepɨrɨ bada?

10Jesupa pꞌanauji:

—Tachi Akꞌõrepa parãmaa kꞌawapimaa bɨda aji, ne–inaa naaweda kꞌawapikꞌaa pada awaraarãmaa: sãga ichideerã pꞌaneedai. Mamĩda awaraarãmaa mɨa nepɨrɨpari jarateeitꞌee:

‘Ãrapa mɨa oo bɨ akꞌɨ pꞌanɨ mĩda, wãara unuda–e mãikꞌaapa mɨa jara bɨ ũri pꞌanɨ mĩda, kꞌawada–ee pꞌaneedamerã.’ (Isaías 6.9)

Jesupa kꞌawapida netꞌatau pꞌoparide

(Mateo 13.18-23; Marcos 4.13-20)

11Mãpai Jesupa mãgaji:

—Mɨa nepɨrɨda netꞌatau pꞌoparide nãga jara kꞌinia bɨ. Ma netꞌatau pꞌoda jara kꞌinia bɨ Tachi Akꞌõre Ũraa jara pëida. 12Chi o jãde baaidapꞌedaa jara kꞌinia bɨ eperãarãpa ma jara pëida ũripata. Mamĩda Netuara Poro Waibɨa chepari ne–inaa ooitꞌee, tꞌãripa ma pedee ijãanaadamerã mãikꞌaapa wãnaadamerã Akꞌõre eujãdee. 13Jõdee chi netꞌatau mãu–idaade baaidapꞌedaa jara kꞌinia bɨ eperãarãpa ma jara pëida o–ĩa ũri pꞌanɨ. Mamĩda chi mãu–idaade tꞌonoda taarã–e weda pɨɨdaiparikꞌa, mãga pɨkꞌa mãgɨɨrãpa ma jara pëida taarã–epai ijãapata. Ma ũraade ijãadapꞌedaa kꞌaurepa nepɨrade baairuta pɨrã, maa–e pɨrã awaraarãpa ãchi jɨrɨruta pɨrã miapidaitꞌee, ijãa amaapata. 14Jõdee chi netꞌatau ne–ɨɨrɨ–idaade baaidapꞌedaa jara kꞌinia bɨ eperãarãpa ma jara pëida pia ũri pꞌanɨ. Mamĩda tꞌẽepai kꞌĩsia pꞌaneeruta piara bɨ pꞌaratꞌa atadaitꞌee maa–e pɨrã ãchia ne–inaa audú oo kꞌinia pꞌanɨ oodaitꞌee, Akꞌõrepa kꞌinia bɨkꞌa oodai kꞌãyaara. Mãgá pꞌaneepata ne–uu waripꞌeda chaukꞌaa bɨkꞌa. 15Mamĩda chi netꞌatau eujã piade baaidapꞌedaa jara kꞌinia bɨ eperãarãpa ma jara pëida wãara ijãapata ãchi tꞌãride. Mãpai pꞌanapata ma ũraade jara bɨkꞌa mãikꞌaapa choopata ãchi ijãa pꞌanɨde. Mãgá pꞌaneepata ne–uu pia chauparikꞌa.

Jesupa lamparade nepɨrɨda

(Marcos 4.21-25)

16Maapꞌeda Jesupa awaraa nepɨrɨji:

—Tachia lámpara kꞌoodakꞌaa ata bɨdaitꞌee ne–inaa edajãde maa–e pɨrã cama ekꞌari. Ma kꞌãyaara lámpara kꞌoodapꞌeda, ɨtꞌɨ́ ata bɨpata pia ɨ̃daamerã te jãde pꞌanɨɨrã–itꞌee. 17Mãga pɨkꞌa Tachi Akꞌõrepa oo bɨ mera pɨkꞌa bɨ eperãarãpa kꞌawanaadamerã. Mamĩda tꞌẽepai irua jõmaarãmaa kꞌawaapiitꞌee kꞌãata jara kꞌinia bɨ. Ichiaba ɨ̃rá irua oo bɨ jõmaarãmaa kꞌawapi–e. Mamĩda tꞌẽepai kꞌawaapiitꞌee.

18Maperã pia ũrítɨ. Chi kꞌawa bɨmaa Tachi Akꞌõrepa audupɨara kꞌawaapiitꞌee. Mamĩda chi ne–inaa kꞌawaara kꞌĩsia bɨpa kꞌawa bɨ paara wẽpapiitꞌee.

María Jesús ɨ̃pemaarã ome

(Mateo 12.46-50; Marcos 3.31-35)

19Jesús nawe chi ɨ̃pemaarã ome wãjida irumaa. Mamĩda iru kꞌaitꞌa pꞌoyaa wãda–e paji eperãarã see nɨ̃bada perã. 20Mãpai eperãpa jaranaji Jesumaa:

—Pɨ nawe pɨ ɨ̃pemaarã ome taawa nɨmaa pꞌanɨda aji, pɨ akꞌɨdaitꞌee.

21Mãga ũrikꞌãri, ichia mãgaji:

—Akꞌõre Ũraa ũripataarã mãikꞌaapa oopataarã Akꞌõrepa jara bɨkꞌa, mãɨrãta mɨ nawekꞌa bɨ mãikꞌaapa mɨ ɨ̃pemaarãkꞌa.

Jesupa nãu pꞌusa ome tꞌumãtɨpida

(Mateo 8.23-27; Marcos 4.35-41)

22Ewari aba Jesupa mãgaji chi kꞌõpꞌãyoorãmaa:

—Wãdáma aji, lago kꞌĩraikꞌa eeree.

Mãpai barcode bataujida mãikꞌaapa wãjida. 23Sĩa wãdade Jesús kꞌãidachi. Mãɨmisa pꞌusara tꞌo nɨ̃beeji. Mapa barco pirubaai wã nipaji. 24Mapa Jesús ɨ̃rɨmatꞌaajida mãikꞌaapa mãgajida:

—¡Tachi Jarateepari, pirubaai wãdapɨ!

Jesús pꞌirabaidachi mãikꞌaapa pedeeji nãumaa mãikꞌaapa pꞌusamaa. Jõmaweda tꞌumãtɨdachi mãikꞌaapa ipꞌii ũu beeji. 25Mãpai Jesupa chi kꞌõpꞌãyoorãmaa iidiji:

—¿Sãapꞌeda parãpa ijãada–e pꞌanɨma aji, mɨa parã akꞌɨitꞌee?

Mamĩda ãchi jõmaweda pꞌera jõnɨpa akꞌɨtrua para beeji mãikꞌaapa ãchi pitapai iidi para beeji:

—¿Kꞌaima ajida, nãgɨ́? Iru pedeepa nãu, pꞌusa paara tꞌumãtɨpiparida ajida.

Eperã kꞌapꞌɨade netuara merãtɨa bada

(Mateo 8.28-34; Marcos 5.1-20)

26Tꞌẽepai panajida Gerasa eujãde lago kꞌĩraikꞌa eere, Galilea eujã kꞌĩrapite. 27Jesús bataukꞌãri, eperã netuara merãtɨa bɨ iru kꞌaitꞌa cheji. Pꞌuurudepema paji mĩda, taarã pꞌaru jɨ̃–e baji; ichiaba teeda bakꞌaa paji. Bapachi jãɨra mãu te uriade. 28Mãgɨ́ eperãpa Jesús unukꞌãri, iru kꞌĩrapite sinapotepa bia baainaji:

—Jesús, Akꞌõre Waibɨa Warra, mɨ ome tꞌĩunáaji. ¡Mɨ chupɨria kꞌawáaji! ¡Ichiakꞌau bɨ́ji!

29Mãga jaraji Jesupa jara bada perã uchiamerã ma eperã kꞌapꞌɨadeepa. Taarã baji ma netuara merãtɨa bɨ iru kꞌapꞌɨade. Atꞌapai ma netuarapa irumaa ne–inaa pariatua oopiji. Mãɨmisa eperãarãpa iru jua bɨɨrɨ ome cadenapa jɨ̃ nɨ̃bɨjida ãyaa wãnaamerã. Mamĩda ma netuara juapa irua ma cadena tꞌɨɨtꞌaapachi mãikꞌaapa jirabodoji tꞌɨmɨ́ eperãarã pꞌanadakꞌaamaa. 30Mãpai Jesupa iidiji:

—¿Pɨ, kꞌasaa tꞌɨ̃jarapatama? aji.

Ichia pꞌanauji:

—Mɨ tꞌɨ̃jarapatada aji, Legión.#8.30 Legión jara kꞌinia bɨ soldaorã seis mil.

Mãga jaraji netuara chokꞌara ichi kꞌapꞌɨade tꞌĩudapꞌedaa perã. 31Mãpai ma netuaraarãpa Jesumaa chupɨria iidipachida ãchi pëinaamerã uria audú nãpɨa bɨdee. 32Ma kꞌaitꞌa ee kꞌarraya sinaarã chokꞌara nekꞌomaa pꞌanajida. Mapa netuaraarãpa chupɨria iidijida ma sinaarã kꞌapꞌɨade tꞌĩupimerã. Mãpai Jesupa mãga ooji. 33Aramãgá netuaraarã uchiajida eperã kꞌapꞌɨadeepa mãikꞌaapa tꞌĩujida ma sinaarã kꞌapꞌɨade. Aramata sinaarã pꞌirakꞌoodachida ee kꞌõotꞌari jira bɨdee. Toida baainadapꞌeda, ɨ̃yapa jɨ̃akꞌoodachida.

34Ma sinaarã jɨ̃a pꞌanadapꞌedaarãpa mãga unudakꞌãri, pꞌirakꞌoodachida pꞌuurudee nepɨrɨdaitꞌee pꞌuuru pidaarãmaa mãikꞌaapa ma pꞌuuru kꞌaitꞌa beerãmaa. 35Mapa eperãarã uchiajida akꞌɨde. Jesumãi pachedakꞌãri, unujida ma eperã netuara kꞌapꞌɨade merãtɨa bada su–akꞌɨ bɨ Jesús bɨɨrɨ kꞌaitꞌa. Pꞌaru jɨ̃pꞌeda, kꞌãiwee su–akꞌɨ baji. Mãga unudakꞌãri, ma eperãarã pꞌera para beeji. 36Mãpai chi unudapꞌedaarãpa nepɨrɨjida sãgapɨ Jesupa jɨpaji ma eperã netuara kꞌapꞌɨade merãtɨa bada. 37Maapꞌeda ma Gerasa eujãdepemaarãpa Jesumaa chupɨria iidijida ãyaa wãmerã mamãikꞌaapa, audú nejasia pꞌanadapꞌedaa perã. Mãpai Jesús barcode bataupꞌeda, wãji. 38Wãi naaweda, ma eperã netuara kꞌapꞌɨade merãtɨa badapa chupɨria iidiji Jesupa ichi ome aukꞌa wãpimerã. Mamĩda Jesupa jaraji beemerã. Mãgaji:

39—Wãpáde aji, pɨchi temaa mãikꞌaapa nepɨrɨpáde aji, Tachi Akꞌõrepa pɨ ome ooda.

Aramãgá ma eperã wãji ma pꞌuurudepema jõmaarãmaa nepɨrɨde Jesupa ichi ome ooda.

Jairo kꞌau mãikꞌaapa wẽrapa Jesús pꞌaru i tꞌõbaida

(Mateo 9.18-26; Marcos 5.21-43)

40Jesús lago kꞌĩraikꞌa eere pachekꞌãri, eperãarãpa iru o–ĩa auteebaijida, jõmaarãpa iru nɨ pꞌanadapꞌedaa perã. 41Mãga nɨde pacheji eperã tꞌɨ̃jarapatapꞌedaa Jairo. Ichi Akꞌõre Ũraa jarateepata tedepema poro paji. Jesús bɨɨrɨmãi bedabaidachi mãikꞌaapa chupɨria iidiji wãmerã ichi temaa 42chi kꞌau jɨpade, juakꞌaya nɨ̃bada perã. Kꞌau apai iru baji; mãgɨ́ doce años iru baji.

Jesús wãrude Jairo temaa, iru ome nipapataarã see nɨ̃bada kꞌaurepa pꞌĩsua baji. 43Ma eperãarã ome baji wẽra bi kꞌayaa bɨ. Doce años waamiapa kꞌayaa baji. Ichi pꞌaratꞌa jõdai baji jɨpapataarã juade nipa. Mamĩda apidaapa pꞌoyaa jɨpadakꞌaa paji. 44Ma wẽra Jesús ãpɨteikꞌaapa kꞌaitꞌa wãji mãikꞌaapa iru ɨ̃rɨpema pꞌaru i tꞌõbaitꞌaaji. Aramata ma waamia tꞌɨbaidachi. 45Mãpai Jesupa iidiji:

—¿Kꞌaipa mɨ tꞌõbaijima? aji.

Chi kꞌõpꞌãyoorã jõmaarãpa ãchia–e pajida apachida.

Mãpai Pedropa mãgaji:

—Tachi Jarateepari, eperãarãpa pɨ tꞌɨsĩa wãrutada aji.

46Mamĩda Jesupa mãgaji:

—Eperã kꞌayaa bɨpa mɨ tꞌõbaijida aji. Mɨdeepa uchiajida aji, Akꞌõre juapa ma eperã jɨpaitꞌee.

47Mãpai ma wẽrapa unukꞌãri pꞌoyaa miru–e paji, bɨɨrɨ wërewëree wãji mãikꞌaapa bedabaidachi Jesús bɨɨrɨmãi. Jõmaarã taide jaraji kꞌãare–itꞌee tꞌõbaitꞌaaji mãikꞌaapa sãgá jɨpa beeji. 48Mãpai Jesupa mãgaji irumaa:

—Wẽra, pɨa mɨde ijãa bairã, jɨpa beejida aji. Kꞌãiwee wã́ji.

49Atꞌãri Jesús pedeemaa bɨde Jairo tedeepa pëida pacheji mãikꞌaapa mãgaji ma Akꞌõre Ũraa jarateepata tedepema poromaa:

—Pɨ kꞌau jai–idaajipɨ. Tachi Jarateepari ichiakꞌau bɨpáde aji.

50Mamĩda Jesupa mãga ũrikꞌãri, mãgaji Jairomaa:

—Waaweenaapáde aji. Jĩpꞌa ijãapáde aji. Pɨ kꞌau jɨpa beeitꞌee.

51Temãi panadakꞌãri, Jesupa chi kꞌõpꞌãyoorã jõmaweda tꞌĩupi–e paji. Aba tꞌĩupiji Pedro, Santiago, Juan mãikꞌaapa chi kꞌayaa nawe chi akꞌõre ome. 52Eperãarã taawa pꞌanadapꞌedaarã jõmaweda jẽe para baji tꞌãri pꞌuapa. Mamĩda Jesupa mãgaji:

—Jẽenáatɨ. Na wẽra kꞌau jai–idaa–e bɨ. Jĩpꞌa kꞌãita bɨda aji.

53Mãga ũridakꞌãri, jõmaarãta ëidachida iru–itꞌee, kꞌawa pꞌanadapꞌedaa perã jai–idaa bɨ. 54Mamĩda Jesupa ma wẽra kꞌau juade jita atapꞌeda, golpe pedeeji:

—Wẽra chai, ¡pꞌirabáiji!

55Aweda chokꞌai beeji mãikꞌaapa aramata pꞌirabaidachi. Mãpai Jesupa jaraji nekꞌopidamerã. 56Chi akꞌõreerã pꞌera pɨkꞌa jõneejida. Mamĩda Jesupa jaraji ma pꞌasada awaraarãmaa nepɨrɨnaadamerã.

Currently Selected:

Lucas 8: sjaB

Highlight

Copy