Marcos 15

Jesús Pilato kꞌĩrapite

(Mateo 27.1-2, 11-14; Lucas 23.1-5; Juan 18.28-38)

1Tapꞌeda weda pꞌaareerã poroorã, judiorã poro waibɨarã mãikꞌaapa Moisepa pꞌãda jarateepataarã, mãgɨ́ Junta Supremadepemaarã chipꞌedaidapꞌeda, pedeeteejida kꞌawaadaitꞌee kꞌãata oodaitꞌee Jesús ome. Jesús jua jɨ̃ atapidapꞌeda, teenajida Pilato temaa. Ichi Romadepemaarã poro waibɨa paji.

2Pilatopa iidiji Jesumaa:

—¿Pɨkꞌã aji, Judiorã Rey?

Jesupa pꞌanauji:

—Mɨda aji, pɨa jara bɨkꞌa.

3Pꞌaareerã poroorãpa audupai ɨmɨatee jõnadapꞌedaa perã, 4Pilatopa waya iidiji:

—¿Maarepida pꞌanau–ekꞌã aji, ɨmɨatee jõnɨta?

5Mamĩda Jesupa maarepida pꞌanaukꞌaa paji. Mapa Pilatopa kꞌawa–e paji kꞌãata ooitꞌee.

Pilatopa Jesús peepida

(Mateo 27.15-26; Lucas 23.13-25; Juan 18.38–19.16)

6Ma fiestade Pilatopa preso aba kꞌena pëipachi, eperãarãpa iidirutata. 7Eperã tꞌɨ̃jarapatapꞌedaa Barrabás carcelde baji awaraa kꞌõpꞌãyoorã ome, Roma pidaarã juadeepa uchia kꞌiniapa chĩara pee pꞌanadapꞌedaa perã. 8Eperãarãpa iidinadakꞌãri Pilatomaa preso kꞌena pëimerã ichia ooparikꞌa, 9irua pꞌanauji:

—¿Kꞌinia pꞌanɨkꞌã aji, mɨa Judiorã Rey apata kꞌena pëimerã?

10Mãga iidiji kꞌawa bada perã judiorã pꞌaareerã poroorãpa Jesús kꞌĩra unuamaa iru pꞌanadapꞌedaa. 11Mamĩda pꞌaareerã poroorãpa eperãarãmaa jarajida iididamerã Pilatopa Barrabata kꞌena pëipimerã. 12Mapa Pilatopa iidiji:

—¿Sãga oopi kꞌinia pꞌanɨma aji, parãpa Judiorã Reyda a pꞌanɨ ome?

13Mãpai biajida:

—¡Kurusode peepitꞌáaji!

14Pilatopa mãgaji:

—¿Kꞌãare kꞌachiata oojima? aji.

Mamĩda waya eperãarãpa biajida:

—¡Kurusode peepitꞌáaji!

15Pilato pia bee kꞌinia bada perã eperãarã ome, Barrabata kꞌena pëiji. Jesús soopa wɨpipꞌeda, pëiji kurusode baijira bɨdamerã piurumaa.

Soldaorãpa Jesús oo iru pꞌanadapꞌedaa

(Mateo 27.27-31; Juan 19.2-3)

16Soldaorãpa Jesús ateejida Pilato palaciode, tꞌɨ̃jarapatapꞌedaa pretorio. Mama tuda soldaorã chokꞌaraara seedachida. 17Oo iru pꞌanapachida. Rey pꞌarukꞌa pꞌoree kꞌĩra pꞌãimapꞌãimaa jɨ̃ bɨdapꞌeda, poro jɨ̃ra pakꞌuru jua ne–ɨɨrɨ–idaa bɨdee oojida mãikꞌaapa jɨ̃ bɨjida. 18Maapꞌeda bia ëipachida:

—¡Akꞌɨ́tɨ Judiorã Rey!

19Poromaa wɨpachida pakꞌurupa. Idupachida mãikꞌaapa bedabaidaipachida iru kꞌĩrapite ɨtꞌaa tꞌɨ̃ pɨkꞌadaitꞌee. 20Mãgá oo iru pꞌanadapꞌeda, ma pꞌaru pꞌoree ẽratꞌaajida mãikꞌaapa ichi pꞌaru waya jɨ̃ bɨjida. Maapꞌeda ateejida kurusode baijira bɨdaitꞌee.

Cirene pꞌuurudepemamaa Jesús kuruso ateepidapꞌedaa

(Mateo 27.32-44; Lucas 23.26-43; Juan 19.17-27)

21Uchia wãdakꞌãri Jerusalendeepa, unujida eperã Cirene pꞌuurudepema tꞌɨ̃jarapatapꞌedaa Simón. Ewaa pꞌuurude panaji. Mãgɨ́ eperã Alejandro mãikꞌaapa Rufo akꞌõre paji. Simón ikꞌaawa wãyaa wãdakꞌãri, soldaorãpa kuruso ateepijida Jesús pari.

Jesús kurusode baijira bɨdapꞌedaa

22Jesús ateejida Gólgota apatapꞌedaamaa. (Gólgota jara kꞌinia bɨ: “Tachi Poro Bɨɨrɨ”.) 23Maapꞌeda teejida vino mirra#15.23 Mirra neera asia bɨ. Ũkꞌuruurãpa kꞌĩsiapata mirra teejida Jesumaa pꞌuapiamaapa. ome pꞌoirada, mamĩda Jesupa to–e paji. 24Mãpai soldaorãpa Jesús jua mãikꞌaapa chi bɨɨrɨ merapꞌejida mãikꞌaapa kurusode baijira bɨjida piumerã. Mãgɨɨrãpa suerte jemenejida kꞌawaadaitꞌee kꞌaipata iru pꞌaru ataitꞌee.

25Mãga oojida tapꞌeweda, las nueve. 26Soldaopa iru poro ɨtꞌaikꞌa eere kurusode letrero merapꞌeji, jaraitꞌee kꞌãare–itꞌee kurusode baijira bɨjida piumerã. Pꞌã baji: Judiorã Rey. 27Mama ichiaba nechɨapataarã omé kurusode baijira bɨjida, aba Jesús juaraare, chi apema juabi eere. 28[Mãga pꞌasaji Tachi Akꞌõre Ũraa jaraparipa pꞌãdakꞌa chonaarãweda:

‘Iru pꞌekꞌau kꞌachia oopataarã ome aukꞌa ata bɨjida.’] (Isaías 53.12)

29Chi arii wãyaa wã nipadapꞌedaarãpa irumaa ikꞌachia jarajida. Ãchi poro pꞌɨrapꞌɨraa mãgapachida:#15.29 Ãchi poro pꞌɨrapꞌɨraadakꞌãri, jara kꞌinia bɨ oo iru pꞌanɨ.

—¡Aai, pɨa Tachi Akꞌõre te waibɨa jõmaweda tꞌeetꞌaaitꞌee paji mãikꞌaapa waya oo ataitꞌee paji ewari õpeemaa! 30Pɨa jarada wãara pɨrã, ¡jãmãikꞌaapa ɨrabáiji piunaamerã!

31Ichiaba mãgá oo iru pꞌanapachida pꞌaareerã poroorãpa Moisepa pꞌãda jarateepataarã ome:

—¡Awaraarã kꞌaripajida ajida. Mamĩda ichi itu nadeepa pꞌoyaa uchia–e! 32¡Akꞌɨ́tɨ! ¿Jãgɨ́ Tachi Akꞌõrepa pëida tachi kꞌaripamerã, Israel pidaarã Rey poro waibɨakꞌã? ¡Jãmãikꞌaapa ɨrabáiji ɨ̃raweda tai kꞌĩrapite! Mãga ooru pɨrã, taipa ichiaba pɨde ijãadaitꞌeepɨ.

Kurusode iru ikꞌaawa baijira pꞌanadapꞌedaarãpa ichiaba irumaa ikꞌachia jarapachida.

Jesús jai–idaada

(Mateo 27.45-56; Lucas 23.44-49; Juan 19.28-30)

33Imatꞌɨpa akꞌõrejĩru kꞌiatꞌɨdachi. Na eujã jõma pꞌãriudachi las tres parumaa. 34Ma hora Jesupa golpe biaji:

—‘Eloí, Eloí, ¿lemá sabactani?’ (Ma pedee jara kꞌinia bɨ: ‘Mɨ Akꞌõre, Mɨ Akꞌõre, ¿Kꞌãare–itꞌee mɨ atabëijima?’) (Salmos 22.1)

35Ũkꞌuru arii pꞌanadapꞌedaarãpa ũridakꞌãri, maajida:

—¡Ũrítɨ! Elías, chonaarãwedapema Akꞌõre pedee jarapari tꞌɨ̃maa bɨda ajida.

36Eperã pꞌira wãji mãikꞌaapa esponjakꞌa pꞌẽesapꞌẽesaa bɨ topa ataji vino achuchuade.#15.36 Eperãarãpa vino achuchua topachida opisia wẽpamerã. Ma vino ichiaba edaa baji. Sia kꞌɨ̃de jõi bɨpꞌeda, Jesús itꞌaimãi tꞌɨ atanaji sõmerã, opisia bɨ jĩakꞌaapa mãikꞌaapa maaji:

—Ɨ̃rá, ichiakꞌau bɨdaitꞌee. Unu kꞌinia pꞌanɨ Elías cheru pɨrã ichi ɨrabai atade.

37Mamĩda Jesús golpe biaji mãikꞌaapa jai–idaaji. 38Mãɨmisa Jerusalende Tachi Akꞌõre te waibɨade chi edupɨara bɨ cuarto tꞌĩupatamãi pꞌaru teesoo eebai jira bada esajĩakꞌa jẽdachi ɨtꞌɨɨpa edaa. 39Jesús kꞌĩrapite akꞌɨ nɨ̃bada soldaorã poropa iru mãgá piu wã unukꞌãri, mãgaji:

—¡Wãara, na eperã Tachi Akꞌõre Warra paji!

40Tꞌɨmɨɨpapai ũkꞌuru wẽraarã pꞌanadapꞌedaarãpa akꞌɨ pꞌanajida: María Magdalena; María, Santiago (chi tꞌẽepema)#15.40 Santiago ichiaba tꞌɨ̃jarapachida Jacobo. mãikꞌaapa José nawe; ichiaba Salomé.#15.40 Salomé Zebedeo wẽra paji. 41Jesús Galilea eujãde nipakꞌãri, ma wẽraarãpa iru chi kꞌõpꞌãyoorã ome kꞌaripa nipapachida. Mama ichiaba wẽraarã chokꞌara pꞌanajida iru ome Jerusalendee chedapꞌedaarã.

Jesús ɨadapꞌedaa

(Mateo 27.57-61; Lucas 23.50-56; Juan 19.38-42)

42Ma ewate pꞌãriupodopa jõmaweda ne–inaa aupa jẽra baitꞌee paji ɨ̃ipata ewate pai naaweda.#15.42 Judiorã–itꞌee kꞌeudaikꞌãri, aɨ norema paji. 43José Arimatea pꞌuurudepema waawee–ee wãji Pilatomaa Jesús kꞌapꞌɨa piuda iidide ɨaitꞌee. Mãgɨ́ Junta Supremadepema paji mãikꞌaapa apemaarã judiorãpa iru pia akꞌɨpachida. Ma awara irua unu kꞌinia baji Tachi Kꞌaripaparipa ichita eperãarã pia akꞌɨpari. 44Pilatopa Jesús piuda kꞌawaakꞌãri, pꞌeraji isapai piuda perã. Mapa soldaorã poro tꞌɨ̃ ataji mãikꞌaapa iidiji:

—¿Wãara piujikꞌã? aji.

45Mãpai Jesús piu bɨda akꞌãri, Pilatopa teeji iru kꞌapꞌɨa Josemaa. 46Mãpai Josepa neto ataji pꞌaru lienzodee mãikꞌaapa Jesús kꞌapꞌɨa kurusodeepa ɨrabai atapꞌeda, aɨde pɨra bɨji. Maapꞌeda bɨnaji mãu te uria kꞌoro iru pꞌanadapꞌedaade mãikꞌaapa chi tꞌai tꞌapꞌa bëiji mãu choma bɨpa. 47María (José nawe), María Magdalena ome akꞌɨ pꞌanajida sãma ɨaruta.

Currently Selected:

Marcos 15: sjaB

Highlight

Copy