Marcos 16

Jesús chokꞌai pꞌirabaida

(Mateo 28.1-10; Lucas 24.1-12; Juan 20.1-10)

1Ɨ̃ipata ewate wãyaapꞌeda, pꞌãrikꞌua María Magdalena, María (Santiago nawe) mãikꞌaapa Salomepa neto atajida kꞌera Jesús kꞌapꞌɨade pꞌurudaitꞌee. 2Tomia ewate,#16.2 Ãchi–itꞌee tomia ewate naapema ewari paji. tapꞌeda weda akꞌõrejĩru uchiaruta wãjida iru kꞌapꞌɨa ɨadapꞌedaamaa. 3Pedee wãjida:

—¿Kꞌaipa ãyaa ata bɨyama ajida, mãu choma chi tꞌaide jɨ̃a bɨ?

4Mamĩda tꞌɨmɨ́ weda akꞌɨnadakꞌãri, unujida mãu pɨradai bɨ awara ãi. 5Mãu te uriade edú tꞌĩudakꞌãri, ununajida kꞌũtrãa su–akꞌɨ bɨ ãchi juaraare. Chi pꞌaru jɨ̃ bada tꞌo–tꞌoo teesoo baji. Mãgɨ́ ángel Tachi Akꞌõre truadepema paji. Ma wẽraarãpa mãga unudakꞌãri, pꞌeradachida. 6Mamĩda mãgɨpa mãgaji:

—Pꞌeranáatɨ. Parãpa jɨrɨ pꞌanɨ Jesús Nazaretdepema kurusode baijira bɨdapꞌedaa. ¡Iru nama wẽ–e! ¡Chokꞌai pꞌirabaijipɨ! Pɨchá, akꞌɨ chétɨ iru ɨadapꞌedaamãi. 7Wã́tɨ jarade Pedromaa ichiaba chi apemaarã kꞌõpꞌãyoorãmaa: “Iru wãitꞌee Galilea eujãdee parã naa. Mama iru unudaitꞌee irua jaradakꞌa.”

8Mãpai wẽraarã kꞌĩra kꞌawa–ee pɨkꞌadachida pꞌera jõnadapꞌedaa perã. Pꞌira uchiajida Jesús kꞌapꞌɨa ɨadapꞌedaamãiipa. Kꞌapꞌɨa wëree jõnajida waaweepa. Mapa maarepida pꞌoyaa jarada–e paji.

Jesupa María Magdalenamaa chokꞌai unupida

(Juan 20.11-18)

9[Tomia ewate Jesús chokꞌai pꞌirabaiji. Naapɨara unupiji María Magdalenamaa. Ma wẽra naaweda netuara siete merãtɨa baji ichi kꞌapꞌɨade. Mamĩda Jesupa jõmaweda ãyaa uchiapikꞌooji. 10Jesús unupꞌeda, María Magdalenapa jaranaji iru ome nipapatapꞌedaarãmaa. Ãra kꞌĩsia paraa jarajẽe pꞌanajida Jesús kꞌapꞌɨa–itꞌee. 11Mãga nɨde Mariapa jara cheji:

—¡Mɨa Jesús chokꞌai unujida! aji.

Mamĩda ãrapa mãga ũridakꞌãri, ijãada–e paji.

Jesupa awaraa kꞌõpꞌãyoorã omeemaa chokꞌai unupida

(Lucas 24.13-35)

12Tꞌẽepai, Jesupa kꞌĩra awara unupiji chi kꞌõpꞌãyoorã omeemaa ode nidade. 13Ãchia iru kꞌawa atadakꞌãri, aramata ãpɨtee nepɨrɨde wãjida apemaarãmaa. Mamĩda ãrapa pida ijãada–e paji.

Jesupa chi kꞌõpꞌãyoorãmaa chokꞌai unupida

(Mateo 18.16-20; Lucas 24.36-49; Juan 20.19-23)

14Tꞌẽepai, Jesupa chokꞌai unupiji chi kꞌõpꞌãyoorã oncemaa, nekꞌomaa pꞌanɨde. Iru chokꞌai bɨ pia ijãadakꞌaa paji kꞌɨɨrɨ kꞌisua pꞌanadapꞌedaa perã. Ma awara apemaarãpa mãga nepɨrɨdapꞌedaa jida ijãada–e paji. Mapa irua ikꞌɨ̃atɨ pedeeji. 15Ichiaba jaraji ãramaa:

—Wã́tɨ na pꞌekꞌau eujã eperãarã paraamaa mãikꞌaapa jaratéetɨ Tachi Akꞌõre pedee pia mɨa kꞌawapida parãmaa. 16Apidaapa ma ũraa chiwidide ijãa bɨ pɨrã, poro choopiipia bɨ kꞌawapiitꞌee mɨ ome araa bɨ. Mãgá ɨtꞌaa wãitꞌee ichi piukꞌãri. Jõdee mɨde ijãa–e pɨrã, tokꞌarradee mianaitꞌee ichia pꞌekꞌau kꞌachia ooda kꞌaurepa. 17Mɨde ijãa pꞌanɨɨrãpa oodakꞌãri ne–inaa eperãarãpa pꞌoyaa oodakꞌaa, awaraarãpa kꞌawaadaitꞌee Tachi Akꞌõre ãchi ome bɨ. Mɨ tꞌɨ̃de netuara uchiapidaitꞌee; awaraa pedee kꞌawada–e pꞌanɨ mĩda, Akꞌõre Jaurepa pedeepiitꞌee; 18taama kꞌachia jitadaitꞌee ãchi juapa; mãikꞌaapa neera kꞌachia todaitꞌee. Mamĩda mãgee ne–inaapa ãchi maarepida kꞌachia ooda–e paitꞌee. Jõdee ãchi juapa kꞌayaa beerã tꞌõbaidakꞌãri, kꞌayaa jɨpadaitꞌee.

Jesús Tachi Akꞌõre eujãdee wãda

(Lucas 24.50-53)

19Tachi Waibɨa Jesús pedeepꞌeda chi kꞌõpꞌãyoorã ome, Tachi Akꞌõrepa iru ɨtꞌaa ateeji ichi eujãdee. Mama su–akꞌɨ beeji Akꞌõre juaraare, ijãapataarã poro waibɨa perã. 20Mãpai chi kꞌõpꞌãyoorãpa Akꞌõre Ũraa chiwidi o–ĩa jarateenajida awara ãi eperãarã paraamaa. Jesupa ne–inaa pia oopachi ãchi kꞌapꞌɨa pari. Mãgá ãchia ne–inaa eperãarãpa oodakꞌaa oodakꞌãri, awaraarãpa kꞌawaajida Jesús ũraa wãara.]

Currently Selected:

Marcos 16: sjaB

Highlight

Copy